Li wankilal li ink’a’ taalajq

Sa’ xtz’ilb’al rix li raatin li qaraarookil profeet, Awa’b’ej Russell M. Nelson , xintaw jun aatin li rajal naroksi. Li aatin, a’an wankilal.

Sa’ li jolomil ch’utub’aj-ib’ chirix naq kib’oqe’ choq’ apostol, li Awa’b’ej Nelson ki’aatinak chirix li wankilal.¹ Chiru xnumikeb’ li chihab’, toj nak’utuk chirix wankilal. Chalen chaq naq xqaxaqab’ xwankil li Awa’b’ej Nelson jo’ li qaprofeet, a’an nak’utuk chirix wankilal—a’ lix wankilal li Dios—ut chan ru naq taqak’ul. Kixk’ut chan ru naq taqoksi lix wankilal li Dios naq naqileb’ li qas qiitz’in,² chan ru naq li jalb’a-k’a’uxlej naxb’oq xwankilal li Jesukristo ut lix tojb’al rix li maak sa’ qayu’am,³ ut chan ru naq li tijonelil—lix wankilal li Dios—narosob’tesi chixjunileb’ li te’ok sa’ sumwank rik’in a’an.⁴ Li Awa’b’ej Nelson kixk’ut naq lix wankilal li Dios nak’eeman reheb’ chixjunileb’ li tiqb’ileb’ sa’ li santil ochoch naq neke’xpaab’ lix sumwank.⁵

Xtoch’e’ inch’ool xb’aan li raatin li Awa’b’ej Nelson sa’ li jolomil ch’utub’aj-ib’ re abril 2020. A’an kixye: “Tzolonqex ut tijonqex re teetzol xkomon chik chirix li wankilal ut li nawom li ak tiqib’anb’ilex wi’, malaj li toj textiqib’aaq wi’.”⁶

Re xb’aanunkil li kixye, laa’in xintzolok ut xintijok, ut chi jo’kan xintaw inna’leb’ chirix li wankilal ut li nawom li ak xintiqib’aak wi’—ut li toj tintiq’ib’aaq wi’ moqon.

Ch’a’aj xtawb’al ru li tento taqab’aanu re roksinkil lix wankilal li Dios sa’ qayu’am, a’b’an xink’e reetal naq naru xtawb’al ru rik’in xtz’ilb’al rix sa’ li qak’a’uxl ut xtz’aamankil naq li Santil Musiq’ej tixkutanob’resi li qana’leb’.⁷ Li Elder Richard G. Scott kixch’olob’ k’a’ru lix wankilal li Dios: a’an “li wankilal re taqab’aanu li ink’a’ naru qajunes qib’.”⁸

Aajel ru xnujob’resinkil qach’ool ut li qaam rik’in li raatin li Dios ut li paab’aal chirix li Jesukristo re tooruuq chixk’ulb’al lix wankilal li Dios re qatenq’ankil sa’ li ch’a’ajkil kutankil a’in. Chi maak’a’ li raatin li Dios ut li paab’aal chirix li Jesukristo sa’ qach’ool, maare taalajq lix nawom qach’ool ut li qapaab’aal, ut ink’a’ chik taawanq qik’in li wankilal naraj li Dios xk’eeb’al qe. Maak’a’ aj-e li paab’aal li yal pak’b’il. Ka’ajwi’ li paab’aal ut li raatin li Dios li k’ojob’anb’il sa’ li qaam naru tooxwaklesi—ut tooxkanab’ chixk’ulb’al lix wankilal a’an.

Naq li Hermana Johnson ut laa’in yooko chixk’iresinkileb’ li qakok’al, xqaye reheb’ naq te’xtzol li wajb’ak. A’b’an, ka’ajwi’ xqakanab’eb’ chixtzolb’al li wajb’ak wi te’xb’aanu practicar wulaj wulaj. Jun li sabado, li qarab’in, xJalynn, kiraj b’atz’unk rik’ineb’ li ramiiw, a’b’an maji’ naxtoch’ li piano. Ak naxnaw naq kixye naq tixb’aanu practicar chiru 30 k’asal, kiraj raj roksinkil jun li cronometro, xb’aan naq ink’a’ xraj xq’axb’al li hoonal ak xxaqab’.

