Yexus Khetos lub Hwj Chim Nyob hauv Peb lub Neej Txhua Hnub
Lub hauv paus ntawm peb lub zog no yog kev ntseeg Yexus Khetos thaum peb txhob txwm nrhiav kev kom los cuag Nws txhua hnub.
Cov kwv tij thiab cov muam, nov yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv zoo siab kawg uas peb cov meej zeej hauv Nws lub Koom Txoos koom ua ke. Kuv ua Vajtswv tsaug vim Thawj Tswj Hwm Russell M. Nelson tau hais kom peb siv lub npe raug ntawm tus Tswv lub Koom Txoos peb thiaj li nco qab ntsoov tias lub Koom Txoos no yog leej twg li thiab peb coj raws li leej twg tej lus qhia.
Thawj Tswj Hwm Nelson tau hais tias: “Thaum yav tom ntej, peb yuav pom tej kev tshwm sim txog tus Cawm Seej lub hwj chim uas zoo tshaj plaws tej uas lub ntiaj teb yeej tsis tau pom dua. … Nws yuav muab cov txiaj ntsim, cov koob hmoov, thiab ua tej txuj ci tseem ceeb rau cov uas mob siab ntseeg.”1
Ib lub cib fim rau kuv thiab kuv tus poj niam, Renee, uas zoo tshaj plaws yog qhov uas wb nrog Haiv Neeg Ntseeg sib ntsib thaum wb ua hauj lwm. Wb mloog lawv tej zaj lus, wb pom tej yam uas lawv xiam lawm, wb nrog lawv tu siab, thiab wb zoo siab thaum lawv vam meej. Wb tau pom ntau yam koob hmoov thiab tej txuj ci tseem ceeb uas tus Cawm Seej tau foom pub rau cov neeg uas rau siab ntseeg. Wb tau ntsib cov neeg uas tau nyiaj dhau tej yam uas nyiaj tsis taus, cov uas raug tej kev txom nyem uas loj dhau.
Wb tau pom tus Cawm Seej lub hwj chim tshwm sim rau ib tug poj ntsuam uas nws tus txiv xiam thaum nkawd ua tus Tswv txoj hauj lwm nyob hauv Bolivia.2 Wb tau pom nyob hauv ib tug ntxhais hluas nyob hauv Argentina uas poob mus hauv qab ib lub tsheb nqaj hlau thiab yuav tsum txiav nws txhais ceg tawm, vim ib tug neeg xav nyiag nws lub xov tooj ntawm tes.3 Thiab nws txiv uas tsis tau yuav poj niam, yuav tsum ua txhua yam thiab txhawb nws tus ntxhais lub zog tom qab ib tug neeg tau ua ib yam lim hiam heev uas piav tsis taus. Wb tau pom nyob hauv tej tsev neeg uas cov hluas taws kub lawv lub tsev thiab txhua yam khoom nyob hauv Chile ob hnub ua ntej Christmas nyob rau xyoo 2022.4 Wb tau pom nyob hauv cov neeg uas raug txom nyem tom qab lawv nrauj txiv nrauj poj niam thiab cov uas tsis muaj txim hlo li raug kev tsim txom.
Vim li cas lawv thiaj muaj hwj chim kom nyiaj dhau tej yam nyuaj? Muaj dab tsi uas ua rau lawv muaj zog ntxiv kom mus tom ntej thaum xav tias txhua yam twb ploj lawm?
Kuv twb kawm tias lub hauv paus ntawm lub zog no yog kev ntseeg Yexus Khetos thaum peb txhob txwm nrhiav kev kom los cuag Nws txhua hnub.
Tus yaj saub Yakhauj qhia tias, “Nws los rau hauv lub ntiaj teb xwv kom nws yuav cawm tau noob neej txhua tus yog tias lawv mloog nws lub suab; vim saib seb, nws nyiaj txhua tus neeg tej kev mob, muaj tseeb tiag, txhua tus uas muaj sia tej kev mob, tsis hais poj niam, txiv neej, los sis me nyuam yaus, uas yog Adas tsev neeg.”5
Tej lub sij hawm, yus xav tias kev ntseeg Yexus Khetos yog ib qho uas ua tsis taus hlo li, ib yam uas ntseeg tsis taus. Tej zaum peb xav tias peb tsis muaj zog, tsis muaj hwj chim, thiab peb zoo tsis txaus kom los cuag Khetos, thiab peb nrhiav tsis tau dag zog kom ua txhua yam no. Tiam sis qhov uas kuv tau kawm los ntawm tag nrho cov neeg no yog qhov uas kev ntseeg Yexus Khetos yog qhov uas ua rau peb muaj zog ua tau lub neej no. Tej lub sij hawm peb xav tias, “Kuv yuav tsum kho kuv lub neej ua ntej kuv los cuag Yexus,” tiam sis qhov tseeb yog qhov uas peb los cuag Yexus kom los ntawm Nws peb thiaj kho tau peb lub neej.
