Seksen 31
Revelesen we Lod i givim tru long Profet Josef Smit i go long Tomas B. Mars, long Septemba 1830. Samting ia i hapen stret afta long wan konfrens blong Jos (luk long heding blong seksen 30). Tomas B. Mars i bin kasem baptaes eli long manis ia mo oli bin odenem hem i kam wan elda insaed long Jos bifo we Lod i givim revelesen ia.
1–6, Lod i singaotem Tomas B. Mars blong prijim gospel mo i kasem gud toktok ia se famli blong hem bae i stap gud; 7–13, Hem i kasem advaes blong hem i mas save wet longtaem, prea oltaem, mo folem Spirit blong Givhan.
1 Tomas, boe blong mi, mi blesem yu from fet blong yu long wok blong mi.
2 Luk, yu bin gat plante hadtaem from famli blong yu; be bambae mi blesem yu mo famli blong yu, yes, ol smol pikinini blong yu; mo dei ia i stap kam we bae oli biliv mo save trutok mo stap wan wetem yu insaed long jos blong mi.
3 Leftemap hat blong yu mo stap glad, from aoa blong misin blong yu i stap kam; mo tang blong yu bae i kam fri, mo bambae yu talemaot ol gudfala nius blong bigfala glad long jeneresen ia.
4 Bambae yu talemaot ol samting we mi bin talemaot long revelesen long wokman blong mi, Josef Smit Junia. Bae yu stat blong prij, stat long taem naoia i go, yes, blong yu tekem kaekae long garen we i waet, i rere blong oli bonem.
5 From hemia, sakem huknaef blong yu wetem evri sol blong yu, mo bambae mi fogivim ol sin blong yu, mo bambae yu tekem fulap bandel kaekae long baksaed blong yu, from man we i stap wok i mas kasem pei blong hem. Taswe, famli blong yu bae i laef.
6 Luk, mi talem long yu, go longwe long olgeta blong wan smol taem nomo, mo talemaot toktok blong mi, mo bae mi mekem rere wan ples blong olgeta.
7 Yes, bambae mi openem hat blong ol pipol, mo bae oli akseptem yu. Mo bambae mi stanemap wan jos tru long han blong yu;
8 Mo bae yu mas mekem olgeta oli kam strong moa mo mekem olgeta oli rere from taem ia we bae mi karem olgeta i kam wanples.
9 Long ol hadtaem, yu mas gat fasin blong save wet longtaem, yu no mas tok nogud agensem olgeta we oli stap tok nogud. Yu mas lidim haos blong yu wetem fasin blong no stap flas, mo yu mas gat fasin blong stanap strong.
10 Luk, mi talem long yu, se bambae yu stap olsem wan dokta blong jos, be i no blong wol, from we bambae oli no akseptem yu.
11 Gohed long rod blong yu, long weaples we mi wantem, mo bambae mi givim long yu tru long Spirit blong Givhan, wanem nao bae yu mekem mo weaples nao bae yu go long hem.
12 Prea oltaem, blong mekem se yu no foldaon long temtesen mo lusum pei blong yu.
13 Stap fetful kasem en, mo luk gud, mi stap wetem yu. Ol toktok ia, i no wan man i talem, o i no ol man oli talem, be mi nao mi talem, mi we mi Jisas Kraes, Ridima blong yu, tru long tingting blong Papa. Amen.