Xxaqab’ rib’ chiru li microondas naq yoo chi xik toj sa’ li piano, ut xpitz’ junjunqeb’ li boton. A’b’an sa’ xna’aj xlochb’al li cronometro, xk’e li microondas chi k’uub’ank chiru 30 k’asal. Chirix xnumik 20 k’asal, xko’o wi’chik sa’ li cocina re rilb’al jarub’ chik k’asal tixb’aanu practicar ut xtaw naq xloch li xam sa’ li microondas.

X’el sa’ kab’l re intawb’al ut xjap re chixyeeb’al naq yoo chi k’atk li qochoch. Sa’ aanil xin’ok sa’ li kab’l ut xink’e reetal naq yoo chi k’atk li microondas.

Re xkolb’al li qochoch chiru li xam, xwisi lix cable li microondas, ut chi chapcho li cable sa’ wuq’ xintaqsi li microondas. Xwaj xkolb’al li qochoch, jo’kan naq xinkut li microondas chinsutam rik’in li cable re naq ink’a’ tinixk’at, toj reetal naq xinkut chirix kab’l. Aran xqachup li xam rik’in li ha’.

K’a’ru xk’ulman? Tento naq wan k’a’aq re ru chi sa’ li microondas re roksinkil lix wankilal, ut naq maak’a’ wan chi sa’, li microondas naroksi li wankilal a’an, natiqwo’, ut na’ok chi k’atk.⁹ Kiloch xxamlel li qamicroondas xb’aan naq maak’a’ wan chi sa’.

Chi jo’kan ajwi’, eb’ li wankeb’ xpaab’aal ut li raatin li Dios sa’ xch’ooleb’ te’ruuq chixk’ulb’al ut chi numtaak sa’ xb’een li lochlookil tzimaj li tixtaqla laj tza re qasachb’al.¹⁰ Wi ta ink’a’ chi jo’kan, maare te’lajq li qapaab’aal, li qayo’onihom, ut lix kawilal qach’ool, ut jo’ li microondas li maak’a’ wan chi sa’, toosache’q.

Xintzol naq wi wan li raatin li Dios chi sa’ li waam, rochb’een li paab’aal chirix li Jesukristo ut lix tojb’al rix li maak, naru tink’ul lix wankilal li Dios re tinnumtaaq sa’ xb’een laj tza ut yalaq k’a’ru tixyal xtaqlankil we. Naq naqak’ul li ch’a’ajkilal, naru taqapaab’ li raatin laj Pablo chirix lix yeechi’ihom li Qaawa’: “Moko li xiwak ta xqamaatani chaq rikʼin li Dios, aʼbʼan lix kawubʼ qachʼool, li rahok ut kuyuk-ibʼ.”¹¹

Sa’ xsaajilal, li Kolonel “yoo chi kʼiik ut chi kawuuk, nujenaq chi chaabʼil naʼlebʼ; ut li rusilal li Dios wank chixbʼeen.”¹² Naq yoo chi nimank, “li Jesus yoo chi k’iik rik’in xna’leb’ ut rik’in xteram, sa’ chaab’ilal chiru Dios ut chiruheb’ li winq.”¹³ Ut sa’ xtiklajik lix k’anjel, eb’ li ke’ab’ink re “ke’kana chi sachsookeb’ xch’ool rik’in lix k’utum, xb’aan naq na’aatinak rik’in wankilal.”¹⁴

B’antiox re lix kawresinkil rib’, li Jesus kiniman xwankilal ut kiru chi numtaak sa’ xb’een li aaleek xb’aan laj Satanas.¹⁵ Rik’in xtaaqenkil li Kolonel ut xkawresinkil qib’ sa’ xtzolb’al li raatin li Dios ut xkawob’resinkil li qapaab’aal, laa’o ajwi’ naru taqak’ul xwankilal li Dios re xtz’eqtaanankil li aaleek.

