Srihpac Luhn Puk luhn Mormon pa Srihpac in Wuhlweacng

Ke Preach My Gospel, kuht rit: “Esam lah ke kahlwem lasr [ke Pahpah Tuhmasr Inkuhsrao ac Plwacn in engan Lal] tuhkuh sin mwet pahluh—Joseph Smith ac mwet in kuhtanglah lal—suc eis mwe fahkwack sin God. Ke ma inge, kihsensiyuck soko mwet se enenuh in topuk uh pa lah pwacye Joseph Smith el mwet pahluh se, ac lah muhtwacn se kuh mukul se kuh in tohpohklah ke rit ac pruhe ke Puk luhn Mormon.”²

Luhlahlfongi pwacye luhk ke pahng luhn Mwet Pahluh Joseph Smith el ahkkweyeyucklac ke pruhe ac stuhti ke Puk luhn Mormon: Sie Wuhlweacng ke Jisus Kraist. Nga orekma nuh ke siyuck lal Moroni in “siyuck ke God, Pahpah Ma Pahtpaht, ke inen Kraist,” in etuh pwacyeiyacn Puk luhn Mormon.³ Nga fahkwack lah nga etuh ma inge pwacye. Ke etuh se inge tuhkuh nuh sik, suc kuh pac in tuhkuh nuh yurum, “ke kuh luhn Nguhn Muhtahl.”⁴

Ke ikucslah ke Puk luhn Mormon el fahk: “Elos suc eis mwe ahkpwacye wolacna se inge [ke Puk luhn Mormon] sin Nguhn Muhtahl ac fah oacyacpac etuh ke kuh se pacna inge lah Jisus Kraist pa Mwet Lahngo luhn facluh, lah Joseph Smith pa mwet fahkwack ac mwet pahluh Lal ke lwen sahflah inge, ac lah Alu luhn Jisus Kraist luhn Mwet Luhlahlfongi lal ke Lwen-sahflah pa tohkohsrahi luhn Leum suc sifilpac akwucki fin facluh, in ahkolah nuh ke Tuhkuh Ahkluo luhn Messiah.”⁵

Ke nga tuhlihk mukul fuhsr se pahng in som kuhlwacnsap ke acn se pahngpahng Chile, nga lotwelah mwe luti yohk in eklac se ke kuh luhn Puk luhn Mormon. Mr. Gonzalez el kuhlwacnsap ke acn na ahkfuhlwactyeyuck ke alu lal ah ke yac pucspucs. El ahkyohkyelihk lutlut lal ke alu uh, weacng in eis fuhlwactiyacn etuh lal ke God ac fin facluh. El arulacna engan se sifacna ke ma El etuh tari ke pwacpuhl. Fihsrwacsr in liyeyuck lah Elder Bowen ac misineri ke acn in lutlut sac etuh lah el tuhlihk etweyuck ke ma luhn alu.

El arulacna etweyuck ke misineri luhn Alu luhn Jisus Kraist luhn Mwet Luhlahlfongi ke Lwen-sahflah ke elos som nuh ke orekma ke acn na pwacye el muhta we pa Lima., Peru. El luhngse pac in ohsun in muh el kuh in oruh elos in lutlut ke pwacpuhl.

Sie lwen, apkuhran in mwe sang se yurun mwet lucng, oruh el nuhnkuh, misineri luo tulokihnilyac inek ah ac siyuck sel fin elos kuh in som nuh lohm sel ah ac sramsram nuh sel ke ma suhmuhslah. Pa inge ma el luhngse ah! Oreklac ke Lal ah. Sahflah, el ahkkahlwemye nuh sin misineri luo ah ma tahfonglac ke luti lalos. El fahk nuh selos lah el ac arulacna pwacr fin elos som nuh lohm sel ah ac sramsramkihn ma suhmuhslah.

