Kiwan wa

Naq maji’ narame’ li xik sa’ avion xb’aan li yajel li wan anajwan, laa’in yookin chaq chi q’ajk sa’ kab’l chirix xb’aanunkil jun k’anjel sa’ jalan chik tenamit, ut ki’ajman ru naq tinkanaaq sa’ jun najtil tenamit chiru li domingo. Wan tz’aqal li hoonal re xinwulak sa’ jun ch’utam re li loq’laj wa’ak, ut aran xinye ajwi’ junjunq li aatin. Chirix li ch’utam, jun saaj al xnach’ok wik’in ut xpatz’ we ma ninnaw ru li Awa’b’ej Nelson, ut ma xinchap li ruq’ jun sutaq. Laa’in xinye re naq ninnaw ru, naq xinchap li ruq’, ut rik’in naq wankin sa’ li Obispil aj Jolominel, ninch’utla rik’in li Awa’b’ej Nelson ut eb’ lix tenq’ aj k’ehol na’leb’ wiib’ sut chiru li junjunq xamaan.

Li saaj al a’in xk’ojla sa’ jun tem, xtaqsi li ruq’ sa’ xb’een xjolom, ut xye, “A’in li kutan mas chaab’il re chixjunil lin yu’am!” Ex was wiitz’in, laa’in maare ink’a’ tintaqsi li wuq’ ut tinjap we, a’ut maak’a’jo’ naq ninb’antioxi naq wan jun li yo’yookil profeet, ut naq naqak’ul qana’leb’ rik’ineb’ profeet, eb’ aj ilol na’leb’, ut eb’ aj k’utb’esinel, ut mas wi’chik sa’eb’ li ch’a’ajkil kutan a’in.

Chalen chaq sa’ xtiklajik li ruchich’och’, li Qaawa’ xk’e xb’eresinkileb’ lix tenamit re te’xkawresi rib’ sa’ musiq’ej ut sa’ tz’ejwalej choq’ reheb’ li rahilal ut li yale’k-ix li kixnaw a’an naq te’chalq naq wankeb’ sa’ li ruchich’och’. Maak’a’ naxye ma neke’chal li ch’a’ajkilal a’in sa’ xb’een li junjunq malaj sa’ xb’een chixjunil li tenamit, li Qaawa’ tixkol qix ut tixk’e qatenq’ankil a’ yaal jo’ noko’ab’ink chiru li na’leb’ naxk’e, ut naqab’aanu. Wan jun esil chirix a’in sa’ li hu Genesis, b’ar wi’ naqil resil laj Jose aran Egipto, naq a’an kixch’olob’ xyaalal lix matk’ laj Farahon.

“Ut laj Jose kixye re laj Farahon, … Li k’a’ru tixb’aanu li Dios, xk’ut chiru laj Farahon. …

“K’e reetal, wuqub’ chihab’ te’chalq re nimla naab’alil sa’ chixjunil li ch’och’ Egipto.

“Ut te’wakliiq wuqub’ chihab’ re we’ej chirixeb’, ut sachb’ilaq sa’ ch’oolej chixjunil li naab’alil sa’ li ch’och’ Egipto.” ¹

Laj Farahon kirab’i li raatin laj Jose, ut ki’ab’in chiru li k’a’ru kixk’ut li Dios chiru sa’ li matk’, ut tikto ki’ok chixkawresinkil rib’ choq’ re li k’a’ru chalel. Sa’ li Santil Hu naxye:

“Ut ki’uuchin li ch’och’ sa’ li wuqub’ chihab’ re naab’alil, chi joob’.

