2010–2019
Eis nuh Facsr Sifacna Inen Jisus Kraist
Ohktohpa 2018

Eis nuh Facsr Sifacna Inen Jisus Kraist

Sel Elder Robert C. Gay

Ke Prestuhnsi luhn Itngucul

Lwelah kuht in eis ke luhlahlfongi nuh facsr sifacna inen Jisus Kraist—in liye oacna El liye, in kuhlwacnsap oacna El kuhlwacnsap, ac in luhlahlfongi lah kuh Lal fal in molikuhtlac.

Tamuhlwel ac tahmtahel wiyuck kihtin pacl na tari ah, ke nga motko ke fahk se lal Prestuhn Nelson in pahngon Alu uh ke ine pwacye la uh, nga suk ke acn se ma Mwet Lahngo El luti Mwet Nephi ke inen Alu uh ah.1 Ke nga riti kahs Lal Mwet Lahngo, oacna in yohk srihpac nuh sihk lah El oacyacpac fahk nuh sin mwet ah muh “kowos enenuh in eis nuh fowos inen Kraist.”2 Ma se oruh ngan nuhnkuh ke mukwikwi luhk sifacna ac siyuck, “Kuh nga eis nuh sik sifacna inen Mwet Lahngo oacna El siyuck ngan oruh uh?”3 Mihsenge nga ke akacsruhi kuhtuh nuhnak nga eis in mwe top nuh ke siyuck luhk.

Ma se met, kalmacn eis nuh facsr sifacna inen Kraist pa kuht in kwacfweacng ke oaru in nuhnkuh ke mwet ke ohiyac se pacna ma God El nuhnkuh kwaclos uh.4 God El nuhnkuh fuhkah ke mwet uh? Joseph Smith el fahk, “Ke sie un mwet uh nuhnuhnkuh ac ahkkolukye sie pac mwet ac wacngihn pahkomuhta la, Pahpah Inkuhsrao El ngwet nuh sin sucu na fohn se luhn mwet uh ke sie puhla ac luhngse luhn sie pahpah,” ke srihpen “luhngse Lal [uh] koflah srihkasrakuh.”5

Yac ekahsr som ah tuh misac tahmtahel mahtuh se wiyuck. El tuh puhla sie moul upac. Tuh upac nuh sel ke wosasuc uh ac tena arlac oaru. Mukul tuhmwacl ah fuhlweack macruht laltahl ac sisuhllah ac tuhlihk srihsrihk ahkosr in tuhfahlah. Ke ekuh se el misac ah, lun rum se wi tuhlihk nahtuhl ah, nga oraclah nuh sel sie ahkinsewowo in som liki moul se ke mihs. Pacl sacn nga akihlen lah nga wacna liye moul luhn tahmtahel wiyuck nuhnkuh na ma upac ac suhkwac wi oruh uh. Ke nga fihliyac pouk fin sifacl ke ekuh sac, nga eis sie muhlat na upac sin Nguhn. Tuh orek ngan liye na pwacye wo lal ac ngan kuh in liyacl oacna God El liyacl uh in te sie mwet ma upac nuh se ke wosasuc ac moul uh, tuhsruhk in oacna sie mwet ma oasr ke elyah upac ma nga tena puhla uh. Nga liyacl oacna sie ninac yohk srihpac ma, finne mwe kosre yohk, el tuh tuhfahlah tuhlihk kahto, wo in liye ahkosr. Nga tuh liyacl oacna kawuck se nuh sin ninac kiyacsr ma eis pacl in karihngihn ac in sie kampacniacn nuh sel tukun pahpah tuhmwacsr misac.

Ke ekuh sahflah sacn in wi tahmtahel wiyuck, nga luhlahlfongi muh God El tuh siyuck, “Kuh kom tena liye lah mwet nuh kwewa siskom an mwet muhtahl?”

