Pahpah se

Ke facl sin nguhn, kuht isuslac oacna nguhn nuh sin Pahpah Ninac Inkuhsrao ac muhta Yohrohlos oacna sie sucu.³ Elos etwekuht, luti kuht, ac luhngse kuht.⁴ Kuht ke na pwacye in oacna Pahpah Lucng. Ne ohinge, in oruh, kuht ac enenuh in:

1. Eis ahkfuhlwact, moul in nguhn, ac mahno;⁵

2. Macruhtlac ac oraclah sucu ke kuh luhn seal luhn pristut;⁶ ac

3. Eis kwewa etuh, kuh, ac ohiyac wolacna.⁷

Ke srihpen kuht enenuh in oruh ma inge kwewa, Pahpah el orwaclah plwacn se ma lwelah nuh sesr fin ohiyac fal,⁸ in eis mahno ma kuh in eis nguhn ac ahkfuhlwact ke Sifil Fohlohk; macruht ac akiyac sucu ke moul ma pahtpaht kuh, mwet luhlahlfongi suc ma tiac oasr pacl wo se inge la, tukun moul in ikoac;⁹ kihluck nuh ke suwohswohs; ac sana fohlohk nuh yurin Pahpah Ninac Inkuhsrao ac muhta Yohrohlos ac sucu lasr ke kampare ac engan wacngihn sahflahiyac.¹⁰

Ma suhmuhslah se inge pahngpahng plwacn in mowelah.¹¹ Kuht tarilac ke plwacn se inge lah ke utuckuh nuh sesr, kuht kahskahs ke engan.¹² Kais sie sesr lwelah ke ohiyac luhn plwacn sacn, wi puhla ac mwe srihkasrak ke moul in ikoac ma fah kahsrwekuht ahkkapye ohiyac wolacna.¹³

Ke pacl luhn moul in ikoac, Pahpah Lucng el use nuh sesr ma kuht enenuh in orwaclah ke plwacn Lal. Pahpah el orwaclah Jisus Kraist in luhmahl,¹⁴ ac sang nuh Sel kahsruh wolacna in ahksahfye orekma in mahno Lal. Pahpah Lucng el fah oacyacpac kahsruh kais sie sesr fin kuht ac kampare in liyacacng masap Lal.¹⁵ Pahpah el use nuh sesr kuh.¹⁶ Ac moul lasr an in Pahol, ac “lwen lasr etweyuck” ac tiac puhs.”¹⁷ Ac El ahkkahlwemye lah tok ma nuh kwewa orekma nuh ke ma wo nuh selos suc luhngse El.¹⁸

Pahpah Lucng pa use nuh sesr mongo nwacsr lwen nuhkwewa,¹⁹ suc oasr kwewa mongo kuht kang ac fokoko kuht enenuh in sruokyac masap nuhkwewa.²⁰ Pahpah el use nuh sesr mwe sang.²¹ El lohng ac topuk pruhe lasr.²² Pahpah Lucng El kol kuht lac liki ma koluk ke kuht lwelah Nuhsel uh.²³ El kahsrwe kuht ke kuht kweok.²⁴ Ne ohinge, mwe kihte wo nuhkwewa lasr tuhkuh sin Pahpah.²⁵

Pahpah Lucng El kol kuht ac use mwe srihkasrak kuht enenuh fal nuhke kuh, muhnahs, ac sulwaclah lasr tuh kuht in kuh in isus fahko wo.²⁶ Pahpah el kai kuht ke pacl enenuh mweyen El luhngse kuht.²⁷ El sie “Mwet in Kahsruh,”²⁸ suc ac fah use kahsruh nuh sesr fin kuht siyuck.²⁹

Pahpah Lucng pa suhpwacma kwewana kuh ac mwe sang luhn Nguhn Muhtahl nuh ke moul lasr.³⁰ Ke mwe sang luhn Nguhn Muhtahl, kaksak—kuh lahlmwetmwet, kahlwem, ac kuh—luhn Pahpah kuh in muhta in kuht.³¹ Fin kuht ac kampare in ahkkapye ke kahlwem ac pwacye neke muhtahsr liye mwe kaksak luhn God, Pahpah Lucng el fah suhpwacma Olwelah luhn Nguhn Muhtahl sealikuhti nuh ke moul ma pahtpaht ac ahkkahlwemye Muhtahl nuh sesr—oacna sie ke moul se inge kuh tok uh.³²

Ke moul ke facl sin Nguhn, Pahpah Lucng El muhtwacwacack in sang Nguhn Muhtahl ac suhpwaclah misineri nuh selos suc enenuh wosasuc. El topuk pruhe ac kahsrwelos suc srihklac eisyacn akwuck in molwelah uh.³³

Pahpah el ahkmoulyelwack Jisus Kraist ac sang kuh nuh Sel in kuhtanglah misac,³⁴ suc pa ohiyac se ma kuht eis mahno kaul uh. Molwelah ac Sifil moulyak luhn Mwet Lahngo fohlohkihnkuhtme nuh yurin Pahpah, acn suc kuht ac fah nuhnuhnkweyuck sin Jisus Kraist we.³⁵

Elos suc luhlahlfongi ke “ohiyac wo, ac pahkotwen, ac luhng kuhlwacng luhn Nguhn luhn Messiah”³⁶ fah eis ahkfuhlwact luhn mahno oacna Pahpah³⁷ ac muhta Yohrohl “ke acn engan wacngihn sahflahiyac.”³⁸ We, Pahpah El fah elac sronin muhtahsr³⁹ ac kahsrwe kuht in muhtwacwacack ke fuhfahsryucsr lasr in tuhkuh oacna El.

