Muaj Kev Cia Siab rau Yexus Khetos
Yexus Khetos ua tau rau peb “tiv taus hnub ntawd.”
Yog ib hnub uas muaj dab neeg piv txwv meej, tej lus nug uas nyuaj, thiab lus qhuab qhia tob. Tom qab Yexus tau cem cov uas zoo li “lub ntxa uas pleev hmoov sib sab nraud dawb paug, tiam sis sab hauv puv nkaus pob txha neeg tuag thiab tsw lwj ntxiag xwb,”1 Nws qhia peb zag dab neeg ntxiv txog tej kev npaj ntawm sab ntsuj plig thiab txoj kev ua thwj tim. Ib zaj lus piv txwv qhia txog kaum tus hluas nkauj.
“Lub sij hawm ntawd ntuj ceeb tsheej piv ib yam li kaum tus hluas nkauj uas taws teeb mus tos tus nraug vauv.
“Tsib tug tsis muaj tswv yim thiab tsib tug muaj tswv yim.
“Cov uas tsis muaj tswv yim, lawv nqa teeb, tiam sis tsis npaj nroj txhab:
“Cov uas muaj tswv yim, lawv nqa teeb thiab ib leeg npaj ib hwj nroj nqa mus.
“Twb lig lig lawm tus nraug vauv pheej tsis txawj tuaj, ces cov hluas nkauj txawm tsaug zog ncaws nruj nris.
“Thaum txog ib tag hmo txawm muaj ib lub suab hu nrov nrov hais tias, Tus nraug vauv tuaj lawm! Cia li tawm tuaj tos nws!
“Kaum tus hluas nkauj txawm sawv huv tib si, thiab nyias kho nyias lub teeb kom cig.
“Ces tsib tus uas tsis muaj tswv yim hais rau tsib tus uas muaj tswv yim hais tias, Thov muab nej cov roj faib me ntsis rau peb, rau qhov peb cov teeb roj tas lawm twb yuav tuag.
“Tsib tug uas muaj tswv yim teb hais tias, Tsis tau, nyob tsam tsis txaus rau peb thiab nej. Nej cia li mus nrhiav yuav tom khw rau nej.
“Thaum tsib tug uas tsis muaj tswv yim tab tom mus yuav roj lawm; tus nraug vauv txawm tuaj txog. Tsib tug muaj tswv yim uas twb xub npaj roj tseg lawm, txawm nrog tus nraug vauv mus noj tshoob hauv tsev, thiab kaw qhov rooj rau lawm.
“Tom qab ntawd tsib tug hluas nkauj uas tsis muaj tswv yim rov los txog. Lawv txawm hu hais tias, Tus Tswv, tus Tswv! Thov qhib qhov rooj rau peb.2
“Tus nraug vauv teb hais tias, Kuv tsis paub nej!3
“Yexus xaus lus hais tias, Nej yuav tsum ceev faj, rau qhov nej tsis paub hnub twg thiab lub sij hawm twg yuav muaj li ntawd.”4
Thawj Tswj Hwm Dallin H. Oaks tau nug tej yam no txog qhov uas tus Nraug Vauv yuav los:5 “Yuav ua li cas yog hnub uas Nws tuaj yog tag kis? Yog peb paub tias peb yuav ntsib tus Tswv tag kis—los ntawm txoj kev tuag ntxov los sis Nws rov qab los—peb yuav ua li cas hnub no?”6
Kuv paub los ntawm kuv lub neej lawm tias kev npaj ntawm sab ntsuj plig rau tus Tswv rov los tsis yog qhov tseem ceeb nkaus xwb tab sis yog tib txoj hau kev kom nrhiav tau kev kaj siab lug thiab kev zoo siab tiag tiag.
Yog lub caij nplooj ntoos zeeg thaum kuv hnov cov lus “Koj muaj mob cancer.” Kuv thiab kuv tus txiv xav tsis thoob! Thaum wb tab tom nyob ntsiag to thiab tsav tsheb mus tsev, kuv cia li xav txog wb peb tug tub.
Kuv nug Leej Txiv Saum Ntuj Ceeb Tsheej hauv kuv lub siab, “Kuv puas yuav tuag?”
Tus Vaj Ntsuj Plig Dawb Huv ntxhi hais tias, “Txhua yam yuav zoo.”
Ces kuv nug, “Kuv puas yuav ciaj sia?”
Cov lus teb rov los: “Txhua yam yuav zoo.”