Chiru li hoonal a’in naq ramb’il chiqu xch’utub’ankil qib’ ut ok sa’ li santil ochoch, xink’e inch’ool chi tzolok chirix lix wankilal li Dios li nachal qik’in naq noko’ok sa’ ut naqapaab’ li sumwank re li santil ochoch. Jo’ naxye sa’ li tij re rosob’tesinkil li santil ochoch re Kirtland, noko’el chaq sa’ li santil ochoch chi kawresinb’il rik’in lix wankilal li Dios.¹⁶ Ink’a’ na’oso’ li wankilal naxk’e li Dios reheb’ li neke’ok sa’ sumwank rik’in sa’ li santil ochoch, ut moko ramb’il ta chiqu roksinkil li wankilal a’an sa’ xq’ehil jun nimla yajel. Lix wankilal malaj sa’ qayu’am ka’ajwi’ wi ink’a’ naqapaab’ li qasumwank ut wi naqab’aanu li k’a’ru narisi qak’ulub’il chixk’ulb’al.

Naq li wixaqil ut laa’in xqajolomi li mision re Tailandia, Laos, ut Myanmar, xqak’e reetal lix wankilal li Dios li nachal rik’ineb’ li neke’ok sa’ ut neke’xpaab’ li loq’laj sumwank sa’ li santil ochoch. B’antiox re li Fondo General de Ayuda para los Participantes del Templo, naab’aleb’ laj santil paab’anel sa’eb’ li tenamit a’in ke’ru chi wulak sa’ li santil ochoch chirix naq xe’xb’aanu li jo’k’ihal naru chiruheb’. Jultik we naq xink’ul jun ch’uut chi aj santil paab’anel aj Laos sa’ li aeropuerto aran Bangok, Tailandia, re naq tintenq’aheb’ wulak sa’ jalan chik li aeropuerto re te’xik sa’ Hong Kong. Jwal saheb’ xch’ool li komon a’in xb’aan naq xikeb’ re toj sa’ rochoch li Qaawa’.

Jalam-uuch

Eb’ li komon aran Laos

Naq xqak’uleb’ wi’chik sa’ xsutq’ijikeb’, xqak’e reetal li k’iik ut li wankilal xe’xk’ul naq xe’tiqib’aak sa’ li santil ochoch ut xe’ok sa’ sumwank rik’in li Dios. Relik chi yaal, eb’ laj santil paab’anel a’in xe’el chaq sa’ li santil ochoch “chi kawresinb’il rik’in lix wankilal.”¹⁷ Li wankilal re xb’aanunkil li ink’a’ naru te’xb’aanu xjunes rib’ kixkawob’resiheb’ chixk’ulb’al li ch’a’ajkilal re wank jo’ komon re li Iglees sa’ xtenamiteb’, ut chixjultikankil “li esil q’axal nim ru ut nim xloq’al, sa’ li yaal”¹⁸ naq yookeb’ chixkab’lankil li rawa’b’ejihom li Dios aran Laos.

Chiruheb’ li kutan a’in naq tz’apb’ileb’ li santil ochoch, ma yooko chixkanab’ankil qib’ chiru li qasumwank re li santil ochoch re naq k’ojob’anb’il tz’aqal xb’ehil li qayu’am? Xpaab’ankileb’ li qasumwank tixk’e qanawom chirix li taachalq sa’ qayu’am ut tooxtenq’a chixyalb’al qaq’e chixk’ulb’al chixjunil li naxyeechi’i li Qaawa’ wi tiikaqo chi paab’ank.

Nekexinb’oq chixsik’b’al li wankilal naraj li Dios xk’eeb’al eere. Ninch’olob’ xyaalal naq wi taqasik’ lix wankilal, taqak’ul qanawom chirix lix rahom li qaChoxahil Yuwa’ choq’ qe.

Ninch’olob’ xyaalal naq xb’aan lix rahom li qaChoxahil Yuwa’ choq’ qe, a’an kixtaqla li Ralal raaro xb’aan, li Jesukristo, re qakolb’al ut re xtojb’al qix. Ninch’olob’ xyaalal li Jesukristo, li wan anchal li wankilal rik’in,¹⁹ ut ninb’aanu sa’ xk’ab’a’ li Jesukristo, amen.