“Ut a’an kixch’utub’ chixjunil li tzakemq re wuqub’ chihab’. …

“Ut laj Jose kixtamresi li trigo jo’ xsamahi’ li palaw, … toj reetal kixkanab’ xkeeb’al sa’ ajl, xb’aan naq maak’a’ rajlankil.” ²

Chirix naq kinume’ li wuqub’ chihab’ re naab’alil, tz’iib’anb’il naq “ke’ok chi chalk wuqub’ chihab’ re we’ej, jo’ li kixye chaq laj Jose, ut kiwan we’ej sa’ chixjunileb’ li ch’och’, a’ut sa’ chixjunil li ch’och’ Egipto kiwan wa.” ³

Sa’ li kutan a’in, osob’tesinb’ilo chi b’eresiik xb’aaneb’ profeet li neke’xtaw ru naq aajel ru xkawresinkil qib’ choq’ re li nimla rahilal “li taachalq,” ⁴ ut neke’xk’e ajwi’ reetal naq wan naq ramb’il chiqu xb’aanunkil li k’a’ru neke’xye.

Nak’eeman reetal naq li yajel COVID-19, ut xkomoneb’ chi li rahilal sa’ li ruchich’och’, ink’a’ neke’xti ru anihaq, ut neke’chal sa’ xb’eeneb’ chixjunil maak’a’ naxye k’a’ru xna’leb’eb’, k’a’ru xtenamiteb’, malaj k’a’ru xpaab’aaleb’. Wankeb’ li xe’sach xtrab’aaj, ut wankeb’ li xe’kub’siman xtojb’aleb’ sa’ xk’ab’a’eb’ li ch’a’ajkilal li xe’chal sa’ xk’ab’a’ li yajel ut xkomon chik li ch’a’ajkilal.

Reheb’ chixjunileb’ li rahob’tesinb’ileb’, naqaye naq naqak’e reetal lee ch’a’ajkilal, ut kaw qach’ool chixpaab’ankil naq wankeb’ li kutan chaab’il wi’chik li toj te’chalq. Osob’tesinb’ilex rik’ineb’ obiisp ut eb’ li awa’b’ej re uq’ej li neke’sik’ok reheb’ li komon sa’ xteepeb’ li wankeb’ sa’ rajb’al ru, ut wan rik’ineb’ k’anjeleb’aal ut eechej re eetenq’ankil, re naq teetuqub’ chi ak’il lee yu’am ut re texruuq eejunes chixtenq’ankil eerib’ naq nekek’anjela li na’leb’ chirix li kawresink-ib’.

Sa’ li ruchich’och’ wanko wi’ anajwan, b’ar wi’ jun li yajel yoo chixsachb’al naab’al li tumin ut naab’aleb’ li yu’am, moko naru ta naq li qaKolonel ink’a’ tixk’e reetal li ch’a’ajkilal wankeb’ wi’ naab’al, ut tixye reheb’ naq te’ok chixk’uulankil li tzakemq ut li tumin. A’ut a’in ink’a’ naraj naxye naq chi junelik toob’ayq chi ab’ink chiru li na’leb’ chirix li kawresink-ib’—yal naraj naxye naq eb’ li na’leb’ a’in tento te’b’aanumanq “chi k’oxlanb’il ut chi tuqtu,” ⁵ re taaruuq taqaye jo’ kixye laj Jose aran Egipto, “Kiwan wa.” ⁶

Li Qaawa’ ink’a’ naraj naq taqab’aanu li k’a’ru ink’a’ naru chiqu, a’ut naraj naq taqab’aanu li naru chiqu, jo’q’e naru chiwu. Li Awa’b’ej Nelson xjultika qe sa’ li jolomil ch’utub’aj-ib’ li xnume’, “Li Qaawa’ naraj naq yalb’ilaq qaq’e.” ⁷

