Karihngihn Nguhn
Kuht saplak ke luhngse nuh sin mwet sahyac ke srihpen pa ma se ma Mwet Lahngo lasr sapkihn sesr in oruh.
Kihtin pacl ah nga sramsram nuh sin kawuck luhk, el fahk nuh sihk ke el fuhsr ac tuhfahna pacptaislac nuh ke Alu uh, el puhla muh sahp el srweyucklac kuhtuh liki ward se lal. Missionary suc tuh lotwel ah mukwilac liki can sel, ac el puhla muhkahimtacl. Ke wacngihn kawuck ke ward se lal ah, el sulpac wi kawuck mahtuh lal ac weluhltahl ke mukwikwi ma oruh tiac fal nuh ke alu—na el muhtwacwacack in tiacna wi alu. Ke sronin muhta, el ahkuhtweyac nuh sihk srui lal ke sie mempucr ke ward lal saplakyang nuh sel ac, ke ohiyac wo ac kuhlwacng se, solwacl in fohlohk. Ke mahlwem ekahsr, el sulpac fohlohk na wi alu, ahkkweye mwet sahyac ac el sifacna. Yac kuht tarilacna nuh sin mwet shepherd fin acn Brazil suc sokwack mukul fuhsr se inge, Elder Carlos A. Godoy, suc muhta tukuk ke sie mempucr ke Prestuhnsi luhn Itngucul?
Usrnguck nuh pwacye lah ma kain ma srihsrihk ohinge kuh in eklac ma pahtpaht. Ma pwacye se inge oasr infulwen orekma in kuhlwacnsap luhn Alu uh. Pahpah Lucng kuh in orekmakihn mukwikwi srihksrihk ac fihsrwacsr lasr in muh ma wolacna se. Tuhfahna mahlwem ohnkohsr ke Prestuhn Russell M. Nelson el ahkkahlwemye lah, “Leum El oraclah eklac ma yohk srihpac nuh ke ohiyac kuht karihngihn sie sin sie,”1 el ahkuhtweyac, “Sahyacna, kuht fah ahkfahsrye sie atac sasuc, muhtahl liki in karihngihn ac in luti mwet sahyac uh. Kuht fah pahngon ohiyac inge oacna ke ‘karihngihn.’”2
Prestuhn Nelson el oacyacpac ahkuhtweyac: “Ma yohk srihpac se luhn Alu pwacye ac moul luhn Leum fah Srihpac ac fah oasr orekma plwacniyuck, kolyuck se in kuhlwacnsap tuhlihk nuhtin God kwewa ac sucu lalos. Ke srihpen pa inge Alu Lal, kuht oacna mwet kuhlwacnsap lal fah kuhlwacnsap nuh sin kais sie, oacna El tuh oruh. Kuht fah kuhlwacnsap ke Inel, ke kuh ac wal Lal, ac ke luhngse kuhlwacng Lal.”3
Tukun pweng se, mukwikwi lowos nuh kac tuh wolacna nuh pwacye! Kuht eis ripohrt ke ma wo ma tuhkuh ke orekmakihnyacn ma sasuc inge ke luhkuhn stek nuhkwewa fin facluh oacna kolyuck sin mwet pahluh moul se lasr. Ke srihkasrak, tamuhlwel ac tahmtahel in karihngihn tuh srihsrngiyucki nuh ke sucu, u in karihngihn—weacng mukul ac muhtwacn fuhsr—oreklac, ac kihsensiyuck in lohlngohk ke kuhlwacnsap tuh sikyak.
Nga tiac ma tiacna lut lah mahlwem ohnkohsr met liki pwenyuck ke fahkyuck luhn ekweyah—“balance ac kuhpahsr sasuc se nuh ke mwet luti luhn wosasuc fin acn lohm ac fin lohm Alu an”4—pwenyuck ke fahkyuck ke karihngihn use nuh sesr. Muhtwacwacack ke Jacnweri, ke kuht ohsun ke ao luo in kaksakihn, ma nuhkwewa kuht etwaclah ke karihngihn fah kahsrwekuht in balancei sie lwen sahpuht fuhlwact ac muhtahl, lwen in Sahpuht ke lohm yurun sucu ac mwet luhngse lasr.
Ke ma tahklac inge uh, kuht sahp ac siyuck, “Kuh kuht ac etuh fuhkah kuht kuhlwacnsap ke ohiyacn Leum? Kuh kuht kahsruh Mwet Shepherd Wo ke ohiyac se El luhngse?”
