Jun ak’ wanjik

Ex was wiitz’in, ch’ina-useb’ li wiib’ kutan a’in re li jolomil ch’utub’aj-ib’! Yaal li xye li Elder Jeffrey R. Holland. Jo’ kixye, li aatinak, li tijok, ut li b’ichank xe’musiq’aak xb’aan li Qaawa’. Naweek’a inb’antioxihom chirix chixjunileb’ li xe’tz’aqon chi yalaq chan ru.

Sa’eb’ li ch’utam a’in, xinwan chek’oxlankil sa’ ink’a’uxl naq yookex chirab’inkil li ch’utub’aj-ib’. Xinpatz’ re li Qaawa’ naq tinixtenq’a chixtawb’al ru k’a’ru nekereek’a, k’a’ru nekek’oxla, malaj k’a’ru teeraj xtuqub’ankil. Xink’oxla k’a’ru naru tinye re xchoyb’al li ch’utub’aj-ib’ a’in, re tex’elq chi k’ojk’o eech’ool chirix li k’a’ru chalel, jo’ ninnaw naq li Qaawa’ taraj naq teereek’a.

Laa’o wanko sa’ jun chaq’al ru kutan, ilb’il chalen chaq najter xb’aaneb’ li profeet. A’in li kutan naq maajun musiq’ejil osob’tesihom taarame’q chiruheb’ li tiikeb’ xch’ool.¹ Us ta wan li ruchich’och’ chi choqinb’il,² li Qaawa’ naraj naq taqoyb’eni li kutan chalel “rik’in xsahil qach’ool.”³ Miqasach qametz’ew rik’in xk’oxlankileb’ li k’a’ru wanjenaq junxil. Lix ch’utub’ankil Israel yoo chi xik chi uub’ej. Li Qaawa’ Jesukristo naxb’eresi li k’a’ru yoo chi k’ulmank sa’ lix Iglees, ut li Iglees tixtaw lix choxahil jayalihom.

Li k’a’ru tento sa’ eeb’een laa’ex ut sa’ inb’een laa’in, a’an naq laa’o taqataw li choxahilal li naru taqak’ul. Sa’eb’ li kutan a’in, k’iila sut naqab’i resil jun li “ak’ wanjik”. Wi chi yaal teeraj ok sa’ jun li ak’ wanjik, nink’e eeb’oqb’al naq teesutq’esi lee ch’ool, lee k’a’uxl, ut lee raam rik’in li qaChoxahil Yuwa’, ut li Jesukristo, li Ralal. Chiwanq a’in choq’ lee ak’ wanjik.

Chex’ok sa’ lee ak’ wanjik rik’in xjalb’al eek’a’uxl wulaj wulaj. Chesik’ wank chi saq eeru eena’leb’, eeraatin, ut eeb’aanuhom. Chexk’anjelaq chiruheb’ lee ras eeriitz’in. Rajlal chiwanq sa’ eech’ool li junelik q’e kutan. Cheyal eeq’e sa’ lee b’oqb’al. Ut maak’a’ naxye ma wankeb’ eech’a’ajkilal, ex was wiitz’in, chexwanq sa’ li junjunq kutan re naq laa’ex kawresinb’ilex chixk’ulb’al li ani kiyo’ob’tesink eere.⁴

Xb’aan a’in naq wan li santil ochoch. Eb’ lix k’ojob’anb’il k’anjel ut lix sumwank li Qaawa’ nokohe’xkawresi choq’ re li junelik yu’am, a’an li q’axal nim re chixjunileb’ li rosob’tesihom li Dios.⁵ Jo’ laa’ex nekenaw, xb’aan li yajel COVID, x’ajman ru xtz’apb’al chixjunileb’ li santil ochoch chiru jarub’aq kutan. Chirix a’an xoo’ok chixteeb’aleb’ wi’chik chi timil ut chi tasal tasal. Sa’ li xkab’ tasal li okenaqeb’ wi’ naab’aleb’ li santil ochoch, k’iila mil chi sumal xe’tz’ape’ sa’ junajil, ut k’iila mil xe’xk’ul lix loq’laj tiqib’ankileb’ sa’eb’ li po a’in. Naqoyb’eni li kutan naq chixjunileb’ li komon sa’ li Iglees li k’ulub’ejeb’ te’ruuq wi’chik chi k’anjelak chiruheb’ lix xe’ tooneb’ ut chi loq’onink sa’ jun santil ochoch.

Anajwan, tinye resil waqib’eb’ li ak’ santil ochoch li te’kab’lamanq sa’eb’ li na’ajej a’in: Tarawa, Kiribati; Port Vila, Vanuatu; Lindon, Utah; Gran Ciudad de Guatemala, Guatemala; São Paulo Este, Brasil; ut Santa Cruz, Bolivia

Naq yooko chixkab’lankileb’ ut chixtuqub’ankileb’ li santil ochoch a’in, naqatz’aama naq li junjunq eere teekab’la eerib’ ut teetuqub’ eerib’ re naq eek’ulub’aq ok sa’ li santil ochoch.

Anajwan, ex was wiitz’in, nekexwosob’tesi rik’in lix tuqtuukilal li Qaawa’ Jesukristo. Lix tuqtuukilal a’an naxq’ax ru chixjunil lix nawomeb’ li winq.⁶ Nekexwosob’tesi re naq mas wi’chik teeraj xpaab’ankil ut texruuq chixpaab’ankileb’ lix chaq’rab’ li Dios. Ninyeechi’i eere naq wi nekeb’aanu, te’hoymanq li osob’tesihom sa’ eeb’een, jo’ xnimal chik lix kawil eech’ool, xnimal chik li na’leb’ k’utb’esinb’il cheru, xnimal chik li sahil wank sa’ lee rochoch, ut li sahil ch’oolejil, us ta sa’ xyi li ch’a’ajkilal.

Chooxik chi uub’ej sa’ komonil, re xtz’aqob’resinkil ru li qachoxahil taqlankil—a’an naq taqakawresi qib’ ut taqakawresi li ruchich’och’ choq’ re li xkab’ xk’ulunik li Qaawa’. Chi jo’ka’in nintz’aama, ut ninch’olob’ wi’chik naq nekexinra, sa’ lix loq’laj k’ab’a’ li Jesukristo, amen.