Luhlahlfongwel, Luhngse El, Oruh Luhngse Lal
Kuht eis moul fas se ke kuht eklac mwet fahsr tukun Jisus Kraist pwacye uh—ke kuht ukwe inkacnek Lal ac oruh orekma Lal.
Tamuhlwel ac tahmtahel sacohk luhk, pacl na wowo se in wi kowos ke tuhkweni na wowo se ke toeni luhlahp se mihsenge inge: in lohng kahs in moklweyuck: in lohng choir na kahto se luhn misineri ahol tausin ke misineri fin facluh nohfohn—tuhlihk muhtwacn ac tuhlihk mukul nahtuhsr—yohkna in ma sefanna ke luhlahlfongi lasr mihsenge, sulpac ahkkweyelah Prestuhn ac mwet pahluh sacohk lasr, Prestuhn Russell M. Nelson, Prestuhnsi Se Met, ac Mwet Kol Luhlahp ke Alu uh. Fuhkah luhpan engan in wi kowos mihsenge uh.
Emet Tohkohsrah Solomon el pa sie mwet oraclah wo ke pacl somlah ah.1 Oacna in oasr ma nuhkwewa lal—mani, fokoko, ahkfuhlwactyeyuck, pwengpweng. Tuhsruhk tukun yac puhs in puhla moul engan ac kahsruhp, King Solomon el ahkuhtweyac fuhkah moul lal?
“Ma nuhkwewa wacngihn srihpac,”2 el fahk.
Mukul se inge, oasr lal ma nuhkwewa, sahflahiyac puhla ahsor, puhla koluk, ac suhpwacr, finne oasr ma wowo sikyak ke moul lal.3
Oasr kahs se ke kahs German uh, Weltschmerz. Ahkuhtweyucki fihsrwacsr, kalmac pa suhpwacr ma tuhkuh ke fosrngah muh facluh muhnahs nuh ke ma kuht nuhnkuh uh.
Tuhsruhk, kuht nuhkwewa oasr kain Weltschmerz se inge in kuht kuhtuh pacl uh.
Ke kuht puhla suhpwacr ke pacl se kuht tiac lohacng nuh kac uh. Ke kuht puhla suhpwacr ke lwen ac fong ke ma sensen ac sikyak nuh sesr uh, weacng nuh ke moul luhn el suc kuht luhngse. Ke kuht puhla ma kuht tiac pahngon ac sikyak a sikyak ke pacl puhs ke moul lasr uh, ac lah kuht puhla pacl puhs mwe sruhf liki na mwet sahyac, ac ngal suc oruh kuht puhla suhpwacr ke kuht puhla muh kuht enenuh in puhla mihslac—sahp kuht sruhflah pac in insese sel Solomon lah moul se inge wacngihn srihpac ac wacngihn kalmeyac.
Oasr Finsrak na Wowo
Mwe fahkwack na wowo se pa, oasr finsrak. Oasr ma kahlwem ke ma wacngihn kalmeyac, wo ke wacngihn, ac Weltschmerz moul uh. Oasr unweyacn finne fuhlweack loal luhn finsrak ac sepuhlaik ke ma kom puhlakihn uh.
Finsrak se inge sukokyak ke kuh in ekuhllah ke wosasuc luhn Jisus Kraist ac ke kuh in molwelah sin Mwet Lahngo lasr suc ahkwoye kuhtlac ke ip luhn nguhn ke mwe sruhf uh.
“Nga tuku,” Jisus el fahk, “tuh mwet uh in kuh in eis moul, moul se ma fas ke ma wo nukewa.”4
Kuht eis moul se ma fas suc pa in tiac lohacng na nuh ke enenuh lasr kuh ke ma kuht kuhtanglah tuhsruhk in mwet tuhma lutlut pwacye lal Jisus Kraist; in ukwe innek Lal ac oruh orekma Lal. Kuht sokwack moul se ma fas in muhlkihnkuhtlac ac kahsruh srihpac yohk luhn Kraist.