Kahlwem lah, Pahpah Lucng el oasr pacl nuhkwewa in kahsrwe kuht.⁴⁰

In tuhkuh oacna Pahpah, kuht enenuh in ahkkapye akucl ke ohiyac Lal. Ma wo ac kuh luhn Pahpah Lucng ac oasr ma inge kac:

• Pahpah el “Wacngihn sahflahiyac ac Ma pahtpaht.”⁴¹

• El wo, kuhlwacng, pahkotwen, tiac sa in malat, ac kena ma wo muhkwena nuh sesr.⁴²

• Pahpah Lucng el Luhngse.⁴³

• El sruokyac olwelah lal.⁴⁴

• El tiacna ekyek.⁴⁵

• El tiac na kikiacp.⁴⁶

• God El tiac oru mwet nukewa oana sie.⁴⁷

• El etuh ma nuh kwewa—ma somlah, ingena, ac pacl fahsruh—ekenamuhtwacwackiyac ah.⁴⁸

• Pahpah Lucng el lahlmwetmwet⁴⁹ yohk liki kuht nohfohn.⁵⁰

• Oasr sin Pahpah kuh nuhkwewa⁵¹ ac oruh kwewa ma El kuh in sang nuh insiyacl in oruh.⁵²

Tamuhlwel ac tahmtahel, kuht kuh in luhlahlfongi kac ac luhlahlfongi Pahpah. Mweyen oasr ohiyac wo ma pahtpaht lal, Pahpah Lucng el kuh in liye ma kuht tiac kuh. Engan orekma, ac kaksaklal pa in acse in pahselah moul in nguhn ac kampare.⁵³ Ma nuh kwewa El oruh ma nuh ke ma wo lasr. El “kena engan ma pahtpaht[lasr] yohk liki na ma [kuht] oruh.”⁵⁴ Ac El “fah tiac lwelah nuh [sesr] in puhla sie puhluhn pacl upac liki na in enenwe [kuht] na pwacye kuh ke elos [kuht] luhngse.”⁵⁵ Ke ma sikyak an, El lohacng in kahsrwe kuht in kihluckyak, tiac nuhnuhnkuh ac ahkkolukye kuht.⁵⁶

Oacna tuhlihk mukul ac muhtwacn nguhn nuhtin God kais sie sesr oasr kuh la in eklac oacna Pahpah. In oruh kac kuht enenuh in ahkfuhlwactye Pahpah ke inen Wen.⁵⁷ Kuht oruh ma inge ke kampare in ahkos tuh luhngse luhn Pahpah oacna Mwet Lahngo,⁵⁸ ac kalweni in auliyak.⁵⁹ Ke kuht oruh ma inge, kuht “eis kuhlwacng nuh ke kuhlwacng ” ne ke kuht eis ma fohnlah⁶⁰ luhn Pahpah ac ahkkweyeyuck ke “ohiyac, wo, ac kuh lal.”⁶¹

Nuhnkuh ke ma tena oacna sie inmahsrlosr ke moul in mahno ac Pahpah Lucng el fuhkah, tiac mwe lut se lah kuhtuh puhla ke eklac oacna Pahpah el tiac fihsrwacsr. Ne ohinge, ma suhmuhslah el kahlwem. Fin kuht fungyang na nuh ke luhlahlfongi ke Kraist, auliyak, ac suk kuhlwacng luhn God ke ahkos, tok kuht fah tuhkuh oacna Pahpah. Nga eis moniyuck wo ke ma pwacye ma elos suc kampare in ahkos fah “eiskuhlwacng nuh ke kuhlwacng” ac sana “eis fohnlah lal uh.”⁶² Ke kahs sahyac an, kuht tiac kuh in eklac oacna Pahpah ke kuh lom sifacna.⁶³ Tuhsruhk, ac fah tuhkuh ke mwe sang luhn kuhlwacng, kuhtuh yohk tuh inkaiyac an srihk, ma muhsaheack kais sie mwet nekena kuht eis fohnlah kac uh. Tuhsruhk, tamuhlwel ac tahmtahel, ac fah tuhkuh!

Nga suli kom in luhlahlfongi lah Pahpah Lucng el etuh lah ac kihluckihn kom fuhkah, suk ahkkweye ke kahsruh lwen nuh kwewa Lal ac ahkwot nuh met ke luhlahlfongi ke Kraist finne ke pacl kom tiac kuh in puhla luhngse luhn God.

Puhs ma kuht tiac kahlwem ke in eklac oacna Pahpah uh.⁶⁴ Tuh nga kuh in fahkwack ke kahlwem lah kampare in tuhkuh oacna Pahpah el oasr srihpac ke kihsac nuh kwewa. ⁶⁵ Kihsac kuht oruh ke moul in mahno inge, finne fuhkah wo kac, el tiacna kuh in luhmweyuck nuh ke engan, pwacr, ac luhngse kuht fah puhla yurin God uh.⁶⁶ Fin kom puhla elyah in puhla ma wo ke kihsaclah kom siyuck in oruh uh, Mwet Lahngo Elac pahngon kom, fahk, “Elos suc soenna etuh lah fuhkah woiyacn mwe insewowo Pahpah el…ahkolah nuh sum…elos tiac kuh in eis mwe insewowo nuh kwewa ingena; tuh, engan, ke Nga fah kol kowos.”⁶⁷

Nga fahkwack lah Pahpah Lucng tomom El luhngse kom ac kena kom in sifil moul Yohrohl. Ke inen Jisus Kraist, amen