“Taetol blong Fridom,” Ol Stori blong Buk blong Momon (2023)
Taetol blong Fridom
Stap stanap from raet ia blong biliv long God
Amalekaea i wan bigfala, strong Man blong Nifae. Hem i wantem blong kam king. Hem i promes blong givim paoa long ol pipol we oli wantem blong helpem hem. Plante pipol oli laekem hem mo oli traem blong mekem ol narawan oli folem hem. Amalekaea i lidim ol pipol blong mekem ol nogud samting. Hem mo olgeta we oli folem hem oli wantem blong kilimded ol pipol we oli tij abaot Jisas Kraes.
Kapten Moronae, we i lida blong ol ami blong Ol Man blong Nifae, oli biliv long Jisas. Hem i save se Ol Man blong Nifae oli gat blesing from se oli stap obei long ol komanmen blong God. Hem i kros tumas se Amalekaea i stap lidim ol pipol i gowe long God, i stap traem blong kam king, mo i stap traem blong mekem nogud long ol pipol.
Moronae i terem kot blong hem. Hem i raet long hem se ol pipol oli mas tingbaot God blong olgeta, fridom blong olgeta, mo ol famli blong olgeta. Afta hem i fasem i go long wan longfala stik mo i singaotem se hem i taetol blong fridom Moronae i prea from blesing blong God. Hem i soem taetol blong fridom long Ol Man blong Nifae mo i askem olgeta blong joenem hem blong faet agensem Amalekaea.
Ol pipol oli werem klos blong faet blong olgeta mo oli ron i go long Moronae. Oli rere blong faet from God mo ol hom blong olgeta, ol famli mo fridom blong olgeta. Oli mekem wan kavenan, o wan spesel promes, wetem God se bae oltaem oli folem Hem. Afta oli rere blong faet agensem Amalekaea.
Ami blong Moronae i bigwan. Amalekaea i bin fraet. Hem i traem blong ronwe wetem olgeta we oli stap folem hem. Be plante long olgeta oli bin wari se Amalekaea i stap faet from ol rong risen. Plante oli nomo wantem folem hem bakegen. Ami blong Moronae i stopem olgeta we oli gohed blong folem Amalekaea, be Amalekaea mo sam narawan oli ronwe.
Amalekaea i go long graon blong Ol Man blong Leman. Hem i wantem Ol Man blong Leman blong helpem hem blong faet agensem Ol Man blong Nifae. Mekem se bae hem i save gat wan ami we i moa bigwan mo moa strong. Hem i mekem plante long Ol Man blong Leman oli kros long Ol Man blong Nifae. King blong Ol Man blong Leman i talem long evri man blong hem blong oli rere blong faet agensem Ol Man blong Nifae.
King i laekem Amalekaea. Hem i mekem Amalekaea i kam wan long ol lida blong ami blong Ol Man blong Leman. Be Amalekaea i wantem moa paoa.
Amalekaea i mekem wan plan blong rul ova long Ol Man blong Leman. Hem i tekova long ful ami blong Ol Man blong Leman. Afta hem i mekem ol wokman blong hem oli kilim ded king mo giaman abaot huia i kilim ded king.
Amalekaea i priten blong kros from se oli bin kilim ded king. Ol Man blong Leman oli laekem Amalekaea. Hem i maredem kwin mo i kam niufala king. Hem i wantem blong rul ova Ol Man blong Nifae tu. Hem i tokbaot nogud Ol Man blong Nifae mekem se Ol Man blong Leman bae oli kros long olgeta. I no long taem, plante long Ol Man blong Leman oli wantem blong faetem Ol Man blong Nifae.
Taem Amalekaea i stap karem paoa tru long giaman, Moronae i bin rere long Ol Man blong Nifae blong oli trastem God. Hem i putum taetol blong fridom long evri taoa long graon blong rimaenem olgeta abaot promes blong olgeta. Ol ami blong Moronae oli rere tu long ol siti blong Ol Man blong Nifae from wo. Oli bildim ol wol mo oli digim ol bigfala hol raon blong mekem ol siti oli sef mo strong.
Taem Ol Man blong Leman oli kam blong faet, oli no save go insaed long ol siti blong Ol Man blong Nifae. Ol wol mo hol we ol ami blong Moronae oli bildim, oli stopem olgeta blong go insaed. Plante long Ol Man blong Leman oli ded taem oli faet agensem Ol Man blong Nifae. Amalekaea i kros tumas. Hem i promes blong kilim ded Moronae.
O Man blong Nifae oli talem tangkyu long God blong stap helpem mo protektem olgeta. Oli mekem ol siti blong olgeta i kam moa sef mo oli bildim sam moa siti. Wo wetem blong Ol Man blong Leman i gohed, be God i helpem Moronae mo ol ami blong hem blong kipim Ol Man blong Nifae oli sef. Ol Man blong Nifae oli hapi. Oli obei long God mo gohed blong stap fetful long Hem.