Lix wankilal li Jesukristo re k’irtesink

Chalen chaq xtiklajik li chihab’ a’in, xqanumsi naab’al li k’a’q re ru maak’a’ sa’ qach’ool. Eb’ li kamk ut xsachikeb’ xtrab’aaj naab’aleb’ xb’aan li yajel li wan sa’ chixjunil li ruchich’och’ yoo chixtoch’b’al chixjunileb’ li tenamit.

Li hiik, li lochk, ut li b’uut’ink chiru li ruchich’och’, jo’ ajwi’ xkomoneb’ chik li ninqi rahilal, yoo chixk’eeb’aleb’ li kristiaan chi xuwak, chi sache’k xyo’onihomeb’, ut chi raho’k sa’ xch’ooleb’; neke’xpatz’ ma taasutq’iiq xyu’am sa’ xna’aj.

Kanab’omaqin xwotzb’al jun seraq’ chirix li yote’k.

Naq toj ka’ch’ineb’ chaq li qakok’al, xe’raj xk’ulb’al xtzolb’al chirix xtoch’b’al li piano. Lin sum aatin, aj Rudy, ut laa’in kiqaj xk’eeb’al reheb’ li k’a’ru neke’xpatz’, a’b’an maak’a’ li qapiano. Maak’a’ li qatumin re xloq’bal jun li ak’ piano, jo’kan naq laj Rudy ki’ok chixsik’b’al junaq ak oksinb’il.

Sa’ li Ralankil a’an, kixloq’ jun li piano choq’ qe, ut eb’ li qakok’al ke’ok chixtzolb’al xtoch’b’al.

Xe’ninqan li qalal ut xe’el chaq sa’ li qochoch, ut li piano yal natam li poqs chiru, jo’kan naq kiqak’ayi. Rik’in xnumikeb’ li chihab’ xqach’utub’ b’ayaq li qatumin. Sa’ jun kutan laj Rudy kixye, “Nink’oxla naq xhoonalil anajwan naq taaqaloq’ jun chik li ak’ piano.”

Xinpatz’ re “K’a’ru aj-e junaq li ak’ piano, xb’aan naq maajun qe naxnaw xtoch’b’al?”

A’an kixsume, “Ah, a’b’an naru naqataw junaq li naxtoch’ rib’ xjunes! Rik’in jun li iPad, naru taayiib’ li piano re naq tixtoch’ numenaq kaahib’ mil chi b’ich, jo’eb’ ajwi’ li re li Iglees, li Coro Tabernaculo, chixjunileb’ li b’ich reheb’ li kok’al, ut naab’al chik xkomon.”

Ninye eere naq laj Rudy a’an jun aj chaab’il k’ayinel.

Kiqaloq’ jun li ak’ piano li naxtoch’ rib’ xjunes, ut chirix xnumik wiib’ oxib’ li kutan, wiib’ li ninqi winq ke’xk’am sa’ qochoch.

Xink’ut chiruheb’ b’ar nawaj taawanq.

A’an jun li piano mas aal, ut re naq taanume’q sa’ li okeb’aal, ke’risi li roq ut chi jo’kan xe’ruhan chixk’eeb’al chi yokyo sa’ xb’een li b’eleb’aal ch’iich’ re paqonk li ke’xk’am.

Li qochoch wan sa’ jun taqsink, ut sa’ li eq’la kit’ane’ li saqb’ach, jo’kan naq yolyol ru li b’e. Ma nekek’oxla b’ayaq k’a’ru taak’ulmanq?

Naq eb’ li winq yookeb’ chixtiikisinkil sa’ li taqsink, kit’ane’, ut kiwab’i jun kawil eek’ank. Li piano kit’ane’, kixten rib’ chiru li ch’och’ rik’in chixjunil lix metz’ew, ut kitoqe’ li pim wan chiru li qochoch.

Xinye: “Ay! Ma us wankex?”

Maak’a’ ke’xk’ul li winq.

Sachso xe’kana ut ke’ril rib’ chirib’il rib’ ut chirix a’an xine’ril ut ke’xye: “Choohaakuy. Taqak’am wi’chik sa’ li k’ayib’aal ut laj eechal k’ay tatxb’oq chaq.”

