“Fet blong Wan Kwin,” Ol Stori blong Buk blong Momon (2023)
“Fet blong Wan Kwin,” Ol Stori blong Buk blong Momon
Fet blong Wan Kwin
Stap faenem glad long Jisas Kraes
Wan kwin blong Ol Man blong Leman, i rul wetem hasban blong hem, King Lamonae. King i bin askem wan Man blong Nifae we nem blong Amon, blong tijim hem abaot Lod. King i bin bilivim wantem we Amon i bin talem long hem. King i nildaon blong prea mo askem Lod blong i fogivim hem. Taem hem i stap prea, king i foldaon i go long graon. I luk olsem se hem i ded.
Ol wokman blong king oli karem hem i go long kwin. Oli putum hem long bed blong hem. Hem i silip i stap mo i no save muv blong tu dei mo tu naet.
Long taem ia, kwin mo ol pikinini blong hem oli harem nogud tumas. Oli stap wetem king mo oli krae from hem. Sam pipol oli stap talem se oli mas berem king. Be kwin i wantem blong toktok long Amon fastaem. Hem i harem se Amon i gat paoa blong God. Wokman blong kwin i askem Amon blong kam luk kwin.
Kwin i talem long Amon se hem i bin harem se Amon i wan profet blong God. Hem i askem Amon blong go luk king. Amon i save se king hem i laef i stap. Hem i paoa blong God we i mekem king i silip i stap. Amon i talem long kwin se hasban blong hem bae i girap bakegen long nekis dei.
Kwin i bin trastem Amon mo i gat bigfala fet long God. Hem i bin bilivim se hasban blong hem bae i girap bakegen long nekis dei. Amon i talem se kwin i kasem blesing from bigfala fet blong hem. Hem i talem long kwin se kwin i gat moa fet bitim ol pipol blong hem. Kwin i stap kolosap mo i lukaot long hasban blong hem ful naet.
Long nekis dei, king i wekap. Hem i talem long kwin se hem i bin luk Jisas Kraes. Kwin mo king tufala i save hamas Jisas i lavem olgeta, mo oli fulap long glad.