Chexkuyuq chi tz’aqal re ru, ut chek’ehaq anchal choq’ xsahil eech’ool!

Wiib’ chihab’ chaq, kikam laj Chad, li wiitz’in. Lix kamik kixk’e chi raho’k sa’ xch’ool li wixnam, li xStephanie; lix kok’aleb’, laj Braden ut xBella; jo’ ajwi’ chixjunil li junkab’al. Kik’ojob’aak qach’ool xb’aan li raatin li Elder Neil L. Andersen sa’ li jolomil ch’utub’aj-ib’ jun xamaan ma nakam laj Chad: “Sa’ lix uk’alil li yale’k-ix sa’ ruchich’och’, tiikisihomaq eerib’ chi uub’ej chi wank eekuyum, ut lix wankilal li Kolonel re k’irtesink tixk’e eesaqenkil, xtawb’al ru, eetuqtuukilal, ut eeroyb’enihom” (“Eb’ li rahob’tesinb’il,” Jolomil ch’utub’aj-ib’ re octubre 2018).

Jalam-uuch

Laj Chad Jaggi ut xjunkab’al

Naqapaab’ li Jesukristo; naqanaw naq taqil laj Chad wi’chik, a’b’an toj naraho’ qach’ool xb’aan xkamik! Wankeb’ naab’al li xe’kam xkomoneb’. Ch’a’aj royb’eninkil li kutan naq taqileb’ wi’chik.

Jun chihab’ chirix xkamik, xqeek’a naq moyb’il qu xb’aan li aak’ab’. Xqasik’ qamuheb’aal sa’ li loq’laj hu, sa’ li tijok rajlal, ut sa’ li santil ochoch. Li raatinul li b’ich a’in naxch’olob’ li xqeek’a: “Ajen, ak xsaqew, chakʼe laa metzʼew. At chʼochʼ, ak xnumeʼ li qʼojyin anajwan ” (“Ajen, ak xsaqew,” Eb’ li B’ich, 27).

Xqaye sa’ junkab’al naq chaab’ilaq taawanq li chihab’ 2020! Sa’ noviembre re 2019, yooko chaq chixtzolb’al Kim, Taaqehin sa’ lix hu laj Santiago sa’ li Ak’ Chaq’rab’ naq xqataw jun chaab’il na’leb’. Santiago 1:2 naxye, “Ex was wiitz’in, chek’ehaq anchal choq’ xsahil eech’ool naq nekext’ane’ sa’ k’iila ch’a’ajkilal” (Santiago 1:2,jo’ jaltesinb’il ru xb’aan laj Jose Smith). Xqaj xtikib’ankil li ak’ chihab’ rik’in sahil ch’oolejil, jo’kan naq xqaye naq sa’ 2020 “taqak’e anchal choq’ xnimal xsahil qach’ool.” K’a’jo’ xqaj a’an, jo’kan naq sa’ Ralankil xqasi reheb’ li qajunkab’al li kamiis rik’in li aatin “Chek’ehaq anchal choq’ xsahil eech’ool” chiru. Chi yaal taasaho’q raj qach’ool sa’ 2020.

Ut arin wanko—sa’ 2020 xqak’ul li nimla yajel COVID-19, li wech’ok-ib’, li ninqi ch’a’ajkilal, ut li ch’a’ajkilal re tumin. Li qaChoxahil Yuwa’ maare nokoxkanab’ chixtz’ilb’al rix li qanawom chirix li kuyuk, ut li rajom qach’ool chixsik’b’al ru li sahil ch’oolejil.

Xqataw xkomon chik li na’leb’ sa’ lix hu laj Santiago. Sa’ Santiago 1:3–4 naxye:

“Nekenaw naq li xyalb’al rix lee paab’aal naxk’am chaq li kuyuk rahilal.

