Kowos Sulaclah Mihsenge

Sramsram se ke mwet se Mary Poppins pa sie aten mwet in to tuhlihk—ma oasr kuh sel in oruh ma upac uh.¹ El sohk wi eng kuhtuhlacp uh ac tuhwi in kahsruh sucu elyah se ke Bank se ke Nempuh 17, Cherry Tree Lane, fin acn Edwardian London. Ituckyang lacn liyacacn tuhlihk ac, Jane ac Michael. Ke sie elah na kuh tuhsruhk kuhlwacng, el muhtwacwacack in lotwelos lesin na wowo ac yohk srihpac.

Jane ac Michael oraclah arlac wo, tuhsruhk Mary el sulaclah muh pacl in som luhkwelos. Ke acn in orek petsac uh, kawuck in ahknwacsnwacs chimney se lal Mary, Bert, srihke in kwacfacl in tiac som. El akuhkuhin fahk, “Tuh elos tuhlihk wowo, Mary.”

Mary el topuk, “Yac ngwac lotwelos na fin elos tiac ke? Tuhsruhk nga tiac kuh in kahsrwelos fin elos tiac lwelah nuh sihk, ac wacngihn mwet upac in lutiyuck oacna tuhlihk ma nuhnkuh muh elos etuh ma nuh kwewa uh.”

Bert el siyuck, “Na?”

Mary el topuk, “Na elos enenuh in oruh ma se tok an in wacngihn kahsruh.”²

Tamuhlwel ac tahmtahel, oacna Jane ac Michael Banks, kuht “tuhlihk wowo” suc fal in lutiyuck. Pahpah Tuhmasr Inkuhsrao El ke kahsruh ac ahkinsewowoye kuht, tuhsruhk kuht tiac pacl nuh kwewa lwelah nuh Sel. Kuhtuh pacl uh, kuht finne oruh in muh kuht etuh tari ma nuh kwewa. Ac kuht pac enenuh in sifacna oruh “ma tok” an. Pa srihpen tuhkuh lasr nuh facluh liki facl luhn nguhn ah, lohm inkuhsrao. Sie “ip” tok lasr pa sukohsohk in sulaclah.

Finsrak luhn Pahpah tuhmasr Inkuhsrao in ekihn pahpah se tiac pa in sap tuhlihk nahtuhl in oruh ma wo; pa in liye tuhlihk Nahtuhl in sulaclah in oruh ma wo ac sahflahiyac eklac oacna El. Fin pa na El ke eltahl in ahkostwen, El ac orekmakihn molo na sa ac kaiyuck in kahsre kuht ke elahsr.

Tuhsruhk God El tena engan ke tuhlihk Nahtuhl in mwet eklac ahkpah ac ahkostwen muhkwena uh oacna kosro soko, suc ma ac tuh ngalis na sori Lal an ke rum in muhta celestial ah.³ Moh, God El ke tuhlihk natuhl in kapwack ke nguhn ac Weluhl ke orekma luhn sucu.

God El oakiyac plwacn se ma kuht ac kuh in eklac mwet ipeis ke tohkohsrahi Lal, inkacnek in olwelah se ma kol kuht in eklac oacna El, eis kain moul se Lal, ac moul netok ekihn sucu Yohrol.⁴ Sulaclah lasr sifacna met—ac inge—yohk srihpac nuh ke plwacn se inge, suc kuht tuh luti kac ke facl luhn nguhn ah. Kuht tuh insese ke plwacn sac ac sulaclah in tuhkuh nuh facluh.

In etuh na pwacye lah kuht ac orekmakihn luhlahlfongi ac luti in orekmakihn sulaclah uh in wo, sie lihsrlihsr luhn muhlkuhnlah tuh fihliyucki nuh fin nuhnak lasr, kuht in muh tiac esam plwacn luhn God uh. Fin wacngihn lihsrlihsr sacn, srihpac luhn God uh ac tiac fahlac mweyen kuht tiac kuh in kapwack ac eklac mwet usru luhlahlfongiyuck El kena nuh sesr uh.

