Ya Kom Lungse Kwela?

Mahlwem ekahsr tari ah, tuhlihk mokul se nahtuhsr wi tahfweyacl ke misin lal ah ahksahfye lutlut laltahl ke tuhlihk mokul se nahtuhsr ah puhlakihn muhnahslah luhn insifacl. Siena puhla lal ah; met wihn na el tiac kuh in puhla lacsac ke pahol; lohohl mahtoltol lac. Lacsac ke muhtal muhtwacwacack in uli. Upac nuh sel in sramsram. El etacack lah oasr elyah. Ma se el tiac etuh uh pa el nihkihn lah el strokyak oasr elyah na upac sikyak nuh ke acn tolu ke prein lal ah. El muhtwacwacack in elyah ke ip ke mahnol uli tiac kuh in mukwiwi. Fuhkah saiyac uh mwet strok se in eis kahsruh ma kuh in oraclah ma usrnguck nuh ke onweyucklac la uh. Mwet luhlahlfongi se weluhl ah sro tiac kahkasrihk in kahsrwel. Tukun el pahngonwack 911, el sang mwe ahkinsewowo se nuh sel. Usrnguckiyac, stosah in ono ah fototomwe nuh yohrohlos ke minit lihmwekohsr yacna.

Tukun tuhlihk se nahtuhsr uh suhlahklahk utucklac ne lohm ono ah, mwet orekma se we suhlahklahk kahsruh elyah sac ac sulwaclah lah enenuh in ituckyang ono nuh selma kuh in lihksrweni na fohlohkohnwack acn ma tiac kuh in mukwikwi ah.¹ Ohinge, fin tena strok se pa luhn tuhlihk se nahtuhsr ah, na kuh in oasr elyah sikyak tok ke ono ah, suc pa e srah prein lal ah. Tuhlihk se nahtuhsr enenuh in sulwaclah. El sulwaclah tuh elacn eis ono. Lusen mahlwem puhs ac laslas ma enenuh in orek nuh sel oruh el kwelac na pwacye, sahflahiyac ah tuhlihk se nahtuhsr ah fohlohk ac ahksahfyelah misin lal tukun ma sikyak ke strok se lal ah lihksrweni na fohlohkihnyucklac.

Pahpah Lucng el kuh liki nuhkwewa ac etuh liki nuhkwewa. El etuh elyah luhn mahnosr ac ikoacsr. El etuh ngal luhn mahnosr ke srihpwen mas, mahtohoh, ongaiyac, kuh elyah ke isuslac. El kahlwem pac ke elyah luhn puhla ac nuhnak suc pa sahngweng, muhkwena, keok, kuh maskihn muhsahllah luhn mwe nuhnak la. El etuh pac mwet suc ma keokkihn sesuwohs la kuh suc ma ahkkohsyeyuck.

Ke moul uh kuht srihkeyuck in liye lah kuht kuh in sulwaclah ma wo liki ma koluk. Elos suc ma liyacacng masap Lal, elos fah muhta yurun God “ke sie ohiyac engan wacngihn sahflahiyac.”² In kahsrwe kuht ke kapkapwack lasr in muh oacna El, Pahpah Lucng el sang kewa kuh ac etuh lal nuh sin Wen Nahtuhl, Jisus Kraist. Wacngihn sie mas ke mahno, puhla kuh nuhnak, kuh nguhna ma Kraist el tiac kuh in onwelah.³

Ke luti kawihl luhn Mwet Lahngo, ma suhmuhslah ahkuhtweyac ma usrnguck puhkantwen sikyak ma Jisus Kraist el orekmakihn kuh fuhlwactlacna Lal in ahkkweyelah mwet ma kweokkihn ikoaclos.

Wosasuc lal John ahkuhtweyac sramsram se ke sie mokul suc muhtwacnglah muhnahslahiyacn mas lal ke yac 38.

