Rik’in lix wankil li Dios sa’ nimla loq’alil

Oxib’ chihab’ chirix li xb’een k’utb’esink, sa’ li 21 xb’e li po septiembre, 1823, li saaj aj Jose Smith kitijok re naq taakuye’q lix maak ut re naq tixnaw chan ru naq wan chiru li Dios.¹ Jun winq kik’utun chire lix ch’aat, kixb’oq laj Jose rik’in xk’ab’a’, ut kixye naq “a’an aj k’amol esil, taqlanb’il chaq chiru li Dios … ut naq aj Moroni xk’ab’a’.” A’an kixch’olob’ “naq li Dios wan jun li k’anjel tixk’e chixb’aanu”² laj Jose, toja’ naq kixk’e xna’leb’ chirix lix k’utunik lix Hu laj Mormon. Aajel ru naq lix Hu laj Mormon a’an jun reheb’ li xb’eenil na’leb’ ki’aatinak wi’ laj Mormon.

Lix Hu laj Mormon a’an jun chik ch’olob’anb’il esil chirix li Jesukristo ut jun nimla k’anjeleb’aal re jalok ch’oolej sa’ li kutankil a’in. Laa’o naqajultika li evangelio re xb’oqb’aleb’ chixjunil chi chalk rik’in li Jesukristo,³ chixk’ulb’al li rosob’tesihom li evangelio li k’ojob’anb’il wi’chik, ut chi kuyuk toj sa’ roso’jik rik’in li paab’aal chirix li Kolonel.⁴ Xtenq’ankileb’ li kristiaan re naq te’xk’anjela jun nimla jalaak sa’ xch’ooleb’⁵ ut te’xb’ak’ rib’ rik’in li Kolonel rik’ineb’ li santil sumwank ut k’ojob’anb’il k’anjel, a’an tz’aqal xch’oolil li xjultikankil li evangelio.

Li na’leb’ kixye laj Moroni re laj Jose Smith chirix lix Hu laj Mormon kixtikib’ li k’anjel re li kolb’a-ib’ ut li taqenaqil loq’al choq’ reheb’ li ani yo’yookeb’ sa’ lix k’ojlajik lix tz’aqalil ru li kutan.

Toja’ naq laj Moroni kixye re laj Jose raatinul lix hu laj Malakias sa’ li Najter Chaq’rab’, chi jalb’il b’ayaq ru rik’in li aatin li wan sa’eb’ li qaSantil Hu:

“Kʼehomaq reetal, tinkʼutbʼesi cheru li Tijonelil, rikʼin ruqʼ laj Elias li profeet, rubʼelaj lix kʼulunik li xnimal ru ut xuwajel xkutan li Qaawaʼ.

“… Ut aʼan taaraw saʼ xchʼoolebʼ li alal kʼajolbʼej li kʼaʼru yeechiʼinbʼil rehebʼ li yuwaʼbʼej, ut lix chʼoolebʼ li alal kʼajolbʼej teʼsutqʼiiq rikʼinebʼ lix yuwaʼ. Wi ta inkʼaʼ joʼkan, chixjunil li ruchichʼochʼ taasachmanq raj chi junajwa saʼ lix kʼulunik.”⁶

Naqakab’laheb’ li santil ochoch re naq te’wanq li santil na’ajej b’ar wi’ li santil sumwank ut k’ojob’anb’il k’anjel li ajb’il ru choq’ re lix kolb’aleb’ chixjunil li winqilal, naru te’b’aanumanq choq’ reheb’ li yo’yo jo’eb’ ajwi’ li kamenaq. Li na’leb’ kixye laj Moroni re laj Jose Smith chirix lix k’anjel laj Elias ut lix wankilal li tijonelil kixnimob’resi li k’anjel re li kolb’a-ib’ ut li taqenaqil loq’al choq’ reheb’ li ani yo’yookeb’ ut kixtikib’ sa’ li qakutankil li k’anjel choq’ reheb’ li ani kamenaq.

Chi jo’kan, li raatin laj Moroni sa’ li septiembre re 1823 chirix lix Hu laj Mormon ut lix k’anjel laj Elias ki’ok choq’ xk’ojleb’aal li k’anjel re li kolb’a-ib’ ut li taqenaqil loq’al choq’ reheb’ li yo’yookeb’ jo’eb’ ajwi’ li kamenaq.

