උන්වහන්සේගේ පියාපත් තුල සුවයත් සමඟ උන්වහන්සේ මරණයෙන් නැවත නැගිට ඇත:

දිවි ගලවා ගැනීමේ කතන්දර ගැන අපි හැමෝම කුතුහලයෙන් සිටිනවා. සියලු දුෂ්කරතා සහ අපේක්ෂාවන්ට එරෙහිව ජීවතුන් අතර සිටීමට සමත් වන, නොබිය ගවේෂකයන්ගේ සහ එලෙසින්ම සාමාන්‍ය මිනිසුන්ගේ කතන්දර අපට අසන්නට ලැබෙන විට, “මට එය කරන්න පුලුවන්ද?” යනුවෙන් අපගෙන්ම ප්‍රශ්න කරන්නේ නැතුව ඉන්න බැරි වෙනවා.

ඇන්ටාක්ටික් අයිස්වල නැව මුහුදුබත් වී වසර දෙකකට ආසන්න කාලයක් නිසරු දූපතක අතරමං වූ බ්‍රිතාන්‍ය ගවේෂක අර්නස්ට් ෂැකල්ටන් සහ ඔහුගේ HMS එන්ඩියුරන්ස් නෞකාවේ කාර්ය මණ්ඩලය ගැන මට මතක්වෙනවා. දරුණුතම කොන්දේසි තිබියදීත්, ෂැකල්ටන්ගේ අසාමාන්‍ය නායකත්වය සහ නොසැලෙන අධිෂ්ඨානය ඔහුගේ මිනිසුන්ගේ ජීවිත බේරාගත්තා.

එවිට මට සිතෙන්නේ ඇපලෝ 13 යානයේ කාර්ය මණ්ඩලය සඳ මතට ගොඩබෑම සඳහා අභ්‍යවකාශය හරහා යාම ගැන! නමුත් ඔක්සිජන් ටැංකියක් පුපුරා යාමෙන් ව්‍යසනයක් සිදු වූ අතර, මෙහෙයුම නතර කිරීමට සිදුවුණා. ඔක්සිජන් හිඟය, කාර්ය මණ්ඩලය සහ මෙහෙයුම් පාලනය දක්ෂ ලෙස ක්‍රියාත්මක වී ගගනගාමීන් තිදෙනාවම ආරක්ෂිතව නැවත පෘථිවියට ගෙන ආවා.

මම පුදුම වෙන්නේ යුද්ධයෙන් විපතට පත්වූ, කඳවුරු වල සිරවී සිටින, සහ සරණාගතයන් බවට පත්වූ, වීරත්වයෙන් සහ ධෛර්ය සම්පන්නව සෙසු දුක්විඳින අයගේ බලාපොරොත්තුවේ ගිනිදැල් සජීවීව තබාගන්නා, ම්ලේච්ඡත්වය හමුවේ යහපත සලසන, සහ තවත් එක් දිනක් පමණක් විඳදරාගැනීමට අන් අයට උපකාර කිරීමට කළමනාකරණය කරගන්නා, පුද්ගලයන්ගේ සහ පවුල්වල විශ්මයජනක පැවැත්ම ගැනයි.

ඔබට හෝ මට මෙම උපරිම තත්වයන්ගෙන් එකක බේරිලා ජීවත් වෙන්න පුළුවන්ද?

කෙසේවෙතත්, සමහරවිට ඔබගෙන් සමහර අය දිවි ගලවා ගත් අයගේ වාර්තා සලකා බලන විට, අපයෝජනය, නොසලකා හැරීම, හිරිහැර කිරීම, ගෘහස්ථ ප්‍රචණ්ඩත්වය, හෝ මේ ආකාරයේ දුක් විඳීමට ගොදුරු වූවෙකු ලෙස ඔබ දැන් දිවි ගලවා ගැනීමේ කතාවක ජීවත් වන බවට ඔබේ ආත්මය කෑගසනවා වෙන්න පුළුවන්. ඔබ සිටින්නේ විනාශකාරී නැව් අනතුරක් හෝ පොරොන්දු වූ මෙහෙයුමක් හදිසියේ නවතා දැමීමක් ලෙස හැඟෙන තත්වයකින් බේරීමට ඔබේම මංමුලා සහගත උත්සාහය මධ්‍යයේ වෙන්නට පුළුවන්. ඔබ කවදා හෝ ගැලවේවිද; ඔබ එය ඔබේම දිවි ගලවා ගැනීමේ කතාව හරහා කරයිද?