El arulacna engan ke pacl in ohsun lalos. El ahkolah in orekmakihn pwacpuhl in ahkpwacyei luhlahlfongi lalos. El arulacna fokoko luhlahlfongi la lah pwacpuhl kuh in kahlwem ac suhmaht ke kahs suc ahkkahlwemye ma tahfonglac ke luti lalos. Ke pacl se elos e ohsun uh tuhkuh, ac misineri ah tongtong ke sruhngucl ah. El arulacna engan. Pacl Lal ah tuhkuh.

El ikucslah sruhngucl ah ac suli misineri ah nuh lun lohm sel ah. Sie sin misineri ah sang puk folfol se nuh sel ac sang luhlahlfongi lal lah el etuh lah puk ah nwacnwaclah ke kahs luhn God. Misineri se sahyac ah sang pac luhlahlfongi lal ah ke puk sac, fahkwack lah el puk sac lwenglah sin mwet pahluh sollac luhn God, inel pa Joseph Smith, ac lah el luti ke Kraist. Misineri ah taltal nuh salac siyuck elos in kuh in som.

Mr. Gonzalez el puhla koluk. Tuh el ikucslah puk sac, ac el muhtwacwacack in forlah in liye ac riti ke kais sie sra puk. El riti ke sra puk se emet. El riti ke sra puk tukun sra puk ac tiac tui ke tukun tahfuhn lwen tok ke lwen sac. El riti nohfohn puk sac ac etuh lah pwacye. El etuh lah meac el oruh uh. El pahngon misineri ah, eis mwe lutlut luhn misineri ah, ac el tui ke moul se lal meet ma el etweyuck kac ah ac sie mempucr ke Alu Luhn Jisus Kraist Luhn Mwet Luhlahlfongi ke Lwen Sahflah.

Mukul na wowo sac pa MTC titsucr luhk ke can Provo, Utah. Sramsram kacl Tamuhlwel Gonzalez eklac ac kuh ke Puk luhn Mormon oruh puhla na wowo se nuh sik.

Ke nga ai sun acn Chile, misineri prestuhn se luhk ah, Prestuhn Royden J. Glade, el suli kuht in riti luhlahlfongi lal mwet Pahluh Joseph Smith suc sihmlac ke Joseph Smith—ke ma Mahtuh ke wik nuhkwewa. El luti kuht lah luhlahlfongi lasr uh ke Ararama Se Emet lah e kol kuht nuh ke kuh lasr sifacna ke luhlahlfongi lasr sifacna ke wosasuc ac luhlahlfongi lasr ke Puk luhn Mormon.

El eis siyuck lal ke ma na pwacye. Nga ritwelah kunohkohn ke Ararama Se Emet; Nga ritwelah Puk luhn Mormon. Nga pruhe oacna ke Moroni el siyuck “God, Pahpah Ma Pahtpaht, ke inen Jisus Kraist”⁶ fin Puk luhn Mormon el Pwacye. Nga fahkwack ke etuh luhk mihsenge lah nga etuh Puk luhn Mormon, oacna ke Mwet Pahluh Joseph Smith el fahk, pa “pa puk se ma pwacye emet sin kuhtwena puk fin facluh, ac pa yot in fihl luhn alu lasr uh, ac sie mwet ac kuh in fototoyang nuh sin God ke el muhta na ke mwe luti luhn ma inge, liki na kuhtwena puk sahyac.”⁷ Mwet Pahluh Joseph el oacyacpac fahk: “Eis Puk luhn Mormon ac mwe fwackyuck, ac piyac alu lasr uh? Wacngihn alu lasr.”⁸

Ke kuht enenuh in kahlwem lah suc kuht uh ac meac srihpac luhn Puk luhn Mormon, eklac lasr uh ahk fokokoi kuht ac tuhkuh muh mwe kulohkihn. Kuht ahkkweyeyuck ke olwelah lasr in ahkos masap lasr ma kuht oraclah yurun God.