Li na’leb’ li kixtzol laj Jose rik’in laj Moroni na’ilman sa’ chixjunil li k’anjel kixb’aanu. Sa’ jun ch’utlajik re tiik ruhil k’a’uxlej sa’ li santil ochoch re Kirtland sa’ 6 abril, 1837, li Profeet kixye: “Chirix chixjunil li ak xyeeman, li qateneb’ankil q’axal nim ut aajel ru, a’an xjultikankil li evangelio.”⁷

Wuqub’ chihab’ chirix a’in, sa’ li 7 abril, 1844, laj Jose Smith kixye li nawb’il ru anajwan jo’ li aatin King Follett. A’an kixye, “Li qateneb’ankil q’axal nim kixk’e li Dios, a’an naq taqasik’eb’ li qakomon kamenaq.”⁸

Chan ru naq sa’ wiib’al li xjultikankil li evangelio ut li xsik’b’aleb’ li qakomon kamenaq a’aneb’ li teneb’ank q’axal nim k’eeb’il sa’ qab’een xb’aan li Dios? Nink’oxla naq li profeet aj Jose Smith kiraj xyeeb’al sa’ xkab’ichal li raatin naq eb’ li sumwank, li noko’ok’ wi’ rik’ineb’ li k’ojob’anb’il k’anjel re li tijonelil, naru toohe’xb’ak’ rik’in li Qaawa’ Jesukristo ut tz’aqal aajeleb’ ru sa’ li k’anjel re li kolb’a-ib’ ut li taqenaqil loq’al choq’ reheb’ li yo’yookeb’ ut li kamenaqeb’.

Li k’anjel re xjultikankil li evangelio ut li k’anjel re li santil ochoch ut li junkab’al neke’xk’am rib’ sa’ jun ajwi’ li nimla k’anjel li jayalinb’il sa’eb’ li santil sumwank ut k’ojob’anb’il k’anjel li nokohe’xtenq’a chixk’ulb’al li wankilal re choxahilal sa’ li qayu’am, ut chi sutq’iik rik’in li qaChoxahil Yuwa’ sa’ roso’jik. Chi jo’kan, us ta chanchan naq neke’xka’pak’ali rib’ li wiib’ chi aatin kixye li Profeet, relik chi yaal naq neke’xk’ut k’a’ru xch’oolil li nimla k’anjel a’in sa’ roso’jikeb’ li kutan.

Li Kolonel kixye:

“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.

“Xb’aan naq moko ra ta lin iiqleb’, ut li nink’e cheriiqani moko aal ta.”⁹

Naqak’ul li riiqleb’ li Kolonel sa’ qab’een naq nokotzolok chirix, naqak’ul chi k’ulub’ejo, ut naqoxloq’iheb’ li santil sumwank ut k’ojob’anb’il k’anjel. Nokob’ak’e’ rik’in li Kolonel naq neke’jultiko’ qe ut naqayu’amiheb’ li teneb’anb’il k’anjel xe’qasik’ ru xk’ulb’al. Ut li wank chi b’ak’b’o rik’in a’an naxk’e qamusiq’ejil kawilal chiru chixjunil li qayu’am.

Nekexinb’oq chixk’oxlankil li yeechi’inb’il reheb’ lix tzolom li Jesukristo li neke’xpaab’eb’ lix sumwank. Laj Nefi, “kixk’e reetal lix iglees lix Karneer li Dios [sa’ roso’jikeb’ li kutan], ut moko k’i ta rajlankileb’, … eb’ laj santil paab’anel re li Dios, wankeb’ ajwi’ chiru chixjunil lix b’een li ch’och’; ut ka’ch’in li neke’awa’b’ejin wi’.”¹⁰

A’an ajwi’ “kixk’e reetal lix wankilal lix Karneer li Dios, naq kikub’e sa’ xb’eeneb’ laj santil paab’anel sa’ lix iglees li Karneer, ut sa’ xb’een lix tenamit li Qaawa’ re li sumwank, … ut eb’ a’an ke’wan chi kawresinb’il rik’in tiikilal, ut rik’in lix wankil li Dios sa’ nimla loq’alil.”¹¹

Li aatin “kawresinb’il rik’in tiikilal, ut rik’in lix wankil li Dios sa’ nimla loq’alil” maawa’ ka’ajwi’ jun ch’ina-usil na’leb’ malaj utz’u’ujinb’il aatin re li loq’laj hu. Li osob’tesiik a’in na’ilman b’an chi saqen ru sa’ xyu’ameb’ lix k’iila tzolom li Qaawa’ sa’ li kutankil a’in.

Lin k’anjel jo’ komon sa’ lix molameb’ li Kab’laju nikinxk’am chiru chixjunil li ruchich’och’. Osob’tesinb’ilin chixnawb’al eeru ut chixtawb’al inna’leb’ eerik’in. Ninch’olob’ xyaalal naq lix tenamit li Qaawa’ re li sumwank sa’ li kutan a’in kawresinb’ileb’ rik’in tiikilal ut rik’in lix wankil li Dios sa’ nimla loq’alil. Ak xink’e reetal li paab’aal, xkawilal li ch’oolej, li kuyuk, ut li sahil ch’oolejil li neke’xq’ax ru xwankil li ruchich’och’—ut li ka’ajwi’ naru tixk’e li Dios.

Ak xink’e reetal lix tiikilal ut lix wankil li Dios sa’ nimla loq’alil chi k’eeb’il rik’in xpaab’ankileb’ li sumwank ut k’ojob’anb’il k’anjel sa’ xyu’am jun saaj aj komon re li Iglees li xkana chi sik xmaak jun toch’e’k sa’ li b’eleb’aal ch’iich’. Chirix k’iila po chi k’iraak ut chixtzolb’al lix ak’ wanjik jo’ aj sik, xinnaw ru ut xin’aatinak rik’in li chaab’il saaj a’in. Naq yooko chi aatinak, xinpatz’ re, “K’a’ru xatzol rik’in li xak’ul.” Kichaq’ok sa’ junpaat, kixye, “Moko ra ta inch’ool. Moko josq’in ta. Us taa’elq chixjunil.”

