Engan ke Kuhlwacnsap Tiac Nuhnkuh Kac Sifacna
Kuht olwelah nuh sin Pahpah Tuhmasr Inkuhsrao lah kuht e Kuhlwacnsuhpwacl ac mwet sahyac ke luhngse ac oruh ma luhngse Lal ke ma nuhkwewa.
Tukun toeni luhlahp sahflah sac, puhs mwet siyuck sihk kihsen siyuck se pacna nge: “Kuh siah emet ngoh wo ke muhta uh?” Top luhk ah oacna sie pacl nuhkwewa: “Siah ngoh wo na pwacye fin kom te enenuh in sramsram.” Ma pwacye se, pwacye? Siah luhk ah tena wo ke toeni se inge, tuhsruhk yohk kuloh luhk ke mwe insewowo ac ahkfuhlwact in sramsram nuh suwos ke ekuh se inge.
Ke pacl kuht kuhlwacnsap uh, kuht muhta ke kain in siah. Kuhtuh wo ke muhta ac kuhtuh ma sahyac uh tiac, tuhsruhk kuht olwelah nuh Sel Pahpah Inkuhsrao muh kuht ac kuhlwacnsuhpwacl ac mwet sahyac ke luhngse ac oruh ma luhngse Lal ke ma nuhkwewa.
Yac ekahsr somlah ah, mwet fuhsr ke Alu uh lotwelah lah “ke kom sroacng nuh ke kuhlwacnsap luhn God uh’[Doctrine and Covenants 4:2], kom weacng fahsr yohk se emet ma oasr uh. Kom kahsruh God salkweaqk orekma Lal, ac oruh yohk, engan, ac usrnguck se.”1Sie fahsr nuh sin mwet nuhkwewa—matwac nuhkwewa—ac oacyacpac fahsr se ma us kuht wi ma ma mwet pahluh sacohk lasr el sruhmuhn oacna “inkacnek luhn olwelah uh.”2
Koluk ohiyac, ohinge, kuht muhta ke facluh nuhnkuh kac sifacna se ma mwet uh wacna siyuck, “Mac ngwac eis kac uh?” likina in siyuck, “Suc nga kuh in kahsruh mihsenge uh?” kuh “Kuh in wolac fuhkah kuhlwacnsap luhk nuh sin Leum ke ip kunuck uh?” kuh “Kuh nga sang kuhiyuck nuh sin Leum?”
Srihkasrak na wo se ke moul luhk ke kuhlwacnsap tiac nuhnkuh kac sifacna uh pa Tahmtahel Victoria Antonietti. Victoria el sie sin mwet luti luhn Primary ke pracns luhk ah ke nga kapkapwack Argentina ah. Kais sie Tuesday ke infulwen lwen, ke kuht tuhkweni ke Primary, el utuck chocolate cake nwacsr. Mwet nuhkwewa luhngse cake—koacl, nohfohn sahyuck. Nga sruhnga chocolate cake! Ac finne el ac srihke in akcsruhi cake uh nuh sihk, nga wacna sruhnga.
Sie lwen ah tukun el akacsruhi chocolate cake uh nuh sin tuhlihk luhlah ah, nga siyuck sel, “Efuh kom te use sie ma sahyac ah—oacna muh kuh vanilla ah?”
Tukun el isracsr kuhtuhsrihk, el siyuck sihk, “Efuh kom te srihke kuhtuhsrihk? Cake se ngwe oreklac ke sie mwe ahkyuc sasuc, ac nga olwelah muh kom fin srihke, kom ac luhngse!”
Nga ngwetlah liye, ac ke lut luhk, mwet nuhkwewa oacna in engankihn cake sac. Nga insese in srihke. Kom kuh in palye lah mea sikyak? Nga luhngse! Pa ngwacn pacl se emet nga tuh luhngse chocolate cake uh.
Tiacna nekena tukun yac puhs tohkoh na nga konwacack lah mac mwe ahkyuc lukmac se lal Tahmtahel Antoniettti ke johklet cake sac. Nga ac tuhlihk nuhtihk ac muhtwacta yurin ninac kiyuck ah kais sie wik. Ke sie muhtwacta ngwe, nga ac ninac kiyuck mongo chocolate cake, na nga fahk nuh sel lah fuhkah ne nga luhngselac chocolate cake pacl se emet ah. Na el fah fahk inkaiyacn sramsram soko ah.