පිළිතුර ඔව්. ඔබට බේරෙන්න පුළුවන්. ඇත්තවශයෙන්ම ඔබව දැනටමත් බේරාගෙන තිබෙනවා; ඔබ විඳිමින් සිටින වධ වේදනා සහ ඔබ විඳදරාගන්නා වේදනාව විඳදරාගත් තැනැත්තා විසින්—ඔබව දැනටමත් ගලවාගෙන තිබෙනවා.¹ යේසුස් වහන්සේ මේ ලෝකයේ අපයෝජනයන්² ජයගෙන ඇත්තේ ඔබට දිවි ගලවා ගැනීමට පමණක්ම නොවේ, නමුත් යම් දිනක, උන්වහන්සේ තුළින්, ජයගැනීමට සහ විජයග්‍රහණය කිරීමටත්—වේදනාවෙන්, දුක්ඛිතයෙන්, සන්තාපයෙන්, සම්පූර්ණයෙන්ම නැගී සිටීමට සහ ඒවා සාමය සමඟ ප්‍රතිස්ථාපනය වීම දැකීමත් සඳහායි.

ප්‍රේරිත පාවුල් මෙසේ අසනවා.

“ක්‍රිස්තුස්වහන්සේගේ ප්‍රේමයෙන් අපව වෙන්කරන්නේ කවුද? විපතවත්, සිත් වේදනාවවත්, පීඩාවවත්, දුර්භික්ෂයවත්, නිර්වස්ත්‍රකමවත්, උපද්‍රවයවත්, කඩුවවත් අප වෙන්කරන්නේද? …

“නුමුත් අපට ප්‍රේම කළාවූ තැනැන්වහන්සේ කරණකොටගෙන අපි මේ සියල්ලේදී අතිශයින්ම ජයගන්නෝ වමුව.”³

සභාපති රසල් එම්. නෙල්සන් ප්‍රධාන සම්මන්ත්‍රණයකදී පහත ආරාධනය කළ ආකාරය ඔබට මතක ඇති. ඔහු මෙහෙම කිව්වා: “ඔබ ඔබේ ශුද්ධලියවිලි අධ්‍යයනය කරන විට … , ගිවිසුම් ලත් ඊශ්‍රායෙලය වෙනුවෙන් කරන බවට ස්වාමින්වහන්සේ පොරොන්දු වී ඇති සියල්ල ලැයිස්තුවක් සෑදීමට මම ඔබව දිරිමත් කරනවා. ඔබ මවිතයට පත්වනු ඇතැයි මම සිතනවා!”⁴

මෙන්න අපේ පවුල සොයාගෙන ඇති බලවත් සහ සැනසිලිදායක පොරොන්දු කිහිපයක්. ස්වාමින්වහන්සේ මෙම වචන ඔබට—බේරී සිටින ඔබට—ඒවා ඔබ වෙනුවෙන් වන නිසා කතා කරන බව සිතන්න.

බිය නොවන්න.⁵

මම ඔබේ දුක දනිමි, මම ඔබ මුදාගැනීමට පැමිණියෙමි.⁶

මම ඔබව අත්නොහරින්නෙමි.⁷

මාගේ නාමය ඔබ මත වන අතර මාගේ දේවදූතයන් ඔබ කෙරෙහි භාරව සිටිති.⁸

මම ඔබ අතරේ ප්‍රාතිහාර්යයන් කරන්නෙමි.⁹

මා සමඟ ඇවිදින්න; මා ගැන ඉගෙනගන්න; මම ඔබට සහනය දෙන්නෙමි.¹⁰

මම ඔබ අතරේ සිටිමි.¹¹

ඔබ මාගේය.¹²

ඒ සහතික බොහෝ සේ හිතේ තියාගෙන, අනෙක් අයගේ කුරිරු ක්‍රියා නිසා ඇතිවූ කම්පනය නිසා තමන්ගේ ගැලවීමේ කතාවෙන් ගැලවෙන්න විදියක් නෑ වගේ දැනෙන අයට කෙලින්ම කතා කරන්න මට අවශ්‍යයි. මෙය ඔබේ දිවි ගලවා ගැනීමේ කතාව නම්, අපි ඔබ සමඟ ශෝක වෙනවා. ඔබ ව්‍යාකූලත්වය, ලැජ්ජාව, සහ බිය ජයගන්නවාට අපි ආශා කරන අතර, යේසුස් ක්‍රිස්තුස්වහන්සේ තුළින් ඔබ විජයග්‍රහණය කරන තෙක් අපි ආශාවෙන් බලා සිටිනවා.

