“Alma mo Koriho,” Ol Stori blong Buk blong Momon (2023)
Alma mo Koriho
Fet se God i tru
Wan man we nem blong hem Koriho i kam long graon blong Sarahemla. Hem i talem long ol pipol se God mo Jisas Kraes oli no tru.
Koriho i talem se ol pipol bae oli save samting sapos nomo we oli luk. Hem i jikim ol pipol we oli biliv long Jisas.
Koriho i talem long ol pipol se oli no nidim ol komanmen blong God. Hem i talem long ol pipol se oli save mekem eni samting we oli wantem blong mekem. Plante pipol oli bilivim hem. Oli disaed blong mekem ol nogud samting.
Koriho i traem blong tijim Ol Antae-Nifae-Lihae, be oli no bilivim hem. Oli bin fasem hem mo sendemaot hem. Afta hem i go long graon blong Gidion. Ol pipol long we oli fasem hem tu. Oli sendem hem i go long Alma.
Koriho i talem long Alma se God i no tru. Hem i talem se Alma mo ol nara pris oli stap giaman long ol pipol. Koriho i talem se oli stap mekem ol pipol oli folem ol krangke kastom. Hem i talem tu se oli stap karem mane aot long ol pipol. Alma i save se hemia i no tru. Hem i biliv long God mo Jisas.
Alma i talem se ol profet mo evri samting we i stap long wol, oli helpem ol pipol blong save se God i tru. Koriho i wantem sam moa pruf. Alma i talem se bae hem i givim pruf long Koriho. Hem i talem se bae God i mekem se Koriho bae i nomo save toktok. Taem Alma i talem hemia nomo, Koriho i nomo save toktok.
Koriho i raetem se hem i save se God i tru. Oltaem hem i bin save hemia. Hem i raetem se devel i bin trikim hem. Devel i talem long Koriho blong tijim ol giaman samting abaot God mo Jisas. Taem ol pipol oli lanem trutok abaot Koriho, oli no bilivim ol tijing blong hem. Oli sakem sin mo stat blong folem Jisas bakegen.