“Kom in etuh, Cris,” ninac kiyuck el fahk, “Victoria ac sucu lal ah tiacna fas ke ma puhs, ac kais sie wik el enenuh in sulaclah inmahsrlon moli bus ah in wi ac tuhlihk ahkosr nahtuhl nuh ke Primary kuh in moli mwe ahkyuc in oraclah sie chocolate cake nwacn kuhlahs lal ke Primary ac. El wacna sulaclah mwe ahkyuc likina in moli bus ah, na el ac tuhlihk nahtuhl fahsr loes liki mael luo [3 km], nuh lohm alu uh, finne fuhkah puhlan pacl ah.”
Lwen sac yohkwaclihk srui luhk ke chocolate cake lal uh. Yohk srihpac likina, nga lotwelah lah mwe ahkyuc ke cake lal Victoria ah pa luhngse lal nuh selos ma el kuhlwacnsuhpuh ac kihsac tiac nuhnkuh kac sifacna in ahol kuhtac.
Nuhnkuh ke cake lal Victoria ah kahsreyuc esam kihsaclah ke tiac nuhnkuh kac sifacna se ke lesin wacngihn sahflah kac se lutiyuck sin Leum nuh sin mwet tuhma lutlut Lal ke El fahsr nuh ke acn in esacni mani tempuhl ah. Kowos etuh sramsram sac. Elder James E. Talmage el luti lah tuh oasr chest 13, ac nuhke chest inge mwet uh sis mwe sang lalos ke kain in srihpac ahkkahlwemyeyuck ke sihm ke pohk ah. Jisus El liye tahk in mwet sang uh, suc oasr kain in mwet. Kuhtuh sang mwe sang ke srihpac pwacye ke kuhtuh pac sahyac sisacng luhpah yohk ke selfuh ac gold, finsrak in liyeyuck, etweyuck, ac kaksakihyuck ke sang lalos.
“Inmahsrlon mwet puhs oasr sie katinmas, suc …sisacng nuh lun sie mwe nenyuck bronze srihsrihk luo etweyuck muh mani srihsrihk; sang lal uh oekyuck muh srihk likina tahfuhn sacn ke mani Macrke uh. Leum El pahngon mwet tuhma lutlut Lal nuh Yohrohl, sap elos in liye katinmas na-suhkahsruhp sac ac mwe sang lal, El fahk: ‘Pwayena nga fahk nu suwos, mwe sang ma katinmas sukasrup se inge el filiya in nien mani uh arulana yohk liki mwe sang lun mwet ngianukewa. Tuh elos nukewafiliya ma elos srela liki ma puspis lalos, a el, el ne sukasrup, el sang ma lal nukewa, aoknufon ma oasr yorol’ [Mark 12:43–44].”3
Katinmas sac oacna in wacnhihn na ma akihlenyuck el kac ke mura lal ah pacl sac. Pwacyeiyac ah oasr ma sel ma yohk srihpac: plwacn lal uh nwacsnwacs, ac el sang ma nuhkwewa ma el enenuh in sang. Sahp el sang srihk liki mwet sahyac, tiac akihlenyuck liki mwet sahyac, sie likina mwet sahyac. Ke liye luhn kuhtuh mwet uh, ma el sang ah tena yohk, tuhsruhk ke liye luhn Mwet Lahngo, mwet akihlen nuhnak ac srihpac luhn insiyac uh,”4 el sang ma lal kwewa.
Tahmtahel kuh kuht sang ma lasr kwewa nuh sin Leum tiac ahlohloh? Kuh kuht sang pacl ac talan lasr in muh fihl kapwack se inge lotwelah in luhngse Leum ac liyacacng masap Lal? Kuh kuht karihngihn kwewana elos ma raunikuhtlac ac elos ma utuckuh nuh sesr ke luhngse ac ke oaru—kihsackuhnlah pacl ac kuh lasr ma kuh in orekmakihnyuck ke ohiyac sahyac? Kuh kuht moulkihn masap luhlahp luo ah—in luhngse God ac in luhngse tuhlihk Nahtuhl?5 Luhngse uh wacna ahkkahlwemyeyuck ke kuhlwacnsap uh.