ඔබ යම් ආකාරයක අපයෝජනයකට, ප්‍රචණ්ඩත්වයකට, හෝ පීඩනයකට මුහුණ දී ඇත්නම්, මෙම සිදුවීම් කෙසේ හෝ ඔබේ වරදක් බවත්, ඔබට හැඟෙන ලැජ්ජාව සහ වරදකාරී හැඟීම රැගෙන යාමට ඔබ සුදුසු බවත් යන අදහස ඔබට ඉතිරි විය හැකියි. ඔබට මෙවැනි සිතුවිලි තිබෙන්නට ඇති:

• මට මේක වළක්වන්න තිබුණා.

• දෙවියන්වහන්සේ මට තවදුරටත් ප්‍රේම කරන්නේ නෑ.

• කිසිවෙක් මට කවදාවත් ආදරේ කරන එකක් නෑ.

• අලුත්වැඩියා කළ නොහැකි ලෙස මට හානි වෙලා.

• ගැලවුම්කරුවාණන්ගේ වන්දිගෙවීම අනෙක් අයට අදාළයි නමුත් මට එහෙම නෑ.

මෙම වැරදි සිතුවිලි සහ හැඟීම් පවුලේ අය, මිතුරන්, නායකයින්, හෝ වෘත්තිකයන්ගෙන් උපකාර ලබාගැනීමට බාධාවක් විය හැකි අතර, එබැවින් ඔබ තනිවම අරගල කරයි. ඔබ විශ්වාස කරන අයගෙන් උපකාර පැතුවේ නම්, ඔබ තවමත් ලැජ්ජාව සහ ස්වයං-පිළිකුල පිළිබඳ අදහස් සමඟ පොරබදමින් සිටිය හැකියි. මෙම සිදුවීම් වල බලපෑම වසර ගණනාවක් පැවතිය හැකියි. යම් දිනක ඔබට හොඳක් දැනෙනු ඇතැයි ඔබ බලාපොරොත්තු වන නමුත් කෙසේ හෝ එම දිනය තවම පැමිණ නැති වෙන්න පුළුවන්.

එම අපයෝජනය කරන්නා හෝ වෙනත් අය ඊට පටහැනිව කුමක් පැවසුවද, අපයෝජනය ඔබගේ වරදක් නොවේ, එය එසේ නොවේ, සහ කිසිදාක එසේ නොවේ. ඔබ කෲරත්වයට, ව්‍යාභිචාරයට, හෝ වෙනත් ඕනෑම ආකාරයක විකෘතියකට ගොදුරු වූ විට, පසුතැවිලි වීමට අවශ්‍ය වන්නේ ඔබ නොවේ; ඔබ එයට වගකිව යුතු නෑ.

ඔබ මනුෂ්‍යයෙකු ලෙස හෝ දෙවියන්වහන්සේගේ දුවක් හෝ පුත්‍රයෙකු ලෙස වෙනත් කෙනෙකු ඔබට කළ දේ නිසා ඔබට අඩු සුදුසුකමක් හෝ අඩු වටිනාකමක් හෝ අඩු ආදරයක් හිමිවන්නේ නෑ.

දෙවියන්වහන්සේ දැන්වත්, කිසිදාකවත් ඔබව හෙළා දැකිය යුතු කෙනෙකු ලෙස දකින්නේ නෑ. ඔබට කුමක් සිදුවුවද, උන්වහන්සේ ඔබ ගැන ලැජ්ජා වන්නේ හෝ කලකිරෙන්නේ හෝ නෑ. උන්වහන්සේ ඔබට ආදරය කරන්නේ ඔබ තවමත් සොයාගෙන නැති ආකාරයටයි. ඔබ උන්වහන්සේගේ පොරොන්දු කෙරෙහි විශ්වාස කරන විට සහ ඔබ “[උන්වහන්සේගේ] ඉදිරියේ වටිනවා” යැයි උන්වහන්සේ පවසන විට ඔබ උන්වහන්සේව විශ්වාස කිරීමට ඉගෙනගන්නා විට ඔබ එය සොයාගනියි.¹³

ඔබට සිදුවී ඇති මෙම භයානක දේවලින් ඔබව නිර්වචනය වෙන්නේ නෑ. ඔබව, මහිමාන්විත සත්‍ය අනුව, ඔබගේ මැවුම්කරුවාණන්ගේ පරිපූර්ණ, අසීමිත ආදරය සහ පරිපූර්ණ වීමට සහ සම්පූර්ණ සුවය සඳහා වන ආරාධනය මගින්, දෙවියන්වහන්සේගේ පුත්‍රයෙකු හෝ දියණියක ලෙස ඔබගේ සදාකාලිකව පවතින අනන්‍යතාවයෙන් නිර්වචනය කර තිබෙනවා.