“A’b’anan chexkuyuq chi tz’aqal re ru, re naq tz’aqalaq eere eeru ut chaab’ilaqex, chi maak’a’ majelaqex wi’ sa’ lee paab’aal.”

Sa’ xyalb’al qaq’e chixtawb’al xsahil qach’ool sa’ xyi li qach’a’ajkilal, xsach sa’ qach’ool naq aajel ru li kuyuk re naq taak’anjelaq li qach’a’ajkilal choq’ re li qachaab’ilal.

Li rey aj Benjamin kixye naq tento taqisi li ruchich’och’il winq ut too’ok “choq’ aj santil paab’anel sa’ xk’ab’a’ lix tojb’al rix li maak xb’aan li Kristo li Qaawa’, ut too’ok chanchan jun li ch’ina al, kub’enaq ratawom, q’un xch’ool, tuulan, aj kuyunel, nujenaq rik’in rahok, wank xch’ool chixk’eeb’al rib’ rub’el chixjunil li k’a’aq re ru” (Mosiah 3:19).

Li ch’ol 6 re Predicad Mi Evangelio naxk’ut xna’leb’ li Kristo li naru taqayu’ami: “Li kuyuk, a’an li wankilal chixk’ulb’al li b’ayk, li ch’a’ajkilal, li ka’pak’alil, ut li rahilal chi ink’a’ nokojosq’o’ chi moko nokoxuwak. A’an li wankilal re xb’aanunkil li rajom li Dios ut xk’ulub’ankil xhoonalil. Naq wan aakuyum, nakaxaqab’ aawib’ ut nakakuy li ch’a’ajkilal chi tuqtu aach’ool ut rik’in li yo’onink” (Predicad Mi Evangelio: Una guía para el servicio misional. [2019], 126).

Li kuyuk chi tz’aqal re ru k’utb’il sa’ xyu’am jun xtzolom li Kristo, laj Simon laj Kanahanita. Eb’ laj Zelote, a’aneb’ jun ch’uut aj Judio li ink’a’ ke’raj naq te’jolomiiq xb’aaneb’ laj Roma. Eb’ laj Zelote ke’xq’unb’esi xch’ooleb’ li kristiaan chixpleetinkileb’ laj Roma, eb’ li rech aj Judio, ut eb’ laj Saduceo rik’in li poqlenk ut li rahob’tesink (chi’ilmanq Encyclopedia Britannica, “Zealot,” britannica.com). Laj Simon laj Kanahanita, a’an chaq aj Zelote (chi’ilmanq Lukas 6:15 K’oxla laj Simon xyalb’al xq’unb’esinkil xch’ool li Kolonel chi pleetik malaj chi poqlenk aran Jerusalen. Li Jesus kixye:

“Osobʼtesinbʼilebʼ li tuulan, xbʼaan naq ebʼ aʼan teʼeechaninq re li ruchichʼochʼ. …

“Osobʼtesinbʼilebʼ li nekeʼuxtaanank, xbʼaan naq ebʼ aʼan teʼuxtaanaaq ru. …

“Osobʼtesinbʼil chixjunil li nekeʼkʼojobʼank re li tuqtuukilal, xbʼaan naq ebʼ aʼan ralal xkʼajol li Dios teʼyeheʼq re” (Mateo 5:5, 7, 9).

Maare laj Simon kixk’ulub’a ut kixjultika lix na’leb’ chi anchal xmetz’ew, a’b’an li loq’laj hu naxye naq xb’aan xna’leb’ ut xb’aanuhom li Kolonel, kijale’ xna’leb’. Li wank jo’ xtzolom li Kristo ki’ok choq’ xch’oolil lix yu’am.

Sa’ xpaab’ankileb’ li sumwank rik’in li Dios, li Kolonel naru tooxtenq’a chi “yo’laak wi’chik, relik chi yaal, yo’laak rik’in li Dios, ut jalaak chaq sa’ li qatz’ejwalejil ut t’anenaqil wanjik, re wank sa’ tiikilal, chi tojb’il qix xb’aan li Dios, chi okenaqo choq’ ralal ut xrab’in” (Mosiah 27:25).

