Srihke, Srihke, Srihke

Tamuhlwel ac tahmtahel sacohk, nga kuloh ke pacl wo in sramsram nuh suwos uh. Toeni se inge mokleyuc ac kahsrweyuc. On yuckyuck ac kahs sruhmuhnyuck uh puhlakihnyuck ke insiyacsr sin Nguhn Muhtahl. Nga pruhe tuh ma nga fahk uh fah utohkoht nuh suwos ke Nguhn se pacna ingacn.

Yac puhs somlah, nga mwet kahsruh se met nuh sin tistrik prestuhn se fin acn eastern United States. Puhs liki pacl se, ke kuht kahsruhsr nuh ke pracns srihsrihk lasr, el fahk nuh sihk, “Hal, ke kom ohsun nuh sin sie mwet, oruh oacna in muh oasr elyah upac lalos, ac pwacye kom yohk liki na tahfuh pacl uh.” Tiac pwacye sel muhkwena, tuh nga lotwelah ke yac puhs lah srihklac puhla in moniyuck lal. Mihsenge, nga kena in kwacfe kowos ke ma upsac kowos sun uh.

Sie moul in ikoac uh akwucki sin sie God luhngse in mwe srihke ac ip in ahk kap nuh sin kais sie sesr. Kom esam kahs luhn God ke tuhlihk Nahtuhl ke Oreklac luhn facluh: “Ac kuht fah ahkpwacyeye nuh selos ke ma inge, in liye fin elos oruh kwewa ma suc Leum God lalos sapkihn nuh selos.”¹

Ekena muhtwaciyacn facluh, mwe srihke uh tiacna fihsrwacsr. Kuht sun mwe srihke ma tuhkuh ke moul in ikoac. Kuht kwewa muhta ke facluh se ma mweun luhn Satan lain kuht ac lain engan lasr uh tuhkuh upaclah. Facluh ac moul luhn facluh lom kuh in oacna in mwe ahkelyah yohk nuh sum.

Mwe ahkweye luhk pa inge: God luhngse suc lwelah mwe srihkasrak inge nuh sum el oacyacpac oakiyac innek in kuhtanglah. Pahpah Lucng el lungse faclu ouinge El ase Wen Sacohk Nahtuhl in tuh moli kuhtlac.² Wen Nahtuhl, Jisus Kraist, acse moul Lal nuh sesr. Jisus Kraist El toasr Gethsemane ac kweok fin sahksin ke ma koluk lasr. El puhlakihn mwe kweok kwewa, ngal, ac ma koluk lasr tuh Elan kuh in ahkwoye ac ahkweye kuht ke mwe srihkasrak in moul lasr lwen nuh kwewa uh.³

Kom esam lah Leum el fahk nuh sin mwet kuhlwacnsap Lal:

“Lah Pahpah ac El ma se fana. El asr in Pahpah ac Pahpah in El ac fin kuht Esacl, kuhtr asr in El ac El in kuht.

“El fahk muh El inmahsrlosr, ac El pa Mwet Shepherd wowo, ac yot luhn Israel, Fin kuht muhsah fin yot se inge kuht fah tiac puhtatlac.”⁴

Mwet pahluh lasr, Prestuhn Russell M. Nelson, el oacyacpac use ke mwe ahkeye sacn pacna. Weacng, el ahkuhtweyac innek ma kuht kuh in muhsahelah fin yot sacn ac kena in oruh ma Leum el kena kuht in oruh kac in kol kuht ke mwe srihke lasr.

El fahk: “Sahp kom ac suhpwacr kuhtuhsrihk, esam, tiac kalmac pa moul uh fihsrwacsr. Kuht fah puhla mwe srihkasrak ac kuhtanglah mwe ahsor in moul lasr. Oacna kom esam lah yurin God wangin ma enenuh in upac’ (Luke 1:37), kom enenuh in etuh lah El pa Pahpah tomom. Kom mukul ac muhtwacn luhmweyucklac ke atac Lal, ahkweyeyucklac ke nwacsnwacs lom in eis fwackyuck in kahsruh srihke wowo lowos an. Kom kuh in eis nuh fom ine muhtahl luhn Leum. Kom kuh in fal in sramsram ke inen God (liyeD&C 1:20).”⁵

Kahs lal Prestuhn Nelson ahkacsmakihnyekuht ke olwelah oreklac ke pruhe in sacracmacn uh, sie olwelah Pahpah tuhmasr Inkuhsrao El ahkpacyei ke kuht oruh ma kuht olwelah uh.