“Jisus el liye lah el oan we, ac el etu lah mukul sac mask e pacl na loeloes; ouinge el siyuk sel, “Ya kom lungse kwela?”

Mwet mas sac tohpohkohl fahk lah wacngihn mwet lal in kahsrwel ke el enenuh na pwacye.

“Jisus el fahk nu sel, Tukakek, srukak mwe oan kiom, ac fahsr.

“Namukul sac kwela in pacl sacna, ac el srukak mwe oan kial ac mutawauk in fahsr.”⁴

Nuhnak muhnahs nuhnkuh ke inmahsrlon ma luo lah puhtahkah mokul se inge keok uh wacngihn kahsruh el eis 38 ac fuhkah saiyacn kwelac lal ke pacl se na ma Mwet Lahngo el eis pacl lal. Onweyac ah “sa na pwacye.”

Sie pac, muhtwacn se maskihn mihsen srah ke yac [Singucul Luo] 12, suc “sislah mani [lal] nuhkwewa nuh sin mwet ono, … fahsryak nuh tohkohl Jisus, ac kahlyac puhluhn nuknuk lal ah; ac kihtin pacl ah na mihsen srah se lal ah tui. …

“Na Jisus el fahk, Oasr mwet se kahlyuwi: mweyen nga pula mu oasr ku luk som likiyu.

“Mutan sac akilen lah eteyukyak ma el oru uh, el … fahkak nu sel ye mutun mwet nukewa … lah mas lal wanginla in pacl sacna.”⁵

Ke kahsruh Lal, Kraist el luti lah oasr kuh Lal nuh ke mahno ac ikoac. Kuht tiac kuh in nuhnuhnkuh pacl se ma e sikyak ke Kraist elac onwelah mas koluk luhn mahnosr kuh ikoacsr uh. Onweyucklac uh sikyak fal nuh ke luhngse Lal ac lahlmwetmwet lal. Lun ma suhmuhslah, kuhtuh keok inmahsrlon yac singucul, kuhtuh ke lusen moul laltahl nohfohn. Mas luhn moul kawihl lasr uh kuh in ahkwoyelah ac ahkyohkye luhlahlfongi lasr sel God uh. Tuh ke kuht lwelah in eisaclwacng Kraist nuh kac, El ac fah ahkkweye kuht pacl nuhkwewa in nguhn in muh oasri kuhiyacsr in muhtwacnglah ma ahktoasrye kuht.

Sahflahiyac ah, kuht etuh lah mas koluk nuhkwea lasr, mihsen mas, kuh suhfas lasr fah onweyucklac ke pacl se kuht ac Sifil Moulyak uh. Pa ingacn mwe sang se nuh sin mwet nuhkwewa ke Iwaclah luhn Jisus Kraist.⁶

Jisus Kraist el kuh in ahkkweyelah yohk liki na mahnosr. El kuh in ahkkweyelah nguhnasr pac. Ke ma suhmuhslah kuht luti lah Kraist el ahkkweyelah nguhnihn mwet ma muhnahs ac kwelac.⁷ Ke kuht nuhnkuh ke ma sikyak inge, finsrak ac luhlahlfongi lasr ke kuh luhn Mwet Lahngo yohkwelik ke ahkinsewowoye moul lasr uh. Jisus Kraist el kuh in ekuhllah insiyacsr, ahkkweye kuhtlac liki ma sikyak ke sesuwohs kuh ma ahkkohsyeyuck kuht puhlakihn, ac ahkfokokoye kuhiyacsr in muhtwenglah ma wacngihn ac insengal, ac use mihslac in kahsrwe kuht muhtwacnglah mwe sruhf ke moul lasr, ahkweye kuht ac nuhnak lasr.