Xink’e reetal lix tiikilal ut lix wankil li Dios sa’ nimla loq’alil chi k’eeb’il rik’in xpaab’ankileb’ li sumwank ut k’ojob’anb’il k’anjel sa’ xyu’ameb’ li toje’ ke’kub’e xha’ ut ke’k’ojob’aak jo’ komon sa’ li Iglees. Eb’ li ak’ komon a’an ke’wan xch’ool chi tzolok ut chi tenq’ank, us ta maji’ neke’xnaw chan ru xkanab’ankileb’ li na’leb’ ke’xpaab’ junxil, a’ut toj saheb’ xch’ool chi ok jo’ “rech tenamitileb’ laj santil paab’anel, … sa’ rochoch li Dios.”¹²

Xink’e reetal lix tiikilal ut lix wankil li Dios sa’ nimla loq’alil chi k’eeb’il rik’in xpaab’ankileb’ li sumwank ut k’ojob’anb’il k’anjel sa’ xyu’am jun junkab’al li ke’xch’olani jun reheb’ li yuwa’b’ej li yaj ut kamk re. Eb’ li tiikil tzolom a’in ke’xch’olob’ naq ke’wan hoonal ke’reek’a naq xjuneseb’ wankeb’—a’ut wan naq ke’xk’e reetal naq li ruq’ li Qaawa’ yoo chixwaklesinkileb’ ut chixkawob’resinkileb’. Li junkab’al a’in ke’xb’antoxi naq li ch’a’ajkilal nokoxtenq’a chi k’iik ut chi wulak jo’ li qaChoxahil Yuwa’ ut li qaKolonel Jesukristo. Li Dios kixtenq’a li junkab’al a’in rik’in li Santil Musiq’ej ut kixsantob’resi li rochoch choq’ muheb’aal jo’ chanru li santil ochoch.

Xink’e reetal lix tiikilal ut lix wankil li Dios sa’ nimla loq’alil chi k’eeb’il rik’in xpaab’ankileb’ li sumwank ut k’ojob’anb’il k’anjel re jun komon li kiraho’ xch’ool xb’aan xraqik lix sumlajik. K’a’jo’ xrahilal li ixq a’in sa’ musiq’ej ut sa’ reek’ob’aal xb’aan naq moko tiik ta xb’aanuhom lix b’eelom naq kixmux lix sumwank ut lix sumlajik. A’an kiraj naq taaraqe’q aatin chirix.

Naq li tiikil ixq a’in yoo chi ch’a’ajko’k xb’aan chixjunil li xk’ul, kixtz’il ut kixk’oxla rix lix tojb’al rix li maak xb’aan li Kolonel jo’ maajun wa xb’aanuhom chaq sa’ xyu’am. Chi timil timil, kinaq sa’ raam xnawom chirix lix k’anjel li Kolonel re xtojb’al qix—naq kixk’ul rahilal xb’aan li qamaak, ut li qarahilal, ut lix q’unal qametz’ew, ut lix rahil qach’ool. Kimusiq’aak chixpatz’b’al rib’: ak tojb’il xtz’aqeb’ li maak a’an, ma taawaj naq wiib’aq sut taatoje’q xtz’aq? Kixk’e reetal naq moko tiikaq ta chi moko aj uxtaanaq ta li na’leb’ a’an.

Li ixq a’in kixtaw naq xb’ak’b’al rib’ rik’in li Kolonel rik’ineb’ li sumwank ut li k’ojob’anb’il k’anjel naru tixk’irtesi li rahilal xb’aan lix maa’usil b’aanuhom jalan chik li kristiaan, ut a’in kixtenq’a chixkuyb’al xmaak ut chixk’ulb’al li tuqtuukilal, li uxtaan, ut li rahok.

Eb’ lix yeechi’ihom ut rosob’tesihom li sumwank neke’chal ka’ajwi’ b’antiox re li qaKolonel Jesukristo. A’an nokoxb’oq chi ilok wan wi’ a’an,¹³ chi chalk rik’in,¹⁴ chi tzolok chirix,¹⁵ ut chixb’ak’b’al qib’ rik’in a’an¹⁶ rik’ineb’ li sumwank ut k’ojob’anb’il k’anjel re lix evangelio li k’ojob’anb’il wi’chik. Ninch’olob’ xyaalal naq roxloq’inkil li qasumwank nokoxkawresi rik’in tiikilal ut lix wankil li Dios sa’ nimla loq’alil. Ut ninch’olob’ xyaalal naq li yo’yookil Qaawa’ Jesukristo a’an li qaKolonel. Chi sa inch’ool ninch’olob’eb’ xyaalal eere li na’leb’ a’in, sa’ lix loq’laj k’ab’a’ li Jesukristo, amen.