Brigham Young el luti:

“Nga kena in luti Mwet Luhlahlfongi … in kahlwem ke mukul ac muhtwacn uh oacna elos oruh ac tiac kahlwem selos ke liye lom an.”6

“Wacna fwack—‘Mwet se orekma koluk ac el te kuh in sie Mwet Luhlahlfongi.’ … Kuht lohng kuhtuh kahskahs koluk ac kikiacp … [kuh] kuhnaus Sabbath. … Nimet nuhnuhnkuh mwet inge, mweyen kom te etuh plwacn luhn God nuh selos. … [Likina,] in muhtweng kaclos.”7

Oacna oasr suwos kuh in petsacelah muh Mwet Lahngo lasr lac lwelah kom ac ma toasr lom ac El te liye kom? Mwet Lahngo El liye mwet Samaria sac, muhtwacn kosro sac, mwet esacni tax sac, lepa sac, mwet mas sac, ac mwet koluk sac ke kahlwem sac pacna. Nohfohnna tuhlihk nuhtin Pahpah Tuhmwacl, ac nohfohn kuh in moliyucklac.

Kom kuh in petsacelah Lan forlah liki sie mwet ma suhlahlahlfongi ke acn lal fin acn tohkohsrahi luhn God, kuh kuhtwena mwet ke ma upac selos?8 Nga te kuh. Ke liye luhn Kraist, kais sie mwet oasr srihpac yohk la. Wacngihn sie mwet sollac in kuf. Moul ma pahtpaht kuh nuh sin mwet nuhkwewa.9

Ke muhlat luhn Nguhn ke sisken pet luhn tahmtahel wiyuck, nga etwaclah lesin na yohk se: lah ke kuht liye mwet uh oacna God El liyaclos uh—kuht ac oraclah finsrak luo—molwelah elos ma kuht inmahsrlo ac molikuhtlac sifacna.7

Ahkluo, in eis nuh facsr sifacna inen Kraist, kuht in te liye muhkwena oacna God El liye, tuhsruhk kuht in oruh orekma Lal ac kuhlwacnsap oacna El oruh. Kuht moulkihn ma sap luo luhlahp, eiskuhtyang nuh ke luhngse luhn God, oracni Israel, ac sang kahlwem lasr in “tolak ye mutun mwet uh.”10 Kuht eis ac moulkihn olwelah ac akwuck ke Alu fohlohkyak Lal.11 Ke kuht oruh ma se uh, God El use nuh sesr kuh in ahkinsewowoye kuht sifacna, sucu lasr, ac moul luhn mwet sahyac.12 “Kuh oasr mwet nga etuh ma tena enenuh kuh luhn inkuhsrao ke moul lalos uh?”

God El ac oruh kuh sakihrihk inmahsrlosr ke kuht ahkmuhtahlye kuht sifacna.13 Kuht ahkmuhtahlye kuht sifacna ke kuht ahksasucye insiyacsr uh.14 Kuht ahknwacsnwacsye insiyacsr ke kuht Lohngohl uh,15 auliyak ke ma koluk lasr,16 in eklac,17 ac luhngse oacna El luhngse.18 Mwet Lahngo El siyuck sesr, “Fin kowos lungse na mwet ma lungse kowos, efu ku God Elan sot mwe moul nu suwos?”19

Nga tuhfahna etwacack ke sie oruh ke moul lal Elder James E. Talmage ma oruh ngan wettoklac ac nuhnkuh lah nga luhngse ac kuhlwacnsuhpuh fuhkah elos ma rauniyuclac uh. Ekihn sie professor, met liki el eklac sie Mwet Sap ac mas na ahkmas se ke diphtheria muhi in fahsrelihk ke 1892 [yac sie alfoko yucngucul luo], Elder Talmage el konwacack sucu se, tiac mempucr ke Alu uh ma muhta apkuhran nuh yohrohl ma kweok ke mas sac. Wacngihn mwet luhngse pihlesruh moul la in som nuh lun lohm se ma oasr mas se we ah. Elder Talmage, ne fuhkah, sa na som nuh lohm sac. El konwacack tuhlihk ahkosr: tuhlihk yac luo tahfuh se misac fin falfucl ah, yac limekohsr se ac yac singucul se puhla kweok yohk, ac tuhlihk muhnahs yac singucul tolu se. Pahpah ac ninac sac puhla kweok ac ullac.

