Fahsruh, Lohng Puhsrwen Sie Mwet Pahluh

Sramsramkihn Prestuhn ke Alu luhn Jisus Kraist luhn Mwet Luhlahlfongi ke Lwen Sahflah, Leum El ahkkahlwemye:

Ma kunacn Prestuhn ke ohfuhs Pristut Fuhlwact uh pa in karihngihn ahkfahsryeyacn alu na fohn se, ac in oacna Moses.

El tuh sie mwet liyactwen, sie mwet in fahkwack, sie mwet in luhngaslah, ac sie mwet pahluh, mwe sang luhn God kwewa oasr sel suc El sang nuh sin sifac luhn alu uh” (liye Doctrine and Covenants 107:91–92).

Nga ahkinsewowoyeyuck in wi liye kuhtuh sin mwe sang luhn God nuh sin mwet pahluh Lal. Nga kuh in akacsruhi nuh suwos ke sie ma usrnguck sikyak? Nuh ke kunohkohn luhk ingena, nga kahsruh ke ahkkahlwemyeyacn ac enenweyacn acn tempuhl in oan kac ke pacl fahsruh uh. Tukun Septempuh 11, 2001, krohsiyac utyak nuh ke mahsrol luhn acn U.S. eklac kuhtuh oakwuck kac uh. Pa sikyak ke, eislah luo nuh ke tolu ao ke mempucr ke Alu uh in krohsiyac acn Vancouver, Canada, ke elos ac som nuh Seattle Washington Tempuhl. Prestuhn Gordon B. Hinckley, Prestuhn ke Alu ah pacl sacn, ngihsre tuh tempuhl fin acn Vancouver fah ahkinsewowoye mempucr ke Alu uh. Sukok se tuh ahkfahsryeyuck ke acn sac, ac tukun kuht konwacack kuhtuh ma luhn Alu uh, pucs acn sahyac ma tiac ma luhn Alu uh ah oacyacpac orek lohlngohk kac.

Sie ipin acn kahto ma itucklac tari luhn alu tahfweyucklac nuh ke Trans-Canadian Highway konweyuckyak. Ipin acn se inge fihsrwacsr acn in utyak la, nwacnwaclah ke sahk pine Canada na kahto, ac acn na wowo se ma kuh in liyeyuck sin tausin mwet yucwot yucme ahliki.

Kuht ahkkahlwemye ipin acn se inge wi petsac ac macp kac ah ke miting in mahlwem luhn Tempuhl Sites Kihmiti. Prestuhn Hinckley el oakiyac tuh kuht in oakiyac ukwe na kantrack ah ac ahksahfyelah in fal nuh ke ma konweyuckyak kac uh. Ke Tisacmpuh ke yac sacn, kuht fohlohk fahk nuh sin kihmiti ah lah sahflah lohlngohk lasr kac uh, ac kuht suk molo ah pac in ahkkweyeyucklac. Tukun lohng mwe fahkwack inge, Prestuhn Hinckley el fahk, “Nga puhla muh nga enenuh in liye ipin acn se inge.”

Tok kuhtuh ke mahlwem sac, lwen luo tukun Krismas, kuht som nuh Vancouver weluhl Prestuhn Hinckley; Prestuhn Thomas S. Monson; ac Bill Williams, mwet kamtuh tempuhl se. Kuht tuh ohsun sel Paul Christensen, prestuhn ke stek se we, suc suhpwekuhtlac nuh ke acn sac. Lwen sac luhman sroksrok ac olahlah, tuhsruhk Prestuhn Hinckley el srolah liki stosah ah ac muhtwacwacack fahsr raunweack nohfohn ipin acn sac.

Tukun eis pacl lasr in muhta ke acn sac, nga siyuck sel Prestuhn Hinckley lah elac luhngse liye pac kuhtuh acn sahyac ma tuh motkoeyuck ah. El fahk muh ahok, el luhngse. Kom liye, ke kom liye acn sahyac uh, kuht kuh in oraclah sulwaclah lasr kac lah piyac kac ma fal uh.

