2010–2019
Ine pwacye ke Alu uh
Ohktohpa 2018

Ine Pwacye luhn Alu uh

Sel Prestuhn Russell M. Nelson

Jisus Kraist El srihsrngi nuh sesr in pahngon Alu uh ke Inel mwen pa Alu Lal uh, sesseslah ke kuh Lal.

Tamuhlwel ac tahmtahel sacohk wiyuck, ke sacnri na wolacna se inge kuht engan ke toeni lasr ke srihpen mwe insewowo puhkantwen sin Leum lasr. Kuht tarilacna ke sramsram lom ke wosasuc fohlohkihnyuckyak lal Jisus Kraist, ke kihsac kom oraclah nuh ke inkacnek olwelah Lal, ac ke kuhlwacnsap wowo lom nuh ke Alu Lal.

Mihsenge nga oruh in sramsramkihn sie ip ke ma yohk srihpac se. Ke wik ekahsr ma somlah ah, nga oruh sramsram se ke pwacyeiyacn ine nuh ke Alu uh.1 Nga sruhmuhn ke srihpen Leum El ahkkweyeyuc ke nuhnak luhk uh in sruhmuhn ke pwacyeiyacn ine Alu Lal, suc pa Alu luhn Jisus Kraist luhn Mwet Luhlahlfongi ke Lwen Sahflah.2

Kom ac motko angwe, ke top nuh ke fahk se inge ac ikihlyuck ke atac se inge3 fohsack. Puhs sin mempucr ahkpwacyeyelah ine luhn alu ke blogs laltahl ac social media laltahl. Kuhtuh suk lah efuh, ke ma sikyak fin facluh inge, arulacna yohk srihpac in lohacng nuh ke ma na srihk se. Ac kuhtuh fahk muh tiac kuh in oreklac, na efuh in tiac srihke? Lwelah nga in ahkuhtweyac lah efuh kuht arulacna elyah ke ma se inge. Tuhsruhk met lwelah nga in fahk lah Alu uh tiac:

  • Pa tiacna in eklac ine se.

  • Pa tiacna in ahksasucyeyuck se.

  • Pa tiacna in ma liyeyac se.

  • Pa tiacna ma ana orek se.

  • Ac pa tiacna ma srihk se.

Tuhsruhk, pa mwe ahksuwohsyeyuck se. Pa masap se sin Leum. Joseph Smith el tiac na sang ine ke fohlohkihnyuckyak an kacl, oacpacna Mormon. Mwet Lahngo El fahk, “Tuh inge alu luhk ac fah pahng ke lwen sahflah, ahok Alu luhn Jisus Kraist luhn Mwet Luhlahlfongi ke Lwen Sahflah.”4

Emet na, ke AD 34 ah, Leum El sang mwe kolyuck nuh sin mempucr ke Alu Lal ke El tuh muhtwacta nuh fin acn Macrke ah. Ke pacl sac El fahk:

“Kowos fah pahngon alu uh ke inek. …

“Ac fuhkah tuh in alu luhk fin tiac pahngpahng ke inek? Tuh fin alu se pahngpahng ke inel Moses na ma lal Moses pa alu sacn; kuh fin pahng ke inen mwet se na ma luhn mwet sacn pa alu sacn; tuhsruhk fin pahngpahng ke inek na pa ingacn alu luhk.”5

Ohinge, inen Alu uh tiac kuh in ikihlyuck. Ke Leum El fahk lah meac inen Alu Lal ac pahngonyuck kac, El tuh fahkwack ke, “Lwelah tuh alu luhk in pahngpahng ohinge,” El ma na suwos se. Ac kuht fin lwelah ine kikiacp in orekmakihnyuck kuh in ahol kuh in ahkkweye ine ngacn, Elac arulacna tihkuclkuclyak kac.

Mac ke ine uh kuh, ke ma se inge, ine kikiacp se? Ke ac pahngpahng Alu uh ke ine ahksruhksruhk, oacna “Alu LDS,” “Alu Mormon” kuh “Alu luhn Mwet Luhlahlfongi ke Lwen Sahflah,” ma se ma yohk srihpac emet ke ine ingacn uh pa wacngihn inen Mwet Lahngo kac. In eslah inen Leum liki Alu luhn Leum pa sie orekma na yohk lal Satan. Ke kuht tohllah inen Mwet Lahngo, kuht muhlkuhnlah ma nuhkwewa Jisus Kraist El oruh nuh sesr—finne nuh ke Iwaclah Lal.

