ළිඳ අසල ඉගෙනගත් පාඩම්

සහෝදරියනි, දුෂ්කර අභියෝග සහ අහිමිවීම් වලට මුහුණදීමේ අවිනිශ්චිත බව—එමෙන්ම ඔබේ ජීවිතය ඔබ බලාපොරොත්තු වූ, යාච්ඤා කළ, සහ සැලසුම් කළ ආකාරයෙන් දිග හැරෙන්නේ නැති විට, ඔබ බොහෝ දෙනෙකුට මට මෙන්ම දැනෙනවා කියා මම දන්නවා.

අපේ තත්වයන් කුමක් වුවත්, අපගේ ජීවිත පරිශුද්ධ වන අතර එයට අර්ථයක් හා අරමුණක් තිබෙනවා. අපි සෑම කෙනෙකුම අපගේ ප්‍රාණය තුළ දේවත්වය සමඟ උපත ලැබූ, දෙවියන්වහන්සේගේ ආදරණීය දියණියක්.

අපගේ ගැලවුම්කරුවාණන් වන, යේසුස් ක්‍රිස්තුස්වහන්සේ, උන්වහන්සේගේ වන්දිගෙවීමේ පරිත්‍යාගය තුළින්, පවිත්‍ර වී සුවපත් වීමට අපට හැකියාව ලබාදුන් අතර, පවුලේ සාමාජිකයන්ගේ තීරණ, අපගේ විවාහක තත්ත්වය, කායික හෝ මානසික සෞඛ්‍ය හෝ වෙනත් ඕනෑම තත්වයක් නොතකා පොළොවේ අපගේ අරමුණ ඉටුකිරීමට අපට හැකියාව ලබාදී තිබෙනවා.

ළිඳ ළඟ සිටි කාන්තාව ගැන සලකා බලන්න. ඇගේ ජීවිතය මොනවගේද? ඇයට ස්වාමිපුරුෂයන් පස්දෙනෙක් සිටි බවත් දැනට ඇය සමඟ ජීවත් වන පුරුෂයා සමඟ විවාහ වී නැති බවත් යේසුස්වහන්සේට වැටහුණා. එහෙත්, ඇගේ ජීවිතයේ දුෂ්කරතා නොතකා, ගැලවුම්කරුවාණන්ගේ පළමු ප්‍රසිද්ධ ප්‍රකාශ වලින් එකක් වූයේ උන්වහන්සේ මෙසියස් බවයි. “නුඹට කතා කරන මම උන්වහන්සේ වෙමි”² කියා උන්වහන්සේ පැවසුවා.

ඇය ප්‍රබල සාක්ෂිකාරියක් වූ අතර, තම නගරයේ සිටි අයට යේසුස් යනු ක්‍රිස්තුස්වහන්සේ බව ප්‍රකාශ කළා. “තවද එම ස්ත්‍රියගේ වචන නිසා ඒ නුවර සමාරියයන්ගෙන් බොහෝ දෙනෙක් උන්වහන්සේ කෙරෙහි අදහාගත්තා.”³

ඇගේ අතීත සහ වර්තමාන තත්වයන් ඇගේ අනාගතය තීරණය කළේ නෑ. ඇය මෙන්, අපව මෙහි එවා ඇති සියල්ල ඉටුකිරීමට අපට හැකිවන ශක්තිය සහ සුවය සඳහා අද ගැලවුම්කරුවාණන් වෙත හැරීමට අපට තෝරාගන්න පුළුවන්.

දහම සහ ගිවිසුම් හි හුරුපුරුදු පදයක, ස්වාමින්වහන්සේ මෙසේ දිරිගන්වනවා ස්ත්‍රීන් හා පුරුෂයන් “යහපත් කාරණා වල උද්‍යෝගයෙන් යෙදිය යුතුවේ, තවද ඔවුන්ගේ ස්වකීය නිදහස් කැමැත්තෙන් බොහෝ දේවල් කළ යුතුවේ, තවද බොහෝ ධර්මිෂ්ඨ කාරණා සිද්ධ කළ යුතුවේ; මක්නිසාද එසේ කිරීමට බලය ඔවුන් සතුව ඇත්තේය.”⁴

සහෝදරියනි, බොහෝ ධර්මිෂ්ඨකම් සිදුකිරීමට බලය අප තුළ තිබෙනවා!