Mwet pahluh Lehi el fahk: “Ohinge, Leum God El sang nuh sin mwet tuh elan orekma nuh sel sifacna. Ohinge, sie mwet el tiac kuh in orekma nuh sel sifacna sahyacn na el srihfeyuck ke sie kuh ke ma se sahyac.”⁵ Ke muhtwacwacyacn sie lacfuhl, sie nuhnak an tohuyak Sel Jisus Kraist, Wen Se Met nuhtin God. Nuhnak se sahyac an tohuyak sel Setuhn, Lucifer, suc kena kuhnahoslah sukohsohk in sulaclah ac eslah kuh.⁶

Ke Jisus Kraist, “oasr sie Mwet Iwe lasr nu sin Papa.”⁷ Tukun El ahksahfyelah kihsac in iwaclah Lal, Jisus El “sowack nuh inkuhsrao … in eis sin Pahpah ke suwohs Lal ke pahkotwen Lal nuh sin tuhlihk nuhtin mwet.” Ac, ke eis suwohs Lal ke pahkotwen, “El iwaclah ip yohk luhn tuhlihk nuhtin mwet.”⁸

Iwe luhn Kraist nuh sin Pahpah in ahol kuht tiac lain kena luhn God. Jisus Kraist, suc lwelah kena Lal in som nuh ke kena luhn Pahpah,⁹ fah tiac pahtok oacna sie ma sahyacn ma Pahpah El luhngse ke muhtwacwacackiyac ah me. Wacngihn suhlahlahlfongi muh Pahpah Inkuhsrao El kahluhkluhk ac pahspahs ke oraclah wo lasr uh.

Iwe luhn Kraist pa, ip kac an pa, in ahkacsmakihnye kuht lah El molwelah ma koluk lasr na lah wacngihn mwet sriyucklac liki pahkotwen luhn God uh.¹⁰ Nuh selos ma luhlahlfongi ke Jisus Kraist, auliyak, pacptaislac, ac kampare nuh ke sahflah—sie oruh in fohlohkyang nuh sin God¹¹—Mwet Lahngo El nuhnakmuhnahs, unwe, ac iwe. El Mwet in kahsruh lasr, ahkwo, ac lahngo—fahkwack kac ac pahtok ahksuwohs lasr nuh sin God.¹²

Ke aposet la uh, Lucifer el mwet ahkkoluk kuh lain se. John ke Fwackyuck lal ahkuhtweyac kuhtangyucklac sahflah lal Lucifer: “Na nga lohng sie pusra lulap inkusrao me fahk, Inge, God El fah molela mwet lal! Inge God El akkalemye ku in tokosra Lal! Inge, Kraist, Mwet Sulosolla lun God, el akkalemye ku lal!” Efuh? Mweyen “el su tu ye mutun God lasr ac akkolukye inen mwet lulalfongi wiasr len ac fong, el sisila tari liki inkusrao. Mwet lulafongi wiasr elos kutangulla ke srahn Lamb, ac ke mwe luti pwaye ma elos fahkak uh.”¹³

Lucifer pa mwet ahkkoluk se inge. El sramsram lain kuht ke facl luhn nguhn ah, ac el tahfwelah in ahkkolukye kuht ke moul se inge. El suk in us kuht nuh ke hell. El kena kuht in puhlakihn kweok ac suhpwacr wacngihn sahflahiyac uh. El pa fahk nuh sesr muh kuht tena fal uh, mwet se ma fahk nuh muh kuht tena wo uh, mwet se ma fahk muh wacngihn ahkwoyeyacn sie tahfonglac uh. El pa mwet ahkngal sahflah uh, mwet se ma ahksahf ke kuht kuf tari uh.

Fin Lucifer el luti sie tuhlihk in fahsr ac tuhlihk sacn tihkuclkucl, el ac sasa kasrkuhsrak nuh sin tuhlihk sacn, kael, ac fahk elan tilac srihke. Oruh lal Lucifer uh ac use sruhngwaclah ac suhpwacr—ahksahfyelah ac pacl nuh kwewa. Pahpah tuhmuhn kikiacp se inge pa ahkfahsrye tahfonglac yohk¹⁴ ac orekma kuhtasrihk in kiacpuh ac losrekuht uh, “tuh el suk tuh mwet nuhkwewa in kuh in suhpwacr oacna el sifacna.”¹⁵

Fin Kraist El luti sie tuhlihk in fahsr ac tuhlihk sacn tihkuclkucl, El ac kahsruh tuhlihk sacn in tuyak ac ahkkweyacl ke step se tok an.¹⁶ Kraist El Mwet in kahsruh ac ahkwo se. Ohiyac Lal use engan ac finsrak—ahksahfyelah ac pacl nuh kwewa.