Lohng kahs inge: “O God, Pahpah Ma Pahtpaht, kuht siyuck Sum ke inen Wen natum, Jisus Kraist, in ahkinsewowoye ac ahkmuhtahlye bread se inge nuh sin mwet nuhkwewa suc ipeis kac, tuh elos in kuh in mongo in esam monun Wen nuhtum, ac ahkkahlwemye nuh Sum, O God, Pahpah Ma Pahtpaht, tuh elos insese in eis nuh faclos inen Wen nuhtum, ac esamuhl pacl nuhkwewa, ac liyacacng masap Lal ma el tuh sang nuh selos; tuh Nguhn Lal in kuh in weluhlos pacl nuhkwewa. Amen.”⁶

Kais kuhtuh pacl kuht fahk kahs se amacn kuh ke pacl se ma orek pruhe se ngwe ahol kuhtlac, kuht olwelah lah ke ipeis bread, kuht olwelah in eis ine muhtahl luhn Jisus Kraist nuh facsr, esam Kacl pacl nuh kwewa, ac sruokyac masap Lal. Fin kuht oruh ma inge, uliyuck nuh sesr muh Nguhn Lal fah wi kuht pacl nuh kwewa. Ke srihpen olwelah se inge, Mwet Lahngo lasr el mwe molwelah nuh sesr ac kuht ac fah kuhtanglah mwe sruhf sikyak nuh sesr uh.

Ke nga nuhnkuh ke kahs luhn olweacng ac lwelah ke mwe ahkinsewowo ke olwelah, nga nuhnkuh lah mac kalmac in olwelah in eis nuh facsr inen Jisus Kraist.

Prestuhn Dallin H. Oaks el ahkuhtweyac: “Yohk srihpac lah ke kuht ipeis ke sackruhmacn kuht tiac akihlen lah kuht eis nuh facsr inen Jisus Kraist. Kuht mwet loh lah kuht insese in oruh. (Liye D&C 20:77.) Pwacyeiyac ah kuht mwet loh muhkwena nuh ke insese lasr in kahlwem lah asr ma sahyac enenuh in sikyak met liki kuht eis ine muhtahl sacn nuh facsr ke puhla yohk srihpac lasr uh.”⁷

Pohloh kahs se ma kuht “olwelah in eis nuh [facsr]” Inel uh fahk nuh sesr lah ke kuht eis inen Mwet Lahngo met ke kuht pacptais, eis Inel tiac sahflah ke pacptais. Kuht enenuh in kalweni in orekma in eis Inel in moul lasr, weacng ke kuht ahksasucye olwelah ke ipeis kuhfa luhn Luem ac oraclah olwelah ke tempuhl muhtahl luhn Leum uh.

Oruh oasr kihsensiyuck luo ma yohk srihpac nuh sesr “ Mac nga enenuh in oruh in eis Inel nuh fek?” ac “Nga ac etuh fuhkah pacl nga oraclah wo liki met ah uh?”

Pohloh kahs lal Prestuhn Nelson ahkahlwemye ke top in kahsruh. El fahk lah kuht kuh in eis inen Mwet Lahngo nuh facsr ac tuh kuht fah kuh in sramsram Lal. Ke kuht kahskahs Lal, kuht kuhlwacnsap Lal. “Tuh sie mwet ac etuh fuhkah mwet kol se suc el soenna kuhlwacnsuhpuh, ac suc sie mwet sac nuh sel, ac el loeslac liki nuhnak ac kena luhn insiacl?”⁸

Sramsram ke El enenuh pruhe ke luhlahlfongi. El enenuh pruhe suwohs nuh sin Pahpah Lucng in etuh lah kahs fuhkah kuht kuh in sruhmuhn in kahsruh Mwet Lahngo ke orekma Lal. Kuht enenuh in fal nuh ke olwelah sac ma utuckuh pacl se Leum El fahk muh: “Lah ke Puhsracl kuh puhsrwen mwet kuhlwacnsap Lal, oacna sie.”⁹

Pwacnwacng, kac enenuh kahs na puhs in sramsram Lal in eis Inel nuh facsr. Oasr puhla luhn insiacsr kuht enenuh in fal ekihn mwet kuhlwacnsap Lal.

