Nikmet Fosrngah

Nga toeniyac luhlahlfongi luhk nuh ke pweng lal Prestuhn Russell M Nelson ac Elder Quentin L Cook ituckyang kihtin pacl somlah ah ke engan ac insese luhn Council luhn Prestuhnsi Se Met ac U luhn Mwet Sap Singucul Luo ah. Nga etuh lah fwackyuck ke mwe fahkwack inge pa nuhnak ac pa luhngse luhn Leum na ac ahkinsewowoye ac ahkfokokoye kais sie, sucu, ac Alu luhn Jisus Kraist luhn Mwet Luhlahlfongi ke Lwen-sahflah ke fihl fah tuhkuh uh.

Yac ekahsr somlah ah, sie sin tuhlihk muhtwacn tuhfahna macruhtlac se nahtuhsr ac mukul tuhmwacl siyuck sihk ac Sister Rasband kihsensiyuck na yohk srihpac se, kahsruh ke moul se: “Kuh srwack sef in use tuhlihk nuh ke facluh oacna in koluk ac ahksahngweng se kuht muhta kac inge?”

Inge, kihsensiyuck na yohk srihpac se nuh sin sie ninac ac pahpah in nuhnak kac yurin tuhlihk sacohk macruhtlac nahtuhlos. Kuht kuh in lohng sahngweng ke puhsraclos ac puhla sahngweng uh insiyaclos. Top lasr nuh selos kuh “Ahok, yohk likina OK,” ke kuht akacsruhi luti ke muhtwacwacyacn wosasuc ac ma kuht etuh ke insiyacsr sifacna ac puhla ke moul uh.

Sahngweng uh tiac sasuc. Mwet tuhma lutlut Lal Jisus Kraist, ke mea Galilee, sahngweng ke “eng ac noa uh” ke lohsr luhn fong sac.¹ Ekihn mwet tuhma lutlut Lal mihsenge, kuht sahngweng pac. Mwet lolacp lasr sahngweng in oruh sulaclah pa in macruhtlac, Macruht sasuc uh oacna tuhlihk nahtuhsr, kuh in sahngweng in use tuhlihk nuh ke facluh yohkwaclihk koluk kac se. Misineri sahngweng ke ma puhs yohkna in sramsram nuh sin mwet sac. Katinmas uh sahngweng ke muhkwenalac. Mwet fuhsr sensen in wacngihn mwet pwacr selos, tuhlihk lutlut sahngweng ke lwen se emet ke lutlut ac; tuhlihk lutlut ke university sahngweng ke ma sikyak ke sie tes. Kuht sahngweng ke kuf, sruhngwacyuck, suhpwacrlac, ac ma tiac etweyuck uh. Kuht sahngweng ke pahkah, kusrusr, ac e kuhnahoslah acn ac moul lasr uh. Kuht sahngweng in te sollac kuht ac ke ohiyac sahyac, kuht sahngweng in sollac kuht. Kuht sahngweg muh kuht suhfal, kuht sahngweng muh wacngihn mwe insewowo sin Leum nuh sesr. Kuht sahngweng ke eklac uh, ac sahngweng lasr uh kuh in use fosrngahlah. Kuh nga sang kwewa ma mwet uh sahngweng kac uh?

Pacl met ah me, sahngweng uh ahksrihkyelah liye luhn tuhlihk nuhtin God uh. Nga wacna luhngse sramsram se kacl Elisha ke LUO TOKOSRA. Tohksrah luhn Syria el suhpwaclah sie un solse ma “sun acn we ke fong, ac kuhlusya acn sac.”² Plwacn laltahl pa in sruokilyac ac unilyac mwet pahluh Elisha. Kuht riti:

“Ac ke mwet kuhlwacnsap luhn mukul luhn God el toang tuhkahkwek, ac illac, liye, sie un mwet mweun wi horse ac chariot raunwelah siti uh. Ac mwet kuhlwacnsap lal fahk nuh sel, Alas, leum luhk! Meac kuht ac oruh?”³

Mwet sac fahk sahngweng lal.

“Ac [Elisha] el topuk, Nimet sangeng: pus mwet wi kut lukelos”⁴

Tuhsruhk el tena tui.