Peb tsis los rau Yexus vim peb yog neeg zoo tag nrho. Peb los cuag Nws vim peb ua yuam kev thiab dhau los ntawm Nws peb yuav “ua neeg zoo tag nrho.”6
Peb yuav ua li cas kom muab siab rau ntseeg me ntsis txhua hnub? Rau kuv mas qhov no pib thaum sawv ntxov: Thaum kuv tsim los, kuv tsis saib xov tooj, kuv thov Vajtswv. Tsuas thov me me xwb. Ces kuv nyeem ib nqe vaj lug kub. Qhov no pab kuv thaum kuv khi lus txhua lub lim tiam thaum kuv txais lub cim nco txog hais tias kuv yuav “nco ntsoov txog nws.”7 Thaum kuv thov Vajtswv thiab nyeem ib nqe vaj lug kub thaum sawv ntxov, kuv yuav “nco ntsoov txog Nws” thaum kuv saib kuv lub xov tooj. Kuv yuav “nco ntsoov txog Nws” thaum kuv raug tej teeb meem thiab tej kev kub ntxhov, es kuv sim kov yeej tej ntawd zoo li Yexus.
Thaum kuv “nco ntsoov txog Nws,” kuv xav hloov siab lees txim. Kuv nrhiav tau lub zog txaus ua raws li kuv tej kev khi lus, thiab kuv hnov tus Vaj Ntsuj Plig Dawb Huv lub hwj huam hauv kuv lub neej “thiab ua raws li nws tej lus txib uas nws tau muab rau [kuv]; kom [kuv] yuav muaj nws tus Ntsuj Plig nrog [kuv] nyob tas mus li.”8 Qhov no pab kuv nyiaj kom mus txog thaum kawg.9 Los yog nyiaj kom mus txog thaum hnub no kawg! Thiab tej hnub uas kuv tsis nco ntsoov txog Nws tas ib hnub, Nws tseem nyob ntawd, hlub kuv qhia kuv tias tsis ua li cas, koj rov qab sim ua dua tag kis.
Txawm yog peb tsis nco ntsoov txog Nws txhua lub sij hawm, peb Leej Txiv Saum Ntuj Ceeb Tsheej uas hlub peb yeej nco ntsoov txog peb.
Ib yam uas peb ua yuam kev yog txoj kev xav tias thaum peb khi lus, los yog cog lus rau Vajtswv, ces yeej zoo li peb nrog Nws ua lag luam: kuv mloog lus, thiab Nws yuav pov hwm kuv kom tsis txhob raug ib yam dab tsi phem. Kuv them ib feem kaum, thiab kuv yuav tsis poob kuv txoj hauj lwm los yog hluav taws yuav tsis ua rau kuv lub tsev kub hnyiab. Tiam sis thaum tej yam ntawd tsis zoo li peb xav, peb quaj rau tus Tswv hais tias, “Koj tsis ntshai tsam kuv tuag los?”10
Peb tej kev khi lus tsis yog kev ua lag luam; yog tej yam uas hloov peb lub siab.11 Dhau los ntawm kuv tej kev khi lus kuv txais Yexus Khetos lub hwj chim uas ua rau kuv ua tau neeg dawb huv thiab ua rau kuv muaj zog, kuv thiaj hloov los ua ib tug neeg tshiab, uas zam tau txim txog tej yam uas neeg zam tsis taus, thiab pab kuv kov yeej tej uas lwm tus kov tsis yeej. Kev txhob txwm nco ntsoov Yexus Khetos yeej yog ib yam uas muaj hwj chim heev; ua rau kuv muaj zog ntxiv kom “ua raws li nws tej lus txib uas nws tau muab rau [kuv].”12 Qhov no pab kuv ua siab zoo, luag nyav, ua ib tug uas pab tib neeg sib haum xeeb,13 tsis txhob sib cav sib ceg, thiab cia Vajtswv yeej hauv kuv lub neej.14
Thaum peb los yog ib tug uas peb hlub raug mob heev peb thiaj li nyiaj tsis tau, kev nco ntsoov Yexus Khetos thiab kev los cuag Nws yuav pab peb ris lub nra, ua rau peb lub siab mos muag, thiab ua rau peb tsis hnov mob npaum li ntawd. Nov yog lub hwj chim uas ua rau ib tug txiv tsev muaj zog txaus txhawb nqa nws tus ntxhais txoj kev hnov mob ntawm sab cev nqaij daim tawv thiab sab siab ntsws thaum nws txhais ceg raug txiav tawm.