Kuht oraclah raun na luhlahp raunweack acn Vancouver liyaclah kwewa ma oasr ke acn sahyac ah, tari na kuht forlah fohlohk pacna ne ke acn se kuht muhtwacwack kac ah. Prestuhn Hinckley el fahk, Pa inge acn se ma kahto uh”. Na el siyuck, “Kuht kuh in som ne ke lohm in miting luhn-Alu ma sahp mael sie-tahfuh ahkosr [0.4 km] lusac na ngi?”

“Ahok, Prestuhn,” kuht tohpohkohllah.

Kuht sulpac sroacng nuh ke stosah ah ac som ne ke siskacn lohm in miting sac. Ke kuht tui sun lohm alu sac, Prestuhn Hinckley el fahk, “Kuhruhlac nuh lacsac inse ngi,” kuht kuhruhlac ac ukwe na sihm ma oan ke inkacnek ah. Acn sac kuht muhtwacwack na kais kuhtuh mayak na lucng.

Ke stosah ah sun muhtuhn tohktohk sac, Prestuhn Hinckley el fahk, “Tulokihnyac stosah uh, tulokihnyac stosah uh.” Na el srihsrsrihsr nuh lacyot nuh ke ipin acn se ac fahk, “Faskah acn se inge? Pa inge acn se ma tempuhl uh ac oan kac. Pa inge acn se ma Leum El ke tempuhl in oan kac. Kom kuh in sruokyac?”

Kuht tiacna ngwetngwet nuh ke acn se inge. Loeslac lac nuh ke inkacnek luhlahp ah, ac acn se inge tiac na kuhkwackihnyuck. ke kuht tohpohkohl kuht tiac etuh lah, Prestuhn Hinckley el srihsrsrihsr nuh ke acn sac ac sulpac fahk, “Pa inge acn se ma tempuhl elac oan kac uh.” Kuht muhta kihtin pacl na som ne lohm aksohk ah in fohlohk na lohm sesr.

Lwen tohkoh ah, nga ac Tamuhlwel Williams pahngonyuck nuh ke ohfohs lal Prestuhn Hinckley ah. El na sruhlwaclah ma nuhkwewa ke sie ipin pwepuh: inkacnek, lohm alu, som nuh lacsac,X mahkiyac ipin acn se luhn tempuhl. El siyuck lah mac kuht konwacack. Kuht fahk nuh sel muh el tiac kuh in sulwaclah acn na upac kuhtuh se. Acn sac ma luhn mwet tolu: sie ma Canada, sie ma India, ac sie ma China! Ac wacngihn na enenweyac kuh kuhpahsr ke ma luhn alu in orek kac.

“Koacl, srihke kuhiyowos,” el fahk.

Na muh ma usrnguck sikyak. Ke mahlwem ekahsr ma lac lasr pa acn sac, ac tohkohyang city luhn Langley, British Columbia, ituckyang kuh la in muhsahelah tempuhl sac we.

Petsac

Vancouver British Columbia Tempuhl

Ke nga nuhnkuh ke atac se sikyak inge, puhlakihn mongfihsrwacsr ke etuh luhk lah nga ac Tamuhlwel Williams eslah lutlut lasr ac orekma yac ke muhsah lohm luhlahp ac oraclah luhmahlah ke atacn tempuhl, tiac sie lutlut ke kamtuh kuh orek lohm ma prestuhn Hinckley el wi, tuh oasr sel sie ma na yohk srihpac—pa mwe sang luhn mwet pahluh liyactwen. El kuh in petsacelah lah piyac acn se ma tempuhl luhn God e oan we uh.

Ke Leum El sapkihn Mwet Luhlahlfongi met ah ke we se inge in muhsaheack sie tempuhl, El fahk:

Tuh sie tempuhl fah muhsahiyucklac ke Inel fal nuh ke pactuhn ma el ahkkahlwemye nuh selos.