“Na el pre, O Leum God, ikasla mutal elan ku in liye. Ac Leum El ikacslah muhtuhn mwet fuhsr sac ac el liye: ac, liye, pe eoluh sessesla ke horse ac chariot e raunella Elisha.”⁵

Kuh in oasr kuh wacngihn chariot e suhpweyuckme in eslah sahngweng ac kuhtanglah demon uh, tuhsruhk lesin uh fihsracsr. Leum El wi kuht, nuhnkuh kacsr ac ahkinsewowoye kuht ke ohiyac ma El muhkwena kuh in oruh. Pruhe uh kuh in oruh in oasr kuh ac fackyuck ma kuht enenuh in ahklohye nuhnak lasr ke Jisus Kraist ac kihsac in iwaclah Lal. Leum El etuh lah oasr pacl kuht ac puhla sahngweng. Nga puhla sahngweng ke kuhtuh pacl, ac kom pac, na pa oruh ma suhmuhslah uh sesseslah ke kahs in kahsruh luhn Leum uh.

Ahkkweye kom, ac tiac sahnweng.⁶

Ngwet nuh sin Kraist ke nuhnak nuhkwewa, tiac ahlohloh, tiac sahngweng.⁷

“Nikmet sahngweng, u srihsrihk.”⁸ Nga lunges fahk se “u srihsrihk.” Ke Alu uh kuh in liyeyuck muh kuht suhpuhs oacna in te yohk srihpac sin mwet facluh uh, tuhsruhk ke kuht ikacslah muhtahsr ke nguhn uh, “pus mwet wi kut lukelos.”⁹ Mwet Shepherd luhngse lasr, Jisus Kraist, fahk lah facluh ac hell ac tuhkweni lain kuht, tuhsruhk fin kuht muhsah fin yot Lal, wacngihn ma koluk ac kuhtanglah.¹⁰

Sahngweng uh itucklac fuhkah? Nuh sin mwet fuhsr sac, el tuh tu na siskacl Elisha, mwet pahluh se luhn God. Asr sesr olwelah se pacna ingwacn. Ke kuht lohngohl Prestuhn Russell M. Nelson, ke kuht porongo kahs in kahsruh lal, kuht tu wi sie mwet pahluh luhn God. Esam kahs lal Joseph Smith ma fahk muh tukun fahkwack luhlahlfongi puhs suc ma fwacklac Kwacl, pa inge luhllahlfongi, ma na sahflah suc kuht fahk Kacl. Lah El moul!¹¹ Jisus Kraist El moul. Luhngse lasr nuh Sel ac wosasuc Lal eslah sahngweng uh.

Kena lasr in “wacna eis Nguhn Lal”¹² in wikuht ac kahsrekuht eslah fosrngah nuh ke sie liye na wowo ke moul in ikwac lasr uh. Prestuhn Nelson el sensenkackihn, “Ke lwen ac tuhkuh uh, ac fah upac in panmoulac fin wacngihn pwenyuck, kol, ahkwo, ac pihrihkyuck pacl nuhkwewa luhn Nguhn Muhtahl uh.”¹³

Leum El fahk, finne mwe ongaiyac ma ac afuhnlah acn uh na ac fah ahkupacyelah insiyacn mwet puhs, lah mwet tuhma lutlut Lal enenuh in tu ke acn muhtahl ac tiac mukwikwi.¹⁴

Ac El use kahs in kahsruh lucng me lah kuht enenuh in tiac fosrngah mweyen ke ma nuhkwewa ac sikyak kuht fah etuh lah olwelah ma El tuh oraclah nuh sesr ah fah ahkpwacyeyeyucklac.¹⁵

Tu ke acn muhtahl—tiac fosrngah—ac olwelah uh fah ahkpwacyeyeyucklac. Lwelah kuht in liye kais sie ma inge na ac kahsruh fuhkah sahngweng lasr uh.

Ma se met, tu ke acn muhtahl. Ke kuht tu ke acn muhtahl–lohm suwohswohs sesr, lohm alu kihsaclah lasr, tempuhl ahkmuhtahlyeyucklac—kuht puhla Nguhn luhn Leum wi kuht. Kuht konwacack top nuh ke siyuck ma ahkfosrngahyekuht kuh mihs ma in eslah fosrngah uh. Pa ngwacn oruh luhn Nguhn uh. Acn muhtahl ke tohkohsrahi luhn God fin facluh uh enenuh suhnak lasr, ahkfuhlwact lasr nuh sin mwet sahyac, wo emet lasr in moulkihn wosasuc, ac finsrak lasr in sislah sahngweng lasr ac suk kuh in ahkweye luhn Jisus Kraist ke Iwaclah Lal.

