Kanaaqex chi jalb’il

Ex komon ixq, k’a’jo’ xsahil wank eerik’in.

K’oxlahomaq naq anihaq yoo chi xik sa’ li k’ayib’aal chixloq’b’al junaq k’a’aq re ru. Wi naab’al wi’chik li naxk’e qe chiru lix tz’aq, laj k’ay tixk’e li na’ela’an.

Li rey aj Benjamin kixk’ut chiru lix tenamit sa’ li najter America chirix xninqal li osob’tesiik naqak’ul rik’in li qaKolonel, li Jesukristo. A’an kixyo’ob’tesi li choxa, li ruchich’och’, ut chixjunil li k’a’ru xchaq’al ru naqil. ¹ Rik’in lix tojb’al rix li maak, naxk’e qe jun li b’e re naq tookole’q chiru li maak ut li kamk. ² Naq naqak’ut qab’antioxihom sa’ xyu’aminkil lix taqlahom, a’an nokorosob’tesi sa’ junpaat, ut nokoxkanab’ wi’chik sa’ k’as.

Mas naab’al wi’chik li naxk’e qe chiru li maare tooruuq chixq’ajsinkil re. Jo’kan ut, k’a’ru taqak’e re a’an, li kitojok re xnimal xtz’aq li qamaak? Naru naqak’e re li jalaak. Naru naqak’e re li qajalajik. Maare a’an xjalajik li qana’leb’, qab’aanuhom, malaj xjalajik li b’e naqak’am. Re xq’ajkamunkil, li Qaawa’ naxpatz’ naq taqajal qach’ool. Li jalaak li naxpatz’, moko choq’ re ta a’an, choq’ qe laa’o b’an. Li kristiaan li naloq’ok naxk’ul li na’ela’an wi taqak’e raj re, a’b’an li qaKolonel naxkanab’ choq’ qe li na’ela’an.

Chirix naq ke’rab’i li raatin li rey aj Benjamin, li tenamit ke’xye naq lix ch’ooleb’ ak xjala, ut ke’xye: “Xb’aan lix Musiq’ li Qaawa’ Q’axal Nim Xwankil, li xk’anjela jun li nimla jalok qe, … maak’a’ chik li qajom re xb’aanunkil li maa’usilal; re b’an xb’aanunkil rajlal li chaab’ilal.” ³ Li loq’laj hu ink’a’ naxye naq ke’tz’aqlok re ru sa’ junpaat; naxye b’an naq li rajomeb’ xch’ool kitenq’ank reheb’ chi ok chi jalaak. Lix jalajik lix ch’ooleb’ naraj naxye naq ke’xtz’eqtaana li ruchich’och’il winq ut ixq, ut ke’ok chixk’eeb’al rib’ chiru li Musiq’ej sa’ xyalb’aleb’ xq’e chi wulak mas wi’chik jo’ li Jesukristo.

Li Awa’b’ej Henry B. Eyring naxk’ut: “Li tz’aqal jalaak nachal rik’in li sik’ok rik’in paab’aal, rik’in yalok q’e, ut rik’in b’ayaq li rahilal. Chi jo’kan li Qaawa’ naxb’aanu li sachb’a-ch’oolejil saqob’resink ut jalok.” ⁴ Naq naqajunaji lix yalb’al qaq’e rik’in lix wankil li Kolonel re qajalb’al, na’ak’ob’resiik qayu’am.

Naq saajin chaq, kink’oxla naq tinb’eeq sa’ jun li b’e taqe’q ut tiik toj reetal tinwulaq sa’ li junelik yu’am. Rajlal sut naq kinb’aanu malaj kinye k’a’ruhaq ink’a’ us, kiweek’a naq ninjolk’ok chaq taq’a, re naq tintikib’ wi’chik taqe’k. Chanchan chik li t’ane’k sa’ lix b’atz’uuleb’ li kok’al, “Li k’anti’ ut li eeb’,” b’ar wi’ nakajukuki chaq aawib’ toj chi tzuul toj sa’ xtiklajik wi’chik li b’atz’unk! K’a’jo’ naq nalub’tesin! A’b’anan naq kin’ok chixtawb’al ru lix tzol’leb’ li Kristo ⁵ kixk’ut laj Nefi ut chan ru xk’anjelankil sa’ inyu’am wulaj wulaj, kintaw woyb’enihom.

