Ninpaab’ naq wankeb’ li anjel
Li Qaawa’ naxnaw li ch’a’ajkilal nakak’ul. A’an naxnaw aawu. Nakatxra. Ninye aawe naq tixtaqlaheb’ li anjel re aatenq’ankil.
Ex was wiitz’in, ninpaab’ naq wankeb’ li anjel, ut nawaj xyeeb’al k’a’ru xink’ul rik’ineb’. Naq tinb’aanu, nawoyb’eni naq taqak’e reetal naq aajeleb’ ru li anjel sa’ li qayu’am.
A’in li kixye li Elder Jeffrey R. Holland sa’ jun jolomil ch’utub’aj-ib’ junxil: “Naq noko’aatinak chirixeb’ li ani wank choq’ k’anjeleb’aal sa’ ruq’ li Dios, najultiko’ qe naq moko chixjunileb’ ta li anjel neke’chal chaq sa’ choxa. Wankeb’ li neke’b’eek ut neke’aatinak qik’in—anajwan, wulaj wulaj. Wankeb’ sa’ xyanqeb’ li qech kab’al. … Relik chi yaal, chanchan naq nach’ wan li choxa naq naqil lix rahom li Dios chi k’utb’esinb’il sa’ xchaab’ilal ut xpaab’aal li ani tiik ut saq ru xch’ool, ut ka’ajwi’ naru xyeeb’al naq a’an jun li anjel” (“El ministerio de ángeles,” Liahona, noviembre 2008, 30).
Nawaj aatinak chirixeb’ li anjel li wankeb’ sa’ qayanq. Eb’ li anjel sa’ qayanq wulaj wulaj neke’xk’ut chiqu lix rahom li Dios choq’ qe.
Eb’ li xb’een anjel tinye resil, a’aneb’ li wiib’ hermana ke’xk’ut li evangelio chiwu naq saajin: li Hermana Vilma Molina ut li Hermana Ivionete Rivitti. Li wiitz’in ut laa’in xoowulak sa’ jun ch’ina k’anjel sa’ li Iglees b’ar wi’ xqanaweb’ ru li anjel a’in. Ink’a’ xinnaw naq li ch’ina k’anjel a’an tixjal inyu’am.
Lin na’ inyuwa’ ut li was wiitz’in ink’a’ ke’raj tzolok chirix li Iglees sa’ li kutan a’an. Ink’a’ ke’raj naq te’ok li misioneer sa’ qochoch, jo’kan naq xintzole’ xb’aaneb’ sa’ li kapiiy. Li Iglees a’an ki’ok choq’ jun “loq’laj k’iche’ ” choq’ we.
Jun po chirix xtawb’al li evangelio b’antiox reheb’ li anjel a’an, xkub’e inha’. 16 chihab’ wan chaq we. Maak’a’ xjalam-uuch lin kub’iha’, a’b’an wan xjalam-uuch li ch’ina k’anjel xoowulak wi’ li wiitz’in ut laa’in. Maare tento tinye anihin sa’ li jalam-uuch. Laa’in li nim woq sa’ li seeb’al.
Jo’ nekenaw, wan naq ch’a’aj li wulak rajlal sa’ li Iglees choq’ re jun li saaj toje’ xkub’e ha’ ut li moko tenq’anb’il ta xb’aan xjunkab’al.
Naq xinyal xtawb’al inna’aj sa’ jun ak’ yu’am rik’ineb’ li ak’ amiiw, xweek’a naq moko k’ulb’ilin ta. Xweek’a naq injunes wankin ut xch’inan inch’ool. Xinnaw naq yaal li Iglees, a’b’an xweek’a naq moko k’ulb’ilin ta. Us ta ch’a’aj li ak’ paab’aal a’in choq’ we, xink’e inch’ool chi tz’aqonk sa’ jun li ch’utub’aj-ib’ choq’ reheb’ li saaj chiru oxib’ kutan, b’ar wi’ maare tintaweb’ li amiiw. Aran xinnaw ru jun chik li anjel, xMônica Brandão xk’ab’a’.
Toje’ xq’axon sa’ jalan chik na’ajej aran Brasil toj sa’ li qatenamit. Xsaho’ inch’ool naq xinxk’ulub’a choq’ ramiiw. Maare xril xchaab’ilal inch’ool ut ink’a’ ma ch’ina-usin.
