“Josue ang Propeta,” Mga Istorya sa Daang Tugon (2022)
“Josue ang Propeta,” Mga Istorya sa Daang Tugon
Deuteronomio 10; 31; 34; Josue 1; 3–6; 10–11; 21; 24
Josue ang Propeta
Kataposang pagsulay sa wala pa mosulod sa gisaad nga yuta
Ang Ginoo mitawag ni Josue nga mahimong bag-ong propeta human si propeta Moises gidala sa langit. Samtang ang mga Israelita nagkampo duol sa Suba sa Jordan, miingon ang Ginoo nga panahon na nga sila mobalhin ngadto sa gisaad nga yuta.
Deuteronomio 34:1–9; Josue 1:1–4; Alma 45:19
Ang gisaad nga yuta anaa sa Canaan, apan ang daotang mga tawo nagpuyo didto. Giingnan sa Ginoo si Josue nga magmalig-on ug magbaton og kaisog. Uban sa tabang sa Ginoo, mabuntog sa mga Israelita ang yuta sa Canaan.
Si Josue mipundok og kasundalohan. Giingnan sila sa Ginoo sa pagpas-an sa mga papan nga bato sa Napulo ka Sugo ug ubang mga kasulatan. Ang mga pari midala niining sagrado nga mga butang sulod sa kahon nga gitawag og arka sa pakigsaad. Dayon ang kasundalohan andam nang molabang sa Suba sa Jordan. Lawom ang suba ug kusog ang sulog.
Deuteronomio 10:5; 31:25–26; Josue 1:10–11; 3:1–11
Gisaaran ni Josue ang mga Israelita nga ang Ginoo motabang nila nga makalabang sa suba.
Si Josue mihangyo og 12 ka pari nga modala sa arka sa pakigsaad ug motaak ngadto sa tubig. Diha nga ang mga pari mitikang sa tubig, ang tubig mipundo.
Ang mga Israelita milabang sa suba sa uga nga yuta. Si Josue mihangyo sa mga Israelita sa pagdala og 12 ka bato gikan sa uga nga suba. Iyang gihanip ang mga bato aron mahinumdom ang mga Israelita sa milagro sa Ginoo nianang adlawa.
Gipangulohan ni Josue ang kasundalohang Israelita ngadto sa yuta sa Canaan. Nangabot sila sa siyudad nga gitawag og Jericho. Lig-on kaayo ang siyudad ug dunay tag-as kaayong mga paril. Giingnan sa Ginoo si Josue unsaon sa pagbuntog ang Jericho. Miingon Siya nga ang mga Israelita kinahanglang momartsa libot sa Jericho matag adlaw sulod sa unom ka adlaw. Si Josue mituman sa Ginoo.
Giingnan ni Josue ang mga pari nga dad-on ang arka sa pakigsaad atubangan sa mga Israelita. Matag adlaw, ang kasundalohan nagmartsa libot sa Jericho, ug pito ka mga pari ang mihuyop sa ilang mga plahota. Ang tanan sa uban nga mga Israelita hilom ra.
Sa ikapitong adlaw, ang kasundalohan mimartsa palibot sa Jericho sa pito ka higayon. Ug ang mga pari mihuyop sa ilang mga plahota, giingnan ni Josue ang mga Israelita sa pagsinggit. Sa kalit ang mga paril sa Jericho nahagsa sa yuta, ug ang kasundalohan ni Josue miangkon sa siyudad.
Ang Ginoo mitabang sa mga Israelita, sama sa iyang gisaad. Ang kasundalohan ni Josue padayon nga mibuntog sa yuta sa Canaan, ug ang mga Israelita nagsugod sa pagpuyo didto. Gipahinumdoman sila ni Josue sa mga milagro sa Ginoo ug mga saad. Gihangyo niya ang mga Israelita sa pagpili nga moserbisyo sa Ginoo.