“Abinadae mo King Noa,” Ol Stori blong Buk blong Momon (2023)
Abinadae mo King Noa
Wan mesej we i kam long wan profet
King Noa i rul ova long ol man blong Nifae we oli stap laef long graon blong Nifae. Noa i mekem ol pipol blong hem oli givim plante mane long hem mo hem i yusum blong pem ol naes samting blong hemwan nomo. Hem i singaotem ol pris we oli fulap long hae tingting, blong helpem hem blong rul ova long ol pipol. Noa i no kipim ol komanmen blong God. Be, hem i mekem plante nogud samting.
Noa i lidim ol pipol blong hem blong oli mekem ol nogud fasin tu. Oli no bin folem Lod.
Wan profet blong God we nem blong hem Abinadae i stap long graon ia. Lod i bin sendem Abinadae blong talem long Noa mo ol pipol blong hem blong oli sakem sin.
Abinadae i bin talem long ol pipol se Lod i wantem olgeta blong oli sakem sin. Sapos oli no sakem sin, bae Lod i letem ol enemi oli kam long graon blong olgeta mo rul ova long olgeta. Ol enemi blong olgeta bae oli mekem laef blong Noa mo ol pipol blong hem i had tumas.
Ol pipol oli kros long Abinadae from wanem we hem i bin talem. Oli wantem blong kilimded hem, be Lod i bin kipim Abinadae i stap sef mo helpem hem blong ronwe.
Noa i wantem blong kilimded Abinadae tu. Noa i no biliv long Lod. Hem mo ol pipol blong hem oli no bin sakem sin.
Tu yia afta, Lod i sendem Abinadae i gobak blong givim woning long ol pipol. Abinadae i talem long ol pipol se enemi blong olgeta bae oli karemaot graon blong olgeta from oli no sakem sin. Ol pipol oli kros long Abinadae. Oli talem se oli no mekem wan samting i rong mo bae oli no sakem sin. Oli fasem Abinadae mo karem hem i go long Noa.
Noa mo ol pris blong hem oli mekem wan plan. Ol pris oli traem blong trikim Abinadae mo askem fulap kwestin long hem. Be Abinadae i no bin fraet mo i ansarem olgeta. Ol pris oli bin sapraes long ol ansa blong Abinadae. Oli no save trikim hem. Abinadae i talem long ol pris se oli wari moa long mane bitim blong stap mekem wanem we i stret.
Noa i talem long ol pris blong hem blong kilimded Abinadae. Be Abinadae i givim woning long olgeta blong no tajem hem. Fes blong hem i saen wetem paoa blong God. Abinadae i talem se ol pris oli no bin tijim ol loa blong God. Abinadae i tijim olgeta se Jisas Kraes bae i bon i kam long wol, bae i ded from yumi, mo bae i laef bakegen long ded. Hem i bin talem se Jisas bae i fogivim olgeta sapos oli sakem sin.
Abinadae i finisim mesej we Lod i bin sendem hem blong givimaot. Noa i kros yet. Hem i talem long ol pris blong hem blong karem Abinadae mo kilim hem i ded.
Wan pris, we nem blong hem Alma, i bin bilivim Abinadae. Alma i traem blong sevem Abinadae. Be naoia Noa i kros long Alma tu mo i fosem hem blong aot.
Ol pris oli talem long Abinadae se hem i save laef sapos hem i talem se ol samting we hem i tijim, oli no tru. Be Abinadae i talem se hem i bin tijim trutok. Noa mo ol pris blong hem oli kros bakegen. Oli putum Abinadae long faea blong hem i ded. Ol bodi gad blong Noa oli traem blong kilim Alma tu. Be Alma i haed mo i raetemdaon evri toktok blong Abinadae.