Mwet pahluh Mormon el ahkuhtweyac ke puhla ma fal ac lwelah nuh sesr in eis Inel nuh facsr. Puhla inge pa luhlahlfongi, finsrak, ac kahsruh, suc pa luhngse suwohs luhn Kraist.

Mormon el ahkuhtweyac:

“Tuh nga nuhnuhnkuh muh kowos luhlahlfongi ke Kraist ke srihpen inse puhsisacl lowos; tuh kowos fin tiac luhlahlfongel na kowos tiac fal in oacwaclah inmahsrlon mwet ke alu se inge.

“Ac sifilpac, mwet lili sacohk luhk, nga kena sramsram nuh suwos ke finsrak. Fuhkah tuh kowos kuh in eis luhlahlfongi, sahyacn na in oasr finsrak lowos?

“Ac meac se kowos ac finsrakihn an? Liye nga fahk nuh suwos tuh ac fah oasr finsrak lowos ke iwaclah luhn Kraist ac ke kuh luhn sifilpac moulyak Lal, in moulyak nuh ke moul ma pahtpaht, ac ma inge ke srihpen luhlahlfongi lom Kacl in fal nuh ke olwelah uh.

“Ohinge fin oasr luhlahlfongi luhn sie mwet enenuh se na in oasr finsrak lal; tuh fin wangihn luhlahlfongi tiac kuh in oasr finsrak.

“Ac sifilpac, liye nga fahk nuh suwos lah tiac kuh in luhlahlfongi ac finsrak yohrohl, sahyacn na el fakpacp, ac inse puhsisacl.

“Fin ohinge, luhlahlfongi ac finsrak lal an wacngihn srihpac, tuh wacngihn kuhtwena ma inge wo ye muhtuhn God, sahyacn na fakpacp ac inse puhsisacl; ac fin sie mwet el fakpacp ac inse puhsisacl, ac fahkwack ke kuh luhn Nguhn Muhtahl lah Jisus pa Kraist, enenuh na in oasr luhngse muhtal yohrohl; tuh fin wacngihn luhngse muhtahl yohrohl na el tiac oacwac; ohinge enenuh na in oasr luhngse muhtahl yohrohl.”

Tukun ahkuhtweyac ke luhngse muhtahl, Mormon el kalweni in fahk:

“Tuh luhngse muhtahl uh pa luhngse suwohs luhn Kraist, ac ma inge muhtweng ne tok ma pahtpaht; ac kuhtwena mwet suc sukokyak in sruokyac na ma inge ke lwen sahflah, ac fah wo nuh sel.

“Ohinge, mwet lili sacohk luhk, pruhe nuh sin Pahpah ke kuhiyacn insiowos nohfohn, tuh kowos in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh kowos in kuh in wen nuhtin God; tuh ke El ac fah sikme kuht fah oacna El, tuh kuht ac fah liyacl oacna El uh; tuh in oasr finsrak se inge yohrohsr; tuh kuht in kuh in ahknwacsnwacsyeyucklac oacna ke El nwacsnwacs. Amen.”¹⁰

Mwe fahkwack luhk pa Mwet Lahngo el kena in sang Inel nuh insiowos. Nuh sin inkaiyowos, luhlahlfongi lowos in El yohkwaclihk. Kom puhlah finsrak yohk ac puhla wo. Ac kom puhla luhngse suwohs luhn Kraist nuh sin mwet sahyac ac nuh sum sifacna.

