“Tiankum,” Ol Stori blong Buk blong Momon (2023)
Tiankum
Stap protektem ol pipol blong hem
Tiankum i wan lida long ami blong Kapten Moronae. Hem i stap traem blong kipim ol siti blong Ol Man blong Nifae oli sef aot long Ol Man blong Leman.
Amalekaea i wan man blong Nifae we i bin kam king blong Ol Man blong Leman. Hem i wantem blong rul ova long Ol Man blong Nifae tu. Hem i faet agensem Ol Man blong Nifae mo i tekova long plante siti.
Alma 47:1, 35; 48:1–4; 51:23–28
Ami blong Tiankum oli go blong stopem ami blong Amalekaea blong oli no atakem ol siti blong Ol Man blong Nifae.
Ol ami oli faet blong wan ful dei. Tiankum mo ami blong hem oli faet wetem plante moa paoa mo skil bitim ami blong Amalekaea. Be nogat wan ami i win. Taem tudak i kam, tugeta ami i stop blong faet blong mekem se oli save spel.
Alma 51:31—32
Be Tiankum i no spel. Hem mo wokman blong hem, tufala i haed mo tufala i go long kamp blong Amalekaea.
Tiankum i haed i go insaed long tenet blong Amalekaea. Hem i kilim ded Amalekaea bifo Amalekaea i wantem girap. Afta Tiankum i gobak long kamp blong hem mo talem long ol soldia blong hem blong oli rere blong faet.
Taem Ol Man blong Leman oli wekap, oli faenem se Amalekaea i ded. Oli luk tu se Tiankum mo ami blong hem oli rere blong faetem olgeta.
Ol Man blong Leman oli bin fraet mo oli ronwe. Plan blong Tiankum i mekem Ol Man blong Leman oli fraet tumas blong faet agensem ol siti blong Nifae. Naoia Tiankum i gat taem blong mekem ol siti blong Nifae oli moa sef. Hem i wok had blong protektem ol pipol blong hem. Hem i bin save kipim plante siti blong Ol Man blong Nifae oli stap sef.