Wacngihn acn luhn sahngweng ke acn muhtahl luhn God inge kuh ke insiyacn tuhlihk nahtuhl. Efuh? Ke srihpen luhngse, God El luhngse kuht—pacl nuhkwewa—ac kuht luhngse El. God El kosraclah sahngweng nuhkwewa, ac luhngse Lal puhlakihnyuck ke acn muhtahl uh. Nuhnkuh kac. Ke kuht tiac etuh na pwacye ke oruh lasr nuh sin Leum, pacl kuht kuhflah liki inkacnek Lal ma kol nuh ke moul ma pahtpaht, ke kuht siyuck ac ahlohloh ke srihpac yohk lasr ke akwuck lucng me Lal, pacl kuht lwelah sahngweng in oruh kuht puhla—muhnahslah, foloyak, kasrkuhsrak, suhpwacrlac—Nguhn som liki kuht, ac Leum El tilac wi kuht. Kom fin etuh lah meac ma sacn oacna uh na kom ac etuh tiac ohiyac wowo se in wi asr kac. In kapsra, pacl kuht tu ke acn muhtahl, kuht kuh in puhla luhngse luhn God, ac luhngse pwacye sislah sahngweng nuhkwewa. ¹⁶

Olwelah se tok an pa “In te fosrngah.”¹⁷ Wacngihn ma ke luhpan muhnahs ac okahrkahr nwacklah facluh uh, uliyuckme nuh sesr mihs luhn God ke oaru lwen nuhkwewa lasr ke Jisus Kraist, suc use etuh nuhkwewa.¹⁸ Ac ke Kraist El tuhkuh ke kuh ac wolacna, ma koluk, lainyuck, ac sesuwohs uh fah sahflah.

Pacl loes somlah ah Mwet Sap Paul el palye ke pacl lasr uh, fahk nuh sel Timothy fuhsr:

“Kom in esam lah ke len safla uh ac fah oasr mwe ongoiya lulap sikyak.

Tuh mwet ac fah nunku kaclos sifacna, lunges mani, konkin, ac filang, ahkkolukye mwet, seakos papa ac nina, nikin sang kulo, ac wanginnunkeyenaluselos, …

“… lungse mwe pwar yohk liki God.”¹⁹

Esam, “elos ma wi kuht uh” ke kwewana siskac ke lihsrlihsr uh, elos ma luhngse Leum ke insiyaclos, kuh, nuhnak, ac fokokoiyaclos, puhs luhkwelos ma weluhlos.”²⁰ Fin kuht oaru in luhlahlfongi Leum ac ohiyac Lal, fin kuht sroacng nuh ke orekma Lal, kuht fah tiac sahngweng ke ekyek luhn facluh kuh in fosrngah selos. Nga kwacfe suwos in eslah nuh sahyac elyah luhn facluh ac suk ma ke nguhn ke moul lom lwen nuhkwewa uh. Luhngse ma Leum El luhngse—ma weacng masap Lal, lohm muhtahl, olwelah muhtahl lasr nuh Sel, kuhfa luhn Leum kais sie lwen, sramsram lasr ke pruhe—na kom fah tiac fosrngah.

Ip sahflah: luhlahlfongi Leum ac olwelah Lal. Nga etuh lah olwelah Lal kwewa ac fah ahkpwacyeyeyucklac. Nga etuh kac oacna ke nga tu ye motowos inse ke toeni muhtahl se inge.

