“Jose sa Ehipto,” Mga Istorya sa Daang Tugon (2022)
“Jose sa Ehipto,” Mga Istorya sa Daang Tugon
Jose sa Ehipto
Ang usa ka ulipon nahimong usa ka lider
Si Jose gibaligya isip usa ka ulipon ngadto sa tawo nga ginganlan og Potifar. Si Potifar nagtrabaho sa Paraon, ang tigmando sa Ehipto. Si Potifar nakaingon nga ang Ginoo mitabang ni Jose. Misalig siya ni Jose ug gibutang siya nga tigdumala sa iyang balay ug sa tanan nga iyang gipanag-iya.
Ang asawa ni Potifar nakagusto ni Jose. Gusto siya nga supakon ni Jose ang mga sugo sa Ginoo uban kaniya. Giingnan siya ni Jose nga dili.
Ang asawa ni Potifar dili maminaw, mao nga midagan palayo si Jose. Nasuko siya kang Jose.
Mipakita siya ngadto ni Potifar og usa ka ginisi nga piraso sa sinina ni Jose. Gibakakan niya si Potifar mahitungod ni Jose. Si Potifar mipabilanggo ni Jose.
Si Jose nabulag sa iyang pamilya. Nahimo siyang ulipon, ug karon siya usa ka binilanggo. Apan sa gihapon ang Ginoo mitabang ni Jose. Wala mawad-i og paglaom si Jose. Ang Ginoo mipanalangin sa guwardiya sa prisohan aron makita ang maayo diha ni Jose. Ang guwardiya nagsugod sa pagsalig kaniya, mao nga gipiyal niya kang Jose ang ubang mga binilanggo.
Si Jose nakatagbo og duha ka binilanggo, usa ka panadero ug ang usa tigtagay sa bino, nga nagtrabaho alang sa Paraon. Pareho sila nga dunay katingad-ang mga damgo. Pinaagi sa gahom sa Ginoo, si Jose mipasabot unsay kahulogan sa ilang mga damgo. Ang damgo sa tigtagay sa bino nagpasabot nga ang tigtagay sa bino buhian. Tulo ka adlaw ang milabay, gibuhian siya aron makatrabaho na usab uban sa Paraon.
Usa ka adlaw ang Paraon nasagmuyo sa iyang mga damgo. Walay makasulti kaniya unsay ipasabot sa iyang mga damgo.
Dayon ang tigtagay sa bino nahinumdom nga si Jose makapasabot og mga damgo.
Si Jose gipagawas sa bilanggoan aron mopasabot sa mga damgo sa Paraon. Si Jose miingon nga ang mga damgo nagpasabot nga ang Ehipto adunay pito ka tuig nga abunda kaayo sa pagkaon sundan sa pito ka tuig nga gutom nga diyotay lamang kaayo ang pagkaon. Giingnan ni Jose ang Paraon nga ang Ehipto kinahanglan nga magtipig og ekstra nga pagkaon panahon niining maayo nga mga tuig.
Nasayod ang Paraon nga unsay gisulti ni Jose mahitungod sa iyang mga damgo tinuod. Gibuhian niya si Jose gikan sa bilanggoan ug mihimo kang Jose nga usa ka bantogan nga lider sa Ehipto. Sulod sa pito ka tuig, si Jose mitabang sa Ehipto sa pagtipig og ekstra nga pagkaon.
Dayon ang gutom miabot. Niini nga panahon, walay bisan usa nga makapatubo og bisan unsang pagkaon. Ang mga tawo mibiyahe ngadto sa Ehipto aron mopalit sa pagkaon nga natipig ni Jose. Tungod kang Jose, ang mga taga-Ehipto nakatigom og igong pagkaon aron makatabang kanila ug sa uban aron makalahutay sa gutom.