Muhtwacn ac Lotwelah Wosasuc in Lohm

Tahmtahel sacohk wiyuck, sie ma wolacna in ohsun yuruwos. Sie pacl engan ke Alu luhn Jisus Kraist luhn Mwet Luhlahlfongi ke lwen-sahflah. Leum el ahkkahlwemye etwacack ke Alu Lal oacna El olwelah muh el fah oruh.

Kom esam ma el fahk: “Fuhkah lusen pacl ma kof kahklah kuh in an tiac nwacsnwacs? Kuh fuhkah fah an inkuhsrao? Tiac fihrwacsr sie mwet in ahsrwelah po muhnas lal in tulokihnyac ac furohklah fahsr luhn infacl Missouri,oacna ke in tulokinyac etwacack inkuhsrao me nuh sin Mwet Luhlahlfongi ke lwen sahflah.”¹

Ip ke akacsruhi ingena luhn Leum ke etwacack kapsra ke ahkyohkye etwacack Lal ke ohiyac ac nuhnak nuh sin mwet Lal. El oruh kahlwem lah muhtwacn nuhtihn Pahpah Lucng arulacna yohk srihpac nuh ke mwe ahkyohkye usrnguck se ingacn. Sie ma ahkkahlwemyeke mwe usrnguck se ingacn pa kolyuck lal nuh sin mwet pahluh lal in sang etwacack yohk ke luti luhn wosasuc ke lohm ac yurun sucu.

Kom fah siyuck, “Fuhkah tuh in oraclah tahmtahel luhlahlfongi ma yohk srihpac se in kahsruh Leum akacsruhi etwacack nuh sin Mwet Luhlahlfongi Lal?” Leum el use top kac “Sucu: Sie Mwe Fahkwack nuh fin Facluh.” Kom esam ke kahs, tuh kom fah akihlen kalmac sasuc ac akihlen lah Leum el palyei ma ekyek wowo inge. Ke mwe fahkwack sac, El sang orekma luhn tahmtahel se in karihngihn luti sucu lal ke kahs inge: “Ninac uh pa karihngihn in karuhnguhnwacng tuhlihk nahtuhlos.”² Wi pacna ke ahkkapye ke ma pwacye ac etwacack luhn wosasuc.

Fahkwack se inge kalweniyuck na.“Pahpah ac ninac enenuh in kahsruh sie sin sie in oacna sie.”³ Oacna sie kesiyacnyacn se, oacna sie ke kuhiyacn kapkapwack luhn nguhn ac in eis etwacack, ac tuh in masefanna in kahsruh sie sin sie. Elos oacna sie ke fuhfahsryucsr wolacna lalos in tuhkweni eis moul ma pahtpaht. Ma na pwacye se, elos tiac kuh in eis moul ma pahtpaht fin tiac tuhkweni.

Efuh, na, sie muhtwacn nuhtin God ke sie kuhpahsr ac fahsrweni sefanna eis karihngihn yohk in kahsruh ke etwacack ma tuhkuh lucng me ma mwet nuh kwewa enenuh in eis, sie etwacack ke ma pwacye tuhkuh lucng me? Oacna ke ma nga etuh, pa ingacn innek luhn Leum ekena sucu uh akiyucki fin facl se inge.

Ke srihpac se inge, Eve pa eis etwacack se ma Adam el enenuh in ipeis fukunsahk se ke sahk luhn etwacack nuh selos in sruokyac kwewa ke masap luhn God ac in akiyac sie sucu. Nga tiac etuh lah efuh etwacack se ingacn tuhkuh nuh sel Eve met, tuh Adam ac Eve masefanna wo ke pacl se etwacack se ingacn ituckyang nuh selos.

Sie pac mwe srihkasrak luhn Leum in orekmakihn mwe sang luhn muhtwacn pa inek se ma El ahkweye wen nahtuhl Heleman. Nga puhlakihn puhla loal ke pacl nga riti sramsram ke ma suhmuhslah ac na esam ke kahs in kahsruh luhn ninac kiyuck ke ahkweye ke nga som nuh ke solse.

Helaman el suhmuhslah:

“Elos tuh lutiyuck sin ninac kiyaclos, lah elos fin tiac ahlohloh, God El ac molweloslac.

“Ac elos kalweni nuh sihk kahs luhn ninac kiyaclos, fahk: Kuht tiacna ahlohloh tuh ninac kiyacsr etuh.”⁴

Ke nga tiac etuh kwewa ke srihpac luhn Leum in sang orekma yohk srihpac in karuhnguhnwacng ke sucu luhn tahmtahel luhlahlfongi, nga luhlahlfongi muh ma nuh ke kuhiyac in luhngse luhn sie muhtwacn. Pa sang luhngse pwacye in puhla enenuh luhn mwet sahyac liki na enenuh lom sifacna. Pa ingacn luhngse muhtahl luhn Kraist nuh sin mwet se ma kom karuhnguhnwacng an. Puhla in luhngse suwohs se ingacn tuhkuh ke mwet se kuht sulaclah muh sie mwet nwacsnwacs in ahkkahlwemye ke Iwaclah luhn Jisus Kraist. Puhluh kahs luhn Rilif Sosaiti, suc ma ninac kiyuck sifacna el mwe srihkasrak se kac, luhman mokleyuc: “Lungse pwacye tiana wanginla.”