Kuv ntxhov siab heev. Vim li cas kuv txais cov lus teb tib yam tsis hais kuv yuav ciaj los yog kuv yuav tuag?
Ces kuv nyob kaj siab lug thaum kuv nco tias: Wb tsis tas maj mus tsev thiab qhia wb cov me nyuam txog kev thov Vajtswv. Lawb twb paub thov Vajtswv kom txais lus teb thiab kev nplij siab. Wb tsis tas maj mus tsev thiab qhia lawv txog cov vaj lug kub los yog cov yaj saub uas nyob niaj hnub nim no cov lus. Cov lus no twb yog lub hauv paus uas ntxiv zog thiab pab peb to taub. Wb tsis tas maj mus tsev thiab qhia lawv txog txoj kev hloov siab lees txim, txoj kev Sawv Rov Los, txoj kev muab txoj moo zoo txum tim rov qab los, txoj kev cawm seej, tsev neeg uas nyob ua ke mus ib txhis, los sis Yexus Khetos cov lus qhuab qhia.
Nyob rau lub sij hawm ntawd txhua zaj lus qhia uas los ntawm tsev neeg hmo ua ke, txhua zaus kawm vaj lug kub, kev thov Vajtswv nrog kev ntseeg, kev foom koob hmoov, kev ua tim khawv, tej kev khi lus uas tau khi thiab ua raws nraim li, txhua zaus uas tau koom tus Tswv lub tuam tsev, thiab txhua zaus tau hwm Hnub Caiv los tej no muaj nqis heev—auj, yeej muaj nqis tiag! Twb lig dhau rau peb tso roj rau hauv peb lub teeb. Peb xav tau txhua tee roj, thiab peb xav tau tam sim no!
Vim muaj Yexus Khetos thiab Nws txoj moo zoo uas txum tim rov qab los, yog kuv tuag, kuv tsev neeg yuav txais kev nplij siab, kev muaj zog, ces muaj ib hnub yuav rov qab los koom ua ke. Yog kuv muaj sia, kuv yuav muaj lub txiaj ntsim zoo tshaj plaws hauv lub ntiaj teb kom tsom kwm, txhawb nqa, thiab kho kuv zoo. Nyob thaum kawg, txhua yam yuav zoo, rau qhov muaj Yexus Khetos.
Los ntawm kev kawm Lus Qhuab Qhia thiab Kev Khi Lus peb kawm seb txoj kev “zoo” zoo li cas:
“Thiab nyob rau hnub ntawd, thaum kuv yuav los nrog kuv lub yeeb koob, ces yuav muaj raws li zaj lus piv txwv uas kuv tau hais txog kaum tus hluas nkauj.
“Vim lawv cov uas muaj tswv yim thiab tau txais qhov tseeb, thiab tau cia tus Vaj Ntsuj Plig Dawb Huv ua lawv tus coj kev, thiab tsis tau raug dag ntxias—kuv hais tseeb rau nej tias, lawv yuav tsis raug muab ntov kom vau thiab muab pov rau hauv hluav taws, tiam sis yuav tiv taus hnub ntawd.”7
Yexus Khetos ua tau rau peb “tiv taus hnub ntawd.” Tiv taus hnub ntawd tsis txhais hais tias peb sau ntxiv rau ib daim ntawv teev tej yam uas yuav tsum tau ua. Cia li xav txog ib daim iav kom pom loj loj. Daim iav no tsis yog kom pom tej yam loj dua xwb. Daim iav no kuj muab duab tshav ntuj koom ua ke thiab tsom ntsoov kom muaj zog dua. Peb yuav tsum ua kom yooj yim, tsom peb txoj kev siv zog, thiab muab Yexus Khetos txoj kev kaj koom los ua ke. Peb yuav tsum muaj kev dawb huv thiab kev tshwm sim ntxiv.
Nyob hauv teb chaws Ixayees sab hnub poob, muaj ib lub roob zoo nkauj heev uas feem ntau hu ua “lub roob uas ntsuab tas niaj tas xyoo.” Lub Roob Kalamees8 nyob ntsuab tag niaj tag xyoo vim muaj dej lwg me me. Txoj kev tu kom loj hlob tshwm sim txhua hnub. Zoo nkauj li ”dej lwg ntawm Kalamees,”9 thaum peb nrhiav kev txhawb nqa peb tus ntsuj plig nrog ”ntau yam txog kev ncaj ncees,”10 ”tej yam me me thiab yooj yim,”11 peb cov lus tim khawv thiab peb cov me nyuam cov lus tim khawv yuav muaj sia!