Eb’ laj b’eresinel sa’ li Iglees k’iila sut xe’xye reheb’ laj santil paab’anel naq “te’xkawresi rib’ choq’ re li ch’a’ajkilal sa’ xyu’ameb’ rik’in xk’uulankil b’ayaq li tzakemq ut ha’, ut b’ayaq ajwi’ li tumin.” ⁸ A’ut yeeb’il ajwi’ qe naq chaab’ilaq qana’leb’, ut naq ink’a’ taqayal qaq’e chi numtajenaq chiru li k’a’ru chaab’il ⁹ sa’ xk’uulankil li tzakemq ut b’ayaq li tumin choq’ re li qajunkab’al. Wan jun li ch’ina hu, Las finanzas personales para la autosuficienca xk’ab’a’, li puktesinb’il sa’ 36 chi aatinob’aal, ut natikla rik’in li raatin li Xb’eenil Awa’b’ejil:

“Li Qaawa’ kixye, “A’an li wajom xk’eeb’al li taak’anjelaq reheb’ lin santil paab’anel” [Tzol’leb’ ut Sumwank 104:15]. Li k’utb’esinb’il na’leb’ a’in, a’an jun xyeechi’ihom li Qaawa’ naq tixk’e li osob’tesink na’ajman sa’ li ruchich’och’ a’in, ut tixte rokeb’aal li kawresink-ib’. …

“… Rik’in xk’ulb’aleb’ ut xyu’aminkileb’ li na’leb’ a’in, k’a’jo’ wi’chik naq tatruuq chixk’ulb’aleb’ li osob’tesink li yeechi’inb’il xb’aan li Qaawa’.

“Naqak’e aab’oqb’al naq taatzoleb’ ut taak’anjelaheb’ li na’leb’ a’in chi yalb’il aaq’e, ut naq taak’uteb’ chiru laa junkab’al. Wi nakab’aanu a’in, tat-osob’tesiiq sa’ aayu’am … rik’in naq laa’at ralal xk’ajol li qaChoxahil Yuwa’. A’an nakatxra ut maajo’q’e tatxkanab’ aajunes. Naxnaw aawu, ut naraj xk’eeb’al aawe li musiq’ejil ut tz’ejwalejil osob’tesink li nachal rik’in li kawresink-ib’.” ¹⁰

Sa’ li ch’ina hu a’in wankeb’ li ch’ol aatin chirix xk’uub’ankil chan ru roksinkil li tumin, chirix xkolb’al rix laa junkab’al chiru li rahilal, chirix xnumsinkil junaq ch’a’ajkilal re tumin, ut chirix xk’uulankil li na’ajman sa’eb’ li kutan chalel, ut chixjunileb’ li komon naru neke’xtaw chiru li internet malaj rik’ineb’ laj jolominel sa’ li na’ajej wankex wi’.

Naq naqak’oxla li na’leb’ chirix li kawresink-ib’, naru najultiko’ qe laj Jose aran Egipto jo’ aj k’amol b’e chiqu. Yal rik’in xnawb’al li k’a’ru taak’ulmanq, ink’a’ raj ke’ru chixnumsinkileb’ li chihab’ li ch’a’aj, wi ta ink’a’ ke’xkawresi rib’ chiruheb’ li chihab’ wan wi’ naab’alil. Ruuchil xk’uxb’al chixjunil lix q’olomeb’ lix tenamit laj Farahon, ke’xb’is ut ke’xk’uula li tzakemq, re taatz’aqloq choq’ reheb’ sa’ li chihab’ a’an jo’ ajwi’ sa’eb’ li chihab’ toj chalel. Moko tz’aqal ta yal xnawb’al naq te’chalq li kutan ch’a’aj. Ki’ajman ru naq ke’k’anjelak, ut rik’in a’an “kiwan wa.” ¹¹

Rik’in a’in, nokowulak sa’ jun patz’om aajel ru: “Chirix a’in, k’a’ru? Us tiklaak rik’in xtawb’al ru naq choq’ re li Qaawa’, chixjunil li k’a’aq re ru a’an re musiq’ej, ut maajun wa kixk’e qe junaq chaq’rab’ li re ta li yu’am a’in.” ¹² Jo’kan naq chixjunil naxk’ut xyaalal naq li Jesukristo a’an li k’ojleb’aal li tento tookab’laq wi’, sa’ li kawresink-ib’ choq’ re li yu’am a’in.

