“Ang mga Kagul-anan sa Ehipto,” Mga Istorya sa Daang Tugon (2022)
“Ang mga Kagul-anan sa Ehipto,” Mga Istorya sa Daang Tugon
Exodo 4–5; 7–12
Ang mga Kagul-anan sa Ehipto
Mga Pagpili sa Paraon batok sa Ginoo
Si Moises misalig sa Ginoo ug mibalik sa Ehipto. Si Moises ug ang iyang igsoon nga si Aaron miadto sa Paraon ug mihangyo kaniya sa pagtugot sa mga Israelihanon nga buhian ug mobiya sa Ehipto. Nasuko ang Paraon ug midumili. Gipugos niya ang mga Israelihanon gani sa pagtrabaho og mas labi pa ka grabe.
Tungod kay ang Paraon wala maminaw sa Ginoo, ang mga Ehiptohanon gitunglo sa makalilisang nga mga kagul-anan. Una, ang tanang tubig sa Ehipto nahimong dugo. Mihangyo si Moises og balik sa Paraon nga tugutan ang mga Israelihanon sa paglakaw, apan ang Paraon miingon og dili.
Sunod, ang Ginoo mipadala og mga baki sa Ehipto. Anaa kini bisan asa. Miingon si Paraon nga tugutan niya ang mga Israelihanon sa paglakaw kon mawala ang mga baki. Gihimo sa Ginoo nga ang mga baki mawala, apan wala tuguti ang mga Israelihanon sa paglakaw. Unya ang Ginoo mipadala ug mga kuto ug mga langaw.
Sunod, ang tanang mga hayop sa kaumahan sa mga Ehiptohanon nangamatay, apan walay namatay sa mga hayop sa mga Israelihanon. Unya ang mga Ehiptohanon natakbuyan og sakit nga mga hubag diha sa ilang mga lawas.
Hilabihan ka dako nga ulan sa yelo ug kalayo miabut sa Ehipto. Kini nakahimo og makalilisang nga pagkahugno.
Sa gihapon ang Paraon wala motugot sa mga Israelihanon sa paglakaw. Unya gipadala sa Ginoo ang mga dulon, ug gikaon niini ang tanang mga pagkaon sa mga katawhan.
Dayon dihay tulo ka mga adlaw sa kangitngit. Sa panahon sa daghang mga kagul-anan, misaad si Paraon sa pagtugot sa mga Israelihanon nga palakton kon ang mga kagul-anan mohunong, apan namakak siya sa kanunay.
Human sa siyam ka nagkalain-laing mga kagul-anan, ang Paraon sa gihapon dili motugot nga palakton ang mga Israelihanon. Ang Ginoo misulti ni Moises og laing makalilisang nga kagul-anan nga moabut. Gigiyahan ug gipanalipdan sa Ginoo ang mga Israelihanon samtang sila naghulat sa ilang kagawasan.