Ac meac srihpac luhn Kraist? Pa in Luhlahlfongwel, luhngse oacna ke El luhngse, ac oruh ma El oruh.
Jisus “El tuh forfor in acn nukewa ac oru ma wo.”5 El fahsr ac kahsruh mwet suhkahsruhp, elos suc srihkkihnyuck, elos suc mas, ac elos suc mwekihn. El oruh kahsruh lal ke kuh, muhnahs, ac kuhlwacng. El sislah pacl lal selos; El sramsram nuh selos. “El akkeyalosla nukewa su mas.”6
Acn nuhkwewa El som nuh we, Mwet Lahngo El luti ke “pweng wo”7 ke wosasuc. El sruhmuhn ke ma pwacye ma pahtpaht lah el ac oruh mwet uh sukohsohklah ke nguhn oacna ke pacl uh.
Elos suc kihsac kuhnuhloslac nuh ke srihpac luhn Kraist konwacack ma pwacye ke olwelah luhn Mwet Lahngo: “El suc moul lal tuhlac lukel keik, el fah konauk moul lal.”8
Solomon el suhtuhelac, tamuhlwel ac tahmtahel sacohk wiyuck—moul uh tiac “wacngihn srihpac.” Ke lwacyacn ngi an, kuh in sesseslah ke srihpac, kalmac, ac mihs.
Paho onweyuck lal Jisus Kraist som nuh sin mwet nuhkwewa ma Sokol. Nga ingena etuh na pwacye lah luhlahlfongi ac luhngse God ac srihke in Ukwacl kuh in ekuhllah insiyacsr,9 ahksrihkye kweok lasr, ac nwacklah nguhnihk ke “engan na yohk.”10
Luhlahlfongwel, Luhngse El, ac Oruh Luhngse lal
Pwacye, kuht kuh in oruh yohk liki na ma oasr ke kahlwem lasr ke wosasuc an in oasr ahkkweyeyucklac ke moul lasr uh. Kuht enenuh in orekmakihn wosasuc ke moul lasr uh—in wi ip ke ohiyac lasr uh ac ma kuht oruh uh.
Lwelah nga in fahk lah ohiyacn mwet tuhma lutlut uh muhtwacwacack ke kahs fihsrwacsr tolu:
Luhlahlfongwel, Luhngse El, acOruh Luhngse lal
Luhlahlfongi ke God som nuh ke luhlahlfongi kuh nuh Sel ac kahs Lal. Luhlahlfongi uh oruh insiyacsr in kapkapwack ke luhngse lasr nuh sin God ac mwet sahyac uh. Ke luhngse sac kapwack uh, kuht kolyuck in etahi Mwet Lahngo ke kuht fahsr na ke fuhfahsryucsr wowo ac ke inkacnek luhn mwet tuhma lutlut uh.
“Tuhsruhk” kom fahk, “kom ahkuhtweyac ma arulacna fihsrwacsr uh. Elyah luhn moul uh, pwacyena elyah luhk uh, arulacna upac in ahkuhtweyac ma kahlwem se. Kom tiac kuh in ahkwoyelahWeltschmerz ke kahs na fihsrwacsr tolu inge: Luhlahlfongwel, Luhngse El, Oruh Luhngse Lal.”
Tiac kahs fototo pa ahkwoyelah uh. Luhngse luhn God pa molwelah, fohlohkohnwack ac fohlohkihn ma uh.
God El etwekom. Kom pa tuhlihk Nahtuhl. El luhngse kom.
El luhngse kom finne ke kom nuhnkuh muh kom tena luhngseyuck, El usot kahsruh nuh sum.
