“Moises sa Bukid sa Sinai,” Mga Istorya sa Daang Tugon (2022)
“Moises sa Bukid sa Sinai,” Mga Istorya sa Daang Tugon
Exodo 19–20; 24; 31–34; Deuteronomio 4–7
Moises sa Bukid sa Sinai
Nagtabang sa mga tawo nga mahinumdom sa Ginoo
Moises ug ang mga Israelita mibiyahe latas sa kamingawan. Nangadto sila sa usa ka bukid nga gitawag og Bukid sa Sinai.
Mitungas si Moises sa bukid aron makigsulti sa Ginoo. Giingnan sa Ginoo si Moises nga gusto Siyang makigsulti sa mga Israelita nawong sa nawong.
Ang mga Israelita nangadto sa tiilan sa Bukid sa Sinai, ug ang Ginoo mipabugwak og panganod nga nag-aso aron mopalibot sa bukid. Ang Ginoo didto sa panganod. Namulong Siya sa mga Israelita ug mihatag kanila og mga sugo. Ang bukid milinog samtang nagsulti Siya.
Exodo 19:16–19; 20:1–17; Deuteronomio 4:12–13, 33; 5:4–5
Ang mga Israelita nangahadlok. Gihangyo nila si Moises nga makigsulti sa Ginoo aron si Moises makasulti kanila unsay gusto sa Ginoo.
Si Moises midala ni Aaron ug sa 70 ka elder nga Israelita ngadto sa bukid aron modawat og dugang nga mga pagtulon-an sa Ginoo. Ang Ginoo mipakita kanila.
Dayon giingnan sa Ginoo si Moises sa pagbiya sa mga elder ug moadto sa ibabaw pa sa bukid. Mituman si Moises. Ang Ginoo migamit sa Iyang tudlo sa pagsulat sa Iyang balaod ug mga sugo ngadto sa mga papan nga bato. Sulod sa 40 ka adlaw, ang Ginoo mitudlo ni Moises og daghang mga butang.
Samtang si Moises didto sa Bukid sa Sinai, ang mga tawo sa Israel nangaluya sa paghulat kaniya. Giingnan nila si Aaron sa paghimo og mga estatuwa nga ilang pagasimbahon sama sa naa kanila didto sa Ehipto. Si Aaron mipundok sa ilang tanan nga bulawan ug mihimo og estatuwa nga nati nga baka.
Ang mga Israelita misimba sa nating baka nga bulawan ug mihalad og mga sakripisyo. Miingon sila nga ang nating baka nga bulawan, dili ang Ginoo, ang mipalingkawas kanila gikan sa Ehipto.
Ang Ginoo nahibalo nga ang mga Israelita nagsimba og dios-dios ug nakalimot Kaniya. Gisugo Niya si Moises sa pagbalik ug sultihan ang mga tawo sa paghinulsol.
Si Moises milugsong gikan sa Bukid sa Sinai ug nakita ang mga Israelita nga nagsimba sa nating baka nga bulawan. Nasagmuyo kaayo siya. Ang katawhan dili andam nga mosunod sa balaod ug sa mga sugo nga gisulat sa Ginoo. Gibuak ni Moises ang mga papan nga bato ug giguba ang nating baka nga bulawan. Gitabangan niya ang mga Israelita nga makahinulsol ug makahinumdom sa ilang tinuod nga Dios.
Si Moises mihangyo sa Ginoo sa pagpasaylo sa mga Israelita ug sa paghimo og mga saad uban kanila pag-usab. Si Moises misaad nga mangulo ug motudlo kanila.
Ang Ginoo mihangyo kang Moises sa paghimo og bag-ong mga papan nga bato ug mobalik ngadto sa Bukid sa Sinai. Ang Ginoo mihimo og bag-ong saad uban sa mga Israelita ug gihatag kanila ang Iyang Napulo ka Sugo.