Kraist el kuh in ahkkweye kuht ke kuht oruh ma koluk. Kuht oruh ma koluk etuh lah kuht kuhnaoslah sie masap luhn God.⁸ Ke kuht oruh ma koluk, fohkfohklah nuhngasr. Wacngihn kuhtwena ma fohkfohk kuh in nuh ke tohkohrahi luhn God.⁹ “Forlah eklac liki ma koluk [pa in] ahkkweyelah nguhna.”¹⁰

Pahpah God el etuh lah kuht ac oruh ma koluk, tuh El ahkolah inkacnwek nuh sesr in sifil moulyak. Elder Lynn G. Robbins el luti: “Auliyak uh tiac plwacn in ayaol se luhn God ke ma se inge kuht fah tahfonglac. Auliyak uh pa plwacn Lal, etuh lah kuht fah oruh.”¹¹ ke kuht oruh ma koluk, oasr pacl wo lasr in sulwaclah ma wo liki ma koluk. Kuht sulwaclah ma wok e kuht auliyak tukun kuht oruh ma koluk. Ke srihpacl Jisus Kraist ac ke iwaclah in kihsackuhnlah Lal, kuht kuh in sifil moulyak liki ma koluk ac fohlohkihnyucklac nuh ye muhtuhn Pahpah God, fin kuht auliyak. Ahkkweyeyacn nguhna uh tiac oreklac sin Mwet Lahngo muhkwena—enenuh in oasr kuh sifil moulyak luhn Mwet Lahngo ac auliyak na pwacye liki ma koluk. Nuh sin suc ma sulwaclah in tiac auliyak, eltahl macnsis kihn ahkkweyucklac ma Kraist el sang. Nuh selos, ac pa na ngacn wacngihn sifil moulyak oreklac.¹²

Ke nga sramsram nuh sin mwet sahyac ma suk in auliyak, nga kaksakihn lah mwet suc ma moulkihn ma koluk uh upac nuh se in oraclah sulwaclah suwohs. Nguhn muhtahl fah som luhkwelos, ac kwacna upac nuh selos in orlaclah sulwaclah ma ac fah usacltahl in fototoyang nuh sin God. Eltahl fah lain sun mahlwem kuh finne yac, mwekihn kuh sahngweng ke ma sikyak ke ma koluk lalos. Eltahl ac kwacna puhla lah ma eltahl tiac kuh in ikihlyucklac kuh nuhnak muhnahs nuh kac. Nga kwacna lohng eltahl akacsruhi sahngweng laltahl fin mwet eltahl luhngse etacack ma eltahl oruh uh, eltahl ac tui te sulpac luhngse eltahl kuh som luhkweltahl. Ke eltahl nuhnkuh ma inge, eltahl sulwaclah in mihslac ac kohllah paht lwen in auliyak lalos. Eltahl tahfonglac in puhla muh wo in tiac auliyak ingena eltahl in muh tiac ahkngalye pac mwet eltahl luhngse. Ma eltahl nuhnkuh uh pa wo in keok tukun moul se inge liki na in som oruh auliyak se ingena. Tamuhlwel ac tahmtahel, tiac na nuhna wowo se in kohllah paht lwen in auliyak uh. Ma koluk uh kwacna orekmakihn sahngweng in lusrohng kuht liki orekma suhlahklahk lasr nuh ke luhlahlfongi lasr kacl Jisus Kraist.

Ke mwet sacohk lasr sun ahksuwohsye ohiyac koluk lalos, ke elos sahp puhlakihn ngal upac, elos kwacna luhngse kahsruh mwet koluk se ma auli yohk in eklac ac fohlohkyang nuh yurin God. Ahok, ahkkweyeyucklac luhn nguhna sa kihluckyak ke mwet koluk se fahkuhlwack ac rauniyucklac sin mwet luhngse eltahl ac kahsrweltahl in sislah ma koluk lalos. Nuhnak muhnahs esam lah Jisus Kraist el fuhlwactlacna mweyen El oacyacpac ahkkweyelah mwet koluk suc foracng nuh Sel.¹³

