“Elias ang Propeta,” Mga Istorya sa Daang Tugon (2022)
“Elias ang Propeta,” Mga Istorya sa Daang Tugon
1 Mga Hari 16–18
Elias ang Propeta
Ang hugot nga pagtuo sa usa ka inahan ug ang mga milagro sa Ginoo
Ang gingharian sa Israel walay ulan, ug ang tubig hapit na mahurot. Si Hari Achab ug Reyna Jezabel wala makagusto sa mga propeta sa Ginoo. Gani ilang gipapatay ang pipila sa mga propeta. Ang hari ug ang reyna nag-ampo sa mga dios-dios alang sa ulan. Apan si propeta Elias misulti kanila nga ang Ginoo dili mopadala og ulan sulod sa mga katuigan.
1 Mga Hari 16:29–33; 17:1; 18:13
Ang hari ug ang reyna nasuko ni Elias. Gipahimangnoan sa Ginoo si Elias sa pagtago tungod kay ang iyang kinabuhi namiligro.
Ang Ginoo migiya ni Elias ngadto sa usa ka sapa ug mipadala og mga langgam sa pagdala kaniya og pagkaon. Apan tungod kay walay ulan, ang sapa nauga, ug si Elias walay tubig.
Ang Ginoo migiya ni Elias ngadto sa usa ka babaye sa layo nga siyudad. Nangayo si Elias kaniya og tubig ug pan. Apan siya adunay igo lamang alang kaniya ug sa iyang anak nga lalaki sulod sa usa na lamang ka adlaw.
Si Elias nahibalo nga kini mao ang iyang katapusang gamay kaayo nga pagkaon. Misaad siya nga kon siya mopakaon kaniya, ang Ginoo mohatag og pagkaon alang sa iyang pamilya hangtud moabut ang mga ulan.
Mihimo og pan ang babaye alang ni Elias. Dayon ang iyang lana ug harina midaghan! Dihay igo nga pagkaon alang ni Elias ug sa iyang pamilya sulod sa daghang mga adlaw.
Usa ka adlaw niana ang anak nga lalaki sa babaye nasakit ug namatay. Gipangutana niya si Elias nganong ang Ginoo mitugot niini nga mahitabo kaniya.
Si Elias adunay pagkapari. Gipanalanginan niya ang anak sa babaye ug gihangyo ang Ginoo sa pagtugot sa batang lalaki nga mabuhi og balik. Ang bata miginhawa og balik, ug ang babaye nahibalo nga si Elias usa ka propeta sa Ginoo.