Ke lwen se inge—lwen nuhkwewa—El saplak nuh sum, kena in ahkkweye kom, in sruhkkomyak, ac in nwacklah acn alal ke insiyom in nwacnwaclah ke engan. El luhngse in eslah kuhtwena ma fohkfohk ke moul lom an ac nwacklah nguhnum in muhtahl ac arulacna kahlwem ke wolacna ma pahtpaht Lal.
Nga puhlakihn tari ma inge sik sifacna.
Ac nga ahkpwacye oacna ke Mwet Sap lal Leum Jisus Kraist lah mwet nuhkwewa suc suk kahsruh sin God—mwet nuhkwewa suc pwacye luhlahlfongi, luhngse, ac oruh la—kuh in puhlakihn oacna.
Kuht Luhlahlfongi
Ma suhmuhslah luti kuht lah, “Wangin mwet ku in akinsewowoye God fin wangin lulalfongi lalos. Tuh kutena mwet su tuku in alu nu sin God, el enenu in lulalfongi lah pwaye oasr God moul se.”11
Nuh sin kuhtuh, orekma ke luhlahlfongi uh upac. Kuhtuh pacl uh yensuhka lasr uh kosraclah. Sahp mwen kuht nuhnkuh muh kuht lahlmwetmwet, lutlut, kuh puhkantwen ma kuht etuh, fihsrwacsr nuh sesr in tiac luhlahlfongi ke God. Ac kuht muhtwacwacack in liye muh alu uh pa facsin lahlfon se.12
Ke ma nga etuh, luhlahlfongi se tiac oacna petsac ma mwet se ngwetngwet nuh kac ac luhngse sramsramkihn kuh nuhnkuh kac uh. El oacna mwe kuclkucl se ma kuht orekmakihn ke imac uh na, ke fioh ke muhtahsr, oraclah tohktohk ke infohk uh ma eis fihtac uh na oraclah fahko ma ac an na.13
Kowos in kalukyang nu yurin God, ac El fah apkuranwot nu yuruwos. Pa inge olwelah nuh selos kwewa ma suk in luhlahlfongi.14
Kuht Luhngse El
Ma suhmuhslah fahk lah luhpan luhngse lasr nuh sin God ac tuhlihk nahtuhl, pa luhpan engan lasr uh.15 Luhngse se Jisus El sramsram kac, ohinge, tiac mwe luhng sacohk se nuh ke mwe insewowo na kuht kihluck nuh met ke luhngse sahyac. Tiac luhngse se ma sramsramkihnyuck na muhlkuhnlah kihtin pacl. Tiac luhngse ma muh “lwelah ngan etuh lah oacna oasr ma nga kuh in oruh” ngwacn.
Luhngse se God El sramsramkihn uh pa kain se ma e utyak nuh insiyacsr ke kuht tuhkahkwek ke lotutacng, wi kuht muhta nuh ke sahflah lwen sac, ac sesseslah ke insiyasr ke kuht fahk pruhe in kuloh lasr ke sahflahiyacn ekuh uh.
Pa inge luhngse se kuht tiac kuh in ahkuhtweyac ma oasr sin Pahpah Tuhmasr Inkuhsrao nuh sesr uh.
Pa inge sahflahiyacn pahkomuhta ma eis kuht in liye kahlwem ke mwet sahyac lah suc elos uh. Ke oasr kahlwem in luhngse, kuht kuh in liye moul kawihl ke ma suc ac arulacna wo ac kuh in sikyak muh ac wen kuloh ac tuhlihk muhtwacn sacohklacna nuhtin God Kuhlwacna.
Ke pacl se kuht nuhnkuh ke mwet uh ke atac inge, kuht tiac kuh in muhnahs in nuhnkuh, tiac elyah ke ma sahyac, kuh in etuh ma sahyac kacn mwet.