El fahk lah fin mwet Lal tiac muhsahelah fal nuh ke pactuhn ma el ahkkahlwemye nuh selos… , El ac fah tiac eis ke paholos (Doctrine and Covenants 115:14–15).

Oacna Mwet Luhlahlfongi met ah, pa pacna kuht mihsenge: Leum El ahkkahlwemye ac tahfwelah in ahkkahlwemye nuh sin Prestuhn ke Alu uh ke pactuhn suc tohkohsrahi luhn God pa in kol kuht ke moul lasr ke pacl mihsenge. Ac, ke kais sie, El sang kolyuck lah kuht kais sie ac kol fuhkah moul lasr, lah ohiyacsr sahp ac kuh in ahkinsewowoye Leum.

Ke Eprel 2013, nga sramsram ke kampare in ahkolah pwelucng nuhkwewa ke tempuhl in ahkkweye lah kuh in tu na kuh lain pahkah ac ma upac ma suc fah tuhkuh fungul. Tuhsruhk pwelucng uh pa muhtwacwacackiyac uh. Tempuhl se el oreklac ke puhlak puhkantwen, tuhkweni akiyucki fal nuh ke pactuhn luhmweyucklac tari. Fin moul eklac oacna sie tempuhl kais sie sesr ac srihke in muhsahelah oacna ke lutiyuck sin Leum (1  Corinth 3:16–17), kuh kuh in sifacna siyuck sesr, “Puhlak fuhkah kuht enenuh in orekmakihn tahkuhnlah in oruh moul lasr uh kahto, wolacna, ac lusrong pahkah luhn facluh?”

Kuht kuh in konwacack top ke kihsensiyuck soko inge ke Puk luhn Mormon. Ke ma sihmlac ke Puk luhn Mormon, Mwet Pahluh Joseph Smith el fahk, “Nga fahk nuh sin mwet lili lah Puk luhn Mormon pa puk se ma pwacye emet sin kuhtwena puk fin facluh, ac pa yot in fihl luhn alu lasr uh, ac sie mwet ac kuh in fototoyang nuh sin God ke el muhta na ke mwe luti luhn ma inge, liki na kuhtwena puk sahyac” (Ikucslah ke Puk luhn Mormon). Ke sramsram in Ikucslah ke Puk luhn Mormon, kuht lutiyuck lah elos suc eis mwe ahkpwacye wolacna sin Nguhn Muhtahl lah Puk luhn Mormon pa kahs luhn God fah oacyacpac etuh ke kuh se pacna inge lah Jisus Kraist pa Mwet Lahngo luhn facluh, lah Joseph Smith pa mwet fahkwack ac mwet pahluh Lal ke Sifil Fohlohkihnyuckyak, ac lah Alu luhn Jisus Kraist luhn Mwet Luhlahlfongi ke Lwen-Sahflah pa tohkohsrahi luhn Leum suc sifilpac akwucki fin facluh.

Pa inge kuhtuh sin puhlak yohk srihpac nuh ke kais sie luhlahlfongi ac testimony:

1. Jisus Kraist pa Mwet Lahngo luhn facluh.

2. Puk luhn Mormon pa kahs luhn God.

3. Alu luhn Jisus Kraist luhn Mwet Luhlahlfongi ke Lwen-Sahflah pa tohkohsrahi luhn God fin facluh.

4. Joseph Smith el mwet pahluh se, ac oasr mwet pahluh moul fin facluh mihsenge.

Mahlwem sasuc inge, nga porongo sramsram nuhkwewa ke toeni luhlahp suc oreklac sel Prestuhn Nelson ke pacl se emet lal in ekihn sie Mwet Sap. Ohiyac se inge ekuhllah moul luhk. Ke nga lutlutkihn ac nuhnkuh yac 34 oracni kwewa kahs in lahlmwetmwet lal Prestuhn Nelson, oasr srihpac yohk ac kahlwem se tuhkuh ke mwe luti lal inge. Kais sie ma yohk srihpac inge kapsrweyuck nuh ke puhlak fwackyuck ah kuh sie pacna ki in muhsahi puhlak nuh ke ma kunacsr ke tempuhl. Ma inge pa luhlahlfongi ke Leum Jisus Kraist, auliyak, pacptaislac ke tihli otyak in elah ma koluk, mwe sang luhn Nguhn Muhtahl, sukohsohklah luhn mwet misact ac orekma luhn tempuhl, ahkmuhtahlye lwen Sabbath, muhtwacwack orekma ke sie ngwetngwet kahlwem nuh ke kena lom, muhta na ke inkacnek in olwelah. Prestuhn Nelson el sramsramkihn ma inge kwewa ke luhngse ac kuhiyacl.

Yot insroasrihk ac puhlak muhsahiyuck ke Alu uh ac nuh ke moul lasr uh pa Jisus Kraist. Pa inge Alu Lal. Prestuhn Nelson pa mwet pahluh Lal. Mwet luti lal Prestuhn Nelson ahkkweyelah ac ahkkahlwemye ma ac wo se nuh sesr ke moul ac ohiyac luhn Jisus Kraist. El sramsram ke luhngse ac etuh ke atacn Mwet Lahngo ac ke orekma Lal. El oacyacpac oswelah testimony ke kunohkohn muhtahl luhn mwet pahluh moul—Prestuhn ke Alu—ye kohkoh luhn suc kuhlwacnsuhpacl.

Inge, mihsenge, pacl wowo lasr in ahkkweye el muh el mwet pahluh moul se luhn Leum fin facluh. Kuht pahlah tari ke pacl se ahkkweyeyuck mwet kol ke Alu uh ke pactuhn muhtahl se pa in kohlwack paho in ahkkahlwemye srui ac taptap lasr. Kuht oruh ohinge kihtin pacl tari ah. Tuhsruhk ahkkweyeyuck na pwacye uh som yohk liki na in srasra po ma. Oacna ke sihmlac ke Doctrine and Covenants 107:22, Prestuhnsi Se Met fah tahpuhkyuck ke puhlaik, luhlahlfongi, ac pruhe ke alu. Kuht orekma pwacye nuh selos, ac na pruhe ke tuhtahflah luhn mwe ahkinsewowo luhn Leum nuh sel.

Ke nga nuhnkuh kacl Prestuhn Russell M. Nelson, nga eis puhla wok e kahs luhn Mwet Lahngo ke El fahk, lah fin mwet Lal porongo puhsrwen kahs Lal ac nuh ke puhsrwen mwet kuhlwacnsap Lal ma el srihsrngiyac in kol mwet Lal, elos ac fah tiac moklweyuck liki acn elos oasr kac (Doctrine and Covenants 124:45).

Lihpsre ac porongo mwet pahluh moul fah nuhnkweyuck, finne ke ma sikyak ke moul-eklac in moul lasr. Kuht ahkfokokoyeyuck. Kuht ahkkweyeyuck ac puhlaik liki met ah. Kuht lohng kahs luhn Leum. Kuht puhla luhngse luhn God. Kuht fah etuh lah kuht ac tahkuhnlah fuhkah moul lasr uh ke srihpac.

Nga luhngse ac ahkkweyacl Prestuhn Russell M. Nelson ac elos sahyac suc pahngpahng mwet pahluh, mwet liyactwen, ac mwet fwackyuck. Nga fahkwack lah oasr mwe sang Leum el sang nuh sel fin sifacl, ac nga wi liye lah kuht ahkfokokoye srihkasrak lasr in lohacng ac fungyang nuh ke puhsrwen mwet pahluh ke moul lasr, moul lasr fah muhsahiyuck fal nuh ke pactuhn muhtahl luhn Leum, ac kuht fah kosracni mwe ahkinsewowo sahflah uliyucki nuh sesr. Solsol se inge tahfweyucklac nuh sin nuhkwewa. Fahsruh, lohng puhsrwen mwet pahluh; ahok, tuhkuh nuh ke Kraist ac moul. Ke inen Jisus Kraist, amen.