Գլուխ 18
Ալմա Կրտսերը ապաշխարում է
Մոսիա թագավորը Ալմային նշանակեց Զարահեմլայի Եկեղեցու ղեկավար։ Այնուհետև Ալման ընտրեց մեկ ուրիշ տղամարդու, որպեսզի օգներ իրեն ուսուցանել Նեփիացիներին:
Ալման և Մոսիա թագավորը անհանգստացած էին, քանի որ անհավատները ստիպում էին Եկեղեցու անդամներին տառապել իրենց հավատի համար։
Ալման որդի ուներ Ալմա անունով։ Ալմա Կրտսերը չէր հավատում իր հոր ուսմունքներին և դարձավ ամբարիշտ մարդ։
Ալմա Կրտսերը և Մոսիայի չորս որդիները սկսեցին պայքարել Եկեղեցու դեմ։ Նրանք շատերին համոզեցին հեռանալ Եկեղեցուց և դառնալ ամբարիշտ։
Ալման աղոթեց, որ իր որդին ճանաչեր ճշմարտությունը և ապաշխարեր։
Ալմա Կրտսերը և Մոսիա թագավորի չորս որդիները շարունակում էին կործանել Եկեղեցին։
Մի օր մի հրեշտակ հայտնվեց նրանց: Հրեշտակը խոսեց այնպիսի բարձր ձայնով, որ գետինը ցնցվեց։
Հինգ երիտասարդները վախից ընկան գետնին։ Սկզբում նրանք չէին հասկանում, թե ինչ էր ասում հրեշտակը:
Հրեշտակը եկել էր ի պատասխան Եկեղեցու անդամների աղոթքների։ Հրեշտակը հարցրեց Ալմա Կրտսերին, թե ինչու էր նա պայքարում Եկեղեցու դեմ։
Գետինը նորից ցնցվեց, երբ հրեշտակը պատվիրեց Ալմա Կրտսերին դադարեել հետապնդել Եկեղեցին։
Ալմա Կրտսերը և Մոսիայի որդիները նորից վայր ընկան։ Նրանք տեսել էին հրեշտակին և հասկացել էին, որ գետինը ցնցվում էր Աստծո զորությամբ։
Ալմա Կրտսերը այնքան զարմացած էր, որ չէր կարողանում խոսել։ Նա այնքան թուլացած էր, որ չէր կարողանում շարժել անգամ ձեռքերը։
Մոսիայի որդիները տարան Ալմա Կրտսերին նրա հոր մոտ և պատմեցին այն ամենը, ինչ պատահել էր իրենց հետ։
Ալման ուրախ էր։ Նա գիտեր, որ Աստված պատասխանեց իր աղոթքներին։
Ալման հավաքեց իր ժողովրդին, որպեսզի տեսնեին, թե ինչ էր Տերն արել իր որդու և Մոսիայի որդիների համար:
Եկեղեցու մյուս ղեկավարների հետ միասին Ալման ծոմ պահեց և աղոթեց, խնդրելով Աստծուն օգնել Ալմա Կրտսերին նորից ոտքի կանգնել։
Երկու օր ու գիշեր անց Ալմա Կրտսերը կարողացավ խոսել և շարժվել։
Նա ասաց մարդկանց, որ ապաշխարել է իր մեղքերի համար և Աստված ներել է իրեն։
Նա սկսեց ուսուցանել, որ Աստծո արքայություն մտնելու համար պետք է արդարակյաց դառնալ։ Նա պատմեց նաև այն մեծ տանջանքի մասին, որը կրել էր իր մեղքերի պատճառով:
Ալմա Կրտսերը երջանիկ էր, որովհետև ապաշխարել էր իր մեղքերի համար, և Աստված ներել էր իրեն։ Նա գիտեր, որ Աստված սիրում է իրեն։
Ալմա Կրտսերը և Մոսիա թագավորի որդիները սկսեցին ամբողջ երկրով մեկ ուսուցանել ճշմարտությունը, բոլորին պատմելով այն ամենը, ինչ տեսել և լսել էին։
Նրանք փորձում էին ուղղել իրենց սխալների հետևանքները։ Նրանք մարդկանց բացատրում էին սուրբ գրությունները և ուսուցանում էին Հիսուս Քրիստոսի մասին։
Աստված օրհնում էր Ալմա Կրտսերին և Մոսիայի որդիներին, մինչ նրանք ուսուցանում էին ավետարանը։ Շատերը լսեցին և հավատացին նրանց։