“Ol Olif Tri,” Ol Stori blong Buk blong Momon (2023)
Ol Olif Tri
Lav blong God long ol pipol blong Hem
Jekob i bin wan profet blong God. Hem i bin wantem blong tijim Ol Man blong Nifae abaot hamas God i lavem ol pipol blong Hem. Jekob i talem wan stori abaot wan plantesen blong ol olif tri. Lod blong plantesen mo ol wokman blong Hem oli wok tugeta blong lukaot long plantesen.
Lod ia i bin gat wan spesel olif tri we i stap karem ol gudfala frut. Jekob i talem se tri ia i olsem ol pipol blong God, o haos blong Isrel. Ol frut oli ol aksen blong ol pipol. Lod ia i bin lukaotgud long tri ia. Hem i helpem tri ia blong gro taem hem i stap fidim ol rus blong hem mo stap katem klinim ol branj blong hem. Hem i givim wanem we tri ia i nidim blong laef.
Afta long sam taem, spesel tri blong Hem i stat blong ded. I gat smol branj nomo we oli helti. Hemia i mekem Lod i harem nogud. Hem i wantem blong tri ia i gohed blong gro mo karem ol gud frut.
Blong sevem ol helti branj, Lod i mas karemaot olgeta mo joenem long ol nara tri. Afta Hem i putum ol helti branj blong ol nara tri i go long spesel tri ia.
Wan longfala taem i pas. Lod mo wokman oli kam plante taem long plantesen. Oli lukaotgud long spesel tri blong Lod. Oli lukaotgud tu long ol spesel branj we oli seraotem long evri nara tri long plantesen. Plante long ol frut we oli gro oli bin gud. Gudfala frut i mekem Lod mo wokman blong Hem oli hapi.
Afta long sam taem, wanwan long ol tri ia oli karem moa frut. Be naoia evri frut oli nogud. Lod i harem nogud tumas. Hem i no wantem lusum plantesen blong Hem o !ol frut blong ol tri! Hem i bin wokhad blong helpem ol tri blong Hem. Hem i tingting se wanem moa Hem i save mekem. Hem i toktok wetem wokman mo jusum blong gohed blong traem.
Blong sevem plantesen blong Hem, Lod i talem blong oli karem tugeta ol branj we Hem i bin karemaot long spesel tri. Hem i talem blong oli joenembak long spesel tri ia bakegen.
Hemia i las taem we bae Lod i wok long plantesen blong Hem. Hem i singaotem ol nara wokman blong oli help. Evriwan i wok tugeta blong karem tugeta mo joenem ol branj.
Oli lukaotgud long evri tri. Oli karemaot ol nogud branj mo holemtaet ol gud wan. Afta long sam taem, spesel tri blong Lod i karem ol gudfala frut bakegen. Ol nara tri oli karem ol frut tu we oli gud semmak long frut blong spesel tri ia. Lod i bin hapi. !Hem i sevem ol tri blong Hem! Olgeta evriwan oli karem ol frut we Hem wantem olgeta blong gat.
Lod i talem tangkyu long ol wokman. Hem i talem long olgeta se bae oli kasem blesing blong stap wokhad mo stap obei ol komanmen blong Hem. Hem i bin serem frut ia wetem olgeta, mo i bin mekem olgeta oli glad tumas. Blong wan longfala taem, Lod i stap glad long frut.
Jekob i finisim stori blong ol olif tri. Hem i tijim ol pipol se God i kea long olgeta semmak long Lod blong plantesen we i lukaotgud long ol tri blong Hem. Jekob i askem evriwan blong sakem sin mo kam moa kolosap long God. Hem i tijim olgeta blong lavem mo givim seves long God from se oltaem, God i stap go long olgeta blong helpem olgeta.