Nga liye ke kuhlwacnsap luhn misineri lasr fin facluh nohfohn. Nga liye ke mempucr elos suc sramsram nuh sin kawuck lalos ac sucu lalos ke Alu luhn Jisus Kraist luhn Mwet Luhlahlfongi ke Lwen-sahflah. Mukul, muhtwacn, mwet fuhsr, ac finne tuhlihk srihsrihk kuhlwacnsap ke luhngse nuh sin Mwet Lahngo ac nuh sin mwet atalani lalos.

Sa in lohngwack ke sie ongaiyac ke sie acn fin facluh, mempucr uh oruh plwacn in som molwelah, kuhtuh pacl uh ahluhkwelah meoa uh, finne te ngihsrweyuck. Kuhtuh pacl uh elos koflah in tuhpan acn ongaiyac sac in ahkolah in eisaclos.

Nga akihlen lah kuhtuh suwos ma lohng mihsenge an kuh in puhla lah luhlahlfongi ac finsrak lowos an kuhtangyucklac ke elyah lowos an. Na kowos kuh in suk in puhla luhngse.

Tamuhlwel ac tahmtahel, oasr pacl wo sin Leum yurum in puhla ac akacsruhi luhngse Lal. Kom kuh in pruhe ke inse pwacye nuh sin Leum in kol kom in luhngse mwet ke Srihpacl. El topuk pruhe luhn mwet fakpack ma insese oacna kom. Kom fah puhla luhngse luhn God nuh sum ac mwet se kom kuhlwacnsuhpuh ke srihpacl an. Ke kom kahsruh tuhlihk nuhtin God ke mwe elyah lalos, elyah lom sifacna fah sana in wacngihnlac. Luhlahlfongi lom ac finsrak lom fah fokokoi.

Oasr puhla luhk sifacna ma pwacye. Ke moul lal, muhtwacn kiyuck el sramsram luhn Leum ac kuhlwacnsapuh mwet Kacl ke acn pucspucs. Oacna nga pa fahk met, sie pisap lasr tuh fahk nuh sihk: “Nga fwefwelac. Pacl nuh kwewa nga lohng ke sie mwet ke ward ma elyah, nga silahklahk in kahsruh. Tuh ke nga sun acn we, muhtwacna kiom an sun acn we tari.” Ma ingacn pwacye ke acn nuh kwewa kuht muhta kac ke yac 56.

Ingena el kuh in fahk kais kuhtuh kahs ke kais sie lwen. El irongyuck sin mwet el luhngse ke Leum. Fohng nuhkwewa ac litutacng nga on weluhl ac kuht pruhe. Nga pa ac oruh pruhe uh. Kuhtuh pacl uh nga kuh in liye inngasrol fahk kahsr ke on uh. El luhngse on luhn tuhlihk srihsrihk. Pohloh kahsr ma el luhngse pa esamyucki wo emet ke on “Nga Srihke ngan oacna Jisus.”¹¹

Sie lwen ah, tukun onkihn kahs ke kohres: “Luhngse sie sin sie oacna Jisus el luhngse kom. Srihke in ahkahlwemye kuhlwacng ke kwewana ma kom oruh,” el kahkahsrihk fahk, tuh kahlwem, “Srihke, srihke, srihke.” Nga nuhnkuh muh el fah konwacack ke el fah konwacack, ke el Liyacl, lah Mwet Lahngo lasr el sang nuh insiacl Inel ac lah el fah tuhkuh oacna El. El kahsrwel ke mwe elyah lal ingena. Oacna El kahsrwe kom ke ma lom.

Nga fahkwack nuh suwos mwe lohoh lah Mwet Lahngo el etwekom ac luhngse kom. El etuh inem oacna kom etuh Inel. El etuh elyah lom. Ke Iwaclah Lal, El kuhtanglah facluh. Ke olwelah lom in eis Inel nuh fom, kom fah eslah ma toasr luhn mwet puhs sahyac. Na kom fah sana in konwacack lah kom etuh Mwet Lahngo yohk ac lah kom luhngse El yohk. Inel fah oan insiom ac kwacna an in mwe nuhnak lom. Nga fahkwack ke ma inge kac, ke srui ke luhngse-kuhlwacng Lal nuh sihk, nuh sin mwet nga luhngse, ac nuh sum, ke inen Jisus Kraist, amacn.