Ip yohk se ke srihpac lasr ke Puk luhn Mormon pa in oracni mwet Israel. Tuhkweni se inge sang tuhlihk nuhtin God nuhkwewa in utyak nuh ke olwelah lasr nuh sel ac, in ahkfuhlwactye olwelah, sifilpac fohlohk nuh yurun Pahpah. Ke kuht lutlut ke ahkostwen ac pacptais ke mwet eklac, kuht oracni mwet Israel nuhkwewa.

Ke Puk luhn Mormon oasr mwe ahkuhtweyac 108 ke lun lohm sel Israel. Ke muhtwacwacyacn Puk luhn Mormon, Nephi el luti, “Kena yohk luhk uh pa lah nga in kuh in kwacfe mwet uh in tuhkuh nuh yurun God lal Abraham, ac God lal Isaac, ac God lal Jacob, ac in moliyucklac.”⁹ God lal Abraham, Isaac, Jacob, pa Jisus Kraist, God luhn Wuhlweacng Mahtuh. Kuht moullac ke kuht tuhkuh nuh yurun Kraist ke wosasuc Lal.

Tohkoh, Nephi el Suhmuhslah:

“Ahok, finne pahpah tuhmuhk el sramsram yohk ke mwet Gentile, ac oacyacpac ke mwet Israel, lah elos ac kapsreyuck nuh ke soko sahk olive, ma lah kac ac kihpatlah ac fahsrelihk nuh ke muhtuhn facl nuhkwewa. …

“Ac tukun mwet Israel ac fahsrelihk elos ac sifilpac fohlohkweni nuh sie; kuh, in ahkkahlwemye, tukun mwet Gentile elos eis fohnlah luhn Wosasuc, lah na pwacye ke sahk olive, kuh mwet luhlah luhn mwet Israel, ac fah kuhpahsryang nuh kac, kuh tuhkuh nuh ke kahlwem luhn Messiah pwacye, Leum lalos ac Mwet in Molwelah lalos.”¹⁰

Oacna pacl nuhkwewa, ke sahflahiyacn Puk luhn Mormon, mwet pahluh Moroni el ahkacsmakihnye kuht ke wuhlweacng lasr, fahk, “Tuh kowos in kuh in tiac sifilpac kaiyuck, tuh wuhlweacng luhn Pahpah Ma Pahtpaht ma El tuh oraclah nuh suwos, O mwet Israel, in ahkpwacyeiyucklac.”¹¹

Meac ngac “wuhlweacng luhn Pahpah Ma Pahtpaht” suc pa nuh sel Moroni? Kuht riti ke puk luhn Abraham:

“Leum el fahk nuh sel Abraham lah inel pa Jehovah ac El etuh sahflahiyac ne ke muhtwacwacack ac Pahol fah oan facl Abraham.

“Ac nga ac fah oraclah facl lowos in wo, ac ahkinsewowoye ma lucng yuruwos, ac oruh ine lowos in wo fin facluh nuhkwewa, ac ma inge mwe ahkinsewowoye fihl tukun fihl, lah paholos elos fah sruhmuhn ke kuhlwacnsap ac Pristut ke facl nuhkwewa.”¹²

Prestuhn Russell M. Nelson el prokracm luti lal fin facluh nohfohn lah “pa inge na pwacye ke lwen sahflah, ac lah Leum el tahpuhk in orekma in oracni mwet Israel. Toeni se inge pa yohk srihpac in sikyak fin facluh mihsenge. Wacngihn ma kuht kuh in kapsrai nuh ke luhpan ma, wacngihn ma kuht kuh in kapsrai nuh ke ma yohk srihpac, wacngihn ma kapsrai mwet yohk wal la. Ac fin kom sulaclah in, fin kom luhngse in, kom kuh in sie ip luhlahp kac. Kom kuh in sie ip ma yohk ke oacna sie ma luhlahp, oacna sie ma yohk molo, ac oacna sie ma yohk wal kac.