Plwacn luhn God uh oasr pac ahkuhtweyac kac nuh sesr, furok nuh ke ma suhmuhslah uh muh masap. Masap inge tiac ma in ahkpwacr tiac pac masap orekweni in mwena ahkpahye kuht in ahkostwen. Ma inge kuhpahsr nuh ke muhsahyak lasr ke ohiyac luhn God uh, fohlohklac nuh yurin Pahpah tuhmasr Inkuhsrao, eis engan wacngihn sahflah kac. Ahkos masap Lal uh tiac ma pihlacsr ac lahlfon se, ke etuh kuht sulaclah God ac inkacnek Lal nuh lohm ah. Atac se nuh sesr inge oacna nuh sel Adam ac Eve ac, ma, “God El sang nuh selos masap, tukun El oruh in etweyuck nuh selos ke plwacn in molwelah.”¹⁷ Finne God El ke kuht in oasr ke inkacnek luhn olweacng, El use nuh sesr kuh luhn sulaclah.

Ahok, God El kena, sano, ac luti tuh kais sie tuhlihk Nahtuhl in sulaclah sel sifacna. El ac tiac sap kuh nuh sesr. Ke mwe sang luhn sulaclah uh, God El lwelah tuhlihk Nahtuhl in “sifacna orekma kaclos ac in tiac orekmakihnyuck.”¹⁸ Sulaclah uh lwelah nuh sesr in sroacng nuh ke inkacnek uh, kuh tiac. Ac lwelah nuh sesr in srolah, kuh tiac. Oacna ke kuht tiac sap ke kuh in ahkos, kuht tiac kuh in seahkos ke sap kuh. Wacngihn sie kuh, ke wacngihn insese lasr, eiskuhtlac liki inkacnek uh. (Na, ma inge tiacna ma in ahkfohs ke mwet suc sukohsohk in sulaclah ahkkolukyeyac. Elos tiacna fahsr liki inkacnek. Elos pa mwet nwacsnwacs. Elos eis kahlwem, luhngse, ac pahkomuhta sin God.)

Tuhsruhk, ke kuht srolah liki inkacnek uh, God El ahsor mweyen El etuh lah sahflahiyacn ma se, ac pacl nuh kwewa, kol nuh ke srihkweni luhn engan ac tuloki luhn mwe insewowo uh. Ke ma suhmuhslah uh, srolah liki inkacnek uh furokyuck nuh ke ma koluk, na srihkweni luhn engan ac tuloki luhn mwe insewowo pa kaclpous. Ke atac se ngwe, God El tiac kai kuht; kaiyuck uh ma ke srihpen sulaclah sifacna lasr uh, tiac El.

Pacl kuht konwacack lah kuht som liki inkacnek uh, kuht kuh in muhta na sahyac, kuh ke srihpen Iwaclah luhn Jisus Kraist, kuht kuh in sulaclah in fohlohk, ac sroacng. Ke ma suhmuhslah, oruh se ke otwelah in eklac ac fohlohk nuh ke inkacnek uh pa oacna auliyak. Kalmacn tiac auliyak pa kuht sulaclah in eiskuhtlac sifacna liki mwe insewowo ma God El kena use uh. Fin kuht tiac ke engankihn ma nuh kwewa ma kuht kuh in eis, sahyac na kuht fah fohlohk nuh ke sie acn ma kuht kuh in engankihn ma kuht ke eis uh”¹⁹—suc pa sulaclah lasr uh, tiac sulaclah luhn God.