Li kawresink-ib’ ut li tenq’ank-ib’ sa’ li yu’am a’in naraj naxye xpaab’ankil naq rik’in li rusilal li Jesukristo, ut rik’in xyalb’al qaq’e, tooruuq chixtawb’al chixjunil li k’a’ru re musiq’ej ut re tz’ejwalej li aajel ru sa’ li qayu’am, choq’ qe laa’o ut choq’ re li qajunkab’al.” ¹³

Wankeb’ chik li na’leb’ chirix xk’eeb’al jun musiq’ejil k’ojleb’aal choq’ re li kawresink-ib’ re li yu’am a’in, jo’ xb’aanunkil chixjunil “chi k’oxlanb’il ut chi tuqtu,” ¹⁴ li naraj naxye naq chiru naab’al kutan yooko chixk’uulankil li tzakemq ut li tumin, ut taqoksi li k’a’ru “ka’ch’in ut moko nimob’resinb’il ta,” ¹⁵ xb’aan naq chi jo’kan k’utk’u qapaab’aal naq li Qaawa’ tixnimob’resi li qach’ina k’anjel wi ink’a’ naqakanab’ xb’aanunkil.

Chirix xk’eeb’al jun musiq’ejil k’ojleb’aal, naru naqak’anjela wiib’ na’leb’ chirix li kawresink-ib’ choq’ re li yu’am a’in—a’an roksinkil chi tuqtu li tumin, ut xk’uulankil li tzakemq.

Eb’ li na’leb’ re roksinkil chi us li tumin, a’aneb’ xtojb’al li lajetqil ut xkomoneb’ chik li mayej, ink’a’ ok sa’ li k’as, xk’uub’ankil chan ru taa’oksimanq li tumin, ut xk’uulankil b’ayaq choq’ reheb’ li kutan chalel.

Eb’ li na’leb’ re k’uulank sa’ li ochoch, a’aneb’ xk’uulankil li tzakemq, xk’uulankil li ha’, ut xkomon chik li k’a’aq re ru a’ yaal li nak’anjelak re li junkab’al, rik’in naq “li k’uuleb’aal q’axal chaab’il” ¹⁶ a’an li ochoch, “li naxk’e li k’a’ru nak’anjelak qe naq ajb’il ru.” ¹⁷

Naq naqak’uleb’ li musiq’ejil na’leb’ ut naqasik’ qab’eresinkil rik’in li Qaawa’, taak’ame’q qab’e re taqanaw k’a’ru naraj li Qaawa’ choq’ qe, qajunes ut sa’ junkab’al, ut chan ru us xb’aanunkil li kawresink-ib’. Li mas aajel ru, a’an xtikib’ankil.

Li Elder David A. Bednar kixye a’in chi chaab’il naq kixye: “Xb’aanunkil k’a’ruhaq, a’an xk’anjelankil li paab’aal. … Li tz’aqal paab’aal k’eeb’il rib’ rik’in ut sa’ xk’ab’a’ li Qaawa’ Jesukristo ut junelik nak’amok sa’ li b’aanuhom.” ¹⁸

Ex was wiitz’in, sa’ li ruchich’och’ a’in li mas yoo chi jalmank, aajel ru naq taqakawresi qib’ choq’ re li k’a’ru chalel. Us ta chaab’ilaqeb’ li kutan chalel, naqanaw naq toj taawanq k’a’ru ch’a’aj ut k’a’ru chaab’il sa’ li yu’am a’in. Wi naqasik’ xkawresinkil qib’ chi tz’ejwalejil, naru naqak’uleb’ li ch’a’ajkilal sa’ li yu’am a’in chi kaw ut chi tuqtu qach’ool, ut jo’ laj Jose re Egipto, taaruuq taqaye, us ta wan li ch’a’ajkilal, “Kiwan wa.” ¹⁹ Sa’ xk’ab’a’ li Jesukristo, amen.