“King Noa mo King Limhae,” Ol Stori blong Buk blong Momon (2023)
King Noa mo King Limhae
Oli Ronwe long Ol Man blong Leman
King Noa i rul ova long wan grup blong ol man blong Nifae. Hem i bin mekem plante nogud samting, mo sam pipol oli bin kros long hem. Wan man we nem blong hem Gidion, i faetem Noa wetem wan naef blong faet. Noa i ronwe mo i klaem long wan taoa. Antap long taoa, hem i luk wan ami blong ol man blong Ol Man blong Leman oli stap kam. Noa i giaman mo i mekem olsem se hem i fraet from ol pipol blong hem mekem se Gidion i lego hem i laef.
Noa mo ol pipol blong hem oli ronwe. Be Ol Man blong Leman oli ronem olgeta mo stat blong kilim olgeta. Noa i talem long ol man blong lego ol famli blong olgeta i stap mo go wetem hem.
Sam man oli aot wetem Noa. Be plante long ol man oli jusum blong stap wetem ol famli blong olgeta. Boe blong Noa tu i jusum blong stap.
Plante long ol gel oli stanap long fored blong ol ami mo askem Ol Man blong Leman blong no mekem nogud long ol famli blong olgeta. Ol Man blong Leman oli lisin long ol gel ia mo oli lego Ol Man blong Nifae ia oli laef. Be, Ol Man blong Leman oli girap oli holemtaet Ol Man blong Nifae.
Ol man we oli bin ronwe oli wantem blong gobak long ol famli blong olgeta. Noa i traem blong stopem olgeta mekem se ol man ia oli kilim ded Noa. Mo afta oli bin gobak long ol famli blong olgeta.
Ol man ia oli hapi tumas se famli blong olgeta oli sef. Oli talem long Gidion wanem we i bin hapen wetem Noa.
Ol pipol oli jusum Limhae blong i kam niufala king blong olgeta. Limhae i promesem king blong Ol Man blong Leman se bae oli pem haf blong evri samting we oli gat i go long Ol Man blong Leman. Afta, king blong Ol Man blong Leman i mekem promes se bae hem i no mekem nogud long ol pipol blong Limhae.
Oli bin laef long pis blong sam yia. Afta Ol Man blong Leman oli stat blong tritim nogud ol pipol blong Limhae. Ol pipol oli wantem fri bakegen. Oli traem blong faet agensem Ol Man blong Leman, be oli lus. Ol pipol oli prea from help long God.
Wan dei, wan Man blong Nifae we nem blong hem Amon, i visitim Limhae mo ol pipol blong hem. Amon i blong wan graon we oli singaotem Sarahemla. Limhae i glad tumas blong luk Amon.
Amon i save lidim ol pipol blong Limhae i go long Sarahemla, be oli mas ronwe long Ol Man blong Leman fastaem. Gidion i mekem wan plan.
Long naet, Gidion i givim ekstra waen long ol soldia blong Ol Man blong Leman blong mekem se oli silip. Taem ol soldia oli stap silip, Limha mo evri pipol blong hem oli ronwe long siti.
Oli bin go long Sarahemla mo joenem Ol Man blong Nifae long we. Limhae mo ol pipol blong hem oli lanem moa abaot God. Oli bin mekem wan kavenan, o wan spesel promes, blong givim seves long God mo obei long ol komanmen blong Hem. Oli kasem baptaes mo kam pat blong Jos Ia blong God. Oli tingbaot se God i bin helpem olgeta blong ronwe long Ol Man blong Leman.