Oacna sie muhtwacn nuhtin God, oasr kuhiyac ma na yurum ac yohk in liye enenuh luhn mwet sahyac ac in luhngse, ke ma ac sikyak uh, oruh fihsrwacsr yohk nuh sum in akihlen mahmah luhn Nguhn. Nguhn el kuh na in kol ma kom nuhnkuh ma kom fahk, ac ma kom oruh in karuhnguhnwacng mwet ma tuh Leum lacn fah okwaclah etwacack, ma pwacye, ac ahkkweyaclos elos suc tuhfweyucklac sin sie muhtwacn.

Tahmtahel lom lohng puhsrwacl pa kais sie acn yohk srihpac ke fuhfahsryucsr in moul. Kuhtuh pa muhtwacn fuhsr ke toeni luhlahp luhn muhtwacn ke pacl se emet. Kuhtuh muhtwacn fuhsr ma ahkolah in mwet kol God el fah kena nuh selos. Kuhtuh selos macruht sasuc suc soenna oasr tuhlihk nahtuh, kuhtuh ninac fuhsr ac oasr tuhlihk sie kuh luo nahtuh. Kuhtuh oasr tuhlihk mahtuh nahtuh ac kuh tuhtuhlihk nahtuhlos wi kuhlwacnsap in missionary. Kuhtuh oasr tuhlihk nahtuh suc srihkeni luhlahlfongi la ac loes liki lohm selos. Kuhtuh muhkwena muhta ac wacngihn mukul luhlahlfongi kiyaclos. Kuhtuh ninac mahtuh.

Tuh, lah fuhkah ohiyac lom sifacna, kom sie ip—yohk srihpac—ke sucu luhn God ac sucu lom sifacna, lah ke pacl fahsruh, ke facl se inge, kuh ke facl luhn nguhn. Ma kunom yurin God in karuhnguhnwacng oacna ma Lal ac mempucr luhn sucu lom oacna kom oruh ke luhngse ac luhlahlfongi lom ke Jisus Kraist.

Mwe srihkasrak upac lom pa in etuh suc kom fah karuhnguhnwacng, fuhkah, ac pacl se ma fal an. Kom enenuh kahsruh luhn Leum. El etuh insiacn mwet sahyac, ac El etuh ke elos ahkolah in lwelah karuhnguhnwacng lom. Pruhe in luhlahlfongi lom pa yohk srihpac nuh ke orekma wowo lom. Kom kuh luhlahlfongi kolyuck Lal.

El sang mwe ahkweye se inge: “Siyuck sin Pahpah ke inek ke luhlahlfongi, luhlahlfongi lah kom fah eis, ac kom fah puhla Nguhn Muhtahl, suc ahkyohkye kwewa ma suc eneneyuck.”⁵

In weacng pruhe, lotwelah na pwacye ke ma suhmuhslah fah sie ip luhn kapkapwack lom in karuhnguhnwacng. Pa inge sie olwelah: “Tiac sruokyac na ma el fahk; sang in ma sacohk se nuh in nuhnak lom pacl nuhkwewa ke kahs in moul, ac fah utuckot nuh sum ke pacna pacl sacn pacna ke ip yohk enenuh nuh sin mwet nuh kwewa.”⁶

Oruh kom enenuh in sang pacl yohk in pruhe, in nuhnkuh, ac in nuhnak ke srihpac luhn nguhn. Kom fah eis etwacack ke ma pwacye ma okwokyang nuh sum ac ahkkapye kuh lom in karuhnguhnwacng in sucu lom.

Fah oasr pacl ma kom puhla lah kihluckyak lom in lotwelah lah karuhnguhnwacng fuhkah uh suhmuhi. Enenweyuck luhlahlfongi in kuhtanglah. El suhpwacma mwe ahkweye inge:

“Tuh, tiac ulac in oruh ma wo, tuh kowos muhsahi pwelucng ke orekma wo. Ac sikyak ke ma srihk ingacn ahkfahsryeyuck ke ma suc wo.

“Liye, Leum el enenuh insiac ac nuhnak in olwelah; ac olwelah ac ahkostwen fah ipeis na wo ke acn Zion ke lwen sahflah.”⁷

Oasr lom ofong uh sie mwe ahkkahlwemye lah kom kena in lwelah suli luhn Leum in karuhnguhnwacng. Pwacye ma se ingacn nuh sin mwet fuhsr ofohng mihsenge. Kom kuh in etuh suc in karuhnguhnwacng in sucu lom. Fin kom pruhe ke inse pwacye, ine kuh sie muhta fah tuhkuh nuh ke nuhnak lom. Fin kom pruhe in etuh mac in oruh kuh mac in fahk, kom fah puhla sie top. Kais sie pacl kom ahkos, kuh in karuhnguhnwacng lom fah kapkapwack. Kom fah ahkolah nuh ke lwen se ma kom fah karuhnguhnwacng tuhlihk nuhtum sifacna.