Sa’ xyanq chijxunil li naru taqayal wi’ qaq’e sa’ li kutan a’in, tento naq li wank jo’ xtzolom li Kristo a’anaq raj xch’oolil li qayu’am. “Xbʼaan naq bʼar wan eebʼihomal, aran ajwiʼ wanq eechʼool” (Mateo 6:21). Misach sa’ qach’ool naq chirix naq lix tzolom “ke’xb’aanu li rajom li Dios,” toj “x’ajman naq wanqeb’ xkuyum” (Hebreos 10:36).

Jo’ naq lix yalb’al rix li qapaab’aal naxk’e chi k’iik li qakuyum, lix k’anjelankil li qakuyum naxk’e chi k’iik li qapaab’aal. Naq nak’i li qapaab’aal, nak’i ajwi’ lix sahil qach’ool.

Sa’ li po marzo xnume’, li qarab’in, xEmma, jo’ naab’al chik li misioneer sa’ li Iglees, kikana sa’ rochoch. Ke’sutq’i naab’aleb’ li misioneer sa’ rochoch. Ke’royb’eni naq te’taqlaaq wi’chik chi k’anjelak. Naab’al reheb’ ink’a’ ke’ru chi ok sa’ li santil ochoch naq maji’ neke’xik sa’ mision. B’antiox eere, ex elder ut ex hermana. Nekexqara.

Li xEmma ut li rochb’een aran Países Bajos ke’yale’ rix chiruheb’ li xamaan a’an—ke’yab’aak chi kok’ aj xsa’. Naq ink’a’ xru rilb’aleb’ li kristiaan chi moko elk sa’ kab’l, li xEmma kixkanab’ rib’ sa’ ruq’ li Dios. Xootijok rik’in sa’ internet ut xqapatz’ re chan ru taqatenq’a. Xpatz’ qe naq taqanaweb’ ru li kristiaan yoo chixtzolb’al sa’ internet.

Xoo’ok jo’ junkab’al chixnawb’al ruheb’ li ramiiw li xEmma sa’ Países Bajos. Xqab’oqeb’ chixtzolb’al Kim, Taaqehin qik’in sa’ internet rajlal xamaan. Wankeb’ li ak’ qamiiw, xFloor, xLaura, xRenske, laj Freek, laj Benjamin, laj Stal, ut laj Muhammad. Junjunq reheb’ li qamiiw sa’ Países Bajos xe’ok “sa’ li okeb’aal laatz’ ” (3 Nefi 14:13). Wankeb’ chik li yookeb’ chi tzolok chirix “lix laatz’al ru li b’e, ut lix ka’ch’inal ru li okeb’aal, li tento te’ok wi’ ” (2 Nefi 31:9). A’aneb’ li qas qiitz’in sa’ Kristo. Rajlal xamaan “naqak’e choq’ xnimal xsahil qach’ool” xtenq’ankil qib’ chiqib’il qib’ sa’ xb’ehil li sumwank.

Naqayal “kuyuk chi tz’aqal re ru” (Santiago 1:4) us ta ink’a’ naru tooch’utlaaq sa’ li Iglees chiru jarub’aq kutan. A’b’an naqak’e choq’ xnimal xsahil qach’ool lix k’iijik li qapaab’aal sa’ junkab’al, b’antiox re li tecnologia li nokoxjunaji ut b’antiox re li tzolok chirix lix Hu laj Mormon sa’ Kim, Taaqehin.

Li Awa’b’ej Russell M. Nelson kixye, “Wi teek’e eech’ool chixb’aanunkil a’an—sa’eb’ ajwi’ li hoonal naq ch’a’aj cheru xb’aanunkil—taajalaaq eeyu’am laa’ex, xyu’am lee junkab’al, ut li ruchich’och’ ” (“Xik chi uub’ej rikʼin paabʼaal,” Jolomil ch’utub’aj-ib’ re abril 2020).

