“David ug Goliath,” Mga Istorya sa Daang Tugon (2022)
“David and Goliath,” Mga Istorya sa Daang Tugon
1 Samuel 17
David ug Goliath
Nag-atubang og dako kaayo nga hagit
Ang mga Filistehanon nag-atake sa mga Israelihanon. Matag buntag usa ka higanting Filistehanon nga gihinganlan og Goliath mihagit ni bisan kinsa nga Israelihanon sa pagpakig-away kaniya. Si Goliath mas dako ug mas taas kay ni bisan kinsa pa, ug siya mabangis. Gisul-ob niya ang baga nga taming ug nagdala og espada, bangkaw, ug dako nga kalasag. Walay usa nga nangahas sa pagpakig-away kaniya.
Si David usa ka batan-ong lalaki nga magbalantay sa mga karnero kinsa adunay hugot nga pagtuo sa Ginoo. Ang iyang magulang nga igsoong mga lalaki mga sundalo sa kasundalohan sa Israel. Usa ka adlaw niana, midala og mga pagkaon si David sa iyang igsoong mga lalaki. Sa dihang siya miabut sa kampo sa mga kasundalohan, nadungog niya ang hagit ni Goliath.
Nangutana si David sa mga sundalo nganong walay usa nga mipanalipod sa Israel. Nasuko ang iyang igsoong mga lalaki ug gisultihan siya paglakaw aron bantayan ang iyang mga karnero. Apan nahibalo si David nga ang Ginoo mopanalipod sa Israel.
Si Hari Saul nahibalo mahitungod sa pagtuo ni David, busa mihangyo siya nga makigkita ni David. Gisultihan ni David si Saul nga siya dili mahadlok nga makig-away ni Goliath. Mipasabut si David nga kausa sa dihang siya nagbantay sa iyang karnero, nakapatay siya og leon ug uso. Ang Ginoo mipanalipod kaniya kaniadto, ug nahibalo si David nga ang Ginoo mopanalipod kaniya karon.
Gihatag ni Saul kang David ang iyang taming. Apan wala kini mohaum, busa gihubo kini ni David. Mihukom siya sa pagpakig-away nga walay taming.
Mikuha si David og lima ka mahinlo nga mga bato ug gibutang kini sa usa ka puntil. Gikuha niya ang iyang lambuyog [tirador] ug ang sungkod sa magbalantay sa karnero ug miadto sa pakig-away ni Goliath.
Sa dihang nakita ni Goliath si David, misinggit siya ug mibugal-bugal kaniya. Miingon siya nga ang usa ka magbalantay sa karnero nga batang lalaki dili makapilde kaniya. Misinggit og balik si David nga siya misalig sa Ginoo sa pagpanalipod kaniya! Miingon si David nga pildihon niya si Goliath aron sa pagpakita sa kagamhanan sa Ginoo.
Si David midagan padulong ni Goliath. Dali niyang gilabay ang bato gamit ang iyang lambuyog. Ang bato miigo ni Goliath diha sa agtang ug ang higanting tawo natumba sa yuta. Gitabangan si David sa Ginoo sa pagpilde ni Goliath nga walay espada o taming.
Sa dihang nakakita ang mga Filistehanon nga namatay si Goliath, nanagan sila sa kahadlok. Midaug ang mga Israelihanon sa gubat. Misalig si David sa Ginoo, ug ang Ginoo mipanalipod sa Israel.