Xe’ok ajwi’ li ramiiw a’an choq’ wamiiw, ut sa’ komonil xoowulak sa’ k’iila k’anjel choq’ reheb’ li saaj. Jwal aajeleb’ ru li kok’ k’anjel a’an choq’ we sa’ lin ak’ yu’am.
Eb’ li chaab’il amiiw a’in xine’xtenq’a, a’b’an toj maak’a’ li evangelio sa’ wochoch ut maak’a’ intenq’ankil xb’aan injunkab’al. Jwal aajel ru li xink’ul sa’ li Iglees choq’ re xjalajik inch’ool. Toja’ naq li Qaawa’ kixtaqlaheb’ wiib’ chik li anjel re intenq’ankil.
Jun reheb’, a’an aj k’utunel sa’ seminario, xLeda Vettori xk’ab’a’. Rik’in lix rahom ut lix chaab’il tzol’leb’, xinixtenq’a wulaj wulaj rik’in “lix chaab’il aatin li Dios” (Moroni 6:4), li aajel ru choq’ we. A’in xinixtenq’a chixk’ulb’al inmetz’ew sa’ musiq’ej.
Jun chik li anjel, a’an li awa’b’ej reheb’ li Saaj Winq, laj Marco Antônio Fusco xk’ab’a’. A’an ajwi’ li wochb’een sa’ li tzolok ochochnal. Us ta toj ka’ch’in innawom, a’an xk’e ink’anjel chi k’utuk sa’ xmolameb’ li tij ut sa’ rochocheb’ li komon. Xinixtenq’a chi k’anjelak ut chi tzolok sa’ li evangelio, ink’a’ ka’ajwi’ ilok. A’an xnaw li naru tinb’aanu, mas wi’chik chiru li xinnaw laa’in.
B’antiox reheb’ li anjel a’an, ut xkomoneb’ chik li xine’xtenq’a sa’ insaajilal, xinkawob’resiik chi kanaak sa’ xb’ehil li sumwank ut xintaw innawom chirix li yaal.
Ut li anjel li xin’aatinak wi’, xMônica? Chirix naq xook’anjelak sa’ mision, xoosumla.
Moko yal chi jo’kan ta naq tenq’anb’ilin chaq xb’aaneb’ li chaab’il amiiw, li k’anjelak sa’ li Iglees, ut li ch’olaniik xb’aan lix chaab’il aatin li Dios. Li Awa’b’ej Gordon B. Hinckley kixye: “Ch’a’aj li ok sa’ li Iglees a’in. Naraj naxye xkanab’ankil naab’al li na’leb’. Naraj naxye xkanab’ankil naab’al li qamiiw. Naraj naxye xkanab’ankil li xqapaab’ junxil. Maare naraj naxye xjalb’al li qab’aanuhom ut xk’ub’sinkil li rajom li qatz’ejwal. Wan naq a’an li junaatal, ut xxuwankil li ink’a’ nawb’il ru. Tento xch’olaninkileb’ ut xkawob’resinkileb’ li ak’ komon chiruheb’ li ch’a’ajkil kutan a’an” (“There Must Be Messengers,” Ensign, octubre 1987, 5).
Moqon kixye, “Chixjunileb’ neke’raj ru a’in: jun li amiiw, jun li k’anjel, ut li ch’olaniik xb’aan “lix chaab’il aatin li Dios” ” (“Los Conversos y Los Hombres Jóvenes,” Liahona, mayo 1997, 47).
K’a’ut naq xinyeheb’ li seraq’ a’in eere?
Xb’een, xinb’aanu choq’ reheb’ li yookeb’ chixnumsinkil a’in anajwan. Maare toje’ nakat-ok sa’ li Iglees, malaj toje’ xatsutq’i chaq, malaj maare nakaweek’a naq moko k’ulb’ilat ta. B’aanu usilal, maakanab’ xyalb’al aaq’e chi okenk qik’in. Aʼin lix tz’aqal Iglees li Jesukristo!