සභාපති රසල් එම්. නෙල්සන් මෙසේ සාක්ෂි දරුවා: “දෙවියන්වහන්සේ සමඟ ගිවිසුම් ඇතිකරගෙන එම ගිවිසුම් පවත්වාගෙන යන සහ පූජක නියෝග වලට සුදුසු ලෙස සහභාගී වන සෑම කාන්තාවකටම සහ පුරුෂයෙකුටම දෙවියන්වහන්සේගේ බලයට සෘජු ප්‍රවේශයක් ඇත.”⁵

බව්තීස්මයේදී සහ ශුද්ධ වූ දේවමාළිගා වලදී ඇතිකරගත් පූජනීය ගිවිසුම් වලට ගරු කිරීමට අප උත්සාහ කරන විට, ස්වාමින්වහන්සේ අපට “උන්වහන්සේගේ සුවකිරීමේ, ශක්තිමත් කිරීමේ බලය” සහ “මීට පෙර කිසිදා නොතිබූ අධ්‍යාත්මික අවබෝධයක් සහ පිබිදීමකින්”⁶ ආශිර්වාද කරන බව මම දැනගත්තා.

කන්ද උඩ දේශනාවේදී යේසුස්වහන්සේ තම ගෝලයන්ට ඉගැන්නුවේ “නුඹලා පොළොවේ ලුණුය”⁸ සහ “නුඹලා ලෝකයේ ආලෝකයය”⁹ ලෙසයි. පසුව උන්වහන්සේ ස්වර්ග රාජ්‍යයේ වර්ධනය මුහුන් වලට සමාන කළා, “ස්ත්‍රියෙකු විසින් පිටි නැළි තුනක් සහමුලින්ම පිපෙන තුරු එහි දමා තිබූ මුහුන් වලට ස්වර්ගරාජ්‍යය සමානයි [කිව්වා].”¹⁰

• ලුණු

• මුහුන්

• ආලෝකය

ඉතා කුඩා ප්‍රමාණ වලින් වුවද, එය අවට ඇති සියල්ලට ඒ හැම එකක්ම බලපානවා. ලුණු, මුහුන්, සහ ආලෝකය ආකාරයට උන්වහන්සේගේ බලය භාවිතා කිරීමට ගැලවුම්කරුවාණන් අපට ආරාධනා කරනවා.

සහෝදරියනි, අපිට ලුණු ස්වල්පයක්, මුහුන් හැන්දක්, සහ ආලෝක කිරණක් පිරිනැමීමෙන් හදවත් වෙනස් කර ජීවිත වලට ආශිර්වාද කරන්න පුළුවන්.

ගැලවුම්කරුවාණන් උන්වහන්සේගේ ප්‍රීතිය හා ප්‍රේමය රස විඳීමට අපට ආරාධනා කරන, අපගේ ජීවිතයේ ලුණු බව මම සාක්ෂි දරනවා.¹⁴ අපගේ ජීවිත දුෂ්කර වූ විට, අපට බලාපොරොත්තුව¹⁵ ගෙන දෙන්නේත්, උන්වහන්සේගේ අසමසම බලයෙන් සහ මුදවාගැනීමේ ප්‍රේමයෙන් අපගේ බර උසුලන්නෙත්¹⁶ මුහුන් වන උන්වහන්සේයි.¹⁷ අපගේ නිවසට ආපසු යන මාර්ගය ආලෝකමත් කරන ආලෝකය¹⁸ උන්වහන්සේයි.

ළිඳ ළඟ සිටි කාන්තාව මෙන් අපට ගැලවුම්කරුවාණන් වෙත පැමිණ උන්වහන්සේගේ ජීවමාන ජලය පානය කළ හැකි වේවායි මම යාච්ඤා කරනවා. සමාරියේ ජනයා සමඟ, අපට මෙසේ ප්‍රකාශ කරන්න පුළුවන්, “අප දැන් විශ්වාස කරන්නෙමු, … මක්නිසාද ඒ අපිම අසා, සැබෑවටම උන්වහන්සේ ක්‍රිස්තුස්වහන්සේ බවත්, ලෝකයාගේ ගැලවුම්කරුවාණන් බවත් දන්නා නිසාය.”¹⁹ යේසුස් ක්‍රිස්තුස්වහන්සේගේ නාමයෙන්, ආමෙන්.