Li xik chi uub’ej

Ex was wiitz’in, k’a’jo’ xsahil inch’ool chi wank eerik’in naq yooko chixtikib’ankil li jolomil ch’utub’aj-ib’ 190 re meero chihab’ re lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Nawulak chiwu ch’utlaak eerik’in sa’eb’ lee rochoch malaj b’araq chik wankex wi’, re rab’inkil li raatineb’ profeet, aj ilol na’leb’, ut aj k’utb’esinel, ut xkomoneb’ chik aj b’eresinel re li Iglees.

K’a’jo’ xsahil qach’ool naq wankeb’ li k’anjeleb’aal li neke’tenq’ank qe chi wank sa’ komonil jo’ lix tzolom li Jesukristo sa’ chixjunil li ruchich’och’. Li jolomil ch’utub’aj-ib’ sa’ li abril xnume’ ki’ile’ xb’aaneb’ naab’al chik li kristiaan chiru chixjunileb’ li wanjenaqeb’ chaq junxil, ut naqak’oxla naq jo’kan taak’ulmanq anajwan.

Chiruheb’ li po li xe’nume’, jun nimla yajel sa’ chixjunil li ruchich’och’, eb’ li ninqi xam, ut xkomoneb’ chik li ninqi rahilal, chanchan naq xe’xb’alq’usi li ruchich’och’. Naraho’ inch’ool chirix li junjunq eere li xsach cheru ani raaro eeb’aan sa’eb’ li kutan a’in. Ut nintijok chirixebʼ li rahobʼtesinbʼilebʼ anajwan.

A’ut, lix k’anjel li Qaawa’ toj yoo chi xik chi uub’ej. Us ta aajel ru xnajtob’resinkil qib’ b’ayaq, us ta tz’aptz’o ru li qilob’aal, us ta noko’aatinak chiru ulul ch’iich’, wan naab’al li xqatzol, ut wan li yooko chixb’aanunkil chi mas chaab’il wi’chik. Naq jalaneb’ li kutan, naru naq jalaneb’ ajwi’ li q’ajkamunk.

Eb’ li misioneer ut eb’ li neke’jolomink reheb’ li mision xe’xk’uub’ xna’leb’, xe’xsik’ chan ru xb’aanunkil lix k’anjeleb’, ut k’a’jo’ naq xe’usa. Us ta lix k’ihaleb’ li misioneer x’ajman ru naq te’xsik’ li ak’ na’leb’ re xb’aanunkil lix k’anjeleb’, sa’ naab’aleb’ li mision mas wi’chik li k’utuk yoo chi b’aanumank.

X’ajman ru xtz’apb’aleb’ li santil ochoch chiru junjunq kutan, ut xrame’ ajwi’ li kab’lank yoo chi uxmank, a’ut anajwan chixjunil yoo wi’chik chi xik chi uub’ej. Sa’ li chihab’ 2020, xqatikib’ xkab’lankil 20 li ak’ santil ochoch!

Li k’anjel re xsik’b’al li xe’ toonil xniman chi us. Xe’yiib’aman naab’al chik li teep ut li oqech. Ut nasaho’ qach’ool naq li Iglees xtenq’ank sa’ xb’anb’al li yajil a’in rik’in 895 chi k’anjel sa’ 150 chi tenamit.

Sa’ naab’aleb’ li ochoch, mas wi’chik naq xk’ulman xtzolb’al li evangelio sa’ li ochoch, ut rik’in a’an xniman li paab’aal ut li sahil wank. Jun na’b’ej xtz’iib’a a’in: “Naqeek’a naq nach’ wi’chik wanko rik’ineb’ li qalal qak’ajol ut eb’ li qimam, rik’in naq nokoch’utla rajlal domingo chiru kaxlan mu. Chiqajunqal naqaye li naqak’oxla chirix li hu Kim, Taaqehin. Xjalman qatij choq’ reheb’ li wankeb’ sa’ li qajunkab’al, xb’aan naq naqataw chik ru k’a’ru neke’raj ru.”

Nintz’aama naq taqoksiheb’ li kutan a’in re k’iik sa’ musiq’ej. Wanko arin sa’ ruchich’och’ re taayale’q qix, re rilb’al ma taqasik’ ru xtaaqenkil li Jesukristo, ma taqajal li qak’a’uxl, ma tootzoloq, ut ma toochaab’ilo’q. Sa’ li qamusiq’ naqaj li usaak. Ut naqab’aanu a’in rik’in b’eek chi kaw sa’ xb’ehil li sumwank.

Ut sa’ xyanq chixjunil a’in, li qaChoxahil Yuwa’ ut li Ralal, li Jesukristo, nokohe’xra. Nokohe’xk’oxla. Eb’ a’an, ut eb’ lix santil anjel, yookeb’ chiqilb’al. ¹ Ninnaw naq yaal a’in.

Naq naqach’utub’ qib’ chirab’inkil li aatin k’eeb’il xb’aan li Qaawa’ reheb’ lix moos re te’xye, nink’e eeb’oqb’al naq teek’oxla jun na’leb’ kixyeechi’i li Qaawa’. A’an kixye naq “yalaq ani na’ajok re naru chixchapb’al rib’ chiru li raatin li Dios, li yo’yo ut nim xwankil, li tixjach sa’ xyi chixjunil lix seeb’al xb’alaq’ … ut lix k’oxlanb’il na’leb’ laj tza, ut tixb’eresi lix tzolom li Kristo sa’ jun li laatz’ ut ka’ch’in ruhil b’e.” ²

Nintz’aama naq teesik’ ru xchapb’al eerib’ chiru li raatin li Dios, jo’ chanru naq ch’olob’anb’ilaq sa’ li jolomil ch’utub’aj-ib’ a’in. Ut nintzʼaama naq teereekʼa lix rahom li Qaawaʼ choqʼ eere, ³ saʼ lix loqʼlaj kʼabʼaʼ li Jesukristo, amen.