Motko ma se inge ke liye lal: ke moul kawihl, El pa Jehovah, God luhn Olweacng Mahtuh. Ke kolyuck luhn Pahpah Tuhmwacl, El pa Mwet Oraclah ke ma se inge ac kuhtuh pac muhtuhnfacl sahyac.6 El sulwaclah in ahkos na ke luhn Pahpah Tuhmwacl ac oruh sie ma ah nuhsin tuhlihk nuhtin God nuhkwewa ma wacngihn mwet kuh in oruh. El tuhkuh nuh facluh oacna Wen Kuloh nuhtin Pahpah ke mahno, el ahkkolukyeyuck, acniyuck,ahkngalyeyuck. Ke imac in acn Gethsemane, Mwet Lahngo lasr El eis nuh Facl mwe ngal nuhkwewa ma koluk nuhkwewa, ac mwe ngal ac kweok nuhkwewa koluk nuhkwewa, ac mwe kweok ac upac nuhkwewa kom tuhfahna puhlakihn ac oacna sie mwet ma tuh moul kuh ac fah moul. Ke puhla na kweok se inge, pat ke mahnol srah kahk kac.7 Mwe kweok inge nuhkwewa ahkfahsryeyucklac ke El srihpsrihpyak ke sahksin soko ah.

Ke puhla upac inge ac Sifil Moulyak tok Lal—iwaclah suwos ma pahtpaht Lal—El sang moul ma pahtpaht nuh sin mwet nuhkwewa, ac molikuhtlac kais sie liki ma sikyak ke ma koluk lasr, finne kuht auliyak.

Ke misac luhn Mwet Lahngo ac Mwet Tuhma lutlut Lal ah, facluh muhta ke lohsr na mahtoltol se. Na ke yac 1820, God Pahpah ac Wen Nahtuhl, Jisus Kraist, sikyak nuh sel Joseph Smith in muhtwacwacack fohlohkohnwack Alu Lal.

Ke ma nuhkwewa El muhtwacnglah—ac ke ma nuhkwewa El oraclah nuh sin mwet uh—nga akihlenwack ma se ke Alu luhn Leum ma pahngpahng sin kuhtuh mwet uh, kais sie mwet eslah ine muhtahl luhn Jisus Kraist!

Kais sie Sacnri nuhkwewa ke kuht eis kuhfa luhn Leum, kuht ahksasucye olwelah muhtahl lasr nuh sin Pahpah Tuhmasr Inkuhsrao ke eis nuh facl sifacna sin Wen Nahtuhl, Jisus Kraist.8 Kuht olwelah in fahsr Tohkohl, auliyak, sruokyacna masap Lal, ac esamuhl pacl nuhkwewa.

Ke kuht srihke in eslah inel liki Alu Lal uh, kuht Esacllah pac ke soaru in tiac pa ma se yohk ke moul lasr uh.

Eis inen Mwet Lahngo nuh sesr el ahkkahlwemye lah kuht mwet loh nuh sin mwet sahyac— kahlwem ke orekma lasr ac kahs lasr—lah Jisus pa Kraist. Yac kuht sahngweng in ahktihkuclkuclye sie mwet ma pahngon kuht “Mormon” uh lah kuht tiac na oraclah in lahngo Mwet Lahngo, in tuyak ke Inel suc pa Alu uh pahngpahng kac uh?

Fin kuht mwet uh kuh kais sie oasr kuh la ke Iwaclah luhn Jisus Kraist—in ahknwacsnwacsye ac ahkkweyelah, in ahkkweye ac liyekuhtyang, ac in ahkpwacryekuhtyak—kuht enenuh in Ahkfuhlwactyacl muh pa kuht eis kuh sacn we uh ke kuh lal. Kuht kuh in muhtwacwacack ke pahngon Alu lal ke Ine se El sapkihn.

Inkaiyacn facluh, Alu luhn Leum El pahngonyuck ingena ke “Alu luhn Mormon.” Tuhsruhk kuht mempucr ke Alu luhn Leum etuh lah suc tu in kol uh: Jisus Kraist sifacna. Koluk ohiyac, puhs selos lohng ke kahs se Mormon uh kuh in nuhnkuh muh kuht alu nuh sel Mormon. Tiac! Kuht ahkfuhlwactye mwet pahluh mahtuh Macrike sacn.9 Tuhsruhk kuht tiac mwet tuhma lutlut lal Mormon. Kuht mwet tuhma lutlut luhn Leum.

Ke fohlohkihnyuckyak luhn alu uh eke pacl met ah, kahs se inge Alu luhn Mormon ac Mormon10 el kwacna orekmakihnyuck in ahkkolukye—oacna in kahs ahkkoluk ma uh, kahs suhfal—oreklac in sang kuhnaus Poun God ke fohlohkihnyuckyak luhn Alu luhn Jisus Kraist ke lwen sahflah.11

Tamuhlwel ac tahmtahel, oasr akuhkuhin ma oreklac ke inen Alu fohlohkihnyuckyak lasr uh. Ke srihpen facluh se kuht muhta kac inge ac ke kahsrweyacn ma kuht suk uh—arulacna kahsrwekuht in eis mwe fahkwack ke Alu luhn Leum—mwe ahkkoluk uh fahk muh ahkpwacyeyuck ke pacl se inge tiac etweyuck. Kuhtuh puhla lah ke srihpen kuht etweyuck lah kuht “Mormon” ac kuht wi “Alu luhn Mormon” kuht enenuh in orekma nuh kac.