Ke nga tuhfahna sramsram, Prestuhn Henry B. Eyring el engan lah Mwet Luhlahlfongi mukwikwi nuh kac ma sasuc inge tuhsruhk el oacyacpac fahk el finsrak lah mempucr etuh lah karihngihn uh yohk liki “in kuhlwacng na.” Nga tiac fahk muh in kuhlwacng tiac na yohk srihpac, tuh mwet suc kahlwem kalmac nuh pwacye luhn karihngihn uh kahlwem lah yohk liki kuhlwacng muhkwena. Ke ohiyac luhn Leum, karihngihn uh kuh in ma na wowo se nuh sin mwet puhkantwen ac new tohk ma pahtpaht nohfohn, oacna nuh sel Elder Godoy.
“Mwet Lahngo El luti ke srihkasrak Lal kalmacn karihngihn mweyen El kuhlwacnsap ke luhngse. … El … luti, pruhe, pahkomuhta, ac ahkinsewowoyaclos suc raunwellah, suli mwet nuhkwewa in ukwacl. … Oacna mempucr luhn Alu uh karihngihn ke ohiyac fuhlwact ac muhtahl se, elos suk in kuhlwacnsap oacna El ac oruh—in in liyacacng Alu uh pacl nuhkwewa, in oasr yohrohlos ac ahkkweyaclos, in muhtwacta lohm sin kais sie mempucr, ac in kahsruh kais sie in mwet tuhma lutlut pwacye luhn Jisus Kraist.”5
Kuht kahlwem lah sie mwet shepherd pwacye el luhngse sip nahtuhl, etuh kais sie selos ke ine, ac “luhngse woiyacn ke” lalos.6
Kawuck luhk ke yac pucs luhk moul oacna mwet rancher se, orekma upac in karihngihn cow ac sip nahtuhl ke finohl luhlahp luhn Rocky Mountains. El akacsruhi nuh sihk ma upac ac ma sensen ma tuhkuh ke karihngihnyacn sip uh. El ahkuhtweyac ke spring, ke apkuhran muhlwesrlac sno uh ke finohl uh, el fihliyac un sip luhn sucu lal ma apkuhran sip tausin luo ke finohl ah ke puhlan pacl luhn summer. We, el liyaclosyang nwe ke pacl luhn fall, ac na elos fah mukwilac liki acn we nuh ke siena innimac ma tiac ohyucu. El ahkuhtweyac lah in karihngihn un sip luhlahp se arlac upac, el enenuh orekma lwen na fohn se—tuhkahkwek met liki faht ah takwack ac ahksahfyelah orekma lal tukun lohsrwacni. El koflah oruh sifacna.
Oasr mwet sahyac suc kahsruh karihngihn un sip se, wi mwet mahtuh suc suhmaht ke kain orekma sacn oacyacpac mwet fuhsr suc sasuc kac ac eis lahlmwetmwet sin mwet mahtuh suc weluhlos. El oacyacpac orekmakihn ohsr mahtuh lukoac, ohsr fuhsr lukoac, sheepdog mahtuh lukoac, ac kosro fuhsr lukoac kuh tolkoe. Nuh ke pacl luhn summer inge, kawuck luhk ac sip lal sun engyeng ac af, mas, kihnet, mwel, ac kain in ma upac nuhkwewa. Kuhtuh yac uh elos enenuh in us kof puhkantwen sip in muh tiacna misac. Na, kais sie yac uh, ke sno luhn winter tuhkuh ac un sip ah utucklac liki finohl ah ac oeyucklac, kwacna ahluhkwelah sip 200 suc tuhlac.
Un sip luhn 2,000 fihliyucklac ke finohl ah ke muhtwacwacackiyacn yac ah srihkweni nuh 1,800. Inkaiyacn sip suc tuhlac tiacna misac sin mas kuh mahtuh, tuh sin kosro lwemnak oacna mountain lions kuh coyotes. Kosro lwemnak inge kwacna konwacack sip suc som liki un sip ah, suc som liki karihngihnyuck luhn mwet shepherd lalos. Kuh kom kuh in nuhnkuh ke kihtihn pacl ma nga tuhfahna ahkuhtweyac tuh luhmweyucklac nuh ke ma luhn nguhn? Suc pa mwet shepherd uh? Suc un sip uh? Suc elos suc kahsruh mwet shepherd?