Elder Talmage el kahsruh mwet moul ac mwet misac ah, imohnlah rum ac, uslah nuknuk fohkfohk ah, ac esuhkwack mahn nuknuk ma oasr mas kac. El orekma lwen fohn se na fohlohk lwen tok ah. Tuhlihk yac singucul sac misac in fong ah. El sruhkwack ac tu sruok yac limekohsr sac. El kohfkohf tuh srah oswelah muhtahl ac nuknuk lal ah. El sihm, “Upac ngan fihlilyac nuh ten,” ac el sruohkuhl nekena el misac in pahol. El kahsruh pihkihnyac nohfohn tuhlihk tolu ac na el sackuhnlah in oasr mongo ac nuknuk sasuc nuh sin sucu ahsor sac. Ke fohlohk nuh lohm ah, Tamuhlwel Talmage el sislah nuknuk lal ah, twacnuhlah ke acn in yucyuc ac, srellah sifacna liki sucu lal ah, ac kweokkihn sie ma upac ke mas sac.20

Puhs na pwacye moul raunikuhtlac oasr in sensen. Mwet Luhlahlfongi elos eis inen Mwet Lahngo nuh faclos ke elos eklac muhtahl ac kuhlwacnsap mwet nuh kwewa wacngihn ma kac lah oyac kuh elos fuhkah—moul uh sef ke kuht oruh ma se uh.21

Sahflah an, Nga luhlahlfongi lah in eis nuh facsr Inel kuht enenuh in Luhlahlfongwel. Ke toeni se nga wi ke sie Sacnri ah, sie muhtwacn fuhsr siyuck ma oacna ma inge: “Kawuck mukul luhk ac nga tuhfahna sahf, na el sulwaclah in som liki Alu uh. El fahk nuh sihk muh wacngihn pacl el engan oacna ngwe. Ac kuh in angwe fuhkah?”

Mwet Lahngo El tohpohklah siyuck se ke El sramsram nuh sin Mwet Nephi ac, “Tuhsruhk fin [moul lom] tiacna muhsahiyuckyak ke wosasuc Luhk, ac muhsahiyuckyak ke orekma luhn mwet, kuh ke orekma luhn devil, pwacyena nga fahk nuh suwos [kom fah] elos engan ke orekma lalos ke sie lusen pacl, ac sa na in tuhkuh pacl sahflah.”22 Wacngihn pacna engan netok sahyacn wosasuc luhn Jisus Kraist uh.

Ke tuhkweni sac nga nuhnkuh ke mwet wowo puhs nga etuh ma upac nuh se ke ma toasr uh ac masap ma arlac upac nuh selos. Nga siyuck sihk sifacna, “Meac pac Mwet Lahngo El ac fahk nuh selos?”23Nga luhlahlfongi El ac siyuck, “Kowos luhlahlfongiyuc?”24 Nuh sin muhtwacn mihsen srah sac, El fahk, “lulalfongi lom akkeyekomlac; som in misla.”25

Sie ma suhmuhslah nga luhngse pa John 4:4[ahkosr fuhs ahkosr], ma ritiyuck, “Ac El enenuh in fahsr sahslah acn Samaria.”

Efuh nga luhngse ma suhmuhslah sac? Mweyen Jisus El tena enenuh in som nuh Samaria. Mwet Jew in pacl Lal ah sruhnga mwet Samaria ac fahsr ut sisken acn Samaria. Tuhsruhk Jisus El sulwaclah in som nuh we in fahkwack nuh sin mwet nuh kwewa pacl se emet lah El pa Messiah se uliyuck ah. Ke pweng se ngwe, El te sulwaclah u sisilac sie muhkwena, tuhsruhk muhtwacn se pac—muhtwacn se tuhsruhk te wo elah—sie mwet ma nuhnkweyuck muh srihk liki nuh kwewa. Nga luhlahlfongi muh Jisus El oruh ma se kais sie sesr in wacna kahlwem lah luhngse Lal uh yohk likina sahngweng lasr, kihnet lasr, pahlah lasr, ahlohloh lasr, mwe sruhf lasr, koluk lasr, sucu fahsrelihk lasr, toasr ac fosrngah lasr, mas upac lasr, suhkahsruhp lasr, ahkkoluk lasr, kena in fuhlweack lasr, ac muhkwena lasr.26 El ke mwet nuh kwewa in etuh lah wacngihn ma ac wacngihn mwet El ac koflah in unwelah ac molwelah in engan netok.27