Tz’apb’il chiru jarub’aq kutan li santil ochoch, b’ar wi’ noko’ok sa’ loq’laj sumwank rik’in li Dios. A’b’an teeto li qochoch, b’ar wi’ naqayu’ami li loq’laj sumwank rik’in li Dios! Sa’ li qochoch naru taqatz’il rix lix chaq’alil ru li qasumwank re li santil ochoch. Us ta ink’a’ naru too’ok sa’ li santil na’ajej a’an, “eb’ li ch’oolej … te’saho’q chi naab’al sa’ xk’ab’a’ li osob’tesink li taahoymanq” (Tzol’leb’ ut Sumwank 110:9).

Wankeb’ li xe’kana chi maak’a’ xtrab’aaj; ut wankeb’ chik li ink’a’ xe’ru xb’aanunkil li k’a’ru xe’raj. A’b’an, nasaho’ qach’ool rik’in li Awa’b’ej Nelson, li xye: “Li qakomon mas wi’chik yookeb’ chixk’eeb’al li mayej re kuyuk sa’, ut yookeb’ chixk’eeb’al tumin re xtenq’ankileb’ li wankeb’ sa’ aajel ru. … Sa’ komonil toonumtaaq sa’ xb’een li ch’a’ajkilal a’in. Li Qaawa’ texrosob’tesi naq toj teerosob’tesi lee ras eeriitz’in” (Li raatin laj Russell M. Nelson sa’ Facebook, tz’iib’anb’il sa’ 16 agosto, 2020, facebook.com/russell.m.nelson).

“Chiwanq xsahil eechʼool,” kixye li Qaawa’, ink’a’ chiwanq eexiw (Mateo 14:27).

Wan naq nalaj qakuyum naq naqak’oxla naq “us chixjunil li naqab’aanu” ut toj maji’ naqak’ul li osob’esink naqaj. Laj Enok kib’eek rik’in li Dios chiru 365 chihab’ toj reetal naq kijaltesiik ru rochb’een lix tenamit. Kixyal xq’e chiru 365 chihab’, toja’ naq kik’ulman! (Chi’ilmanq Tzol’leb’ ut Sumwank 107:49.)

Li wiitz’in, laj Chad, kikam yal wiib’ oxib’ po chirix xraqik li qak’anjel chixjolominkil li mision re Ogden Utah. Kiwan li qochoch sa’ California, ut a’an jun sachb’a-ch’oolej naq sa’ xyanqeb’ li 417 chi mision sa’ 2015, xoob’oqe’ chi k’anjelak sa’ Utah. Li qochoch sa’ mision nach’ wan rik’in li rochoch laj Chad. Kiyehe’ re laj Chad naq wan xcancer chirix naq xoob’oqe’ sa’ mision. Sa’ li nimla ch’a’ajkilal a’an, xqanaw naq li qaChoxahil Yuwa’ yoo chiqak’oxlankil ut chiqatenq’ankil re taqataw li sahil ch’oolejil.

Ninch’olob’ xyaalal lix wankilal li Kolonel Jesukristo re xtojb’al qix, qasantob’resinkil, qatuulanob’resinkil, ut xk’eeb’al xsahil qach’ool. Ninnaw naq wi tootijoq chiru li qaChoxahil Yuwa’ sa’ xk’ab’a’ li Jesus, a’an taasumenq. Ninch’olob’ xyaalal naq wi taqab’i ut taqapaab’ xyaab’ xkux li Qaawa’ ut lix yo’yookil profeet, li Awa’b’ej Russell M. Nelson, naru “tookuyuq chi tz’aqal re ru” ut “taqak’e choq’ xnimal xsahil qach’ool.” Sa’ xk’ab’a’ li Jesukristo, amen.