Leum Jisus Kraist El sifacna fahk, “Nga mwet shepherd wo. Nga etu ma nutik … ac nga engan in sang moul luk ke sheep nutik.”7
Mwet pahluh Nephi el oacyacpac luti lah Jisus “fah kihte sip nahtuhl, ac elos fah konwacack nien mongo Yohrohl.”8 Nga puhla mihslac in etuh lah “Leum el pa shepherd luhk”9 ac lah kais sie sesr etweyuck Sel ac oasr ye karihngihnyuck Lal. Ke kuht sun engyeng ac af luhn moul uh, mas, kihnet, ac mwel, Leum—mwet shepherd lasr—ac karihngihn kuht. Elac ahksasucye nguhn lasr.
Ke ohiyac se pacna ma kawuck luhk karihngihn sip nahtuhl ke kahsruh luhn mwet karihngihn sip mahtuh ac fuhsr, ohsr, ac kosro ma karihngihn sip uh, Leum el oacyacpac enenuh kahsruh ke orekma luhn luhngse nuh ke sip luhn un sip Lal.
Kuht tuhlihk nuhtin Pahpah luhngse Inkuhsrao ac kuht sip ke un sip Lal, kuht engankihn mwe insewowo in karihngihnyuck kais sie sin Jisus Kraist. Ke pacl se pacna, oasr kunohkohn lasr in karihngihn mwet ma raunikuhtlac oacna mwet shepherd. Kuht in ahkos kahs luhn Leum in “kuhlwacnsuhpweyuc ac som ke Inek, ac … oracni nuh sie sip Nuhtihk.”10
Suc mwet shepherd se? Kais sie mukul, muhtwacn, ac tuhlihk ke tohkohsrahi luhn God ekihn mwet shepherd se. Tiac enenuh pakpucklac kom. Ke pacl se ke otyak liki kof in pacptais, kuh pahngonyuck nuh ke orekma se inge. Kuht saplak ke luhngse nuh sin mwet sahyac ke srihpen pa ma se ma Mwet Lahngo lasr sapkihn sesr in oruh. Alma el luti: Tuh meac oasr mwet shepherd … suc oasr sip pucspucs nahtuh a tiac karuhnguhnuhlos, tuh wolf suhlallacl in tiac utyak ac kanglah un sip nahtuhl? … El ac tiac ukwacack?”11 Kuhtwena pacl mwet tuhlan lasr enenuh kahsruh ke ma luhn facluh kuh ma luhn nguhn, kuh sa som kahsrwelos. Kuht ac akacsruhi ke ma toasr luhn kais sie, tuh ma inge in muhlahlahlac. Kuht kena in ahsor weluhlos suc ahsor. Kuht ahkenganyaclos suc enenuh in ahkenganyeyuck.12 Leum el ke luhngse kena kuht in oruh ma inge. Ac sie lwen fah tuhkuh ac Elac nuhnuhnkuh kuht ke ohyiacn karihngihn lasr nuh ke un sip Lal.13
Mwet kawuck shepherd se luhk akacsruhi siepac ma yohk srihpac ke karihngihnyacn sip ke innimac uh. El ahkuhtweyac lah sip suc tuhlac arulacna muhnahs nuh ke sensen luhn kosro lwemnak. Ke pwacye, 15 percent luhn pacl lal ac u lal oasr ke sukyacn sip suc tuhlac. Elos fin sa konwacack sip tuhlac ah, met liki sip uh som loeslac liki un sip uh, sip uh kwacna wo. Konwacack sip tuhlac enenuh luhpan muhtweng.
Kuhtuh yac somlah uh, nga konwacack article se ke newspaper se ma nga luhngse oruh nga sefiyac. Kahs ma oasr nuh ke fahk, “Kosro Oaru Se Tiacna Som Liki Sip Nahtuhl.”14 Article se inge ahkuhtweyac lah kuhtuh sip ma wi un sip se ma fototo nuh ke acn sin kawuck luhk likiyucklac ke finohl ah. Mahlwem luo kuh tolu tohk, sip ah srwackna sremlah ke sno ke finohl ah. Ke sip uh likiyucklac ah, kosro in karihngihn sip soko ah muhta yurin sip ah—karuhnguhnuhltahl ke mahlwem puhkantwen ke sno ac ohyucu ah, ac topang liki coyotes, mountain lions, kuh kuhtwena kosro lwemnak sahyac ma ac ahkkolukye sip uh. El muhta we nwe ke el kuh in kol kuh us sip ah in fohlohk nuh ye karihngihnyuck luhn mwet shepherd ac un sip ah. Petsac oasr ke muhtwacwackiyac mwe sihm se inge lwelah sie mwet in liye ma wo ac suwohs sin ahtron muhta ac mukwikwi luhn sheepdog se inge.