Junpaataq chik laj eechal k’ay ki’aatinak rik’in laj Rudy re rilb’al chan ru naq te’xq’axtesi jalan chik li ak’ piano. Laj Rudy jwal q’un xch’ool, kixye re laj eechal k’ay naq ka’ajwi’ texyiib’ ut te’xk’am wi’chik chaq a’an. A’b’an laj eechal k’ay kixye naq tento taqak’ul jun chik li ak’.

Laj Rudy kixye, “Maawa’ xnimal ru ch’a’ajkilal. Yal teeyiib’ ut teek’am chaq.”

Laj eechal k’ay kixye, “Li tz’alam che’ jorol, ut naq najore’ li tz’alam che’, moko juntaq’eet ta chik na’eek’an. Taqataqla jun chik li ak’ piano.”

Ex was wiitz’in, ma ink’a’ chanchano li piano a’an, jorol, tenb’il, malaj rahob’tesinb’il, ut maare naqeek’a naq ink’a’ chik toosutq’iiq jo’ junxil? A’b’anan, naq nokochal rik’in li Jesukristo rik’in xpaab’ankil, xjalb’al qak’a’uxl, ut ok sa’ sumwank rik’in, li qamajelal—yalaq chan ru xqak’ul—naru taak’irtesiiq. Lix wankilal li Kolonel re qak’irtesinkil, ink’a’ yal naxsutq’isi li ak xwan qe, nokoxchaab’ilob’resi b’an chik. Ninnaw naq rik’in li qaKolonel Jesukristo, chiqajunilo naru toob’ane’q, took’irtesiiq, ut tootzaq ut too’eek’anq jwal chaab’il wi’chik, jo’ li ak’ piano.

Li Awa’b’ej Russell M. Nelson kixye: “Naq nujenaqaqo rik’in qacha’ajkilal, a’an li hoonal b’ar wi’ taqakawob’resi li qapaab’aal chirix li Dios, took’anjelaq rik’in chixjunil li qametz’ew, ut taqatenq’aheb’ li qas qiitz’in. Toja’ naq a’an tixk’irtesi li qaam li yoo chi yot’ek xb’aan rahilal. A’an tixk’e li qatuqtuukilal ut tixk’ojob’ li qach’ool! Eb’ li ninqi matan a’an maajun wa te’sache’q, chi moko rik’in li kamk.” ¹

Li Jesus kixye:

“Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.

“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.

“Xb’aan naq moko ra ta lin iiqleb’, ut li nink’e cheriiqani moko aal ta” (Mateo 11:28–30).

Re xk’irtesinkil lix yot’b’al li qach’ool, tento wanq li qapaab’aal chirix li Jesukristo naq nokonach’ok rik’in a’an. “Li paab’aal chirix li Jesukristo naraj naxye xkanab’ankil qib’ chi tz’aqal sa’ ruq’—chiru ajwi’ lix wankilal … ut lix rahom maak’a’ roso’jik. Naraj ajwi’ naxye xpaab’ankil lix k’utum. Naraj naxye naq us ta ink’a’ naqataw ru chixjunil li k’a’aq re ru, a’an naxtaw ru. A’an ak kixnumsi chixjunil li qarahilal, qach’a’ajkilal, ut qayajel, jo’kan naq a’an naxnaw chan ru tooxtenq’a re toonumtaaq sa’ xb’een li qach’a’ajkilal.” ²

Naq nokochal rik’in a’an, naru toonujaq rik’in sahil ch’oolejil, tuqtuukilal, ut xk’ojob’ankil li qach’ool. Chixjunil li k’a’ru ch’a’aj sa’ li yu’am a’in naru nayiib’aak rik’in lix tojb’al rix li maak xb’aan li Jesukristo.” ³ A’an naxye qe, “Chex’iloq wankin wi’ sa’ li junjunq eek’oxlahom; miwiib’an eech’ool; mexxuwak” (Tzol’leb’ ut Sumwank 6:36).