එය කළ නොහැකි දෙයක් ලෙස පෙනුණත්, කළ නොහැකි දෙයක් ලෙස හැඟුණත්, සුවය ලැබිය හැක්කේ “ස්වකීය පියාපත්වල සුවකිරීම ඇතුව”¹⁴ මරණයෙන් නැවත නැගිටි යේසුස් ක්‍රිස්තුස්වහන්සේගේ වන්දිගෙවීමේ මිදීමේ බලයේ ආශ්චර්යය හරහායි.

අන්ධකාරයෙන් හා දුෂ්චරිතයෙන් ජයගත්, අපගේ දයාවන්ත ගැලවුම්කරුවාණන්ට සියලු වැරදි නිවැරදි කිරීමට බලය තිබෙනවා, එය අන් අය විසින් වැරදි සිදුවූ අයට ජීවනදායක සත්‍යයක්.¹⁵

ඔබට සිදුවී ඇති දේ කෙරෙහි පවා, ගැලවුම්කරුවාණන් සෑම දෙයකටම වඩා පහළට බැස ඇති බව කරුණාකර දැනගන්න. ඒ නිසා, සැබෑ භීෂණය සහ ලැජ්ජාව කෙබඳුද යන්නත්, අත්හැරීම හා බිඳී යාමේ හැඟීම කුමක්ද යන්නත් උන්වහන්සේ හොඳින් දන්නවා.¹⁶ උන්වහන්සේගේ වන්දිගෙවීමේ දුක්විඳීමේ ගැඹුර තුළින්, සදහටම නැතිවූවා යැයි ඔබ සිතන බලාපොරොත්තුව, ඔබට කෙදිනකවත් ලබාගැනීමට නොහැකි යැයි සිතූ ශක්තිය, ඒවගේම ඔබට සිතාගත නොහැකි සුවය ගැලවුම්කරුවාණන් ලබාදෙනවා.

කායික, ලිංගික, චිත්තවේගීය, හෝ වාචික ආකාරයෙන්—කිසිඳු ආකාරයක හිංසනයකට—ඕනෑම නිවසක, ඕනෑම රටක, හෝ ඕනෑම සංස්කෘතියක තැනක් නෑ. බිරිඳක්, හෝ දරුවෙක්, හෝ ස්වාමිපුරුෂයෙක් කළ හැකි හෝ කියන කිසිවකින් ඔවුන් පහර ලැබීමට “සුදුසු” වන්නේ නෑ. කිසිවකු, කිසිම රටක හෝ සංස්කෘතියක, වෙනත් බලධාරියෙකුගෙන් හෝ වඩා විශාල හා ශක්තිමත් කෙනෙකුගෙන් ආක්‍රමණයක් හෝ ප්‍රචණ්ඩත්වයක් කිසිවිටක “ඉල්ලන්නේ” නෑ.

අපයෝජනය කරන සහ තම දරුණු පාපයන් සැඟවීමට උත්සාහ කරන අය ටික කලකට එයින් සැඟවී සිටියි. නමුත් සියල්ල දකින ස්වාමින්වහන්සේ හදවතේ ක්‍රියාවන් සහ සිතුවිලි සහ චේතනා දන්නවා.¹⁷ උන්වහන්සේ යුක්තියේ දෙවි කෙනෙක් වන අතර, උන්වහන්සේගේ දිව්‍ය යුක්තිය ඉටුවෙනවා.¹⁸

ආශ්චර්යමත් ලෙස, ස්වාමින්වහන්සේ සැබෑ ලෙස පසුතැවිලි වූවන්ට දයාවේ දෙවියන්වහන්සේද වෙනවා. වරෙක අපයෝජනයට ලක්වූවන් ඇතුළුව—අපයෝජකයන්ට—පාපොච්චාරණය කර, තම පාපය අත්හැර, වන්දිගෙවීමට සහ එය නිවැරදි කිරීමට හැකි සෑම දෙයක්ම කරන ඔවුන්ට, ක්‍රිස්තුස්වහන්සේගේ වන්දිගෙවීමේ ප්‍රාතිහාර්යය තුළින් සමාව සඳහා ප්‍රවේශය තිබෙනවා.