Kuhlwacng Lal fallacna.28 El muhkwena puhtati nuh ye ma nuh kwewa. Kuh luhn Iwaclah Lal pa kuh se in kuhtanglah oacna sie ma toasr in moul lasr uh.29 Pweng se ke muhtwacn se ke luhf in kof sac pa El etuh elyah ke moul lasr30 na lah kuht kuh in pacl nuh kwewa Weluhl fahsr wacngihn ma kac lah suc kuht uh. Nuh sel ac kais sie sesr, El fahk, “Kutena mwet su nim kof se ma Nga fah sang nuh sel fah tiana sifilpa malu; tuhsruhk [fah eis] sie unon in kof ma use moul ma pahtpaht.”31

Ke oacna sie fuhfahsryucsr ke moul uh efuh kom in forlah liki Mwet Lahngo ma oasr kuh nuh kwewa la in unwe ac molikomlac uh? Lah luhpahkah kom enenuh in moli in luhlahlfongwel pa yohk srihpac uh. Tamuhlwel ac tahmtahel, lwelah kuht in sulwaclah in ahkyohkye luhlahlfongi ke Pahpah Lucng ac Mwet Lahngo, Jisus Kraist.

Ke insiyuck nohfohn, nga fahkwack testimony lah Alu luhn Jisus Kraist luhn Mwet Luhlahlfongi ke Lwen-sahflah pa Alu luhn Mwet Lahngo—kolyuck sin Kraist suc moul ke sie mwet pahluh. Pruhe luhk pa kuht in eis ke luhlahlfongi nuh facsr sifacna inen Jisus Kraist—in liye oacna El liye, in kuhlwacnsap oacna El kuhlwacnsap, ac in luhlahlfongi lah kuh Lal fal in molikuhtlac lohm ah ac in engan na. Ke inen Jisus Kraist, amen.

Mwe Kahsruh

  1. Liye3 Nephi 27:3–8.

  2. Liye 3 Nephi 27:5–6; liye pac Doctrine and Covenants 20:77 ac mwe luti ke kuhfa luhn Leum.

  3. Liye Dallin H. Oaks, His Holy Name (1998) nuh ke sie akihlen in sramsramkihn eis nuh facsr sifacna ac in sie mwet loh ke inen Jisus Kraist.

  4. Liye Mosiah 5:2–3. Ip ke eklac fokoko luhn insiyac inmahsrlon mwet lal Tohkohsrah Benjamin ma eis nuh faclos inen Kraist pa eltahl kuh in akihlen in “liye yohk.” Elos ma usrui tohkohsrahi luhn celestial pa kais sie ma liye oacna liyeyuck eltahl uh. (Doctrine and Covenants 76:94).

  5. Teachings of Presidents of the Church: Joseph Smith (2007), 39.

  6. Brigham Young, in Journal of Discourses, 8:37.

  7. Discourses of Brigham Young, sel. John A. Widtsoe (1954), 278.

  8. Liye 3 Nephi 17:7.

  9. Liye John 3:14–17; Orekma 10:34; 1 Nephi 17:35; 2 Nephi 26:33; Doctrine and Covenants 50:41–42; Moses 1:39. Elder D. Todd Christofferson el oacyacpac luti: “Ke oaru kuht fahkwack lah Iwaclah luhn Jisus Kraist ahkwot nuh met ac, ke sahflah uh, ac ahkfalye ma itucklac ac tuhlac nuh kwewa nuh selos ma for ngwet nuh Sel uh. Wacngihn sie mwet oreklac muh in eis srihk liki ma nuh kwewa luhn Pahpah nuh sin tuhlihk Nahtuhl.” (“Why Marriage, Why Family,” Liahona, May 2015, 52).

  10. Liye Matthew 5:14–16; 22:35–40; Mosiah 3:19; Doctrine and Covenants 50:13–14; 133:5; liye pac Russell M. Nelson, “The Gathering of Scattered Israel,” Liahona, Nov. 2006, 79–81.

