“Job,” Mga Istorya sa Daang Tugon (2021)
“Job,” Mga Istorya sa Daang Tugon
Job 1–3; 19; 38–42
Job
Pagsalig sa gugma sa Ginoo
Si Job usa ka maayong tawo kinsa nahigugma sa Ginoo ug misunod sa Iyang mga sugo. Siya ug ang iyang asawa adunay 10 ka anak, ug siya adunay daghang panon sa mga hayop ug dagkong katigayonan.
Ang Ginoo mitugot nga ang hugot nga pagtuo ni Job pagasulayan. Si Job nakasinati og malisod nga mga butang.
Usa ka adlaw niana daghan sa mga hayop ni Job gipangkawat. Wala madugay usa ka kalayo misunog sa tanan nga kabtangan ni Job ug mipatay sa tanan niyang mga sulugoon ug sa ubang mga kahayopan. Dayon usa ka unos mitumba sa balay sa anak nga lalaki ni Job. Ang mga anak ni Job didto sa sulod, ug silang tanan namatay. Walay nahibilin ni Job ug sa iyang asawa gawas sa ilang panglawas.
Si Job ug ang iyang asawa naguol. Nawala kanila ang tanan, bisan ang ilang mga anak. Apan si Job sa gihapon adunay hugot nga pagtuo sa Ginoo. Wala niya basola ang Ginoo sa unsay nahitabo.
Unya si Job nahimong masakiton kaayo. Sakit nga mga hubag miputos sa iyang lawas. Natingala si Job ug ang iyang asawa nganong tanan niini nga mga butang nanagpanghitabo.
Ang Ginoo misulti ngadto ni Job ug mipakita kaniya sa yuta, sa mga bitoon, ug sa tanang buhi nga mga butang. Gitudloan sa Ginoo si Job og usa ka importanteng leksiyon. Ang tanan nga butang gilalang aron sa pagtabang sa mga anak sa Langitnong Amahan nga makakat-on mahitungod sa Iyang Anak nga si Jesukristo ug sa pagsunod Kaniya.
Si Job naghinulsol ug mihangyo sa Ginoo nga pasayloon siya tungod sa pagduhaduha. Misaad siya nga mosalig sa Ginoo. Ang Ginoo nahibalo nga si Job nahigugma Kaniya. Giayo Niya si Job ug gipanalanginan siya og dugang nga mga anak ug doble nga gidaghanon sa katigayonan nga anaa kaniya kaniadto.