Eklac sie Mwet Shepherd
Nga finsrak elos ma kom kahsruh an in liye kom oacna sie kawuck ac akihlen lah, in kom, sie champion lalos, mwet in lahngo se, ac sie mwet in sramsram nuh se.
Yac se tari ah, nga ohsun nuh sin sie tuhlihk Primary Chile oruh nga isracsr. “Lwen wo,” el fahk, “Nga pa David. Kom kuh in sramsram keik ke toeni luhlahp uh?”
Mihslac kihtin pacl, nga motko ke pwacngak ahklut lal David ac. Kuht nuhkwewa ke in akihlenyuck. Ke mwet oasr srihpac, in esamyuck, ac in puhla luhngse.
Tahmtahel ac tamuhlwel, kais sie suwos oasr srihpac. Finne kowos tiac sramsramkihnyuck ke toeni luhlahp uh, Mwet Lahngo El etuh ac luhngse kowos. Fin kowos suk lah pwacye, pa na kowos ac nuhnkuh lah El “sihmihskowoslac lun [Pahol].”1
Ke etuh lah Mwet Lahngo El luhngse kuht, kuht ac sahp suk lah kuht ac oruh fuhkah in wo luhngse lasr nuh Sel uh?
Mwet Lahngo El siyuck sel Peter, “Ya kom lungse nga … ?”
Peter el topuk, “Aok Leum, kom etu lah nga lunge kom. El fahk nu sel, karinganang sheep fusr nutik.”
Ke siyuckyuck kisensiyuck se inge kwewana pacl luo ac tolu, “Ya kom luhngse nga?” Peter el toasr kac tuh ahkkweyelah luhngse lal: “Leum, kom etu ma nukewa, kom etu lah nga lunges kom. Jisus El fahk nuh sel, Karinganang sheep nutik.”2
Yac Peter el tiac ahkpwacyei tari lah el mwet fahsr tukun Kraist luhngse se? Ke ohsun se emet laltahl pekof ah, el “in pacl sacna” fihliyac nwek nahtuhl in fahsr Tohkohl Mwet Lahngo.3 Peter el eklac tari in sie mwet pahtuhr mwet pwacye. El weluhl Mwet Lahngo ke luti Lal sifacna ac kahsruh luti mwet sahyac wosasuc luhn Jisus Kraist.
Tuhsruhk inge Leum sifil moulyak El etuh El ac tilac muhta yohrohl Peter, ahkkahlwemye nuh sel ah fuhkah ac pacl el enenuh in kuhlwacnsap uh. Ke wacngihnlac Lal Mwet Lahngo, Peter lac enenuh in suk sin Nguhn, eis fwackyuck nuh sel sifacna, na eis puhlaik ac luhlahlfongi in oruh ma uh. Lohacng nuh sin mwet fahsr Tohkohl., Mwet Lahngo El kena Peter lan oruh ma El ac oruh fin El oasr inge. El siyuck Peter lan eklac sie mwet shepherd.
Ke Eprel ah, Prestuhn Russell M. Nelson el tahfuh sie solsol ma oacna nuh sesr in kihtacacng sheep nuhtin Pahpah tuhmasr ke sie ohiyac muhtahl ac in oruh ke karihngihnyuck.4
In oruh nguhsr se inge in wo, kuht enenuh in puhla oacna sie mwet shepherd ac akihlen enenuh luhn sheep nuhtin Leum. Na kuht ac eklac fuhkah nuh ke shepherd ma Leum El enenuh kuht in eklac nuh kac uh?
Oacna siyuck nuhkwewa, kuht kuh in suk Mwet Lahngo lasr, Jisus Kraist—Mwet Shepherd Wo. Sheep nuhtin Mwet Lahngo uh etweyuck ac oacwaclah, ac eltahl karihngihnyuck; elos orekweni nuh ke u luhn God.
Etweyuck ac Oacwaclah
Ke kuht kwacfweacng in ukwe srihkasrak luhn Mwet Lahngo, kuht enenuh ma se met etuh ac oek sheep Nahtuhl. Srihsrngiyucki nuh sesr kais sie mwet ac sucu in fosrngahkihn oruh kuht etuh lah u nuhkwewa luhn Leum uh taranyuck ac wacngihn selos muhlkihnyucklac. Oacwac, ne ohinge, te arlac ma ke pihsac an, pa in liye lah pwacye kais sie mwet puhla luhngse luhn Mwet Lahngo sin sie mwet ma kuhlwacnsap nuh Sel. Ke ohiyac sacn, mwet nuhkwewa kuh in akihlen lah elos etweyuck sin sie Pahpah luhngse Inkuhsrao.
Nga tuhfahna ohsun nuh sin sie muhtwacn fuhsr ma srihsrngiyucki in kahsruh sie tahmtahel ma apkuhran in pacl limekohsr nuh ke matwacl. Tuhkweni, elos konwacack lah kwewana luhngse on. Pacl muhtwacn fuhsr se inge muhtwacta uh, elos tuhkweni on, ac elos fahk pahiyaclos. Eltahl oraclah sie kawuck ma ahkinsewowoye moul lalos kwewa.