  11. LiyeLeviticus 18:4; 2 Nephi 31:5–12; Doctrine and Covenants 1:12–16; 136:4; Articles of Faith 1:3–4.

  12. Liye Doctrine and Covenants 84:20–21; 110:9.

  13. Liye Joshua 3:5; Doctrine and Covenants 43:16; liye pac John 17:19. Mwet Lahngo El ahkmuhtahlyaclah sifacna in eis kuh in ahkinsewowoye kuht.

  14. Liye Helaman 3:35; Doctrine and Covenants 12:6–9; 88:74.

  15. Liye Joseph Smith—History 1:17, sap kuh se emet sin God nuh sel Mwet Pahluh Joseph Smith; liye pac 2 Nephi 9:29; 3 Nephi 28:34.

  16. Liye Mark 1:15; Acts 3:19; Alma 5:33; 42:22–23; Doctrine and Covenants 19:4–20.Oacyacpac nuhnkuh nuhnak luo ke ma koluk inge. Ma se met, Hugh Nibley sihmihs: “Ma koluk uh wacngihn srihpac. Pa oruh ma pacl se kom enenuh in oruh ma sahyac ac wo ma oasr etuh lom kac” (Approaching Zion, ed. Don E. Norton [1989], 66). Ninac kiyacl John Wesley, Susanna Wesley sihm nuh sin tuhlihk mukul nahtuhl: “Nuhnkuh ma se tuh in masap se. Lah meac ahkmuhnahsyelah kuh in nuhnak lom, kuhnaus kahlwem wowo lom ke ma wo ac ma koluk, kosraclah puhla wo lom ke God, kuh ahksrihkye engan lom ke ma luhn nguhn, … lah meac ahkyohkye … kena lom ke ma luhn ikoac lom; kom enenuh in etuh ma inge ma koluk nuh sum, lah fuhkah oacna in wacngihn ma kac sifacna” (Susanna Wesley: The Complete Writings, ed. Charles Wallace Jr. [1997], 109).

  17. Liye Luke 22:32; 3 Nephi 9:11, 20.

  18. LiyeJohn 13:2–15, 34. Ke fong met liki Iwaclah Lal, Mwet Lahngo El ohllah nien sie suc tuhkahkuhnuhlwack, sie pac ma lahfuhkuhnuhl, ac kuhtuh pac ma mutullac kea ao El enenuh emet. Na El luti, “Sie masap Nga sot nuh suwos tuh kowos, In luhngse sie sin sie; oacna Nga luhngse kowos.”

  19. Matthew 5:46.

  20. Liye John R. Talmage, The Talmage Story: Life of James E. Talmage—Educator, Scientist, Apostle (1972), 112–14.

  21. Liye Alma 10:22–23; 62:40.

  22. 3 Nephi 27:11.

  23. Ke Matthew 11:28, 30, Leum El fahk: “Fahsru nu yuru, kowos su orekma ac totola, tuh nga fah sot mongla nu suwos. …Tuh srenenu luk fisrasr, ac mwe utuk luk mulala.” Oacyacpac nuhnkuh 2 Corinthians 12:7–9: Paul el ahkuhtweyac kweok yohk ke sie fakfuck ke ikwac uh, suc el pruhe in eslah. Kraist El fahk nuh sel, “Kuhlwacng Luhk fal nuh sum: tuh kuh luhk oreklac ke muhnahs.” Liye pac Ether 12:27.