බොරුවට චෝදනා ලැබූ අයට, මෙම චෝදනා වල විස්තර කළ නොහැකි බර එල්ල වී, අසාධාරණව දඬුවම් ලැබෙනවා. නමුත් ඔවුන් වෙනුවෙන් ගැලවුම්කරුවාණන්ගේ දුක්ඛිත දුක්වේදනා සහ අවසානයේ සත්‍යය ජයගන්නා බව දැනගැනීමෙන් ඔවුන්ද ආශිර්වාද ලබනවා.

නමුත් පසුතැවිලි නොවන අපයෝජකයින් ඔවුන්ගේ දරුණු අපරාධ වලට ගණන් දීමට ස්වාමින්වහන්සේ ඉදිරියෙහි පෙනීසිටියි.

ඕනෑම ආකාරයක අපයෝජනයක් හෙළාදැකීම පිළිබඳ ස්වාමින්වහන්සේ ඉතා පැහැදිලියි: “නුමුත් මා කෙරෙහි අදහන මේ බාලයන්ගෙන් එක්කෙනෙකුටවත් බාධා කරන යමෙක් ඇද්ද ඔහුගේ බෙල්ලේ මහත් ඇඹරුම් ගලක් එල්ලා මුහුදේ ගැඹුරෙහි ගිල්වීම ඔහුට යහපතය.”¹⁹

ඉතා දරුණු ලෙස තුවාල ලැබූ හිතවත් මිත්‍රවරුනි—ඒ සඳහා, ජීවිතයේ අසාධාරණකම් දරා සිටින ඕනෑම කෙනෙකුට—ඔබට නව ආරම්භයක් සහ නව ප්‍රවේශයක් ලබාගන්න පුළුවන්. ගෙත්සෙමනේදී සහ කල්වාරියේදී, යේසුස්වහන්සේ “ඔබ සහ මා මෙතෙක් අත්විඳින ලද සියලු සන්තාපයන් සහ දුක් වේදනා, උන්වහන්සේ වෙතම භාරගත්තා,”²⁰ ඒවගේම උන්වහන්සේ ඒ සියල්ල ජයගෙන තිබෙනවා! දෑත් දිගු කර, ගැලවුම්කරුවාණන් ඔබට සුවකිරීමේ ත්‍යාගය පිරිනමනවා. ධෛර්යය, ඉවසීම, සහ ඇදහිලිවන්තව උන්වහන්සේ කෙරෙහි අවධානය යොමුකිරීමෙන්, වැඩිකල් නොගොස් ඔබට මෙම ත්‍යාගය සම්පූර්ණයෙන්ම පිළිගැනීමට පැමිණිය හැකියි. ඔබට ඔබේ වේදනාවට යන්නට ඉඩහැර එය උන්වහන්සේගේ පාමුල තැබිය හැකියි.

ඔබේ මෘදු ගැලවුම්කරුවාණන් මෙසේ ප්‍රකාශ කළා, “සොරා එන්නේ සොරකම්කරන්ටත් මරන්ටත් විනාශ කරන්ටත් පමණක්ය: මා ආවේ [ඔබට] ජීවනය ලැබෙන පිණිසත් එය [ඔබට] අධික ලෙස ලැබෙන පිණිසත්ය.”²¹ ඔබ බේරුණු අයෙක්, ඔබට සුව කළ හැකියි, යේසුස් ක්‍රිස්තුස්වහන්සේගේ බලයෙන් සහ කරුණාවෙන් ඔබ ජයගෙන විජයග්‍රහණය කරනු ඇතැයි ඔබට විශ්වාස කළ හැකියි.

කළ නොහැකි ලෙස පෙනෙන දේවල් කිරීමට යේසුස්වහන්සේ දක්ෂයි. උන්වහන්සේ මෙහි පැමිණියේ කළ නොහැකි දේ කරන්නයි, ආපසු ලබාගත නොහැකි දේ මුදාහරින්නයි, සුව කළ නොහැකි දේ සුවකරන්නයි, වැරදි දේ නිවැරදි කරන්නයි, එමෙන්ම පොරොන්දු විය නොහැකි දේ පොරොන්දු වෙන්නයි.²² ඒවගේම උන්වහන්සේ ඇත්තටම ඒකට දක්ෂයි. ඇත්තවශයෙන්ම, උන්වහන්සේ එයට පරිපූර්ණයි. අපගේ සුවදායකයාණන් වූ, යේසුස් ක්‍රිස්තුස්වහන්සේගේ නාමයෙන්, ආමෙන්.

වැඩි විස්තර සහ සම්පත් සඳහා, බලන්න “Abuse” in the Life Help section at ChurchofJesusChrist.org and in the Gospel Library app.