Li Jesukristo ak xk’utum chiqu chan ru toojalaaq. Nokoxb’oq chixk’anjelankil li qapaab’aal chirix a’an, li nokoxmusiq’a chixjalb’al qak’a’uxl—“a’ paab’aal ut jalb’a-k’a’uxlej a’an naxk’am xjalajik li qaam.” ⁶ Naq naqajal qak’a’uxl ut naqasutq’isi qach’ool rik’in a’an, naniman li qajom chi ok sa’ loq’laj sumwank ut xyu’aminkileb’. Nokokuyuk toj sa’ roso’jik naq naqayu’amiheb’ li na’leb’ a’in ut naqab’oq li Qaawa’ chiqajalb’al. Li kuyuk toj sa’ roso’jik naraj naxye jalaak toj sa’ xraqik. Anajwan nintaw chik ru naq moko nintikib’ ta wi’chik taqe’k naq ninsach b’ayaq, rik’in b’an a’an, nikinxik chi uub’ej sa’ lin jalajik.

Wan jun xchaq’al ru na’leb’ sa’ li ch’ol aatin choq’ reheb’ li Saaj Ixq li naxye: “Nink’e xloq’al li maatan re li jalb’a-k’a’uxlej ut ninyal chaab’ilo’k rajal kutan.” ⁷ Lin tz’aam, a’an naq taqak’e xloq’al li xchaq’al ru maatan a’in ut naq taqasik’ li jalaak chi yalb’il qaq’e. Wan naq, li jalaak tento taqab’aanu, a’an xkanab’ankileb’ li ninqi maak. A’b’anan, wan ajwi’ naq naqayal qaq’e chixchaab’ilob’resinkil li qana’leb’ re naq jayalinb’ilaqo rik’ineb’ lix chaab’ilal li Jesukristo. Li k’a’ru naqasik’ ru xb’aanunkil wulaj wulaj tooxtenq’a malaj tooxram. Li kok’ jalok chi kok’ aj xsa’ tooxtenq’a chi chaab’ilo’k. Mich’inan eech’ool. Na’uxman li jalaak chiru chixjunil li qayu’am. Ninb’antioxi re li Qaawa’ naq wan xkuyum choq’ qe sa’ xyalb’al li qaq’e chi jalaak.

Li Jesukristo naxk’e qakawilal re jalaak chi junajwa. Naq yooqo chixsik’b’al a’an rik’in tuulanil, tixnimob’resi li qawankil re jalaak.

Wan ajwi’ lix wankil lix tojb’al rix li maak xb’aan li Kolonel, ut li Santil Musiq’ej tooxtenq’a ut tooxb’eresi sa’ xyalb’al qaq’e. Tooxtenq’a ajwi’ chixnawb’al k’a’ru li tento taqajal. Naru ajwi’ naqataw qatenq’ankil ut xkawil qach’ool sa’eb’ li osob’tesiik rik’in li tijonelil, li tijok, li kuyuk sa’, ut li wulak sa’ li santil ochoch.

Jo’kan ajwi’, eb’ li qajunkab’al, laj jolominel ut li qamiiw naru nokohe’xtenq’a sa’ xyalb’al qaq’e chi jalaak. Naq wan chaq we waqxaqib’ chihab’, li was ut laa’in nokob’atz’un chaq rik’ineb’ li qamiiw sa’ ru’uj jun li che’. Mas nawulak chiqu wank rik’ineb’ li qamiiw rub’el li che’ a’an. Sa’ jun kutan, laj Lee kit’ane’ chaq sa’ ru’uj li che’ ut kixtoq li ruq’. Chi toqol li ruq’, ch’a’aj chik chiru taqe’k sa’ ru’uj li che’. Ut moko sa ta chik nokowan sa’ ru’uj li che’. Jo’kan naq junjunq qe naqawaklesi chaq taq’a ut junjunqeb’ chik neke’xkelo rik’in li ruq’ moko toqol ta, ut chirix b’ab’ay qametz’ew, laj Lee nataqe’ wi’chik sa’ ru’uj li che’. Toj toqol li ruq’, a’b’an toj nokorochb’eeni ajwi’ chaq naq yoo chi k’iraak li ruq’.