Aajel ru naq toj taayal aaq’e, choq’ re xsahil aach’ool ut choq’ re laa kolb’al. Tat-osob’tesiiq sa’ xjalb’al laa yu’am ut laa na’leb’. Li Qaawa’ naxnaw li ch’a’ajkilal nakak’ul. A’an naxnaw aawu. Nakatxra. Ninye aawe naq tixtaqlaheb’ li anjel re aatenq’ankil.
Sa’ tz’aqal li raatin, li Kolonel kixye: “Tinxik chiru lee rilob’aal. Tinwanq saʼ lee nim uqʼ ut saʼ lee tzʼe, ut lin Musiqʼ taawanq saʼ lee chʼool, ut ebʼ lin anjel chesutam, re eewaklesinkil” (Tzolʼlebʼ ut Sumwank 84:88).
Xkab’, xinye a’in choq’ re chixjunileb’ li komon re li Iglees—chiqajunilo. Chijultiko’q qe naq choq’ reheb’ li ak’ komon, li ani neke’sutq’i, ut eb’ li jalaneb’ xyu’ameb’, ch’a’aj xtawb’aleb’ xna’aj. Li Qaawa’ naxnaw lix ch’a’ajkilaleb’ ut junelik naxsik’eb’ li anjel li te’tenq’anq reheb’. Li Qaawa’ naxsik’eb’ li neke’raj k’anjelak jo’ anjel sa’ xyu’ameb’ li ras riitz’in.
Ex was wiitz’in, ma texwanq choq’ k’anjeleb’aal sa’ ruq’ li Qaawa’? Ma texk’anjelaq jo’ anjel? Ma textaqlaaq xb’aan li Dios re xtenq’ankil li ani yoo wi’ xk’a’uxl? Aajel eeru choq’ re li Dios. Aajel eeru choq’ reheb’.
Naqanaw naq eb’ li qamisioneer junelik neke’raj tenq’ank. A’aneb’ li xb’een li neke’wulak chi k’anjelak jo’ anjel. A’b’an toj neke’ajman xkomoneb’ chik.
Wi tex’iloq chesutam, teek’e reetal naab’aleb’ li neke’raj xtenq’ li anjel. Maare moko tiqto ta sa’ saqi kamiis malaj sa’ vestiiy. Maare chunchu xjunes toj najt chaq sa’ li kapiiy malaj tzoleb’aal, nareek’a naq maajun na’ilok re. Maare jalan li rismal malaj li raatin, a’b’an xwulak ut yoo chixyalb’al xq’e.
Wankeb’ li neke’xk’oxla, “Ma toj tinwulaq? Ma toj tinyal inq’e? Wankeb’ chik li neke’xpatz’ jo’q’e te’reek’a naq k’ulb’ileb’ ut raab’ileb’. Neke’ajman ru li anjel, anajwan; eb’ li anjel li te’xtenq’aheb’, us ta wan naq ch’a’aj; “[na’ajman li ani] tiik ut saq ru xch’ool, ut ka’ajwi’ naru xyeeb’al naq a’an jun li anjel” (Jeffrey R. Holland “El ministerio de ángeles,” 30).
Ex was wiitz’in, ninpaab’ naq wankeb’ li anjel. Chiqajunilo wanko arin anajwan, jun nimla teep chi anjel choq’ reheb’ li kutan a’in, xaqab’anb’il re k’anjelak chiru chixjunil jo’ k’anjeleb’aal sa’ ruq’ laj Yo’ob’tesinel. Wi wanq qach’ool chi tenq’ank, li Kolonel tooxtenq’a chi k’anjelak jo’ anjel. A’an naxnaw ani naraj xtenq’ li anjel, ut tixk’e sa’ li qab’e. Wulaj wulaj li Qaawa’ naxk’e li ani naraj xtenq’ li anjel sa’ li qab’e.
Ninb’antioxi re li Qaawa’ li k’iila anjel naxk’e a’an sa’ xb’ehil inyu’am. Aajeleb’ ru choq’ we. Ninb’antioxi ajwi’ lix evangelio li nokoxtenq’a chi jalaak ut chi chaab’ilo’k.
A’in jun evangelio re xraab’aleb’ ut rilb’aleb’ li qakomon. Sa’ xk’ab’a’ li Jesukristo, amen.