Nim no, tej zaum nej xav, “Tiam sis Muam Wright, koj tsis paub kuv tsev neeg. Ua nyuaj rau peb thiab peb tsis zoo li no hlo li.” Nej hais yog lawm. Kuv tsis paub nej tsev neeg. Tiam sis ib tug Vajtswv uas muaj kev hlub tsis kawg, hlub tshua, hwj chim, kev txawj ntse, thiab koob meej Nws yeej paub.
Cov lus nug uas nej yuav nug yog cov lus ntawm sab siab ntsws uas ua rau nej lub siab mob mob heev. Cov vaj lug kub muaj tej lus nug uas zoo ib yam:
“Xib Hwb, koj tsis quav ntsej [kuv tsev neeg] li los? Peb twb yuav tuag.”12
“Kuv tseem tshuav kev cia siab thiab los?”13
“[Kuv] yuav ua li cas, es thiaj tshem tau tauv huab tsaus tsaus uas roos [kuv] no?”14
“Tiam sis yuav nrhiav tswv yim qhov twg thiab tau? thiab yuav kawm kev to taub qhov twg?”15
“Yuav ua li cas [kuv] thiaj yuav ua tau txhua yam uas zoo?”16
“Kuv tus Tswv, koj xav kom kuv ua dab tsi?”17
Ces cov lus teb tuaj:
“Koj puas ntseeg Khetos lub hwj chim uas cawm tau tib neeg?”18
“Tus Tswv puas txib leej twg tias kom lawv tsis txhob txais yuav nws txoj kev zoo?”19
“[Koj] puas ntseeg hais tias [Nws] kho tau [koj]?”20
“Koj puas ntseeg tej lus uas cov [yaj saub] qhia?”21
“Nej puas muab siab rau ntseeg txoj kev txhiv dim uas los ntawm tus uas tau tsim nej?”22
“Tus uas txiav txim rau tej neeg ntiaj teb tag nrho yeej yog tus uas txiav txim ncaj ncees xwb.”23
Kuv cov phooj ywg zoo, peb fais tsis tau peb cov roj, tiam sis peb faib tau Nws txoj kev kaj. Cov roj hauv peb lub teeb yuav pab peb “tiv taus hnub ntawd” thiab yuav ci rau txoj kev uas coj cov uas peb hlub mus cuag tus Cawm Seej, uas sawv “qhib caj npab lug tos txais” lawv.24
“Nej tsis txhob quaj, cia li so kua muag. Txhua yam uas nej ua yuav tawg paj txi txiv, nej cov me nyuam yuav rov hauv yeeb ncuab tej teb chaws los.
“Nej tseem muaj kev cia siab rau qhov nej tej tub ki yuav tau rov los. Kuv yog tus Tswv uas hais li ntawd.”25
Yexus Khetos yog “kev cia siab.” Tsis muaj dab tsi uas peb tau ua los sis tsis tau ua uas Nws txoj kev txi uas kav mus ib txhis ncav tsis cuag. Nws yog vim li cas tsis muaj qhov kawg ntawm peb zaj dab neeg.26 Yog li ntawd, peb “yuav tsum sib zog mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog [peb] yuav … sib zog mus lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis.”27
Txoj sia nyob mus ib txhis yog txoj kev xyiv fab mus ib txhis. Txoj kev xyiv fab hauv lub neej no, tam sim no—tsis yog txawm tias muaj kev cov nyom hauv peb lub caij nyoog tiam sis yog vim tus Tswv pab peb kawm los ntawm tej kev cov nyom ntawd thiab peb peb kov yeej—thiab txoj kev xyiv fab uas tsis pom qab piav txog hauv lub neej tom ntej. Peb cov kua muag yuav qhuav, lub siab mob los yuav kho, tej yam uas ploj lawm los yuav nrhiav tau, kev txhawj xeeb yuav raug daws, tsev neeg yuav rov qab los, thiab txhua yam uas Leej Txiv muaj yuav yog peb li.28
Saib xyuas Yexus Khetos thiab ua neej nyob29 yog kuv cov lus tim khawv los ntawm Yexus Khetos, tus Tswv Yug Yaj thiab tus Npisov ntawm peb sab ntsuj plig,30 lub npe, amees.