Prestuhn Dallin H. Oaks el luti: “Mwet Lahngo lasr El Esaclwacng sifacna ke kuhlwacnsap tiac nuhnkuh kac sifacna. El luti lah kais sie sesr enenuh in fahsr Tohkohl in fihliyac luhngse lasr sifacna in muh kuhlwacnsuhpuh mwet sahyac.”
El tahfwelah:
“Sie srihkasrak etweyuck ke pihlesrekuhtlac in kuhlwacnsuhpuh mwet sahyac…pa kihsac luhn pahpah ninac uh oruh nuh sin tuhlihk nahtuhlos uh. Ninac uh kweok ke ngal ac pihlacsraclah ma yohk ac mwe engan in oswelah ac tuhfahlah kais sie tuhlih. Pahpah el ahkwoye moul lalos ac ma yohk in kihte sie sucu. …
“… Kuht oacyacpac engan kaclos ma kahsruh mwet muhnahs ke sucu ac mwet mahtuh. Wacngihn sin kuhlwacnsap inge siyuck, mac ngwac eis kac uh? Ma inge kwewa enenuh in fihliyac pwacr luhk sifacna nuh ke kuhlwacnsap tiac nuhnkuh kac sifacna uh. …
“[Ac] ma inge kwewa ahkkahlwemye ip yohk netok lah yohkwaclihk engan lasr ac yohkwaclihk ahkpwacye kac pacl kuht oruh ac kuhlwacnsap ke ma kuht sang, tiac ma kuht eis uh.
“Mwet Lahngo lasr El luti kuht in fahsr Tohkohl in oruh kihsac enenweyuck in pihlesrekuhtlac ke kuhlwacnsap tiac nuhnkuh kac sifacna nuh sin mwet sahyac.”6
Prestuhn Thomas S. Monson el oacyacpac luti lah “sahp ke kuht oruh angwetwacni nuh sin Mwet Oraclah lasr, ac tiac siyuckyuck sesr, “Kuhlwacnsap ekahsr kom sruok?’ tuhsruhk ac pa, ‘Mwet ekahsr kom kahsruh?’ Pwacyeiyac uh, kom tiac kuh in luhngse Leum nekena kom kuhlwacnsuhpwacl pa in kuhlwacnsuhpuh mwet Lal.”7
Kalmac pa, tahmtahel, wacngihn ma kac fin kuht muhta ke siah wo emet kuh kuht muhta tiac puhla wo ke siah lihmlihm ras ke tahk soko etok ke pacl toeni an. Ac fah wacngihn pacna ma kac fin kuht, pacl enenuh, in tufoklac ke kihtin pacl in ahkwoye sie tuhlihk tuhng. Ma oasr srihpac an pa lah kuht tuhkuh ke sie kena in kuhlwacnsap, lah kuht akihlacnuhlos suc ma kuht karihngihn ac pwacngak nuh selos ke engan yohk, ac lah kuht fahk kuht sifacna nuh selos ma muhta siskacsr ke siah an—saplaklac ke kawuck finne kuht tiac pakpucki in kuhlwacnsap nuh selos. Na ac oasr kalmac na pwacye tuh kuht in oruh kwewa ma ingacn tuh kuht oruh ke mwe ahkwo sacohk ke kuhlwacnsap toeniyac luhngse ac kuhlwacnsap.
Nga etwaclah kuht tiacna enenuh oraclah chocolate cake in mwet luti luhn Primary wowo kuh oaru, ke srihpen tiacna cake se pa ma yohk srihpac uh. Luhngse uh pa yohk srihpac.
Nga fahkwack lah luhngse sacn oreklac muhtahl ke kihsac—kihsac luhn sie mwet luti ac finne yohkwaclihk ke kihsac sahflah ac netok luhn Wen nuhtin God. Nga fahkwack loh luhk lah El moul! Nga luhngse El ac kena in eslah luhngse luhk sifacna in kuh in luhngse ac karihngihn oacna El oruh. Ke inen Jisus Kraist, amen.