  24. Liye Mosiah 7:33; 29:20; Helaman 12:1; Doctrine and Covenants 124:87.

  25. Liye Luke 8:43–48; Mark 5:25–34.Muhtwacn se ma wi musen srah tuh arulacna enenuh ac wacngihn ma sahyac. El kweok ke yac 12, el sang ma lal nuh kwewa nuh sin mwet in unwe, tuh tiacna wolac. Sruhngwacyucklac sin mwet lal ac sucu lal, el nuhnkuh ac tuhkuh nuh inmahsrlon u luhlahp se ac silahklahk kihluck nuh yurin Mwet Lahngo. Oasr luhlahlfongi yohk lal kacl Mwet Lahngo, ac El puhla kahkah lal ke puhluhn nuknuk Lal. Ke luhlahlfongi sac El kihtin pacl ah ac sa na unwellah. El pacl sacn pahngol “tuhlihk muhtwacn nuhtihk,” El tilac mwet sisilac se tuhsruhk sie mwet ke sucu luhn God. Unweyucklac lal ma nuh ke ikoac, kuhpahsr lal, puhla lal, ac ke nguhn. Ma puhlakihnyuck uh kuh in paht sun yac kuh pacl in moul uh, tuhsruhk olwelah Lal ke unweyuck uh pwacye ac suwohs.

  26. LiyeLuke 4:21; John 4:6–26. Luke, tiac John, suhmuhslah lah met ke luti lal Jisus, El som nuh ke lohm alu Sel sifacna Nazareth, riti mwe rit se ke pahluh lal Isaiah ke Messiah ah, na fahkwack, “Misenge Ma Simusla se inge akpwayeiyuk ke insrewos.” Pa inge pacl se emet Mwet Lahngo El sramsram kacl sifacna in pa Messiah uh. Ohinge, unohn in kof lal Jacob, John el suhmuhslah pacl se emet lah Jisus El fahk Messiah Lal inmahsrlon mwet uh. Ke oraclah se inge, ke srihpen mwet Samaria uh oacwac muh tiac mwet Jew, Jisus El oacyacpac luti lah wosasuc Lal ma nuh sin mwet nuh kwewa, mwet Jew ac Gentile. Fahk se sikyak ke “ao ohnkohsr” kuh infulwen lwen, pacl se facluh eis fohnlah ke kahlwem ke faht ah. Unohn in kof lal Jacob ah an pac ke fahlfahl se apkuhran nuh ke acn se ma Israel mahtuh tuh oruh alu in olwelah la nuh sin Leum tukun utyak nuh ke acn luhn olwelah. In etuh ke la fahlfahl ah oasr finohl na paho soko ac ke la oasr finohl sesseslah ke infacl ma use kof.

  27. Elder Neal A. Maxwell el luti: “Pacl kuht oasr ke ohiyac suhpwacr kuht nuhnkuh lah oacna srack oasr ma sesr in sang, kuht kuh in ahkwoyeyuck in etuh lah God, suc etuh wo ke ma kuht kuh kac fihlikuhti inge in oraclah wo. Wacngihn mwet tuh srihsrngiyucki in kuf kuh in muhnahs. … Ke kuht puhla losreyucklac, lwelah kuht in esam ahkkweye se lah God El ac tiac use upaclac nuh sesr” (“Meeting the Challenges of Today” [Brigham Young University devotional, Oct. 10, 1978], 9, speeches.byu.edu).

  28. Prestuhn Russell M. Nelson el luti:

    “Sie pacl fahsruh uh, kowos ac eskowosyang sifacna ye muhtuhn Mwet Lahngo. Kom ac sunyucki yohk oruh kom ac ke tuhng ke kom oasr ke acn muhtahl Sel. Kom ac sukok kahs in kuloh nuh Sel ke molwelah ma koluk lom, ke nuhnak muhnahs nuh ke te kuhlwacng nuh sin mwet, ke unwekomlac liki ke siyuck ac sesuwohs ke moul se ngwe.

    “Kom ac kuloh nuh Sel ke ahkkweye kom in oruh ma upac, ke furohklah muhnahs lom nuh ke kuh, ac ke oraclah kuh nuh sum in Weluhl muhta ac sucu lom netok. El sifacna, Iwaclah Lal, ac elah Lal ac eklac ma lal sifacna ac pwacye nuh sum” (“Prophets, Leadership, and Divine Law” [worldwide devotional for young adults, Jan. 8, 2017], broadcasts.lds.org).

  29. Liye Isaiah 53:3–5; Alma 7:11–13; Doctrine and Covenants 122:5–9.

  30. LiyeJoseph Smith—History 1:17; Elaine S. Dalton, “He Knows You by Name,” Liahona, Mei 2005, 109–11.

  31. John 4:14.