Orekma luhn Nuhnak Muhnahs

April tari ah, ke Prestuhn Russell M. Nelson el muhtwacwacack in luti ke ministering kuh kuhlwacnsap, el fahk lah pa sie innek in muh ahkkohs masap luhlahp in luhngse God ac sie sin sie.¹ Kuht, mwet officer luhn Alu uh, kaksakihnkowos ac engan suwohs ke to na wowo lowos kowos muhtwacwacack ke ma inge. Kuht kuloh nuh suwos ke ahkos mwet pahluh lasr orekma wowo inge ac ngihsre lah kowos met sano ke mwe luti sahyac. Muhtwacwacack na in kahsruh mwet ma enenuh. Met fosrngahlah tuh kom in kahsruh fuhkah. Kuht fin ukwe ip yohk ma lutiyuck, fahsr fal nuh ke ki luhn pristut, ac suk Nguhn Muhtahl in kol kuht, kuht tiac kuh in tahfonglac.

Olutu uh nga ke sramsram ke ip yohk se luhn kuhlwacnsap ma tiac pakpucklac nuh sesr, wacngihn lohlngohk in kihsensiyuck la, ac wacngihn mwet kuht ripohrti nuh kac sahyacn inkuhsrao. Lwelah ngan akacsruhi sramsram in lohm soko ke kain in karihngihn inge.

Grant Morrell Bowen el pahpah ac mukul tuhma oaru ac suwohs se suc, oacna mwet pucspucs suc moul ke orekma innimac, muhtwacwacack in suhkahsruhp ke suhpuhs fahko tuhkuh ke innimac lal. El ac muhtwacn kiyacl, Norma, tuh sokwack orekma sasuc, ac mukwilac nuh ke siena mura, ac muhtwacwacack in eis mani fal nuh seltahl. Tuhsruhk, ke pacl suhpwacr se, Tamuhlwel Bowen el ahsorack, ke sie lohlngohk nuh ke temple recommend se, bishop se el tiacna luhlahlfongi kuhtuh muh Morrel el sang sie tahfuh singucul lal.

Nga tiacna etuh lah suc sin mukul inge etuh pwacyeiyacn ma inge ke lwen sacn, tuh nga etuh muh Tahmtahel Bowen el som liki lohlngohk se wi temple recommend sasuc lal, ac Tamuhlwel Bowen el som fohlohkyak ac tiacna sulpac wi Alu uh ke yac 15.

Macnsiskihn suc etuh ma pwacye ke sie tahfuh singucul lal, kahlwem lah Morrel ac bishop sac kwewana muhlkuhnlah sap luhn Mwet Lahngo in muh “aksaye akwoyela inmasrlomtal”² ac mwe luti lal Paul in “nik kowos lela mulat lowos in kolkowoslac nu ke ma koluk.”³ Tuh kahlwem elostiacna aksaye akwoyelah sie sin sie ac muhlat lal Tamuhlwel Bowen srwackna oasr ke pacl na loes, ma ahkkahlwemye mwe luti pwacye luhn mukul lahlmwetmwet mahtuh luhn mwet Roman suc fahk, “Fohlohkyak uh, fin tiacna karihngihnyuckyang, koluk liki ma se ma ahkkasrkuhsrakiyac mwet sacn.”⁴ Tuh ma usrnguck luhn nuhnak muhnahs kuh in kahsruh kuht, ac ke luhngse nuh sin sucu lal ac nuh sin Alu se el etuh muh pwacye, Morrell Bowen el fohlohk na pwacye nuh ke Alu uh. Lwelah ngan akacsruhi ma sikyak.

Mukul nahtuhl Tamuhlwel Bowen, Brad, el kawuck wo se lasr ac kuhlwacnsap ke U luhn Mwet Itngucul ke acn Idaho. Brad el yac singucul sie ke ma inge sikyak, ac ke yac 15 el liye luhlahlfongi luhn pahpah tuhmwacl wacngihnlac, ac liye ma koluk ma sikyak nuh ke sucu lal ke fohlohkyak ma tuhkuh ke fohs ke sie tahfuh singucul ah. El etuh el enenuh kahsruh. Ke holiday luhn Thanksgiving tuhkuh ke ye 1977, Brad, matwac 26 ac sie mwet lutlut ke Brigham Young University; muhtwacn kiyacl, Valerie, ac ahwowo sasuc se nahtuhltahl, Mic, sroacng nuh ke stosah mah okwacltahl ac, finne afyaf, kahsruhsr nuh Billings, Montana. Finne oasr ongaiyac ke stosah okwacltahl, wacngihn ma kuh in kosracltahllah in kuhlwacnsap nuh sel Tamuhlwel Bowen mahtuh.

