“Abis,” Ol Stori blong Buk blong Momon (2023)
Abis
Stap helpem ol pipol blong hem blong biliv long Jisas
Abis i wok blong wan kwin we i wan Woman blong Leman. Abis i bin lanem abaot Jisas Kraes long wan visen blong papa blong hem. Blong plante yia, hem i bin biliv long Jisas mo i wantem blong folem Hem. Be hem i no bin talem long ol nara Man blong Leman yet.
Wan dei, wan man blong Nifae we nem blong hem Amon, i bin kam long kingdom blong tijim Ol Man blong Leman abaot Jisas mo God. Kwin mo king tufala i bin bilivim wanem we Amon i bin tijim. Kwin mo king i save se Jisas bae i kam long wol blong mekem se evriwan we i biliv long Hem i save kasem fogivnes.
Alma 17:12–13; 18:33–36, 39–40; 19:9, 13
Kwin mo king i bin filim Tabu Spirit mo oli hapi tumas mekem se oli foldaon long graon. Amon mo ol wokman blong hem tu oli foldaon. Abis hemwan nomo i stap stanap.
Abis i wantem blong talem long ol pipol abaot merikel ia. Hem i hop se bae ol pipol oli biliv long paoa blong God taem bae oli luk wanem i bin hapen. Mekem se Abis i ron i go long wan haos afta narawan. Hem i talem long ol pipol blong go luk wanem we God i bin mekem long kwin mo king.
Plante pipol oli kam long haos blong kwin mo king. Oli sapraes from i luk olsem se kwin, king mo ol wokman blong tufala oli ded.
Ol pipol oli konfius. Oli rao abaot wanem i bin hapen long kwin mo king.
Taem Abis i kambak, hem i luk ol pipol oli stap rao. Hem i no hapi from se ol pipol ia oli no luk paoa blong God. Afta hem i tekem han blong kwin, mo kwin i stanap mo i presem Jisas.
Kwin i tekem han blong hasban blong hem, mo hem i stanap. King i talem long ol pipol abaot Jisas. Afta Amon mo ol nara wokman oli stanap tu. Olgeta evriwan oli talem long ol pipol se Jisas i bin jenisim olgeta. Naoia oli wantem blong mekem ol gudfala samting nomo. Plante pipol oli bin bilivim olgeta.
Olsem we Abis i bin hop from, ol pipol oli luk paoa blong God. Plante pipol oli biliv long Jisas mo oli bin kasem baptaes. Oli gat Spirit blong God i stap wetem olgeta. Oli stanemap tu, wan Jos long graon blong olgeta. Oli luk se Jisas i helpem eniwan we i sakem sin mo biliv long Hem.