Elder Boyd K. Packer el fahk: “Nguhn lasr uh kuhnaosyucklac ke kuht oraclah tahfonglac ac oruh ma koluk. Tuh sahyacn ip luhn moul in ikoac ac mahno lasr uh, ke ahkfahsryeyacn auliyak uh sahflah, wacngihn kuhretyuck ac oan ke srihpen Iwaclah luhn Jisus Kraist. Olwelah sac pa mwet ma auliyak ke ma koluk lalos eis nuhnak muhnahs, ac Leum el fahk lah el tiac sifil esamuhlos. [Doctrine and Covenants 58:42].”¹⁴

Ke kuht auliyak “ke insepwacye,”¹⁵ “kihtihnmihsenge fah plwacn wolacna luhn molwelah fah utuhkoht” ke moul lasr uh.¹⁶ Mwet Lahngo fah onwekuhtlac.

Misineri se wi tuhlihk se nahtuhsr ah ac mwet orekma ke ono ma kahsrwelah tuhlihk se nahtuhsr ma strok ke misin laltahl ah suhlahklahk na mukwilac in kahsruh. Tuhlihk mokul se nahtuhsr ah sulwaclah in eis ono ma ac kahsruh strok lal ah. Ma sikyak ke strok se lal ah kuh in eklac pwacnuhllah nuh ke moul luhlah lal. Oacpacna nuh ke, kuht fin sa in auilyak ac us Iwaclah luhn Jisus Kraist nuh ke moul lasr, na sa pacna kuht eis kwelac liki ma sikyak ke ma koluk lasr uh.

Prestuhn Russell M. Nelson el sang mwe solsol se inge: “Fin kom tihllac liki wosasuc, … Ngac suli kom … in nuhnak muhnahs fohlohkoh. Lah meac ngac elyah lom, lah meac ngac ma upac lom, oasr acn se ahkoeyucklac nuh sum, ke Alu luhn Leum. Kom ac fihl sonna isuslac uh fah ahkinsewowoyeyuck ke ohiyac lom ingena in fohlohk nuh ke inkacnwek in olwelah.”¹⁷

Unweyucklac luhn nguhnasr enenuh kuht in eiskuhtyang sifacna nuh ke ma Mwet Lahngo el ahkolah. Kuht tiac enenuh in kohllah paht. Kuht enenuh in oraclah mihsenge! Orekma ingena in muh nguhna uli lasr in tiac tulokihnyac kapwack ma pahtpaht lom. Ke nga sramsram, fin kom puhla muh enenuh kom in siyuck ke nuhnak muhnahs sin sie mwet ah ke tahfonglac lom, nga suli kom in oruh oacna. Fahk nuhseltahl ma kom oraclah an. Siyuck ke nuhnak muhnahs laltahl. Fin kom oraclah ma koluk ma ahkkolukyelah suwohs lom ke tempuhl, nga suli kom in sramsram nuh sin pisap lom an mihsenge. Nimet kohllah paht.

Tamuhlwel ac tahmtahel wiyuck, God el Pahpah kuhlwacng tuhmasr Inkusrao. El sang kwewa kuh ac kahlwem lal nuh sin wen sacohk nahtuhl, Jisus Kraist. Ke Srihpacl, mwet nuhkwewa fah unweyucklac sie lwen ke mas nuhkwewa ke mahnolos ne tok. Ke srihpen Iwaclah luhn Jisus Kraist, fin kuht sulwaclah in auliyak ac ekuhllah insiacsr kewa nuh sin Mwet Lahngo, El fah unwelah nguhasr. Unweyucklac se ingacn kuh in muhtwacwacack inge pacna. Sulwaclah uh ma lasr. Yac kuht luhngse kwelac?

Nga fahkwack lah Jisus Kraist el molwelah misact tuh kuht kuh in kwelac. Tuh kuht enenuh in sulwaclah in eis ono in unweyucklac se ma El use. Eis mihsenge. Nimet kohllah. Ke inen Jisus Kraist, amen.