Ke elos tuhkuh, Brad ac muhtwacn wiyacl Pam siyuck in sramsram tuhkweni yurin pahpah tuhmwacltahl. “Kom pahpah na wowo se,” Brad sramsram ke insiacl, “ac kuht etuh muh kom luhngse kuht. Tuh ma se tiacna wo, ac ohinge ke pacl na loeloes. Ke srihpen kom ahkkweokyeyuck ke pacl se, sucu se inge tuh kweok ke yac puhkantwen. Kuht suhfas, ac kom pa mwet sefanna suc kuh in ahkwoye kuht. Nuhnak muhnahs, nuhnak muhnahs, tukun pacl inge, kuh kom kuh in suk insiom ac sislah ma suhpwacr ma sikyak ke bishop sacn ac sulpac muhtwacwacack in kol sucu se inge ke wosasuc oacna kom oruh met?”

El mihslac na pwacye. Na Tamuhlwel Bowen el ngwetwacng nuh sin mwet luo inge, suc tuhlihk nahtuhl, sri luhn sri lal ac ikoac luhn ikwacl,⁵ ac kahkahsrihk fahk, “Ahok. Ahok, nga fah oruh.”

Enganwack nuh pwacye ke top se inge, Brad Bowen ac sucu lal tuh liye mukul ac pahpah tuhmwacltahl som nuh ke bishop sasuc lal ke inse pwacye in tuh ahksuwohsye moul lal. Ac tukun mukwikwi puhlaik tuh ahklut se, bishop se, suc tuh ngihsre Tamuhlwel Bowen pacl puhkantwen in fohlohk, sruokilyac Morrel ke pahol ke luhngse ac na sruokilyac ke pacl na loes.

Wik na ekahsr somlah—tiac enenuh pacl loes—tamuhlwel Bowen el sroacng nuh pwacye nuh ke Alu ac ahknwacsnwacsyacl moul lal in muh som nuh ke tempuhl. Tiac paht el eis kunohkohn in kol branch na srihksrihk se luhn mwet longoul limekohsr ac liyacacng in muh fokokoi ac aluhkwelah mwet 100. Ma inge tuh sikyak apkuhran na yac luhmngaul met, tuh ke srihpen wen se ac acn se nguhsr in kuhlwacnsap nuh in pahpah tuhmwacl ac insese luhn pahpah sacn in nuhnak muhnahs ac fahsr nuh met, finne oasr tahfonglac luhn mwet sahyac, use mwe insewowo ma srwackna tuhkuh—ac fah tuhkuh nwe tohk ma pahtpaht—nuh ke sucu lal Bowen.

Tamuhlwel ac tahmtahel, Jisus El siyuck tuh kuht in moul tuhkweni ke luhngse”⁶ ac ke “wacngihn akuhkuhin inmahsrlowos.”⁷ “el suc oasr nguhn in lokoalok yohrohl el tiacna ma Luhk,” El sensenkackihn Mwet Nephi ah.⁸ Ke pwacye, in yohk, kuhpahsr lasr nuh sin Kraist fah etweyuckyak—kuh wiwina—kuhpahsr lasr nuh sie sin sie.

“Kowos fin … kena in tuhkuh nuh Yuruk,” El fahk, “ac esamwack lah oasr ma suhfal luhn tamuhlwel wiyom in lain kom—

“Som nuh yurun tamuhlwel wiyom, ac ma se met auliyak nuh [sel], ac na tuhkuh nuh Yuruk ke insiom nohfohn, ac Nga fah eis kom.”⁹

Kais sie sesr kuh in esamwack ngal ac ahsor ac ma upac ma srwackna kuh in ahkkolukye mihs luhn insiacn mwet se, kuh sucu se, kuh mura se. Finne kuht oruh ngal ingacn kuh kuht tuh eis ngal ingacn, kihnet ingacn enenuh in unweyucklac tuh moul uh in engan oacna God El luhngse. Oacna mongo mahtuh ma oan paht nwe koluklac, tahfonglac mahtuh ingacn tuh koluklac pacna. Nuhnak muhnahs tiac lwelah ma ingacn insiowos. Oacna Prospero el fahk nuh sel Alonso suc auli ke The Tempest, “Kuht in tiac ahktoasrye nuhnak lasr ke ma toasr ma tuh somlah tari.”¹⁰