Thaum Txwj Laug Soares mus xyuas Argentina lub Rau Hli Ntuj tas los thiab nug Flavia txog nws txoj kev raug xwm txheej, nws rau siab ntseeg teb hais tias, “Kuv raug kev ntxhov siab, kev chim siab, thiab kev ntxub ntxaug thaum [raug qhov no]. Ib yam uas pab kuv yog kom tsis txhob nug ‘vim li cas yog kuv?’ tiam sis nug tias ‘kuv yuav kawm dab tsi?’ … Nov yog ib yam uas ua rau kuv nrog lwm tus thiab tus Tswv sib raug zoo. … Kuv tsis tau txav mus deb ntawm nws, kuv yuav tsum los muab siab npuab Nws.”15
Thawj Tswj Hwm Nelson qhia tias: “Lub nqi zog rau kev ua raws li Vajtswv tej kev khi lus yog lub hwj chim saum ntuj ceeb tsheej—lub hwj chim uas txhawb peb lub zog kom nyiaj dhau peb tej kev sim siab, kev ntxias, thiab kev mob lub siab. … Yog li ntawd, cov uas ua raws li kev khi lus muaj cai so yam tshwj xeeb.”16 Nov yog kev kaj siab lug thiab kev so uas kuv pom nyob hauv tus poj ntsuam ob lub qhov muag, txawm yog nws nco nws tus txiv txhua hnub.
Phau Tshiab muaj ib zaj uas hais txog thaum Yexus thiab Nws cov thwj tim nyob hauv ib lub nkoj:
“Tam sim ntawd txawm muaj cua daj cua dub hlob heev ntsawj dej ntas los rau hauv lub nkoj. …
“Yexus rau ncoo pw tsaug zog … cov thwj tim txawm los tsa Yexus hais tias, Xib Hwb, koj tsis quav ntsej peb li los? Peb twb yuav tuag.
Yexus sawv tsees los txwv cua hais tias, Cia li tu! Thiab txwv dej hais tias, Cia li tus. …
“Yexus hais rau nws cov thwj tim hais tias, Vim li cas nej ntshai ua luaj? Ua li cas nej tsis muaj kev ntseeg li?”17
Zaj no yeej ua rau kuv xav paub ntxiv. Tus Tswv puas xav tias lawv yuav tsum siv lawv txoj kev ntseeg kom tej ntas hiav txwv tu lawm? Kom txwv cov cua? Kev ntseeg Yexus Khetos yog kev nyob kaj siab lug thiaj tiv taus cua daj cua dab, es peb paub tias peb yuav tsis piam sij vim Nws nrog peb nyob hauv lub nkoj.
Nov yog kev ntseeg uas wb pom thaum wb mus xyuas tej tsev neeg tom qab hluav taws kub hnyiab nyob hauv Chile. Lawv tej tsev los twb kub hnyiab tag nrho; txhua yam xiam lawm. Tiam sis thaum wb taug kev ntawm qhov chaw uas lawv tej tsev nyob ua ntej thiab lawv qhia wb txog tej xwm txheej uas lawv raug, ua rau wb xav tias wb sawv saum ib thaj av dawb huv. Ib tug poj niam tau hais rau kuv tus poj niam tias, “Thaum kuv pom tej tsev nyob ze uas kub hnyiab, kuv txais kev tshoov siab tias peb lub tsev yuav kub hnyiab thiab, es txhua yam uas peb muaj yuav ploj mus. Tiam sis kuv tsis nyuaj siab li, ua rau kuv hnov ib txoj kev kaj siab lug uas piav tsis taus. Xyov yog vim li cas, tiam sis kuv xav tias yuav tsis ua li cas.” Kev tso siab rau Vajtswv thiab kev ua raws li peb tej kev khi lus rau Nws ua rau peb muaj hwj chim thaum peb qaug zog, thiab kev nplij siab thaum peb tu siab.
Kuv zoo siab kawg uas Renee thiab kuv muaj cib fim no ntsib ib cov Neeg Ntseeg zoo kawg nkaus, vim lawv coj yam ntxwv txog kev ntseeg, kev muaj dag zog, thiab kev nyiaj ntxeem. Wb tau hnov tej zaj dab neeg txog kev tu siab thiab kev poob siab uas yuav tsis muaj leej twg qhia hauv ntawv xov xwm los yog tshaj tawm saum huab cua mus txhua qhov chaw. Kuv zoo siab uas tsis tas thaij duab txog tib neeg uas los kua muag thiab thov Vajtswv tom qab lawv tej khoom xiam los yog lawv sib nrauj, thiab tsis tas xa zaj lus txog kev ntshai, kev tu siab, thiab qhov mob vim lawv nyiaj taus los ntawm lawv txoj kev ntseeg Yexus Khetos thiab Nws txoj Kev Theej Txhoj. Cov neeg no ua rau kuv txoj kev ntseg muaj zog ntxiv, thiab kuv ua Vajtswv tsaug rau lawv.
Kuv paub tias nov yog Yexus Khetos lub Koom Txoos. Kuv paub tias Nws npaj lawm muab vaj txiaj ntsim rau peb uas yog Nws lub hwj chim yog tias peb los cuag Nws txhua hnub. Los ntawm Yexus Khetos lub npe, amees.