Ninac kiacn muhtwacn ac mukul fuhsr uh kuh in pruhe in etuh lah ac fuhkah in karuhnguhnwacng wen ac acn ma luhman koflah suk in karuhnguhnwacng. Kom fah pruhe in etuh lah suc oasr nguhn kuh in karihngihn se ac suc fah lwelah kolyuck sacn. God el lohng ac topuk pruhe pwacye ke elyah luhn ninac se ac suhpwaclah kahsruh Lal.

Oacyacpac, sie ninac mahtuh ofong inge fah puhlah inse ngal ma ke ngal ac ma upac luhn tuhlihk nahtuhl ac nuhtin tuhlihk nahtuhl. Kom fah eis puhlaik ac kolyuck ke mwe srihke ke sucu ma oasr ke ma suhmuhslah.

Ke pacl se ke Eve ac Adam, ke Pahpah tuhmuhn Israel, ac nuh ke kais sie sucu nuh kwewa ke Puk Luhn Mormon, oasr mwe luti na wowo se: kalweni in luhngse.

Oasr sesr mwe srihke in kwacfe luhn Mwet Lahngo oacna El karihngihn tuhlihk nguhn pucspucs nuhtihn Pahpah tuhmwacl Lucng. Finne ke elos ac kuht oruh ma koluk, poun Mwet Lahngo srwackna ahsroeyucklac.⁸ El sramsram ke 3 Nephi nuh ke nguhnin tahmtahel ac tamuhlwel, suc El koflah na srihke in karuhnguhnwacng: “ O kowos mwet … suc pa mwet Israel, pacl ekahsr nga orek owoseni sie won ma oracni won srihsrihk nuh ye pahol, ac ahkweye kowos.”⁹

Nuh sin tahmtahel ke kwewa fihl ke moul in fuhfahsryucsr, ke ohiyacn suc nuh kwewa, ac raunweack facsin kwewa, Mwet Lahngo pa sie mwe srihkasrak fuhkah ma fah ip yohk ke mukwi Lal in sang kahlwem yohk in etwaclah wosasuc ke lohm uh.

Kom fah sang puhla in luhngse pwacye lom in ekuhllah activity luhn sucu ac srihke kac yurin sucu lom. Ma ingacn fah acse kapkapwack wo luhn nguhn, Ke kom pruhe kac ac ke mempucr ke sucu lom, kom fah puhla luhngse lom ac luhngse luhn Mwet Lahngo nuh selos. Ma ingacn fah yohk ac yohkwelihk ke mwe sang luhn nguhn ke kom suk kac. Mempucr ke sucu lom fah puhla kac ke kom pruhe ke luhlahlfongi yohk.

Ke pacl sucu tuhkweni in riti in yohk ke ma suhmuhslah, kom ritelah kaclos ac pruhe kaclos tari in ahkoekomlac. Kom fah konwacack pacl in pruhe ke Nguhn in ahkkahlwemye nuhnak lom. Na, ke pacl lom in rit, mempucr ke sucu fah puhlah luhngse lom nuh sin God ac kahs Lal. Elos fah karihngihnyuck Sel ac sin Nguhn Lal.

Fahsr se ma oacpacna ingacn kuh in tuhkuh ke oacna tuhkweni luhn sucu fin kom pruhe ac plwacnwelah. Kuh in eislah kuhiyac ac eislah pacl, tuh ac fah acse mwe usrnguck. Nga esam sie mwe luti ninac kiyuck el luti ke nga srack fuhsr. Nga srack esamyac wo petsac ke macp se el oraclah ke forfor lal Mwet Pahluh Paul. Nga nuhnkuh lah el eislah pacl lal fuhkah ac kuhiyac in oruh kac. Ac ne mihsenge nga insewowo ke luhngse lal nuh sin Mwet Pahluh sacn.

Kais sie fah konwacack innek in kahsruh in akacsruhi ke ma pwacye luhn sucu ke fohlohkyak luhn Alu luhn Leum. Kais sie sesr fah pruhe, luti, ac nuhnkuh in etuh meac fah orekma yohk srihpac lasr. Tuh nga etuh ma se inge. Nga etuh: kais sie suwos, kuhpahsryang nuh sin wen nuhtin God, fah sie ip yohk srihpac luhn mwe usrnguck ke wosasuc nuh ke fohlohk enganlacna luhn Mwet Lahngo Jisus Kraist. Ke ine muhtahl luhn Jisus Kraist, amacn.