Nga finsrak elos ma kom kahsruh an in liye kom oacna sie kawuck ac akihlen lah, in kom, sie champion lalos ac sie mwet in sramsram nuh se—mwet se ma akihlen elyah lalos ac tahpuhkuhlos ke finsrak ac kena lalos.
Nga tuhfahna eis sie kunohkohn in som kahsruh sie tahmtahel ma companion luhk ac nga tiac arlac etuh. Ke nga sramsram yohrohl Jess, companion yac 16 in wiyuc karihngihn, el ngihsre ke lahlmwetmwet, “Kuht enenuh in oruh in etwacllah.”
Kuht sana sulwaclah muh sie selfie ac sie fahkyacsr ke text ahkoeyucklac. Nga sruokyac phone ac, ac Jess el tanyac pohtin kac in oraclah petsac se. Pacl wowo se emet lasr in kahsruh ah pa sie srihke ekihn companion se.
Ke muhtwacta se emet lasr ah, kuht siyuck sin tahmtahel lasr lah oacna oasr ma kuht kuh in sang nuh ke pruhe lasr in kahsrwel. El akacsruhi ke sie elyah lal sifacna ac fahk lah el insese ke pruhe lasr. Pwacye ac kuh in luhlahlfongi lal use kuhpahsr na sa se ke luhngse. Pacl na sacohk se in esamuhl ke pruhe luhk lwen nuhkwewa.
Ke kom pruhe, kom ac puhla luhngse luhn Jisus Kraist nuh selos ma kom karihngihn. Akacsruhi luhngse sacn nuh selos. Meac ohiyac wo liki ma oasr in kihtacacng sheep nahtuhl likina in kahsrwelos puhla luhngse Lal—ke srupom?
Liyacacng
Ohiyac ahkluo in muhsaheack insiyacn sie mwet shepherd pa in liyacacng sheep Nahtuhl. Ekihn mempucr ke Alu Luhn Jisus Kraist luhn Mwet Luhlahlfongi ke Lwen-Sahflah kuht kuh in kihluck, oraclah, ahkwoyelah, ac sulpac nahwelah apkuhran oacna sie ma. Kuht sa in oraclah sie enenuh ke sie paho in kahsruh kuh sie alu in kukis an. Tuhsruhk oasr pac?
Kuh sheep nahtuhsr uh etuh lah kuht liyaclosyang ke luhngse ac kuht ac tuyak in kahsruh?
Ke Matthew 25, kuht riti:
“Fahsru, kowos su akinsewowoyeyuk sin Papa tumuk! Fahsru ac usrui tokosrai se su nuna akoeyukla nu suwos … :
“Mweyen nga tuh masrinsral ac kowos kiteyu mongo; nga malu ac kowos se ma nimuk: nga sie mwet sac ac kowos suliyuyak nu in lohm suwos: …
“Na mwet suwoswos elos ac fah fahk nu sel, ‘Leum, ku ngac kut liye kom masrinsral ac kut sot ma nom? Ku malu ac kut sot ma nimom?
“Ngac kut liye kom sie mwet sac ac sulikomyak nu in lohm sesr?”5
Tamuhlwel ac tahmtahel, mwe luti yohk srihpac sacn pa liye. Mwet suwohs uh liyaclos ma enenuh mweyen elos liyacacng ac akihlen. Kuht kuh pac in mwet karihngihn in kahsruh ac ahkwoye, in ahkfuhlwactye ac mwemwei. Ac ke kuht oruh, kuht kuh in etuh pwacyeiyacn olwelah ke Mathew an: “Ke kowos oru ma inge nu sin sie su srik liki nukewa … , kowos oru nu sik.”6
Kawuck se—kuht ac pahnglol John—akacsruhi lah meac kuh in sikyak pacl kuht liye enenuh srihklac akihlenyac luhn mwet sahyac uh: “Tahmtahel se ke ward luhk srihke ahklas se. Tukun mahlwem luo, nga konwacack lah wacngihn mwet ke u luhk ah som nuh yurin mukul tuhmwacl in tahfuh elyah ke mahno se inge. Mwe ahsor, nga te pacna oruh kuhtuh ma. Sahflahiyac, nga siyuck sin mukul tuhmwacl in wiyuc mongo luhns. El sie mukul mwekihn, wacna fohlohkihn ma uh. Ac inge ke nga fahk, ‘Muhtwacn kiyom srihke in ahklas. Ma sacn sahp tankowi. Kom luhngse sramsram kac? El tuhng te ukun. Kuht oruh sramsram na ahsor ac insese se ac muhsaheack sie inmahsrlol na fototo ac luhlahlfongi ke kihtin pacl na.”