Ke Wuhlweacng Sasuc, kuht konwacack puhpuhlyuck soko ac mwe luti luhn Mwet Lahngo ma ahkuhtweyac wo kunohkohn lasr oacna mwet shepherd, tahmtahel ac tamuhlwel in karihngihn, luhn sip suc tuhlac:
“Fin sie suwos oasr sheep sioifok natul, ac soko tuhlac, mea el ac oru? Ya el ac tia filiya ma eungoul eu inima an ac som suk ma soko ma tuhlac nwe ke na el konauk?
“Ke el konalak el ac arulana engan, na el ac srakalak nu finpisal,
“Ac usal folokla nu yen sel ah. Na el ac pangoneni mwet kawuk lal ac mwet tulan lal ac fahk nu selos, ’Fahsru wiyu engan, mweyen nga konauk sheep soko nutik ma tuhlac.”15
Ke kuht ahkfototoye ma lutiyuck ke puhpuhlyuck soko inge, kuht etwaclah mwet luti wo inge:
-
Kuht ac etwaclah fin oasr sip tuhlac.
-
Kuht ac sokolos nwe konwaclosyak.
-
Ke konweyuckyak elos, kuht sahp in srakluhlosyak fin puhsrwacsr ac usaclos nuh lohm ah.
-
Kuht raunweloslac ke kawuck ke elos fohlohk.
Tamuhlwel ac tahmtahel, ma upac yohk ac mwe insewowo yohk fah tuhkuh ke kuht karihngihn sip suc tuhlac. Mempucr ke Alu uh ke Puk luhn Mormon “liyacacng mwet lalos, ac in kihtaclos ke ma suc suwohswohs.”16 Kuht kuh in ukwe srihkasrak la ac esam lah kuhlwacnsap uh in “kolyuck sin Nguhn, … wiwina, ac … falyang nuh sin kais sie mempucr.” Arulacna yohk srihpac tuh kuht “suk ac kahsruh mwet ac sucu in ahkolah nuh sin akwuck tohk lalos, in ahkos olwelah [lalos] … , ac elos in kuh in kahsrwelos sifacna.”17
Mwet nuhkwewa arulacna sacohk nuh sin Pahpah Lucng. Nguhsr Lal nuh sesr in karihngihn arulacna yohk srihpac nuh Sel, ac nuh sin orekma ac wolacna Lal. Ke pwacye pa orekma luhn ma pahtpaht. Kais sie sin tuhlihk Nahtuhl oasr yohk woiyac la ke nuhnak Lal. El luhngse kom ke sie luhngse ma tiac kuh in luhmweyucklac sum. Oacna kosro in karihngihn sip oaru se, Leum El ac muhta finohl ah in karihngihn kom liki engyeng, af, sno, ac ma sahyac.
Prestuhn Russell M. Nelson el luti kuht ke toeni luhlahp tari ah: “Pweng lasr nuh facluh [ac, ngan tahfwelah, “nuh sin un sip in karihngihn lasr”] fihsrwacsr ac pwacye: kuht suli tuhlihk nuhtin God suc moul ac misac tari in tuhkuh nuh ke Mwet Lahngo, ac eis mwe insewowo luhn temple muhtahl, engan, ac eis moul ma pahtpaht.”18
Lwelah kuht in fahsr kampare nuh ke fwackyuck luhn mwet pahluh inge, kuht in muh kuh in karihngihn mwet nuh ke tempuhl ac ke sahflah nuh ke Mwet Lahngo lasr, Jisus Kraist. El tiacna nuhnkuh kuht ac oruh ma usrnguck yohk. El siyuck na lah kuh us tamuhlwel ac tahmtahel wiyacsr nuh Sel, ac oasr kuh Lal in molwelah nguhn luhn mwet. Ke kuht oruh ohinge, kuht kuh in ac fah eis olwelah se inge: “Ac ke Mwet shepherd Fulat el sikme, kowos ac fah eis tefuro saromrom ac wolana, su ac fah tia ku in efla.”19 Ke ma inge nga ahklohye—ac ke Jisus Kraist ke Mwet Lahngo lasr ac Mwet Molwelah lasr—ke inen Jisus Kraist, amen.