“Nunak munas nu sin wet saya, ac God El fah nunak munas nu suwos,”¹¹ Kraist el luti ke pacl luhn Wuhlweacng Mahtuh. Ac ke lwen lasr, Leum el fahk elac sang nuhnak muhnahs nuh sin mwet ma el nuhnkuh fal nuh kac, tuh sapkihnyuck sesr in sang nuhnak muhnahs nuh sin mwet nuhkwewa.”¹² Tuhsruhk, srwackna yohk srihpac nuh kuhtuh suwohs suc kweok in etuh ke ma el tiac fahk. El tiac fahk, “Kom ac fah tiac ngal kuh ahsorkihn ma koluk mwet sahyac oruh nuh sum.” El tiac pac fahk, “In nuhnak muhnahs kom enenuh fohlohk ac sulpac wi mwet se suc koluk, ac sruhngwac kom.” Tuh finne ma koluk na pwacye sikyak nuh sesr, kuht kuh in kuhtanglah ahsor lasr ke kuht muhtwacwacack in fahsr ke inkacnek luhn unweyuck pwacye. Jisus luhn Nazareth el fahsr ke inkacnek in nuhnak muhnahs se inge, ac el fahk nuh sesr kais sie, “fahsru fahsr tukuk.”¹³

Ke mwe solsol se inge in ekihn mwet tuhma lutlut Lal ac oruh muh El oruh, Jisus el siyuck sesr in us pahkotwen Lal—“kuht mwet in tafwema kas lun Christ” ke “orekma luhn nuhnak muhnahs,” oacna Paul el ahkuhtweyac nuh sin mwet Corinth.¹⁴ El pa Mwet Ono luhn kihnet nuhkwewa, El suc ahksuwohsye ma suhfal nuhkwewa, siyuck sesr in Weluhl orekma ke kunohkohn yohk in use mihslac nuh ke facluh ma koflah konwacack mihslac ke acn sahyac.

Na, oacna Phillips Brooks el sihmlac, “Kowos suc lwelah tahfonglac kuh ma koluk luhn mwet sahyac in wakre kom yac nuh ke yac, ac kotwelah in ahkwoye; kowos suc tiacna ahksahfyelah ahngyahng lom ke srihpen kowos tiac kuh in sulaclah in sislah inse fuhlwact ac ahkwoye; kowos suc srasrol motom nuh sin mwet sahyac ac tiacna sramsram nuh selos mweyen lahlfon lom … ; kowos suc lwelah … insiyacn mwet se mwel ke kahs in kuhlwacng lowos, ma kowos sahp ac sang … ke sie lwen tohk, … som ingena ac oruh ma sacn ma sahp ac fah tiacna pacl wo in oruh tohk.”¹⁵

Tamuhlwel ac tahmtahel sacohk luhk, nga fahkwelihk lah nuhnak muhnahs ac muhlkuhnlah ma koluk, mahtuh ac sasuc, arlac yohk srihpac nuh ke woiyacn Iwaclah luhn Jisus Kraist. Nga fahkwelihk muh unweyucklac luhn nguhn tuhkuh sin Mwet Molwelah muhtahl lasr, suc tuhkuh in kahsruh kuht ke “unwelah oasr ke lulin pahol.”¹⁶ Kuht kuloh nuh Sel, ac Pahpah Lucng suc suhpwaclma, lah ahksasucye ac sifilpac isuslac, ac moul sukohsohk liki ahsor ac tahfonglac mahtuh, ma nuh kuh se, tuh moliyucklac tari ke moul yohk sin srah luhn Lahm ma tuh kahklah kacl.

Ke wal luhn sie mwet sap ma utuckuh nuh sihk sin Mwet Lahngo luhn facluh, nga fahkwelihk ke mihs luhn nguhn lah ahksasucyeyucklac nuh sin God ac nuh sie sin sie ma tuhkuh kuht fin inse puhsisacl ac puhlaik in suk. Tilac orek fohs sie sin sie, Mwet Lahngo el siyuck.¹⁷ Kom fin etuh ke kihnet mah se, ahkwoyelah. Karihngihn sie sin sie ke luhngse.

Kawuck wowo luhk, ke kuhlwacnsap lasr luhn nuhnak muhnahs. Nga siyuck sesr in ahkmihs—in luhngse mihslac, in suk mihslac, in oraclah mihslac, in karihngihn mihslac. Nga siyuck ma inge ke inen Fihsrack luhn Mislac, suc etuh ma nuhkwewa ke in “orekla in lohm sin mwet kawuk se [Lal]”¹⁸ tuh srwackna kena in nuhnak muhnahs ac muhlkuhnlah—ac fah ahkkweye—ac in engan. Ke ma inge nga pruhe, ke kowos ac nga, ke inen Leum Jisus Kraist, amen.