Fin sramsram inge ma oreklac sin mwet uh, na akuhkuhin se inge ac tiac oreklac. Tuhsruhk ke ma se inge, kuht ngwet nuh Sel suc pa inge Alu Lal ac in etuh lah inkacnek luhn Leum uh tiacna, na ac fah tiac, ma ke inkacnek luhn mwet uh. Kuht fin muhtweng ac fin kuht oruh na orekma lasr wo, Leum elac fah kol kuht ke orekma yohk srihpac se inge. Kuht etuh lah Leum el kahsruh elos suc suk in oruh Luhngse Lal, oacna El kahsrwel Nephi ahksahfyelah orekma lal ke muhsahi oak soko in sahslah ke meoa uh.12

Kuht enenuh in tu na kuh ac muhtweng ke kuhiyacsr in ahkpwacyeyelah ma stuhelac lasr. Responsible media ac kahsruh ke top nuh ke nguhsr an.

Ke toeni luhlahp se met tari ac, Elder Benjamin De Hoyos el sramsram ke elyah se inge. El fahk:

“Ke kuhtuh yac somlah ah ke nga orekma ke office se ke public affairs ke Alu fin acn Mexico ah, [nga ac kawuck luhk] tuh suliyuck in wi sramsram ke radio se. … [Sie sin mwet kol ah] siyuck [sesr], ‘Efuh kuh Alu lomtacl an arulacna loeslac ine la an? …

“Nga ac kawuck se luhk ah isrwacsrlah ke kisensiyuck sac ac kuht ahkuhtweyac lah ine ke alu uh tiac na suleyucklac sin mwet uh. Ma ituckyang sin Mwet Lahngo. … Na mwet kol ke Program sac silahklahk na fahk ac ke suhnak, ‘kuht ac sifil pac siyuck ke kuhlwacng.’”13

Fahk sac oasr atac se nuh kac. Kais sie, kampare lasr kais sie ac enenuh in ahkpwacyelah tahfonglac ma sruhmuhnyuck ke yac sac.14 Inkaiyacn facluh ac fah kuh tiac ukwe kol lasr in pahngon kuht ke ine pwacye se. Tuhsruhk kuht in tiac foloyak fin facluh pahngon Alu uh ac mempucr kac uh ke ine stuhuh uh fin kuht oruh oacpacna.

Kahsruh lasr uh enenweyuck. Pa: “Kahsruh se met, ine fohnlah luhn Alu uh pa: ‘Alu luhn Jisus Kraist luhn Mwet Luhlahlfongi ke Lwen-sahflah.’ Ke fahk fototo [ahkluo] ac enenweyuck, kahs inge ‘Alu uh’ kuh ‘Alu luhn Jisus Kraist’ ahkkweyeyuck. ‘Fohlohkihnyuckyak luhn Alu luhn Jisus Kraist’ el suwohs ac ahkweyeyuck.”15

Fin mwet se siyuck, “Kuh kom Mormon?” kom ac topuk, “Kom fin siyuck sihk lah nga mempucr ke Alu ac luhn Jisus Kraist luhn Mwet Luhlahlfongi ke Lwen-sahflah, na ahok!”

Fin mwet se siyuck, “Kuh kom Mwet Luhlahlfongi se ke Lwen-sahflah?”16 kom ac topuk angwe, “Ahok. Nga luhlahlfongi ke Jisus Kraist ac nga mempucr ke Alu fohlohkihnyuckyak Lal.”

Tamuhlwel ac tahmtahel wiyuck, nga olwelah nuh sim lah kuht fin sang kuhiyacsr in fohlohkohnwack ine pwacye ke Alu luhn Leum, El suc Alu la ac okwaclah kuh Lal ac mwe insewowo nuh sin Mwet Luhlahlfongi ke Lwen-sahflah,17 kain se suc tiac liyeyuck. Kuht ac oasr se etwacack ac kuh luhn God in kahsrwekuht in eis mwe insewowo ke wosasuc fohlohkihnyuckyak luhn Jisus Kraist nuh ke acn nuhkwewa, kain nuhkwewa, lohoh, ac mwet ac in ahkolah nuh sin facluh ke Tuhkuh se Ahkluo luhn Leum.

Na, Meac ke ine se? Fin pa ine an pa Alu luhn Leum, top an ma “Ma nuhkwewa!” Jisus Kraist El kolkuht in pahngon Alu lal ke Inel mweyen pa inge Alu Lal, sesseslah ke kuh.