“Ke kuht sramsramkihn tuhkweni, fihsrwacsr kuht in fahk muh kuhlwacnsap pwacye: Kais sie sin tuhlihk nahtuhl Pahpah Tuhmasr Inkuhsrao, oan ke lacyacn se fanna nuh facl uh, kuhtanglah in lohng ke sramsram ke fohlohkyak luhn wosasuc luhn Jisus Kraist. Elos sifacna sulaclah fin elos luhngse etuh pack ac.”¹³

Pa inge ma kuht oruh mempucr ke Alu Luhn Jisus Kraist Luhn Mwet Luhlahlfongi Ke Lwen Sahflah: kuht suk in use facluh nohfohn in kuh in kahlwem ke—ac sramsram nuh ke—wosasuc luhn Jisus Kraist. Kuht pa “Mwet Luhlahlfongi ke Lwen sahflah in toeni.”¹⁴ Orekma lasr uh kahlwem. Tamuhlwel ac tahmtahel, oruh kuht in etweyuck muh elos suc olwelah pwacye in weluhl Moroni, pruhe ac eis top ma kom etuh muh Puk luhn Mormon pwacye, ac kom fah sruhmuhn etuh lom an sin mwet sahyac ke kahs lasr ac, yohk liki nuhkwewa nuh ke orekma lasr uh.

Puk luhn Mormon el nwacklah fohnlah luhn wosasuc ke Jisus Kraist.¹⁵ E kol kuht nuh ke olwelah lasr nuh sin Pahpah, suc kuht eis in ahkkahlwemye nuh sesr ke mwe sang na yohk se Sel—nuh tok ma pahtpaht.¹⁶ Puk luhn Mormon pa yot in fihl ke wuhlweacng lasr nuhkwewa sin Pahpah Tuhmasr Inkuhsrao wen nahtuhl ac tuhlihk muhtwacn nahtuhl.

Sifilpac sruhmuhn sel Prestuhn Nelson: “Ke kom … riti Puk luhn Mormon, kom e lotwelah mwe luti ke toeni, pwacye kacl Jisus Kraist, Iwaclah Lal, ac fohnlah luhn wosasuc Lal tiac sukokyak in Pwacpuhl, Puk luhn Mormon pa infulwen ma nuhkwewa ke tuhkweni luhn mwet Israel. Ke srihpac se inge, fin wacngihn Puk luhn Mormon, olwelah se tuhkweni luhn Mwet Israel e tiac ahkkolukye.”¹⁷

Lwelah ngan ahksahfye ke kahs luhn Mwet Lahngo ke El luti mwet Nephite ke mwe ahkinsewowo olwelah: “Kowos tuhlihk nuhtin mwet pahluh; ac kowos mwet Israel; ac kowos ma ke wuhlweacng se suc Pahpah El tuh oraclah nuh sin pahpah tomowos, fahk nuh sel Abraham: Ac ke fihtac lom kain in mwet nuhkwewa fin facluh ac fah ahkinsewowoyeyuck.”¹⁸

Nga fahkwack ma inge lah kuht tamuhlwel ac tahmtahel nuhtin God, fihl nahtuhl Abraham, lohm sin mwet Israel. Kuht oracni tuhlihk Israel ke pacl sahflah ac oruh ma inge ke Puk Luhn Mormon—sie puk lah, kapsra yurun Nguhn luhn Leum, pa ip kuh emet in eklac nuh wo. Kuht kolyuck sin mwet pahluh luhn God, Prestuhn Russel M. Nelson, suc kol toeni luhn Israel ke pacl lasr ah. Puk luhn Mormon pa pwacye. Ekuhllah moul luhk uh. Nga olwelah nuh sum, kacl Moroni ac mwet pahluh ke pacl meet ah, lah e kuh pac in ikihlkomlac.¹⁹ Ke inen Jisus Kraist, amen.