Wacngihn ma ke lusen som lasr liki inkacnek an kuh fuhkah lusac kuht kuhflah an, pacl se kuht otwelah in eklac an, God El kahsre kuht in fohlohk.²⁰ Ke liye luhn God, ke auliyak pwacye ac ahkwot nuh met ke sie luhlahlfongi kuh in Kraist, pacl se kuht fohlohkyang nuh ke inkacnek an, ac oacna kuht in tuh tena srolah.²¹ Mwet Lahngo El molwelah ma koluk lasr ac use sukohsohk liki ahksrihkye luhn engan ac mwe insewowo uh. Ma se inge furokyuck ke ma suhmuhslah uh in oacna auliyak uh. Tukun pacptais, mempucr nuh kwewa puhtatlac liki inkacnek uh—finne ahtulac liki. Ohinge, orekmakihn luhlahlfongi ke Jisus Kraist, auliyak, eis kahsruh Sel, ac eis nuhnakmuhnahs, tiac ma nuh ke pacl se na tuhsruhk oruh se nuh ke lusen moul uh, oruh ac kalweniyuck se ma ac kais kuhtuh na muhsahyak sie fin sie. Pa inge ohiyac kuht kuh in “muhtweng ne ke na sahflah” uh.”²²

Kuht enenuh in sulaclah lah suc kuht ac kuhlwacnsuhpuh uh.²³ Luhpan engan ma pahtpaht lasr uh wiwina sulaclah ke God moul ac Weluhl ke orekma Lal. Ke kwacfweacng in sifacna “oruh ma se tok” an, kuht ahkpah in orekmakihn sulaclah lasr uh in pwacye. Oacna Prestuhn Luhlahp luo met luhn Rilif Sosaiti fahk, kuht tiac enenuh in “ahwowo ma enenuh in taranyuck ac ahkpwacyeiyuck pacl nuhkwewa.”²⁴ Moh, God El kena kuht in lahlmwetmwet ac ohiyacn sifacna mukwikwi.

Sulaclah in fahsr tukun plwacn luhn Pahpah pa ohiyac sefanna kuht kuh in eklac mwet usru ke tohkohsrahi; pacl sacn na pa El kuh in luhlahlfongi kuht in tiac finne siyuck ma lain kena Lal uh.²⁵ Tuhsruhk kuht enenuh in esam lah “wacngihn mwet upac in lutiyuck oacna tuhlihk ma nuhnkuh muh elos etuh ma nuh kwewa uh.” Na kuht enenuh in insese in lutiyuck ke ohiyac luhn Leum sin Leum ac mwet kuhlwacnsap Lal. Kuht kuh in eis luhlahlfongi lah kuht tuhlihk kuloh nuhtin Pahpah ac Ninac Inkuhsrao²⁶ ac fal “in lutiyuck,” ac in kahlwem lah “kuh in sifacna” oruh ma tok an fah tiac kalmac pa “muhkwena.”

Oacna mwet pahluh luhn Puk luhn Mormon Jacob el fahk, nga weluhl fahk:

“Ke ma inge, ahkenganye insiowos, ac esam lah kowos sukohsohk in mukwikwi nuh suwos sifacna in sulaclah inkacnek luhn misact ma pahtpaht kuh inkacnek luhn moul ma pahtpaht.

“Ohinge, mwet sacohk wiyuck, sifacna fohlohkyang nuh ke luhngse luhn God, ac tiac nuh ke luhngse luhn devil … ; ac esam, tukun kowos fohlohkyang nuh yurin God, tuh ke luhng kuhlwacng luhn God muhkwefanna tuh kowos moliyucklac.”²⁷

Na, sulaclah luhlahlfongi ke Kraist; sulaclah auliyak; sulaclah in pacptaislac ac eis Nguhn Muhtahl; sulaclah ke oaru in ahkolah ac fal in ipeis ke kuhfa luhn Leum; sulaclah in oraclah olwelah ke tempuhl; ac sulaclah in kuhlwacnsuhpuh God moul ac tuhlihk Nahtuhl. Sulaclah lasr uh fahkwack lah suc kuht uh ac suc kuht eklac nuh kac uh.

Nga ahksahfye na mwe insewowo sahflah lal Jacob: “Ohinge, lwelah God Elan ulkowosyak liki … misac ma pahtpaht ke kuhn luhn iwaclah, tuh kowos in kuh in eisyuck nuh ke tohkohsrahi ma pahtpaht luhn God.”²⁸ Ke inen Jisus Kraist, amen.