Nga etuh lah God el moul. Jisus pa Kraist. El kol Alu lal mihsenge. Nga fahkwack ke ine muhtahl luhn Jisus Kraist, amen.

Mwe kahsruh

  1. “Leum el oruh kuht etuh ke yohk srihpaciyacn ine el ahkkahlwemye nuh ke Alu Lal, finne Alu luhn Jisus Kraist luhn Mwet Luhlahlfongi ke Lwen-sahflah. Oasr orekma met liki kuht in use nuh sesr engan ke luhngse Lal. Ke wik se inge, kain in mwet kol ke Alu uh ac u sahyac muhtwacwacack in oruh orekma lalos. Kuhtuh pac mwe fahkwack ke ma se inge ac fah tahfweyuck ke mahlwem fahsruh uh” (Russell  M. Nelson, ke “The Name of the Church” [official statement, Ohk.  16, 2018], mormonnewsroom.org).

  2. Prestuhn ke Alu uh oraclah nguhsr se. In mwe srihksrak, Prestuhn George Albert Smith el fahk: “Nimet ahksuhpwacrye Leum ke kom pahngon muh Alu luhn Mormon. El tiacna pahngon ke ine se Alu luhn Mormon” (ke Conference Report, Apr. 1948, 160–161).

  3. Liye “Style Guide—The Name of the Church,” mormonnewsroom.org.

  4. Liye Doctrine and Covenants 115:4.

  5. 3  Nephi 27:7–8.

  6. Liye Moses 1:33.

  7. Liye Doctrine and Covenants 19:18.

  8. Liye Moroni 4:3; Doctrine and Covenants 20:37, 77.

  9. Mormon pa sie sin mwet sihm yohk ke Puk luhn Mormon, kuhtuh pa Nephi, Jacob, ac Moroni. Nohfohn mwet kuhlwacnsap luhn Leum, oacna ke mwet lweng mokleyuck, Mwet Pahluh Joseph Smith.

  10. Finne kahs se inge Mwet Mormon pa sie kahs ma orekmakihnyuck yohk uh (liye History of the Church, 2:62–63, 126).

  11. Kuhtuh pac ahkkoluk ma sik ke pacl luhn Wuhlweacng Sasuc ah. Ke miting se lal Mwet Sap Paul yohrohl Felix ac, Paul el fahk muh el “mwet kol se fin acn Nazarene” ((Orekma 24:5). ke kahs se inge “Nazarene” sie mwet sihm ke ma suhmuhslah: “Pa inge ine se ma mwet Kristin ac pahngpahng kac. Elos pahngpahng ohinge mweyen Jisus El mwet Nazareth” (Albert Barnes, Notes, Explanatory and Practical, on the Acts of Apostles [1862], 313).

    Oacpacna, sie pac ahkuhtweyac uh fahk muh: “Ke Leum lasr El pahngon ‘Nazarene ac’ (Matt71), na mwet Jew pahngon mwet tuhma lutlut lal ‘Nazarene.’ Elos ac tiac fahk lah elos mwet Kristin, i.e mwet tuhma lutlut luhn Messiah” ((The Pulpit Commentary: The Acts of the Apostles, ed. H. D. M. Spence and Joseph  S. Exell [1884], 2:231).

    Oacna ke Elder Neal A. Maxwell el liye: “Ke ma suhmuhslah mahtuh, kuht liye orekma ma tiac tulokihn in ahkkolukye mwet pahluh in ahksuhmuhiyaclos—in sang ine stuhuh in ahkmuhnahsyaclos. Tuhsruhktuh, elos tiac lohacng nuh ke ma mahtuh uh. Na mwet Kristin nuhkwewa pahngpahng ‘mwet Nazarene.’ (Orekma 24:5.)” (Out of Obscurity,” Ensign, Nohfuhmpuh 1984, 10).

  12. Liye 1 Nephi 18:1–2.

  13. Benjamín De Hoyos, “Called to Be Saints,” Liahona, May 2011, 106.

  14. Ke kuht tiac lohacng nuhke ma mwet sahyac pahngonkuht kac, kuht etuh lah suc kuht uh. Kuht ac sano fuhkah mwet sahyac in ahkfuhlwactye ine pwacye luhn Alu uh fin kuht mempucr tiac na oruh?

  15. “Style Guide—The Name of the Church,” mormonnewsroom.org.

  16. Kahs se inge mwet luhlahlfongi el kwacna orekmakihnyuck ke Bible Muhtahl uh. Ke Lwacta lal Paul nuh sin mwet Ephesus ac, el orekmakihn kahs se inge mwet luhlahlfongi pacl se ke sapta se nuhkwewa. Mwet luhlahlfongi el mwet se suc luhlahlfongi ke Jisus Kraist ac ukwacl.

  17. Liye Doctrine and Covenants 121:33.