“Ang Kasundalohan ni Gideon,” Mga Istorya sa Daang Tugon (2022)
“Ang Kasundalohan ni Gideon,” Mga Istorya sa Daang Tugon
Ang Kasundalohan ni Gideon
Pagsalig sa Ginoo panahon sa away
Ang katawhan sa Israel gipanalanginan sulod sa daghang katuigan. Apan dayon sila mipili nga mosupak sa Ginoo. Aron sa pagtabang kanila sa paghinumdom Kaniya, ang Ginoo mitugot nga ang ilang mga kaaway mokuha sa ilang pagkaon ug mga hayop. Ang mga Israelita mamatay na sa kagutom, mao nga nahinumdom sila sa Ginoo ug nag-ampo Kaniya alang sa tabang.
Si Gideon usa ka tawo gikan sa kabos nga pamilya. Ang Ginoo mipadala og anghel sa pagtawag kaniya aron haw-ason ang Israel. Nahibulong si Gideon nganong ang Ginoo mipili kaniya.
Giingnan sa Ginoo si Gideon sa pagguba sa mga dapit diin ang mga Israelita nag-ampo ug mini nga mga dios. Dihang mituman si Gideon, nasuko ang mga tawo.
Ang mga Israelita gusto nga mopatay ni Gideon. Apan ang amahan ni Gideon mikombinsi kanila sa dili pagpasakit kaniya. Si Gideon padayon nga luwas.
Si Gideon wala maghunahuna nga iyang mahimo nga gawasnon ang Israel. Adunay kapin sa 135,000 ka sundalo diha sa Midianhon nga kasundalohan. Apan ang Ginoo mihatag ni Gideon og kaalam ug kalig-on.
Ang Ginoo gusto nga ang mga Israelita masayod nga modaog sila pinaagi sa Iyang kusog, dili sa ilang kaugalingon. Bisan og ang Israel adunay 32,000 ka sundalo lamang, ang Ginoo mihangyo kang Gideon nga papaulion ang si bisan kinsang mga sundalo ang nahadlok. Human namauli ang 22,000, ang mga Israelita nabinlan og 10,000 ka sundalo.
Ang Ginoo miingon nga ang 10,000 daghan ra gihapon kaayo nga mga sundalo. Giingnan niya si Gideon nga dad-on ang kasundalohan ngadto sa tubig. Kadtong moinom direkta gikan sa tubig gamit ang ilang mga baba papaulion. Kadtong mogamit sa ilang mga kamot sa pag-inom sa tubig ang mahimong magpabilin. Karon 300 ka kalalakin-an ra ang nahibilin.
Sa kataposan, andam na ang mga Israelita nga makig-away. Ang Ginoo mipakita ngadto ni Gideon unsaon sa pagbuntog ang mga Midianhon. Giingnan ni Gideon ang iyang kasundalohan sa paggamit og mga trumpeta ug mga lampara sa paghadlok kanila. Ang kalangas ug ang mga suga milibog kaayo sa mga Midianhon nga sila nagsugod sa pag-unay og away. Dayon naninggit sila ug nanagan.
Tungod kay misalig si Gideon sa Ginoo, ang mga Israelita mipildi sa dakong pundok sa Midianhon nga kasundalohan pinaagi sa 300 lamang ka sundalo. Ang Ginoo mihimong gawasnon sa katawhan sa Israel.