Kuht Oruh Luhngse Lal
Ke orekma luhn Mwet Lahngo, ke pacl nuhkwewa ke ma srihsrihk ac fihsrwacsr ac “[ma] yohk tuhkuh kac.”16
Kuht etuh lah enenuh ins kalweniyuck na in ahkpah in wo ke ma nuhkwewa. Lah sritaclkihnyuck mwe on se, fohtohnglah pohl se nuh ke nwek ah, ahkwoyelah stosah soko, kuh finne us soko aksohk, ma inge kwewa ma ke srihke in ahkpah lah kuht in muh suhmahtlah nuhke suhmaht.17
Akiyac Lal Mwet Lahngo fin facluh—Alu Luhn Jisus Krais Luhn Mwet Luhlahlfongi Ke Lwen-sahflah—kahsrwekuht in oruh ke ma inge. Utuckuh acn in srihkasrak in ahkpah in moulkihn oacna ke El luti ac ahkinsewowoyelah mwet sahyac ke atac Lal uhl.
Ekihn mempucr ke Alu uh, utuckuh pahng nuh sesr, ip kunac, ac pacl wo in soklah ke pahkomuhta ac kuhlwacnsuhpuh mwet sahyac.
Ingena, Alu uh ahksasucye ma yohk srihpac ke kuhlwacnsap kuh luhngse mwet sahyac. Nuhnak wowo tuh motkweyuck in etuh lah kuht ac pahngon fuhkah srihpac yohk se inge.
Sie sin ine ma sramsramkihnyuck ah pa in mwet shepherd, ma fal nuh solsol luhn Kraist: “Karinganang sheep fusr nutik.”18 Tuhsruhk, oasr ma se fanna tiac wo kac: orekmakihn kahs se inge oruh nga mwet shepherd German se. Ke ma kahlwem uh, nga arulacna mihs ke kahs sekarihngihn uh.
Orekma Se Inge Ma Nuh Sin Mwet Nuhkwewa
Mana pwacye se, ma yohk srihpac inge tiac sasuc. El oreklac in kahsruh ahksasucye ac ahkfwelye pacl wo in srihke in ahkpah nuh ke masap luhn Mwet Lahngo in “luhngse sie sin sie,”19 sie ohiyac in ahkfwelye ac oruh srihpac luhn Alu uh.
Srihke nuhnkuh orekma luhn misineri; puhlaik, puhsisacl, ac mwesahs in sruhmuhn ke wosasuc pa srihkasrak wo ke kuhlwacnsap uh nuh ke mwe enenuh luhn nguhn luhn mwet sahyac uh, oacna sie mwet.
Kuh oruh orekma ke tempuhl—suk ine nuh ke mwet lasr somlah ah ac sang nuh selos mwe insewowo nuh tok ma pahtpaht Ma inge arulacna ahkuhtweyac fal nuh ke kuhlwacnsap uh.
Lohacng nuh ke orekma in suk elos suc suhkahsruhp ac enenuh, kohlwack po suc atat, kuh ahkinsewowoye elos suc mas ac kweok. Yac ma inge pa pwacye ke orekma ke nwacsnwacs in kuhlwacnsuhpuh Leum in ahkpah ke El muhta fin facluh uh?
Fin kom tiac mempucr se ke Alu uh, Nga suli kowos in “fahsruh ac liye.”20 Fahsruh ac wi kuht. Fin kom mempucr se ke Alu uh tuh tiac arulacna oaru ke ma orek uh, nga suli kowos nuhnak muhnahs fohlohk. Kuht enenwekom!
Tuhkuh, use kuh lom an nuh sesr.
Mweyen ke talan sacohk lom, kuh, ac sum sifacna, kom ac kahsrwe kuht in muh suhmahtlac ac engan. Fin kom oruh ma inge, kuht ac kahsrwekom kom in muh sie pacl suhmaht ac engan pac.
