“Daniel ug ang Damgo sa Hari,” Mga Istorya sa Daang Tugon (2022)
“Daniel ug ang Damgo sa Hari,” Mga Istorya sa Daang Tugon
Daniel 2
Daniel ug ang Damgo sa Hari
Misteryosong mensahe sa Dios ngadto sa usa ka hari
Ang hari sa Babilonia adunay damgo nga nakasamok kaniya. Namugos siya nga ang iyang mga pari ug maalamong mga tawo mosulti kaniya unsay kahulugan sa damgo.
Ang hari dili mosulti kanila sa damgo. Miingon siya nga kon ang mga pari ug ang maalamong mga tawo sa tinuod adunay gahum, sila makasulti kaniya unsa ang damgo ug unsa ang kahulugan niini.
Ang mga pari ug ang maalamong mga tawo misulti sa hari nga sila dili makahubad sa iyang damgo kon siya dili mosulti kanila kon unsa ang damgo. Miingon sila nga walay tawo nga makahimo niana. Nasuko ang hari ug miingon nga iyang patyon ang tanang maalamon nga mga tawo sa gingharian, lakip si Daniel ug ang iyang mga higala.
Sa dihang ang tigbantay sa hari miabut sa pagkuha ni Daniel ug sa iyang mga higala, nangayo si Daniel og dugang pa nga panahon aron siya makasulti sa hari unsa ang kahulugan sa iyang damgo. Nahibalo siya nga ang Ginoo nasayud ug nakakita sa tanan, bisan sa mga damgo. Si Daniel mihangyo sa iyang mga higala sa pag-ampo uban kaniya.
Gipakita sa Ginoo kang Daniel ang damgo sa hari diha sa usa ka panan-awon ug gitudloan si Daniel unsa ang kahulugan niini. Gipasalamatan ni Daniel ang Ginoo sa pagtubag sa mga pag-ampo niya ug sa iyang mga higala ug sa pagluwas sa ilang mga kinabuhi. Dayon miadto siya sa pagsulti sa hari sa kahulugan sa damgo.
Miingon si Daniel nga ang damgo sa hari mahitungod sa usa ka higanting estatuwa nga giguba pinaagi sa usa ka bato nga gisapsap gikan sa usa ka bukid. Ang estatuwa mirepresentar sa mga gingharian sa yuta. Ang bato nga gisapsap gikan sa bukid mirepresentar sa gingharian sa Dios nga mopuno sa yuta. Ang hari nahibalo nga si Daniel misulti sa kamatuoran.