“Mbreti Noe dhe Mbreti Limhi”, Tregime nga Libri i Mormonit (2023)
Mbreti Noe dhe Mbreti Limhi
Largimi nga lamanitët
Mbreti Noe qeveriste një grup nefitësh. Ai bëri shumë gjëra të këqija dhe disa njerëz u nxehën me të. Një burrë, që quhej Gideon, u ndesh me Noeun me shpatë. Noeu ia mbathi dhe u ngjit në kullë. Nga kulla, ai pa një ushtri lamanitësh që po vinte. Noeu u shtir sikur kishte frikë për popullin e tij, ndaj Gideoni e la të jetonte.
Noeu dhe njerëzit e tij ia mbathën. Por lamanitët i ndoqën ata dhe filluan t’i sulmonin. Noeu u tha burrave t’i linin pas familjet e tyre dhe të shkonin me të.
Disa burra u larguan me Noeun. Por shumë burra zgjodhën të qëndronin me familjet e tyre. I biri i Noeut, Limhi, zgjodhi gjithashtu që të qëndronte.
Shumë bija dolën përpara ushtrisë dhe u kërkuan lamanitëve që të mos u bënin keq familjeve të tyre. Lamanitët i dëgjuan ato bija dhe i lanë nefitët të jetonin. Mirëpo, lamanitët i zunë rob nefitët.
Burrat që ia mbathën, donin të ktheheshin te familjet e tyre. Noeu u përpoq t’i ndalonte, ndaj burrat e vranë atë. Pastaj ata u kthyen te familjet e tyre.
Burrat ishin shumë të lumtur që familjet e tyre ishin shëndoshë e mirë. Ata i treguan Gideonit atë që i ndodhi Noeut.
Populli zgjodhi Limhin si mbretin e vet të ri. Limhi i premtoi mbretit lamanit se ata do t’u paguanin lamanitëve gjysmën e gjithçkaje që zotëronin. Në këmbim, mbreti lamanit premtoi se ai nuk do ta lëndonte popullin e Limhit.
Ata jetuan në paqe për disa vjet. Pastaj lamanitët filluan ta trajtonin keq popullin e Limhit. Populli dëshironte të ishte i lirë sërish. Ata u përpoqën t’i luftonin lamanitët, por humbën. Populli iu lut Perëndisë për ndihmë.
Një ditë, një nefit, që quhej Amoni, vizitoi Limhin dhe njerëzit e tij. Amoni erdhi nga një tokë që quhej Zarahemla. Limhi u gëzua që e takoi Amonin.
Amoni mund t’i udhëhiqte njerëzit e Limhit drejt Zarahemlës, por atyre iu duhej të shpëtonin nga lamanitët fillimisht. Gideoni kishte një plan.
Në mbrëmje, Gideoni u dha rojave lamanitë më shumë verë që ata t’i zinte gjumi. Ndërsa rojat i zu gjumi, Limhi dhe të gjithë njerëzit e tij u larguan nga qyteti.
Ata shkuan në Zarahemla dhe iu bashkuan nefitëve atje. Limhi dhe njerëzit e tij mësuan më shumë rreth Perëndisë. Ata bënë një besëlidhje, ose premtim të veçantë, për t’i shërbyer Perëndisë dhe për t’iu bindur urdhërimeve të Tij. Ata u pagëzuan dhe u bënë pjesë e Kishës së Perëndisë. Ata u kujtuan se Perëndia i ndihmoi ata të largoheshin nga lamanitët.