Tuhkuh, kahsrwekuht in muhsahi ac ahkkweye ohiyac ke onwelah, kuhlwacng, ac pahkotwen nuh sin tuhlihk nuhtin God. Mwen kuht kwewa insacnweacng in eklac mwet sasuc suc “ma matu wanginla,” ac “ma nuhkwewa … eklac sasuc.”21 Mwet Lahngo El kol kuht nuh—meet ac tiac fohlohk nuh tok. El fahk, “Fin kom luhngse nga, kom ahkos masap luhk.”22 Kuht nuhkwewa toeni orekma kuht in muh eklac mwet ma God El luhngse kuht in eklac nuh kac uh.
Pa inge kain in facsin ke wosasuc uh ma kuht luhngse in orekmakihn ke Alu luhn Jisus Kraist uh. Kuht suk in ahkweye Alu uh in sie acn ma kuht nuhnak muhnahs nuh sin sie sin sie uh. Ma kuht kuh in lain mwe sruhf in lohacng nuh ke tahfonglac, lwesrihk, ac tuni mwet sayac. Suc ma, likina in fwahk muhnahs luhn mwet, kuht sruhkwack ac kahsruh kais sie in eklac in wo ke kuhiyasr.
Nga in sifilpac sulikom. Fahsruh ac liye. Wi kuht. Kuht enenwekom.
Mwet Tiac Suwohs
Kom ac sokwack lah Alu se inge nwacnwaclah ke mwet na wowo ma facluh se inge use. Elos arulacna paing, luhngse, kuhlwacng, ac nwacsnwacs. Elos orekma upac, kena kihsac ac finne watwen ke pacl.
Ac elos oacyacpac ngalkihn fin tiac suwohs.
Elos oraclah tahfonglac.
Ke pacl nuh ke pacl elos fahklah ma elos tiac enenuh in fahklah. Elos oruh ma elos finsraki muh elos tena oruh.
Tuhsruhk oasr ma elos oacna sie kac—elos luhngse in kapwack ac fototo nuh yurin Leum, Mwet Lahngo, finne Jisus Kraist.
Elos srihke in oruh ma uh pwacye.
Elos Luhlahlfongwel. Elos Luhngse El. Elos Oruh Luhngse Lal.
Elos ke eklac tiac nuhnkuh kac sifacna, elos pahkomuhta, elos in puhla wo, oacna Jisus.
Ke Sroal in Oraclah Engan
Ahok, moul se kuh in upac ke kuhtuh pacl uh, Pwacyena, kuht nuhkwewa oasr pacl la ke wacngihnlac finsrak ac ma lusrohngtwen.
Tuhsruhk wosasuc luhn Jisus Krais use finsrak. Ac, ke Alu luhn Jisus Kraist, kuht toeni wi mwet sahyac suc suk acn se ma kuht puhla oacna lohm ah—acn in kapkapwack suc kuht, tuhkweni, kuht inluhlahlfongi, luhngse. ac oruh.
Nuh ke ma eklac lasr uh, kuht suk in eis sie ekihn tuhlihk mukul ac tuhlihk muhtwacn nuhtin Pahpah tuhmasr Inkuhsrao.
Nga kulohkihn arulacna yohk in sie mempucr ke Alu luhn Jisus Kraist luhn Mwet Luhlahlfongi ke Lwen-sahflah ac in etuh lah God El luhngse tuhlihk Nahtuhl fal in sang nuh selos petsac se ke engan ac kalmeyacn moul se inge ac sie ohiyac in puhlakihn engan netok ke acn wolacna sac ke moul se ac tuhkuh uh.
Nga kuloh ke God El use sie inkacnek in unwe mas luhn nguhn uh ac Weltschmerz luhn moul uh.
Nga fahkwack ac fihliyac mwe insewowo luhk lah ke kuht luhlahlfongi ke God, ke kuht luhngse El ac luhngse tuhlihk Natuhl ac mwet sahyac ke insiyacsr nohfohn, ac ke kuht kampare in oruh oacna ke God El fahk nuh sesr, kuht ac sokwack onweyuck, ac mihslac, engan, ac kalmeyac. Ke ine muhtahl luhn Jisus Kraist, amen.