Chi kok’ aj xsa’ nink’oxla naq li b’atz’unk naqab’aanu chaq sa’ ru’uj li che’ chanchan chik li k’anjel naqab’aanu sa’ lix evangelio li Jesukristo. Rub’el lix muhel li evangelio, naqak’ul naab’al li osob’tesiik xb’aaneb’ li qasumwank. Maare, junjunq neke’t’ane’ chaq sa’ ru’uj lix sumwank ut neke’raj ru li qatenq’ re naq te’taqe’q wi’chik sa’ xmuheb’aal li evangelio. Maare ch’a’aj li q’ajk choq’ reheb’ xjunes. Ma naru te’qatenq’a b’ayaq rik’in rahok ut te’qawaklesi b’ayaq re naq te’k’iraaq sa’ qayanq jo’ qamiiw qib’?

Wi ra wankex xb’aan lee t’anik, b’aanuhomaq usilal, k’ehomaq eerib’ chi tenq’aak chi q’ajk sa’eb’ li sumwank ut sa’eb’ li osob’tesiik neke’xk’e a’an eere. Li Kolonel naru nekexxk’irtesi ut nekexxjal naq sutsuukex xb’aaneb’ li ani neke’rahok eere.

Wan naq nawileb’ ru li wamiiw li junxil ink’a’ wilomeb’ ru. Wan naq neke’xye, “Ink’a’ nakatjala!” Rajlal naq nawab’i a’an, nikinxutaanak b’ayaq, xb’aan naq nawoyb’eni naq tinjalaaq b’ayaq rik’in xnumikeb’ li chihab’. Nawoyb’eni naq jalanin anajwan chiru ewer! Nawoyb’eni naq mas wi’chik inrahom, ink’a’ chik mas tinwech’inq, ut k’ihaq chik li wusilal. Nawoyb’eni naq mas seeb’aqin chik chixtenq’ankileb’ li was wiitz’in ut nawoyb’eni naq wanq chik b’ayaq inkuyum.

Nawulak chiwu b’eek sa’eb’ li tzuul li wankeb’ nach’ rik’in li wochoch. Wan naq, naq nikinb’eek sa’ li b’e, na’ok junaq li pek sa’ lin xaab’. Nikinxaqli ut nawisi li pek sa’ lin xaab’. A’b’an nink’e reetal naq naab’al li ninb’ehini rik’in li pek sa’ lin xaab’ naq maji’ ninxaqli chirisinkil.

Naq nokob’eek sa’ xb’ehil li sumwank, wan naq neke’ok li pek sa’ li qaxaab’, a’aneb’ li maare ink’a’ us naqab’aanu, li maak malaj, li yib’ aj na’leb’. Wi te’qisi a’an sa’ junpaat sa’ li qayu’am, sa chik toob’eeq sa’ li ruchich’och’.

Li kanaak chi jaljo naraj naq taqayal qaq’e. Moko nink’oxla ta xaqliik sa’ li b’e re xk’eeb’al wi’chik li pek sa’ lin xaab’ li nach’a’ajkob’resin ut narahob’tesin. Ink’a’ raj tinb’aanu a’an; jo’ naq jun xchaq’al ru peepem ink’a’ raj taaq’ajq sa’ li rix.

Ninch’olob’ xyaal naq sa’ xk’ab’a’ li Jesukristo naru toojalaaq. Naru naqatuqub’ ru li naqab’aanu, naru naqajal li qak’a’uxl, ut naru naqachaab’ilob’resi li qana’leb’ re naq toojuntaq’eeto’q rik’in a’an. Ut, rik’in lix tenq’, tooruuq chi kanaak chi jalb’il. Sa’ xk’ab’a’ li Jesukristo, amen.