Leum El fahkwack, elos ma lahlmwetmwet ac eis ma pwacye, ac eis Nguhn Muhtahl tuh in mwe kolyuck lalos, ac soena kiacpweyucklac fah tiac kuhnausyucklac ke lwen sahflah.²¹

Pa ngwe srihpac se oruh kuht tiac enenuh in fosrngah ke okahrkahr uh, selos ke lohm luhlahp ac mwesahs sac, selos ma ahksruhksruhkye srihke suwohswohs ac kuhlwacnsap oaru nuh sin Leum Jisus Kraist uh. Liye muh facluh pa wo emet, puhlaik, finne luhngse pwacye pa ma sikyak ke sie inse tiac toasr ke fosrngah kuh ma upac. Prestuhn Nelson, ma etuh muh ma wo uh ac kuhtanglah ke sahflah uh,” ahkacsmakihnyekuht, “Fin kuht enenuh in eis finsrak in konwacack ma yohk enenweyac ke nuhnak puhs ac sramsram suhmaht luhn mwet ma lain ma pwacye uh, kuht enenuh in etuh in eis fwackyuck.”²²

In eis fwackyuck nuh sesr sifacna, kuht enenuh in fihliyac moulkihnyacn wosasuc tuh in pa ma se emet ac ahkweye oaru ac moul in nguhn luhn mwet sahyac oacyacpac kuht sifacna.

Spencer W. Kimball pa sie sin mwet pahluh ke nga srihk ac. Yac ekahsr somlah ngwe, tukun pahng ekihn sie Mwet Sap, nga konwacack mihs ke pweng se emet lal ke toeni luhlahp ke Ohktopa 1943 ac. El sesseslah ke pahng se lal uh; Nga etuh lah fuhkah puhla sacn. Elder Kimball: “Nga tuh oruh nuhnak ac pruhe na yohk, ac lalo ac pruhe. Tuh oasr nuhnak in lain ma nga tiac kuh in tui in nuhnkuh kac —puhsra ma oacna in fahk muh: ‘Kom tiac kuh in oruh orekma sacn. Kom tena fal. Kom tiac kuh’—tuh sahflahiyac nga kuh suc pa nuhnak in kuhtanglah uh; ‘Kom enenuh in oruh orekma utokot an—kom enenuh in oruh kom in kuh, nwacsnwacs, ac fal.’ Ac mweun uh tuhtahflah na.”²³

Nga ahkweyeyuck ke fahkwack luhlahlfongi ke nwacsnwacs insiyac luhn Mwet Sap se inge ma eklac Prestuhn ahk 12th ke Alu fokoko se inge. El akihlen lah el enenuh in ngwetlah liki sahngweng lal in oruh ma kuneyuck nuh sel na lah el enenuh in epacl nuh sin Leum ke kuh in oruh lan sifacna “kuh, nwacsnwacs, ac fal.” Kuht kuh pac. Mweun uh tuhfahflahna, tuhsruhk kuht ac laenuhlos ke Nguhn luhn Leum. Kuht fah “tiac fosrngah” mweyen kuht tahpuhk Leum ac lango mwe luti Lal ac plwacn netok Lal, kuht tu ke acn muhtahl.

Inge, meac ke tuhlihk muhtwacn sac ac tuhlihk mukul srome se ma siyuck kihsensiyuck na pwacye ac yohk kalmac, ahksahngweng soko ke yac ekahsr somlah ah? Eltahl nuhnkuh yohk sramsram lasr ke fong sac; eltahl pruhe ac lalo ac oraclah otwelah lalos sifacna. Engan ac ke engan kaclos ac kacsr, pahtmahtuh ac ninacmahtuh, Elos inge ahkinsewowoyeyuck ke tuhlihk kahto itkohsr ke elos fahsr nuh met ke luhlahlfongi ac luhngse uh.

Petsac

Itkohsr sin tuhlihk nuhtin tuhlihk nahtuhl Elder ac Sister Rasband ah

Kowos in puhlaik, tamuhlwel ac tahmtahel. Ahok, kuht muhta ke pacl ongaiyac se, tuhsruhk pacl kuht muhta ke inkacnek luhn olweacng, kuht tiac enenuh in fosrngah. Nga ahkinsewowoye kowos tuh ke kowos oasr ke inkacnek uh, kowos fah tiac fosrngah ke ma sik siskacsr kuh elyah sik nuh sesr uh. Nga ahkinsewowoye kowos in sulaclah in tu ke acn muhtahl ac tiac mukwikwi. Nga ahkinsewowoye kowos in luhlahlfongi ke olwelah luhn Jisus Kraist, lah El moul, na lah El karihngihnkuht, liyekuhtyang ac tu siskacsr. Ke inen Leum lasr ac Mwet Lahngo, Jisus Kraist, amen.