John el fahk pac, “Nga muh oruh lasr pa in oruh sie ma wo ah likina in kotai lah ac ahkwoyeyuck fuhkah elyah sacn ke suwohswohs ac luhngse.”7
Sheep nahtuhsr uh kuh in ngal, tuhlac, kuh finne fahsrelihk ke luhngse la; ekihn mwet shepherd, kuht kuh in pa inmahsrlon mwet emet in liye enenuh lalos. Kuht in lohng ac luhngse tiac nuhnuhkuh ac sang finsrak ac kahsruh ke kolyuck akihlenyuck sin Nguhn Muhtahl.
Tahmtahel ac tamuhlwel, facluh sesseslah kuhtuh ke finsrak ac engan ke srihpen mokleyuck ke oruh luhn kuhlwacng kowos oruh. Ke kowos suk kolyuck luhn Leum lah ac ahkkahlwemyeyuck fuhkah luhngse Lal ac liye enenuh lalos ma kom karihngihn, ac oasri kahlwem lasr. Kunohkohn muhtahl in karihngihn lom an usot nuh sum suwohs sin God me in eis pihrihkyuck. Kom kuh in suk pihrihkyuck sacn ke luhlahlfongi.
Fahsrweni nuh ke u luhn God
Ahk tolu, kuht ke sheep nahtuhsr uh in fahsrweni nuh ke u luhn God. In oruh angwe, kuht enenuh in nuhnkuh lah mwet ma kuht kahsruh uh oruh fuhkah ke kapkapwack in nguhn lalos uh ac kena fahsr weluhlos ke fuhfahsryucsr luhn luhlahlfongi lalos. Oasr sesr sie suwohs muhtahl in eklac in etuh nuhna lalos ac kohlohlos nuh yurin Mwet Lahngo lalos.
Tahmtahel Josivini ma Fiji upac in liye inkacnek lal nuh met ke inkacnek wuhlweacng uh—pwacye na. Kawuck lal liye lah upac nuh sel Josivini in liye ma suhmuhslah uh wo in rit. El sang nuh sel Josivini sie glass in rit sasuc ac pinsucl rangrang kahlwem soko in mahki fahk nuhkwewa kacl Jisus Kraist ke Puk luhn Mormon. Oruh se ke kena srihsrihk se in karihngihn ac in kahsruh ke lutlut ke ma suhmuhslah uh oruh sikyak som lal Josivini nuh tempuhl pacl se emet ke yac 28 tukun el pacptaislac.
Lah sheep nahtuhsr uh fokoko kuh muhnahs, engan kuh ngal, kuht kuh in liye in wacngihn sie puhla muhkwena. Kuht kuh in luhngse elos finne fuhkah moul in nguhn lalos an ac sang taptap ac kwacfeyuck ma ac kahsrwelos kapkapwack an. Ke pruhe ac suk in kahlwem ke insiyaclos, nga luhlahlfongi lah Pahpah Lucng El ac kol kuht ac Nguhn Lal fah wi kuht. Kuht eis pacl wowo in lihpufacn raun elos lac ke El som ye muhtahlos.8
Leum El suli kuht in kihtacacng sheep Nahtuhl, in liyacacng mwet fahs Tohkohl oacna El ac oruh El suli kuht in sie mwet shepherd nuh sin muhtuhnfacl nuhkwewa. (Ac ahok Elder Uchtdorf kuht luhngse ac enenuh kosro German Shepherd.) Ac El kena mwet fuhsr Lal in wi srihpac se.
Mwet fuhsr lasr uh kuh in pa kuhtuh mwet shepherd fokoko lasr uh. Eltahl, oacna ke Prestuhn Russell M. Nelson el fahk, “inmahsrlon mwet wo emet Leum El suhpwacma nuh facl se inge” Oasr “nguhn na wowo,” “mwet pihsrlac emet” lasr ma fahsr tukun Mwet Lahngo.9 Kuh kom kuh in petsacelah kuh ma kain mwet shepherd se ac use ke elos karihngihn sheep Nahtuhl uh?
Muhtwacn ac mukul fuhsr, kuht enenwekowos! Fin wacngihn kunohkohn in kahsruh lom, sramsram nuh sin Rilif Sosaiti Prestuhn kuh prestuhn ke u luhn Elders. Elos ac engan ke kena lom in liye lah sheep Nahtuhl uh etweyuck ac oacwaclah, liyeyuckyang, ac orekweni nuh ke u luhn God.
Ke lwen sac ac tuhkuh ke kuht ac sikuckmuhtuhntei ke nien Mwet Lahngo kuloh lasr, in kihte u Lal. Nga pruhe kuht in kuh in topuk oacna Peter ah: “Aok, Leum, kom etu lah nga lungse kom.”10 Ma inge, sheep Nuhtum, elos luhngseyuck,, elos sef, ac elos oasr lohm ah. Ke inen Jisus Kraist amen.