Sa’ lix Hu laj Mormon, naq laj Alma ut lix tenamit ka’ch’in chik ma xe’juk’e’ xb’aan li aalal iiq k’eeb’il sa’ xb’eeneb’, li tenamit ke’xtz’aama naq taaseeb’ob’resiiq. Li Qaawa’ ink’a’ kirisiheb’ li riiq; ruuchil a’an, kixye reheb’:

“Ut joʼkan ajwiʼ tinkotz li iiq li kʼeebʼil saʼ xbʼeen lee tel, re naq inkʼaʼ ajwiʼ texruuq chireekʼankil cherix, naq toj wankex chi moosil; ut aʼin tinbʼaanu re naq texruuq chi xaqliik moqon choqʼ aj yehol nawom chiwix, ut re naq teenaw chi chʼolchʼo naq laaʼin, li Qaawaʼ Dios, nawulaʼanihebʼ lin tenamit saʼ lix chʼaʼajkilalebʼ.

“Ut anajwan kikʼulman naq li iiq li keʼkʼeheʼ saʼ xbʼeen laj Alma ut ebʼ lix komon keʼseebʼobʼresiik; relik chi yaal, li Qaawaʼ kixkʼehebʼ xmetzʼew re naq moko chʼaʼaj ta chiruhebʼ xkʼambʼal li riiqebʼ, ut keʼxqʼaxtesi ribʼ chi sahebʼ saʼ xchʼool ut rikʼin kuyuk chiru chixjunil li rajom li Qaawaʼ ” (Mosiah 24:14–15).

Li Elder Tad R. Callister kixk’ut lix wankilal li Kolonel re k’irtesink ut re xseeb’ob’resinkil li iiq:

“Jun reheb’ li osob’tesink li naxk’am chaq lix tojb’al rix li maak, a’an naq naru naqak’ul lix wankil li Kolonel re qatenq’ankil. Laj Isaias ki’aatinak naab’al sut chirix li k’irtesink ut li tuqtuukilal naxk’e li Kolonel. Kixch’olob’ xyaalal naq li Kolonel, “a’an xkawub’ xch’ool li neb’a’ naq wank sa’ rahilal, nakolok chiru li hab’, ut namuheelank chiru xtiqwal li saq’e” (Isaias 25:4). Chirixeb’ li ra wankeb’, laj Isaias kixye naq li Kolonel wan xwankil re “xk’ojob’ankil xch’ooleb’ chixjunileb’ li yookeb’ chi yaab’ak ” (Isaias 61:2) ut “xchaqihob’resinkil chixjunil li xya’aleb’ ru” (Isaias 25:8; chi’ilmanq ajwi’ Apokalipsis 7:17); ut “xk’eeb’al xkawub’ xch’ool li kub’enaq xwankil” (Isaias 57:15); ut “xk’ojob’ankil xch’ooleb’ li ra wankeb’ ” (Isaias 61:1; chi’ilmanq ajwi’ Lukas 4:18; Salmos 147:3). Lix wankil re tenq’ank a’an jwal nim, chi jo’kan naq naru tixk’e li “koroon ruuchil li cha, li sununkil b’an ruuchil li tz’uyink, li chaab’il aq’ej ruuchil li rahil ch’oolej” (Isaias 61:3).

“Ch’ina us li oyb’enihom wan sa’ eb li yeechi’ihom a’an! … Lix musiq’ nak’irtesin, nak’ojob’an ch’oolej, naxk’am chaq ak’ yu’am reheb’ li sachb’ileb’ xyo’onihom. Wan xwankil re xjalb’al li yib’ ru, tz’eqb’eetal, ut maak’a’ xtz’aq sa’ li yu’am a’in, toj reetal naq ch’ina-us ut nim xloq’al. A’an wan xwankil re xjalb’al ru lix chahil li kamk sa’ xch’ina-usal li wank chi junelik.” ⁴

Ninch’olob’ xyaalal naq li Jesukristo a’an laj Kolol qe, aj Tojol qix, li Nimla K’irtesinel, ut li tz’aqal qaamiiw. Wi naqasik’ a’an, tooxk’irtesi ut tooxkanab’ chi k’irtesinb’il. Ninch’olob’ xyaalal naq a’an a’in lix Iglees, ut naq a’an yoo chixkawresinkil rib’ re taasutq’iiq wi’chik re taajolominq rik’in wankilal ut loq’alil sa’ li ruchich’och’ a’in. Sa’ xk’ab’a’ li Jesukristo, amen.