Sramsram in Ikacslah

Tamuhlwel ac tahmtahel sacohk wiyuck, kuht ngwetlah in sulpac oracni se yuruwos ke toeni luhlahp luhn Alu se inge ke Ohktohpa. Kuht sruikihn pain lasr ke insiyacsr nuh sin kais sie suwos. Kuht tarilacna ke pruhe in ahkkweye lom. Kuh puhla kuh ngacn. Kuloh!

Kuht tarilacna ke orekma wowo lom in ukwe ma sruhmuhnyuck ke toeni luhlahp ma sikyak mahlwem ohnkohsr tari ah. Prestuhn luhn stek fin facluh nohfohn elos sokwack fwackyuck enenweyuck in sulpac oracni u luhn elders. Mukul ke u inge oacyacpac muhtwacn fokoko luhn Rilif Sosaiti orekma yohk in karihngihn tamuhlwel ac tahmtahel wiyacsr ke ohiyac fuhlwact, muhtahl. Kuht puhla sruikihn ke wo lom ac orekma yohk lom in us tuhkuh luhngse luhn Mwet Lahngo nuh sin sucu, mwet tuhlan, ac kawuck lom ac in karihngihn selos oacna El ac oruh.

Tukun toeni luhlahp ke Eprel ah, Tahmtahel Nelson ac nga ohsun yurin mempucr ke continent ahkosr ac ke tuhka fin kof uh. Fin Jerusalem nuh ke Harare, fin Winnipeg nuh ke Bangkok, kuht puhlakihn luhlahlfongi yohk lom ac kuh luhn testimony lom.

Kuht enganwack ke mwet fuhsr ekahsr suc welah mwet mweun fuhsr luhn Leum in kahsruh oracni tuhlihk fahkwelihk luhn Israel.¹ Kuht kuloh nuh sum! Ac ke kom kampare in ukwe suli luhk sang ke toeni nuh sin mwet fuhsr luhn facluh, kom oraclah srihkasrak nuh sin kais sie sesr sahyac in ukwe. Ac pwacye oasr ma eklac kom oraclah!

Ke kuhtuh yac ekahsr an, kuht ke u luhlahp luhn Alu uh sramsram yohk ke kihsensiyuck fihsrwacsr: yac kuht kuh in use wosasuc ke fihsrwacsr suwos lal, ac akwuck ke enenuh ma pahtpaht lal, nuh sin tuhlihk nuhkwewa nuhtin God?

Ke Mwet Luhlahlfongi ke Lwen-Sahflah, kuht nuhnkuh pacl pucs lah “alu” pa ma se ma sikyak fin acn lohm alu lasr muhkwena, ahkkweyeyuck ke ma sikyak fin acn lohm. Kuht enenuh in eklac atac se inge. Pa pacl se ke lohm-infulwacn Alu, ahkkweyeyuck ke ma sikyak fin acn lohm sin puranas, ward, kuh stek.

Ke Alu uh lihksreni in kapwack fin facluh nohfohn, puhslac mempucr muhta fin acn ma wacngihn lohm alu—ac sahp wacngihnlac ke pacl fahsruh. Nga esam sie sucu suc, mweyen ohiyac se inge, enenuh in ohsun fin lohm selos. Nga siyuck sin ninac se el luhngse wi alu fin lohm selos sifacna fuhkah. El topuk, “Nga luhngse! Mukul tuhmuhk el wowoyak kahs lal fin lohm, el etuh muh kuht ahkinsewowoyeyuck sackracmacn ke acn uh kais sie Sacnri.”

Srihpen mahtuh luhn Alu uh pa in kahsruh mempucr nuhkwewa in ahkyohkye luhlahlfongi lalos ke Leum lasr Jisus Kraist ac Iwaclah Lal, in kahsrwelos in oraclah ac karihngihn olwelah lalos yurin God, ac in ahkkweye ac sili sucu lalos. Ke facluh fohswack se inge mihsenge, ma inge tiacna fihsrwacsr. Mwet lain se el ahkyohkye meun lal ke luhlahlfongi ac kacsr ac sucu lasr ke ohiyac luhlahp se. In puhlaik ke nguhn, ke enenuh ohiyac ma laenuhl ac plwacn fokoko. Ke ma inge, kuht kena ingacna in oraclah kuht eklac nuh ke ohiyacn Alu ma kuh in kahsruh ahkkweye mempucr lasr ac sucu lalos.

Ke yac pucspucs, mwet kol luhn Alu elos orekma nuh ke mwet luti ke lohm ac alu in ahkkweye sucu ac mwet sifacna ke plwacn in lohm-infulwacn ac Alu ahkkweye in luti ip yohk, ahkkweye luhlahlfongi, ac ahkyohkye alu sin mwet sifacna. Orek lasr ke yac ekahsr inge in ahkmuhtahlye lwen Sahpuht—in oruh el in ma engan ac mwe loh nuh sin God ke luhngse lasr nuh Sel—fah wowoyak ke ma eklac kuht fah pwenyuck ingacna.

Olutu uh kuht fah pwenyuck balance ac kapsra sasuc se nuh ke mwet luti luhn wosasuc fin acn lohm ac fin lohm Alu an. Kunohkohn in kapwack nuhnkwacsr pa ma lasr kais sie sifacna. Ac ma suhmuhslah fahk suwos lah pahpah ninac sruok kunohkohn yohk in luti ip yohk nuh sin tuhlihk nahtuhlos.² Ac pa kunohkohn luhn Alu in kahsrwelos mempucr kais sie ke finsrak muhtahl lalos in ahkyohkye etweyuck luhn wosasuc.

Elder Quentin L. Cook ac fah sruhmuhnyuck ma eklac yohk srihpac ingacna. Mempucr nuhkwewa ke U luhn Prestuhnsi se Met ac U luhn Mwet Sap Singucul Luo tuhkweni ahkkweye pweng se inge. Kuht tarilacna fahk mwe fahkyuck sin Leum lah ahkkweye plwacn ac ohiyac in eklac ma Elder Cook ac fah pwenyuck.

Tamuhlwel ac tahmtahel sacohk wiyuck, nga etuh lah God El moul! Jisus pa Kraist! Pa inge Alu Lal ma El kolyuck ke fahkyuck nuh sin mwet kuhlwacnsap Lal. Nga pa fahkwack ek inen Jisus Kraist, amen.