“Deborah ang Babaye nga Propeta,” Mga Istorya sa Daang Tugon (2022)
“Deborah ang Babaye nga Propeta,” Mga Istorya sa Daang Tugon
Deborah ang Babaye nga Propeta
Usa ka lider nga mitabang sa Israel sa pagsalig sa Ginoo
Si Deborah usa ka babaye nga propeta, usa ka matinud-anong lider nga Israelita kinsa gidasig sa Ginoo. Ang Iyang katawhan mihunong sa pagtuman sa mga sugo sa Ginoo, ug ang mga Canaanhon ang nagmando kanila. Human sa bayente ka tuig, ang mga Israelita nagsugod sa pag-ampo alang sa tabang sa Ginoo.
Ang Ginoo nakadungog sa ilang mga pag-ampo. Giingnan Niya si Deborah sa pagpundok og kasundalohan nga Israelita aron makig-away batok sa mga Canaanhon.
Ang kasundalohang Canaanhon dunay daghang sundalo ug mga karwahe. Nakapahimo kini sa kasundalohang Israelita nga mahadlok, apan si Deborah wala. Nasayod siya nga ang Ginoo motabang kanila.
Si Barak maoy lider sa kasundalohang Israelita. Dili siya gustong makig-away. Apan nagtuo siya nga kon si Deborah mouban sa kasundalohan, ang Ginoo manalipod kanila. Si Deborah miuyon nga moadto. Nanagna siya nga usa ka babaye mopildi ni Sisera, nga lider sa kasundalohang Canaanhon.
Ang kasundalohang Israelita nagpundok sa bukid, ug ang mga Canaanhon nagpundok sa walog. Giingnan ni Deborah si Barak sa pagkanaog gikan sa bukid. Misaad siya nga ang Ginoo magauban kanila.
Ang Ginoo mipadala og ulan, ug ang mga karwahe sa Canaanhon gibanlas sa tubig. Daghan sa mga Canaanhon nangalumos sa suba, apan si Sisera midagan palayo.
Mga Maghuhukom 4:15, 17; 5:4–5, 19–22
Usa ka babaye nga ginganlan og Jael nagpuyo sa duol nga tolda. Nakita niya si Sisera nga nagdagan ug giingnan siya nga motago diha sa iyang tolda. Nahibalo si Jael nga lider siya sa kasundalohang Canaanhon ug mipatay kaniya aron dili na siya makapasakit og mas daghan pang tawo.
Ang panagna ni Deborah natinuod. Si Sisera gipildi sa usa ka bayanihon nga babaye. Si Deborah mikanta og usa ka awit aron matabangan ang mga Israelita sa paghinumdom kon giunsa sila sa pagluwas sa Ginoo. Ang mga Israelita mituman sa mga sugo ug nagpuyo nga malinawon sulod sa 40 ka tuig.